Conseju ni zacané laanu gápanu ti familia nayecheʼ
Ti regalu stiʼ Dios nga guendaxheelaʼ ne xiiñiʼ binni. Cumu racaláʼdxibe guibani ca familia ca nayecheʼ la? rudiibe conseju galán laacaʼ ne zeeda ca ni lu Stiidxabe, Biblia. Lu artículo riʼ zadúʼyanu caadxi de ca conseju riʼ.
Hombre, gunnaxhii xheelaluʼ
«Naquiiñeʼ gannaxhii hombre xheelaʼ cásica nadxii cuerpu stiʼ. Ti hombre ni nadxii xheelaʼ la? nadxii laca laa, purtiʼ nin ti hombre qué huayuu dxi gaca nanalaʼdxiʼ cuerpu stiʼ, sínuque ruyaanaʼ ni ne rannaxhii ni» (EFESIOS 5:28, 29).
Hombre nga xaíque ndaaniʼ familia (Efesios 5:23). Cadi nadúxhube, sínuque rusisácabe xheelabe, rudiibe laa ni caquiiñeʼ ne racanebe laa guni sentir galán. Laaca rúnibe stipa chuʼ xheelabe nayecheʼ ne qué ruyúbibe gaca puru si ni nabe (Filipenses 2:4). Ora riníʼnebe xheelabe rábibe laa ni cayuni sentirbe, xi riníʼ íquebe ne laaca rucaadiágabe laa. Cadi nadúxhube né xheelabe ne qué runinabe laa (Colosenses 3:19).
Gunaa, biʼniʼ respetar xheelaluʼ
«Naquiiñeʼ gapa gunaa stale respetu xheelaʼ» (EFESIOS 5:33).
Ora runi respetar ti gunaa xheelaʼ ne runi apoyar laa, cayacané para chuʼ familia stiʼ tobi si. Ne pa guchee xheelabe, qué runi búrlabe laa, sínuque rápabe paciencia ne qué rusaanabe de guni respetarbe laa (1 Pedro 3:4). Ora nuu xiixa guendanagana nánnabe pora gábibe ni xheelabe ne riníʼnebe laa né respetu (Eclesiastés 3:7).
Cadi gucheeneluʼ xheelaluʼ
«Zusaana hombre bixhoze ne jñaa ne ziaanané xheelaʼ ne zácacaʼ tobi si» (GÉNESIS 2:24).
Ora richaganáʼ ti hombre ne ti gunaa, maʼ ti familia laacaʼ. Nga runi, caquiiñeʼ gúnicaʼ stipa para chuʼcaʼ tobi si. ¿Ximodo zanda gúnicabe nga yaʼ? Naquiiñeʼ guiníʼcabe xi cayuni sentírcabe ne guyúbicabe guni sentir xheelacabe galán. Ne cadi caquiiñeʼ gápacabe relación sexual né sti binni ni cadi xheelacabe. Ora rucheené tobi xheelaʼ la? runiti confianza stiʼ xheelaʼ ne runiná familia stiʼ (Hebreos 13:4).
Padre caʼ, lagusiidiʼ ca xiiñitu
«Bisiidiʼ xcuidi ca neza ra naquiiñeʼ saʼ; neca guióʼxhobe qué zareechube de lu neza ca» (PROVERBIOS 22:6).
Maʼ bidii Dios responsabilidad ca padre gusiidicaʼ ca xiiñicaʼ gúnicaʼ ni jneza ne gácacaʼ ti ejemplu galán para laacabe (Deuteronomio 6:6, 7). Ora guni xiiñiʼ binni xiixa ni cadi jneza la? cadi oraqueca naquiiñeʼ uguu jnézacabe laacaʼ, sínuque naquiiñeʼ gucaadiágacabe xiiñicabe, cadi casi zécabe guiníʼcabe xiixa diidxaʼ ne cadi guidxiichicabe (Santiago 1:19). Ne pa uguu jnézacabe ca xiiñicabe la? naquiiñeʼ gúnicabe ni purtiʼ nadxiicabe laacaʼ ne cadi purtiʼ cadxiichicabe.
Baʼduʼ caʼ, laguzuubaʼ stiidxaʼ bixhózetu ne jñaatu
«Baʼduʼ caʼ, laguzuubaʼ stiidxaʼ bixhózetu ne jñaatu [...]. “Biʼniʼ respetar bixhózeluʼ ne jñaaluʼ”» (EFESIOS 6:1, 2).
Caquiiñeʼ guzuubaʼ binni stiidxaʼ bixhoze ne jñaa ne guni respetarcaʼ laacabe. Ora rúnicabe ni, racanécabe chuʼ familia stícabe tobi si ne chúʼcabe nayecheʼ. Ora maʼ huaniisi xiiñiʼ binni, rusihuínnicaʼ runi respetarcaʼ bixhózecaʼ ne jñaacaʼ ora rápacaʼ laacabe. Ti modo zanda gúnicabe ni nga ra gacanécabe chuʼ lídxicaʼ nayá o gudiicabe laacaʼ ni caquiiñecaʼ (1 Timoteo 5:3, 4).