Guendanabani ndaaniʼ ti guidxilayú cubi nuu dxi

Xi runi sentirluʼ ora guʼyuʼ dibuju riʼ. Ñee qué rinabaʼ ladxidoʼloʼ guendariuudxi, guendanayecheʼ ne cani galán ruuyuʼ raríʼ la? Rinabaʼ pue. Peru, ñee ti bacaandaʼ si nga guni crenu de qué ziuu ti dxi zaca guiráʼ ndiʼ la?

Stale binni zándaca guiníʼ ique de que zacá ni. Cani nagana ni cadiidinu yanna nga: ca guendaridinde stiʼ ca guidxi ca, guendarucheené ley, guendarindaana, guendahuará, guendayooxhoʼ, ca nga nga chupa chonna de laacani. Peru, nuu xi pur zanda cuézanu guiree cani. Biblia na para ti dxi ni zeeda «laanu cabeza nu, casi bidii [Dios] stiidxa [...], ti guidxilayú cubi ne ti ibáʼ cubi ra gasti enda nadxabaʼ» (2 Pedro 3:13; Apocalipsis 21:1, 5).

Casi na Biblia, «ibáʼ cubi» ne «guidxilayú cubi» ca la? cadi guibáʼ ni rúʼyanu ca ni, ne nin cadi Guidxilayú ni rizanu lu riʼ ni. Guidxilayú ne guibáʼ ca guyáʼ cani sicarupeʼ, ne Biblia na qué ziuu dxi guinitilú cani (Salmo 89:36, 37; 104:5). Ca diidxaʼ «guidxilayú cubi» ca la? nga nga ca binni nachaʼhuiʼ ni chindeza lu Guidxilayú riʼ, ne ca diidxaʼ «ibáʼ cubi» ca nga ti reinu o ti gobiernu de guibáʼ ni zuni mandar jneza luguiáʼ binni guidxilayú. Peru, ñee ti bacaandaʼ nga guni crenu de que zanda chuʼ «ti guidxilayú cubi», ni rábinu ca binni nachaʼhuiʼ ca la?

Guníʼ ique si, cani sicarú ni maʼ bieeteʼ ca nga ni gudixhe ique Dios ñuu lu Guidxilayú riʼ. Laabe guluube primé guendaxheelaʼ que ndaaniʼ paraisu stiʼ Edén, ne bidiibe laacaʼ ti dxiiñaʼ sicarú: «Lagapa xiiñitu ne lagaca stale ne laguchá guidxilayú riʼ ne laguni dxiiñaʼ luni» (Génesis 1:28). Ya, ni gudixhe ique Dios nga ñápacabe xiiñicabe ne ñúnicabe guidubi Guidxilayú riʼ ti paraisu. Peru laacabe gulícabe cadi guzuubacabe stiidxaʼ Dios ne zacá bisihuínnicabe cadi para laacabe guendanabani ni qué zaluxe que, neca zacá qué nuchaa diʼ cani gudixhe ique Dios guni. ¡Ne napa xidé gaca cani ndaaniʼ Guidxilayú cubi ca! (Tito 1:2).

Ne ora ruʼnuʼ orasión stiʼ padrenuestru ne rinabuʼ gueeda Reinu stiʼ Dios la? canabuʼ gobiernu de guibáʼ Stibe cuee ca guendaquéiquiiñeʼ ca lu Guidxilayú riʼ ne canabuʼ guni mandarbe ca binni nachaʼhuiʼ (Mateo 6:9, 10). Ne zanda guni crenu de guidubi ladxidoʼno zacabi Dios orasión ca, purtiʼ Stiidxabe na: «Dichoso ni nadóʼ purti zudii Dios laaca guidxilayú» (Mateo 5:5).

Guendanabani ndaaniʼ guidxilayú cubi stiʼ Dios

Reinu stiʼ Dios zudii laanu stale ni sicarú ndaaniʼ guidxilayú riʼ ni qué zanda guchaaganu ne cani nápanu yanna, ne zacá zeedaneni guiráʼ ni gudixhe ique Dios ñapa binni lu Guidxilayú riʼ primé que. Ca guendaracananalaʼdxiʼ ne cani runi jusgar ante ganna ni dxandíʼ la? maʼ qué ziuu diʼ, ne óraque guiráʼ binni guidxilayú dxandíʼ zaca xhamígucaʼ. Dios cuzabiruaa ndaaniʼ Biblia de que Laabe zunduuxebe guendaridinde stiʼ ca guidxi ca dede ra biluxe guidxilayú. «Qué zadinde guidxi roʼ ne sti guidxi roʼ ne guiibaʼ duxhuʼ, ne qué zaziidirucaʼ tíndecaʼ» (Salmo 46:9; Isaías 2:4).

Guiluxe si guiráʼ nga la? guidubi naca Guidxilayú riʼ guizáʼ sicarú zaca ni, cásipeʼ ti jardín. Biblia na: «Desiertu ne ra gastiʼ nisa ziéchecaʼ, ne ra napampa casi desiertu ziuu nayecheʼ, ne zudii guieʼ casi asafrán. [...] Purtiʼ lu desiertu zadá nisa ne zuxooñeʼ nisa ra napampa casi desiertu. Ne layú nabé nandáʼ zaca casi ti ra daʼ nisa dxaʼ nite; ne layú nabidxi, casi ra cadá nisa» (Isaías 35:1, 6, 7).

Ndaaniʼ paraisu lu Guidxilayú riʼ ziuu xi pur guiecheʼ binni. Maʼ qué ziuu dxi tiidiʼ binni guendarindaana pur guiaadxaʼ ni go. «Guidxilayú riʼ dxandipeʼ zudii cuananaxhi stiʼ», na Biblia (Salmo 67:6; 72:16). Guiráʼ ziechené ni gudii xhiiñaʼ laa, cásipeʼ bizabiruaa ni Bizáʼ laanu ca: «Dxandipeʼ zucuícabe yoo, ne zaquiiñecabe cani; ne dxandipeʼ zudxiibacabe uba ne zócabe cuananaxhi stiʼ ni. [...] Qué zudxiibacabe ne stobi tu go ni» (Isaías 65:21, 22).

Lu guidxilayú cubi stiʼ Dios ca maʼ qué zabani stale binni ndaaniʼ ti yoo roʼ si o ndaaniʼ yoo yuxehuiiniʼ, purtiʼ Dios na: «Dxandipeʼ zucuícabe yoo, ne zaquiiñecabe cani [...]. Qué zucuícabe ne stobi tu iquiiñeʼ ni». Biblia laaca na: «Qué zunisicabe dxiiñaʼ» (Isaías 65:21-23). Nga runi binni zuuyaʼ ni gudii xhiiñaʼ laa ne zeedaneni guendanayecheʼ para laacabe. Qué zareecabe gana guendanabani ca.

Despué la? Reinu stiʼ Dios dede zudxiguetaʼ guendariuudxi ni guyuu lade ca maniʼ ca ndaaniʼ jardín de Edén que, ne ni guyuu lade binni ne maniʼ. Biblia na: «Gueuʼ ca dxandipeʼ zabaniné dendxuʼ caadxi dxi, ne maniʼ casi beedxeʼ zazilaʼdxiné chibahuiiniʼ, ne yuzehuiiniʼ ne liónhuiiniʼ ne maniʼ ni maʼ ro guixi la? tobi si ziuucaʼ; ne ti xcuidihuiiniʼ si zapa laacame» (Isaías 11:6-9; Oseas 2:18).

¡Bixuiʼlú si, ndaaniʼ paraisu lu Guidxilayú riʼ laaca zaree guiráʼ guendahuará! Stiidxaʼ Dios dxandipeʼ cayabi laanu: «Guirutiʼ tu cueza racá zaníʼ: “Huaraʼyaʼ”» (Isaías 33:24). «[Dios] zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 21:4).

Ximodo zanda guidxeʼluʼ ni

Zándaca biniibi ladxidoʼloʼ ora biindaluʼ ca diidxaʼ ni bizabiruaa Dios para guendanabani stinu ndaaniʼ guidxilayú cubi ra maʼ qué ziuu ni cadi jneza. Nécapeʼ nuu tu laa riníʼ ique de que naroʼbaʼ cani ne qué zanda diʼ gaca cani dxandíʼ la? peru para Dios de guendarannaxhii ni bizáʼ laanu ca cadi naroʼbaʼ diʼ cani (Salmo 145:16; Miqueas 4:4).

Peru, pa chiguibáninu sin qué guiuu dxi gátinu ndaaniʼ paraisu ni gueeda lu Guidxilayú riʼ la? nápanu xidé gúninu ni canabaʼ Dios laanu. Jesús guníʼ tobi de cani naquiiñepeʼ gúninu ora biʼniʼ orarbe Dios: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).

Nga runi, pa dxandipeʼ racaláʼdxinu guibáninu ndaaniʼ guidxilayú cubi stiʼ Dios la? nápanu xidé guizíʼdinu xii nga na Dios ne de racá gúninu ni, purtiʼ rihuínnica «canitilú guidxilayú ne irá ni nuu ndaani ni que, peru qué ziuu dxi initilú ni guni ni na Dios». Pa gúninu zacá la? qué ziuu dxi gusaana de icaanu ca ndaayaʼ ni gudii Dios de guendarannaxhii ni bizáʼ laanu (1 Juan 2:17).