Chuʼnu nazaaca
Neca cadi naca Biblia ti libru de medicina, racaneni binni chuʼ nazaaca. Guidúʼyanu caadxi conseju zeeda lu Biblia ni zacané laanu chuʼnu nazaaca.
GÁPANU CUERPU STINU
CONSEJU ZEEDA LU BIBLIA: «Purti iruti raca nanalaʼdxi cuerpu stiʼ, sínuque ruyaana ni ne ranaxhii ni» (Efesios 5:29).
XI RINÍʼ NI. Racané conseju stiʼ Biblia riʼ laanu gúninu stipa para chuʼnu nazaaca. Caadxi estudiu maʼ bisihuinni raca huará binni purtiʼ qué rapa laa. Nga runi, naquiiñeʼ gápanu laanu para ganda chuʼnu nazaaca.
XI ZANDA GÚNINU
Gápanu ni guidoʼno. Gúninu stipa guidoʼno cosa ni zacané cuerpu stinu ne guideʼnu ziáʼ nisa.
Gúninu ejerciciu. Biaʼ tiica iza napa binni, pa guni ejerciciu la? zanda gacaneni laa neca napa xiixa discapacidad o ti guendahuará ni qué rianda. Zanda gacané familia stinu laanu o ti doctor para gúninu ejerciciu, peru laanu nga chigúninu stipa pur gúninu ni.
Gásinu biaʼ tiempu caquiiñeʼ. Pa huaxiéʼ rasi ti binni, zanda guiasa xiixa guendahuará luguiáʼ. Stale binni qué rasi biaʼ caquiiñeʼ gasiʼ purtiʼ jma riuulaʼdxiʼ iquiiñeʼ tiempu stiʼ para guni sti cosa. Peru ca binni ni rasi biaʼ caquiiñeʼ gasiʼ jma galán riuucaʼ.
GUSAANANU XIIXA VICIU
CONSEJU ZEEDA LU BIBLIA: «Gusianu laanu de guiráʼ ni runi biidiʼ cuerpu stinu ne espíritu stinu» (2 Corintios 7:1, TNM).
XI RINÍʼ NI. Ziuʼnu nazaaca pa qué guni biidinu cuerpu stinu né xiixa ni zuniná laanu, casi cúbanu gueza, purtiʼ zanda guindísani xiixa guendahuará malu luguianu ne dede zanda guutini laanu.
XI ZANDA GÚNINU. Quíxhenu ti fecha para gusaana de cúbanu gueza ne gucaʼnu ni lu calendariu stinu, ne gábinu ca binni ni nánnanu zanda gacané laanu maʼ chigusaana de cúbanu gueza. Ne ante guedandá dxi ca, naquiiñeʼ gusáʼbinu guiráʼ gueza nápanu, encendedor o sti cosa ni qué zacané laanu gusaananu viciu ca. Laaca cadi naquiiñeʼ chuunu lugar ra riguʼbaʼ binni gueza.
XCAADXI CONSEJU ZEEDA LU BIBLIA
Pa racaláʼdxiluʼ gápaluʼ ti Biblia, zanda guiníʼneluʼ ti testigu stiʼ Jiobá ni nuu neza ra nabézaluʼ.
GUINÍʼ ÍQUENU ANTE GÚNINU XIIXA
«Pa gucuiluʼ ti yoo nacubi la? napa xidé gúniluʼ ti pretil ique lídxiluʼ, ti cadi gaʼniʼ donda íqueluʼ pa gatiʼ tuuxa ni guiaba de racá» (DEUTERONOMIO 22:8).
GÁPANU PACIENCIA
«Binni ni rindaa para guidxiichi la? guizáʼ riene, peru ni ridxiichi nagueenda la? cusihuinni nahuati» (PROVERBIOS 14:29).
CADI GUIDÓʼ XHAATANU
«Cadi chuʼluʼ lade [...] ca binni ni ró xhaataʼ» (PROVERBIOS 23:20).