CA GUENDANAGANA NUU LU GUIDXILAYÚ

1 | Biʼniʼ stipa chuʼluʼ nazaaca

¿XIÑEE RISACA NI?

Ora napa binni guendanagana jma nagueenda raca huará.

Ora guizaaca xiixa cosa malu, guizáʼ raca estresar binni ne jma nagueenda raca huará.
Nuu biaje qué randa runi tender ca doctor guiráʼ binni ni huará ne gastiʼ medicina para guiracaʼ.
Nuu tiru qué gapa binni bueltu dede nin para siʼ ca cosa ni jma caquiiñeʼ casi guendaró ne medicina.

¿Ñee nannuʼ ni la?

Ora napa ti binni xiixa guendahuará malu ne napa stale estrés zándaca qué zacaa decisión jneza ne qué zapa laa para chuʼ nazaaca. Lugar de guianda binni riʼ la? laga jma raca huará.
Pa qué guni tenderluʼ ti guendahuará nápaluʼ zándaca ra tidiʼ tiempu zaca xirooni ne dede zándaca guutini lii.
Pa nuuluʼ nazaaca la? zacaaluʼ decisión jneza ora guidxaagaluluʼ xiixa guendanagana.
Pa nápaluʼ o qué gápaluʼ bueltu, nuu cosa ni zanda gúniluʼ para gápaluʼ lii ti chuʼluʼ nazaaca.

¿Xi zanda gúniluʼ?

Ti binni nuu xpiaaniʼ la? ruuyaʼ ca cosa ni zándaca guniná laa ne ruyubi modo guireecueʼ de laacani. Nga runi, pa racaláʼdxiluʼ chuʼluʼ nazaaca ne cadi gápaluʼ ti guendahuará malu la? guca ti binni nayá, jma galán gúniluʼ xiixa ante gaca huaraluʼ.

«Cumu rúnidu stipa gácadu binni nayá ne nayá nuu ra lídxiluʼ la? huaxiéʼ runítidu bueltu para chuudu ra nuu doctor o para sidu medicina» (Andreas).a

a Maʼ bidxaa lá caadxi binni.

XI ZANDA GACANÉ LII: Yenanda ca conseju riʼ

Para ganda chuʼluʼ nazaaca ca dxi nagana riʼ, yenanda ca conseju riʼ

GUCA TI BINNI NAYÁ

Guca ti binni nayá

Biblia ná: «Binni nuu xpiaaniʼ la? rucaachilú ora guʼyaʼ zeeda xiixa guendanagana ni zuniná laa» (Proverbios 22:3). Biiyaʼ xii nga ca cosa ni zuni huará lii.

Gupa costumbre quiʼbiʼ naluʼ né xabú, jmaruʼ si pa chitánaluʼ xiixa guendaró o despué de cheluʼ bañu.
Bisiá ne biʼniʼ desinfectar ra lídxiluʼ gatigá, jmaruʼ si ca cosa ne ca lugar ni jma rigáʼnaluʼ.
Biʼniʼ stipa cadi chuʼluʼ gaxha de tuuxa ni zanda gucaa lii xiixa guendahuará.

GUPA NI GOLOʼ

Gupa ni goloʼ

Biblia ná: «Purtiʼ nin ti hombre qué huayuu dxi gaca nanalaʼdxiʼ cuerpu stiʼ, sínuque ruyaanaʼ ni ne rannaxhii ni, cásica runi Cristu né ca xpinni» (Efesios 5:29). Rusihuínninu nadxiinu cuerpu stinu pa gápanu cuidadu ni guidoʼno.

Güeʼ ziáʼ nisa.
Gudó cuananaxhi ne verdura de guiráʼ clase.
Cadi goloʼ stale cosa ni nazá, ni naxí o ni nanaxhi peʼ.
Cadi cúbaluʼ gueza, cadi gaca drogarluʼ ne cadi xhúdxiluʼ.

«Para cadi gaca huaradu la? rápadu ni guidoʼdo, purtiʼ huaxiéʼ bueltu nápadu para chuudu doctor. Runi preferirdu sidu cosa ni zacané laadu chuʼdu nazaaca para guidoʼdo» (Carlos).

BIʼNIʼ EJERCICIU NE BIZIILAʼDXIʼ

Biʼniʼ ejerciciu

Biblia ná: «Jma jneza guiziilaʼdxiʼ binni ti ratu que guni xhaataʼ dxiiñaʼ purtiʼ zanda gueeda gácani casi ora nizanándanu bi» (Eclesiastés 4:6). Galán nga gúninu dxiiñaʼ peru laaca galán nga guiziiláʼdxinu.

Biʼniʼ ejerciciu. Zanda guireeluʼ gatigá para saluʼ neca ti ratu. Zacané ejerciciu riʼ lii chuʼluʼ nazaaca, neca maʼ huaniisiluʼ, nápaluʼ xiixa discapacidad o ti guendahuará ni maʼ qué rianda.
Biziilaʼdxiʼ

Biʼniʼ stipa guiziiláʼdxiluʼ. Ora huaxiéʼ rasi binni nabé raca estresar ne qué randa peʼ raca concentrar. Ne ra tidiʼ tiempu zanda guindisaʼ ni ti guendahuará malu luguiáʼ.
Gudixhe ti ora para chigásiluʼ huaxhinni. Biʼniʼ stipa gásiluʼ ne guiásaluʼ ora maʼ gudíxheluʼ.
Cadi gúʼyaluʼ tele nin iquiiñeluʼ xiixa dispositivu electrónicu ora maʼ chigásiluʼ.
Cadi góxhiluʼ stale, nin gueluʼ xiixa ni napa cafeína o alcohol ante chigásiluʼ.

«Ora gaseʼ biaʼ caquiiñeʼ cuerpu stinneʼ, racaneni naa para chuaaʼ nazaaca. Ora qué guizaa bacaandaʼ stinneʼ riuubaʼ iqueʼ ne riuubaʼ ladeʼ. Peru ora rizaa bacaandaʼ stinneʼ né stale gana riasaʼ siadóʼ, randa runeʼ stale cosa ne huaxiéʼ racaʼ huaraʼyaʼ» (Justin).