2 Ndaa

Dios nga ni jma galán gaca xhamíguluʼ

Gácaluʼ xhamigu Dios nga ni jma galán ni zanda guizaaca lii. Dios zusiidiʼ lii ximodo guidxeʼluʼ guendanayecheʼ ne guendariuudxi; zabeebe lii de ni rusiidicabe ni cadi dxandíʼ ne de guendanabani ni runiná. Zucaadiágabe ca orasión stiluʼ. Zudiibe lii guendariuudxidoʼ ne zapu confiansa lii (Salmo 71:5; 73:28). Dios zacané lii ora tiiduʼ ra nagana (Salmo 18:18). Dios laaca racalaʼdxiʼ gusigaʼdeʼ lii guendanabani ni qué ziuu dxi guiluxe (Romanos 6:23).

Ora cadxíñaluʼ Dios la? laaca cadxíñaluʼ ca xhamigu Dios. Ca xhamigu Dios zeeda gácacaʼ xhamíguluʼ. Dxandipeʼ nga zeeda gácacabe para lii casi bíʼchiluʼ ne bizaʼnuʼ. Ziéchecabe gusiidicabe lii de Dios, zacanécabe ne zaguucabe gana lii.

Cadi biaʼca diʼ laanu Dios. Ra guyubuʼ gaca xhamíguluʼ Dios la? naquiiñeʼ guieʼnuʼ ndiʼ: gácanu xhamigu Dios la? cadi riníʼ diʼ nga de que biaʼca laanu laabe. Laabe nápabe stalepeʼ iza que laanu, nánnabe stale ne jma nandxoʼbe que laanu. Laasibe nga tobi lucha ni naquiiñeʼ gaca Xaíque stinu. Nga runi, pa racaláʼdxiluʼ gácabe xhamíguluʼ la? napuʼ xidé gucaadiaʼguʼ ne guʼnuʼ ni cayábibe lii. Pa guzuubanu stiidxaʼ Dios la? zieni laanu jneza (Isaías 48:18).