Cayuni prometer Dios zaca chaahuiʼ Guidxilayú stinu

Ndiʼ nga ni guníʼ ti grupu de investigador ni ruuyaʼ ximodo cuchaa clima stiʼ Guidxilayú. Pa runi creluʼ nuu tu Bizáʼ ca cosa ca ne rizaalaʼdxiʼ laanu la? zándaca zadxagayaaluʼ ora gánnaluʼ ni bidxela ca científicu ca, maʼ bidiicabe cuenta gudixhe chaahuiʼ Dios modo guiá Guidxilayú riʼ stubi.

Peru cumu guizáʼ maʼ bininá binni Guidxilayú la? stúbisi ni maʼ qué zanda gaca chaahuini. ¿Peru xiñee zanda gápanu confianza zuni Dios xiixa para cadi guinitilú Guidxilayú ne guiráʼ ni nabani luni yaʼ?

Ca textu ni zeeda lu cuadru riʼ, rusihuinni ca ni qué zanitilú Guidxilayú ne siempre ziuu guendanabani luni.

• Dios bizáʼ Guidxilayú stinu. «Dede principiu que bizáʼ Dios guibáʼ ne guidxilayú» (Génesis 1:1).

• Stiʼ Dios Guidxilayú riʼ. «Stiʼ Jehováa guidxilayú ne guiráʼ ni nuu luni» (Salmo 24:1).

• Bizáʼ Dios Guidxilayú para qué chuʼ dxi guinitilú. «Guluube guidxilayú riʼ ra naquiiñeʼ guiaana ni; qué ziuu dxi guiniibi ni de ra nuuni» (Salmo 104:5).

• Cayuni prometer Dios siempre ziuu guendanabani lu Guidxilayú stinu. «Dios ni dxandíʼ, ni bizáʼ guidxilayú [ . . . ], cadi bizáʼsibe ni, sínuque bizaʼbe ni para cueza binni luni» (Isaías 45:18).

• Cayuni prometer Dios siempre zabeza binni lu Guidxilayú riʼ. «Zacaa ca ni biʼniʼ ni jneza guidxilayú ne zabánicaʼ luni para siempre» (Salmo 37:29).

Pur modo bizáʼ Dios Guidxilayú riʼ, zanda gúnini dxiiñaʼ jneza, pa iquíʼñenu ca cosa ni nuu luni biaʼsi. Lu ca profecía ni zeeda lu Biblia ná maʼ gulí Jehová ti dxi ne hora gunduxeʼ guiráʼ ca ni cayuniná Guidxilayú ne ca ni cuyubi puru para laasi (Apocalipsis 11:18).

Biblia cayabi laanu ora maʼ gudiʼdiʼ guiráʼ ndiʼ la? zuni chaahuiʼ Dios Guidxilayú ne zúnibe ni ti paraísu guizáʼ sicarú ne zuxhélebe nabe para gudiibe «guiráʼ ni racalaʼdxiʼ ca ni nabani» (Salmo 145:16).