Lii zanda guibániluʼ ndaaniʼ ti guidxilayú cubi nuudxí stiʼ Dios

DIOS guluu Adán ne Eva ndaaniʼ jardín ni láʼ Edén que. Nécaxa guirópacabe bicheecabe ne gúticabe, peru Jiobá maʼ biʼniʼ xiixa ti ganda guibani ca xiiñicabe ndaaniʼ ti Paraísu sin qué chuʼ dxi gáticaʼ. Biblia na: «Cani runi jneza ca zacaacabe guidxilayú, ne zabánicabe luni guiráʼ dxi» (Salmo 37:29).

Biblia caníʼ de «ti guidxilayú cubi» ne «ti ibáʼ cubi» (Isaías 65:17; 2 Pedro 3:13). «Ibáʼ» ni nuu yanna ca nga ca gobiernu stiʼ guidxilayú riʼ, peru «ibáʼ cubi» ca la? nga nga Jesucristu ne cani chiguni mandarné laabe. ¡Pabiáʼ sicarú zabáninu ora guni mandar Reinu chaʼhuiʼ ne nadóʼ stiʼ Dios ca lu guidubi guidxilayú riʼ!

Yanna, xii nga «guidxilayú cubi» ca yaʼ.... Guidxilayú cubi ca nga ca binni nachaʼhuiʼ ni gannaxhii Jiobá. Biaa, ora guzeeteʼ Biblia de «guidxilayú» la? nuu tiru riníʼ ni de binni ni nabeza luni, ne cadi Guidxilayú ripeʼ (Génesis 11:1; Salmo 66:4; 96:1). Nga runi, guiráʼ binni ni chigaca guidxilayú cubi riʼ zabánicabe raríʼ, lu planeta riʼ.

Dxicá la? guidxilayú nuu yanna, o ca binni malu riʼ, maʼ qué ziuudícabe. Bietenalaʼdxiʼ, Nisaguié roʼbaʼ ni biaba ca dxi stiʼ Noé que binduuxeʼ ni ca binni malu de dxiqué. Ne casi maʼ bizíʼdinu ca, ca binni malu nuu yanna riʼ zatinilucaʼ lu Armagedón. Guidúʼyanu yanna ximodo nga chiguibáninu ndaaniʼ guidxilayú cubi stiʼ Dios, tiidiʼ si Armagedón.

Ñee riuláʼdxiluʼ guibániluʼ ndaaniʼ Paraísu nuudxí stiʼ Dios sin qué chuʼ dxi gátiluʼ la?... Nin ti doctor qué zanda guidxela modo guibáninu sin gátinu. Ne laaca gastiʼ nin ti pastilla ni cuee guendaguti. Ti modo ganda si gápanu ti guendanabani ni qué zaluxe nga guidxíñanu Dios. Ne Maestru Ni Jma Nanna Gusiidiʼ ca cayabi laanu ximodo gúninu ni.

Guxhálenu Biblia ndaaniʼ Juan, capítulo 17, versículo 3. Raríʼ guníʼ Maestru Ni Jma Nanna Gusiidiʼ que ca diidxaʼ riʼ: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ».

Casi modo guníʼ Jesús ca, xi riquiiñeʼ gúninu para guibáninu sin que chuʼ dxi gátinu yaʼ.... Ni gúninu primé nga gunibiaʼnu, o guizíʼdinu de Bixhózenu ni nuu guibáʼ, Jiobá, ne de Xiiñibe, ni bidii guendanabani stiʼ pur laanu. Nga riníʼ naquiiñeʼ gúʼndanu Biblia. Libru riʼ, GUIZÍʼDINU DE MAESTRU NI JMA NANNA GUSIIDIʼ, zacané laanu gúninu ni.

Ra guizíʼdinu de Jiobá riʼ, ximodo zacané ni laanu gápanu ti guendanabani ni qué zaluxe yaʼ.... Biaa, cásica riquiiñeʼ guidoʼno guiráʼ dxi la? zacaca riquiiñeʼ guizíʼdinu de Jiobá guiráʼ dxi. Biblia na: «Cadi pan si nga ibani né binni sínuque irá ca diidxa ni iree de ruaa Dios» (Mateo 4:4).

Laaca naquiiñeʼ guizíʼdinu de Jesucristu, purtiʼ Dios biseendaʼ Xiiñiʼ para guxhá ca stóndanu. Biblia rusiidiʼ «laasi be zanda ulá be laanu», ne laaca nani «tu runi cre Xiiñi be la? napa enda nabani ni qué zaluxe» (Hechos 4:12; Juan 3:36). Yanna, ñee dxandíʼ runi creluʼ sin laabe qué zanda gápanu guendanabani ni qué zaluxe la?... Pa zacá ni la? zazíʼdirunu de Maestru Ni Jma Nanna Gusiidiʼ ca guiráʼ dxi ne zúninu ni nabe.

Ti modo ganda guizíʼdinu de laabe nga gúʼndanu libru riʼ stale biaje. Biiyaʼ ca dibuju cá luni ne guníʼ ique xi riníʼ cani. Biʼniʼ stipa pur guicábiluʼ ca guendarinabadiidxaʼ ni cá cueʼ cani. Laaca naquiiñeʼ gúʼndaneluʼ libru ca jñaaluʼ o bixhózeluʼ. Pa nin tobi de laacabe cadi nuunécabe lii la? biindaneni stuudxi binni huaniisi o stuudxi baʼduʼ. Zacá zándaca gacaneluʼ tuuxa guiziidiʼ de Maestru Ni Jma Nanna Gusiidiʼ ca ne xi naquiiñeʼ guni para guibani ndaaniʼ guidxilayú cubi stiʼ Dios sin qué chuʼ dxi gati. Ñee cadi guizáʼ galán nga la?...

Biblia na «canitilú guidxilayú», peru laaca cusiidini ximodo gápanu ti guendanabani ni qué zaluxe ndaaniʼ guidxilayú cubi stiʼ Dios. Cusiene ni «qué ziuu dxi initilú ni guni ni na Dios» (1 Juan 2:17). Nga runi, xi naquiiñeʼ gúninu ti guibáninu ndaaniʼ guidxilayú cubi stiʼ Dios sin qué chuʼ dxi gátinu yaʼ.... Guizíʼdinu de Jiobá ne de Jesús, Xiiñibe ni nadxiibe, ne gúninu ni rizíʼdinu. Ribézadu ra gúʼndaluʼ libru riʼ gacané ni lii gápaluʼ guendanabani ca.