3 ndaa

Tuu nga Jesucristu

Xiñee rábicabe Jesús Baʼduʼ lugola stiʼ Dios (1)

Xiñee rábicabe Jesús «Diidxaʼ» (1)

Xiñee beeda Jesús ndaaniʼ Guidxilayú riʼ casi ti hombre (2-4)

Xiñee bíʼnibe milagru (5)

Xi chiguni Jesús ca dxi chigueeda ca (6)

1. Jesús maca bibánibe guibáʼ casi ti binni de espíritu ante gueedabe ndaaniʼ Guidxilayú riʼ. Laabe nga primé ni bizáʼ Dios, pur nga runi biree labe Baʼduʼ lugola stiʼ Dios (Colosenses 1:15; Apocalipsis 3:14). Stubi lucha Jiobá bizáʼ laabe, guirutiʼ ñacané laa. Jiobá biquiiñebe Jesús dxi biuu guibáʼ casi tobi ni runi xhiiñabe jnézapeʼ, ora bizaʼbe guiráʼ ni nuu guibáʼ ne ni nuu lu Guidxilayú (Proverbios 8:22-31; Colosenses 1:16, 17). Dios laaca biquiiñeʼ laabe casi ridxi risaca stiʼ. Ngue runi Jesús la? biree labe «Diidxaʼ» (Juan 1:14; Apocalipsis 19:13).

2. Dios biseenda Xiiñiʼ lu Guidxilayú riʼ ra bitiidibe guendanabani stiʼ ndaaniʼ xpidxana María. Ngue runi Jesús qué ñápadibe bixhózebe ndaaniʼ Guidxilayú ne qué ñalenédibe donda ne guendaruchee. Dios biseenda Jesús ndaaniʼ Guidxilayú pur chonna razón: 1) para gusiidibe laanu ni dxandíʼ de Dios (Juan 18:37), 2) para gácabe nachaʼhuiʼ lu guiráʼ ni gúnibe ne zacá quíxhebe ti ejemplu ni gúninu (1 Pedro 2:21) ne 3) para gudiibe laabe gátibe ti guilanu de donda ne de guendaguti. Xiñee biquiiñeʼ gudiibe laabe gátibe yaʼ (Mateo 20:28).

3. Ra qué nuzuuba Adán stiidxaʼ Dios la? bíʼnibe ni ribee lá Biblia «guendaruchee». Ngue runi Dios gudxi laabe dxandipeʼ zátibe (Génesis 3:17-19). Cumu maʼ qué ñúnibe biaʼ na ley stiʼ Dios la? bisaanabe de gácabe binni ni qué gapa donda. Chaahuidugá bióʼxhobe ne gútibe, ne zacá bitiidibe donda ca guiráʼ xiiñibe, nga runi laanu laaca rióʼxhonu, raca huaranu ne rátinu. Ximodo zanda guilá binni guidxilayú yaʼ (Romanos 3:23; 5:12).

4. Jesús gúcabe ti binni ni qué ñapa donda casi Adán. Peru Jesús gúcabe gadxé purtiʼ bizuubabe stiidxaʼ Dios, nécaxa gudíʼdibe guendanagana ni jma naná. Pur nga la? gunda bidiibe guendanabani sin donda stibe para biaxa donda stiʼ Adán. Biblia ribee lá modo bíʼnibe ca «guendariguixe». Zacá la? ca xiiñiʼ Adán gunda bilacaʼ de guendaguti. Yanna guiráʼ tu gapa fe Jesús la? zanda tidilaʼdxiʼ donda sticaʼ ne gápacaʼ guendanabani ni qué zaluxe (1 Timoteo 2:5, 6; Juan 3:16; Romanos 5:18, 19).

5. Dxi beeda Jesús lu Guidxilayú riʼ la? bisianda binni huará, biyaanaʼ binni ni candaana ne bicueeza bi lu nisadóʼ, dede bisibánibe gueʼtuʼ. Xiñee bíʼnibe milagru. 1) Biabe ca binni ni cayacaná que ne guyuláʼdxibe gacanebe laaca. 2) Ca milagru que biluíʼ cani de que laabe nga Xiiñiʼ Dios. 3) Biluíʼ cani xi chigúnibe pur binni ni ruzuubaʼ diidxaʼ, ora laabe maʼ guni mandarbe casi Rey lu guidubi naca Guidxilayú (Mateo 14:14; Marcos 2:10-12; Juan 5:28, 29).

6. Jesús guti, peru Dios bisibani laabe casi ti binni de espíritu ne bibiguétabe guibáʼ (1 Corintios 15:45). Despué, Dios biʼniʼ laabe Rey. Xcaadxi si la? zunduuxebe guiráʼ guendaquéiquiiñeʼ ne ca guendananá ni nuu lu Guidxilayú (Salmo 37:9-11; Proverbios 2:21, 22).

[Dibuju/foto ni zeeda lu yaza 7]

Lu dxiiñaʼ stiʼ Jesús bisiidiʼ, biʼniʼ milagru ne dede bidiibe guendanabani stibe pur laanu