2 ndaa

Tuu nga Dios

Tuu nga Dios ni dxandíʼ dxandipeʼ, ne tu labe (1, 2)

Xi cuerpu napa Dios (3)

Gunáʼ nga ca guenda ni jma rihuinni napa Dios (4)

Naquiiñeʼ iquiiñenu bidóʼ para guni adorarnu laabe la? (5)

Xi chupa modo zanda guizíʼdinu de Dios (6)

1. Binni la? runi adorar stale cosa. Yanna, Biblia cayabi laanu de que nuu tobi lucha si Dios NI DXANDÍʼ DXANDIPEʼ. Laabe nga tobi lucha ni naquiiñeʼ guni adorarnu, purtiʼ laabe bizaʼbe guiráʼ ni nuu guibáʼ ne ni nuu ndaaniʼ Guidxilayú, ne purtiʼ laabe bidiibe laanu guendanabani (1 Corintios 8:5, 6; Apocalipsis 4:11).

2. Nécaxa gadxé gadxé nga riníʼcabe lá Dios, peru laabe nápabe ti lásibe: JIOBÁ. Ndaaniʼ stale Biblia maʼ guleecabe lá Jiobá ne bichaacabeni pur Señor o Dios, peru dxi gucuá Biblia la? lá Jiobá gucuani biaʼ gadxe mil biaje (Éxodo 3:15; Salmo 83:18).

3. Jiobá napa ti cuerpu cadi casi stinu. «Dios Espíritu laa», na Biblia (Juan 4:24). Ti espíritu nga ti guendanabani ni jma dxiʼbaʼ que stinu. Nin ti binni de guidxilayú qué huayuu dxi gúʼyacaʼ Dios. Neca de guibáʼ nuu Jiobá zanda gúʼyabe guiráʼ ni nuu lu guidxilayú (Juan 1:18; Hebreos 4:13). Peru, xii nga espíritu santu yaʼ. Cadi ti binni diʼ ni casi Dios, sínuque laani nga stipa ni riquiiñeʼ Dios (Salmo 104:30).

4. Biblia cayabi laanu ximodo nga Jiobá, caniʼni de que Dios rannaxhii, runi jneza, nanna stálepeʼ ne nandxóʼ (Romanos 11:33; 1 Juan 4:8; Apocalipsis 11:17; 15:3). Laaca caniʼni de que Dios riubaláʼdxibe, nacháʼhuibe, rutiidiláʼdxibe donda, riuláʼdxibe gudiibe ne nadoʼbe. Yanna cumu maʼ nácanu xiiñiʼ Dios la? naquiiñeʼ gácanu casi laabe (Efesios 5:1, 2).

5. Naquiiñeʼ gusuxíbinu lu ca bidóʼ ca la? Coʼ (Hechos 17:24, 25, 29). Jiobá na laa si nga naquiiñeʼ guni adorarnu. Qué rudiidibe guendanaróʼ stibe guirutiʼ. Ca bidóʼ ca qué gápacaʼ poder para gacanecaʼ laanu (Isaías 42:8; 1 Corintios 8:4; Apocalipsis 9:20).

6. Ximodo zanda gunibiáʼ chaahuinu Dios yaʼ. Tobi de laacani nga, ra guidúʼyanu guiráʼ ni maʼ bizaʼbe ne guiníʼ íquenu xi rusiidiʼ cani laanu. Laaca rusihuinni cani de que nápabe stale guendanandxóʼ ne guendananna stálepeʼ. Ne pur guiráʼ ni maʼ bíʼnibe la? rúʼyanu guendarannaxhii stibe (Salmo 19:1-6; Romanos 1:20). Sti modo zanda guizíʼdinu de Dios nga gúʼndanu Biblia. Laani cayabi ni laanu jma de ximodo nga Dios. Laaca cayábibe laanu xi chigúnibe ne xii nga racaláʼdxibe gúninu (Amós 3:7; 2 Timoteo 3:16, 17).

[Dibuju/foto ni zeeda lu yaza 5]

Rizíʼdirunu jma de Jiobá ora gúʼndanu Biblia ne ora gúʼyanu ca ni maʼ bizaʼbe