Capítulo 11
Cadi guiaanadxinu de guyúbinu primeru Reinu stiʼ Dios
1. 1) Xiñee gudxi Jesús cani cucaadiaga laa guyúbicaʼ primeru Reinu stiʼ Dios. 2) Xi naquiiñeʼ guinabadiidxanu laca laanu.
MAʼ RACA jma de ti mil gaʼ gayuaa iza bidii Jesús ti libana ndaaniʼ guidxi Galilea, raqué gúdxibe cani cucaadiaga laabe: «Cadi guiaanadxitu de guyúbitu primeru Reinu stiʼ Dios ne guendaruni jneza stibe». Yanna, xiñee naquiiñeʼ gúnicabe ni nagueendaca yaʼ. Ñee cadi cayaadxaruʼ stálepeʼ iza ti guicaa Cristu derechu para guni mandar casi rey dxiqué la? Ya, peru Reinu stiʼ Mesías ca nga chiguiquiiñeʼ Jiobá para gusihuínnibe laabe nga nápabe derechu guni mandarbe ne para gúnibe guiráʼ cosa sicarú naguixhe íquebe gaca lu Guidxilayú riʼ. Guiráʼ binni ni biene pabiáʼ risaca nga la? biyúbicaʼ Reinu ca primeru lu xquendanabánicaʼ. Pa zacá bíʼnicabe lu primé siglu que la? yanna riʼ jma nuu razón para gúninu ni, purtiʼ maʼ zuba Cristu casi Rey. Nga runi cada tobi de laanu nga naquiiñeʼ guiníʼ íque: «Ñee rusihuinneʼ pur modo nabaneʼ cuyubeʼ Reinu stiʼ Dios primeru la?» (Mateo 6:33, NM).
2. Xii nga nabé ruyubi stale binni gapa.
2 Yanna riʼ, millón de binni ni nuu lu guidubi naca Guidxilayú cuyúbicaʼ Reinu stiʼ Dios primeru . Rusihuínnicabe nuucabe pur laani, purtiʼ nabánicabe para gúnicabe ni na Jiobá, ne laabe nga maʼ bidiicabe xquendanabánicabe. Peru jma stale binni ruyubi gapa guiráʼ ca cosa ni ricá ique binni guidxilayú. Nabé ruyúbicabe gápacabe bueltu ti sícabe stale cosa ni risaca ne gúnicabe guiráʼ ni racalaʼdxisícabe, o rúnicabe stale stipa pur guireendúcabe, ne dede últimu riguucabe Dios, ne nga pa runi crécabe laabe xa (Mateo 6:31, 32).
3. 1) Xi ca cosa ni risaca nga gudxi Jesús ca discípulo stiʼ guyúbicaʼ, ne xiñee. 2) Xiñee cadi naquiiñeʼ cuʼ xaíquenu stálepeʼ pur gápanu ca cosa ni caquiiñenu.
3 Cumu nanna Jesús ziuu dxi guinitilú guiráʼ ca cosa ni napa binni la? bidiibe conseju riʼ ca discípulo stibe: «Cadi guyubi tu gapa tu stale ni risaca ndaani guidxilayú riʼ [...]. Sínuque laguyubi gapa tu ni risaca ibáʼ», ne zanda gápanu ni risaca ca pa gúninu ni na Jiobá. Jesús gúdxibe ca discípulo stibe gúʼyacaʼ ni jneza si ra gucaa íquecaʼ gúnicaʼ ni na Dios ne gúnicaʼ ni ne stale stipa. Na Jesús rabi laacabe: «Qué zanda di ganaxhii tu Dios ne ganaxhii ca tu bidxichi». Peru, xi naquiiñeʼ gúnicabe para gápacabe cani caquiiñecabe casi ni gócabe, ni gácucabe ne ra cuézacabe yaʼ. Ndiʼ nga conseju bidiibe laacaʼ: «Cadi cuʼ xa ique tu ximodo ibani tu». De raqué gúdxibe laacaʼ gúʼyacaʼ ca maniʼ ripapa ni cuyaanaʼ Dios ca, ne gúdxibe laacaʼ gúʼyacaʼ ca guieʼ ni rucuaaquiʼ Dios lari ca, ti gúʼyacabe xi rusiidicani laacabe. Ñee cadi jma risaca guiráʼ ca binni ni cayuni ni na Jiobá ca que xcaadxi ni bizaʼbe ca la? Na Jesús rabi laacabe: «Cadi guiaanadxitu de guyúbitu primeru Reinu stiʼ Dios ne guendaruni jneza stibe, ne xcaadxi cosa [ni caquiiñetu] riʼ zudiisibe ni laatu» (Mateo 6:19-34, NM). Ñee rusihuínniluʼ runi creluʼ ca diidxaʼ riʼ lu cani rúniluʼ la?
Cadi gusiáʼndanu ni bizíʼdinu de Reinu ca
4. Xi zándaca guizaaca pa tiidisunu pur guizaaláʼdxinu gápanu cani caquiiñenu.
4 Galán nga guizaaláʼdxinu gápanu ca cosa ni caquiiñenu ne ni caquiiñeʼ binnilídxinu. Peru pa tiidisunu pur guizaaláʼdxinu gápanu cani la? zápanu guendananá. Neca tuuxa guiníʼ runi cré Reinu ca, peru pa jma rusisácabe xcaadxi cosa ndaaniʼ ladxidoʼbe la? zusiaandabe ni biziidibe de Reinu ca (Mateo 13:18-22). Casi ti dxi, ti baʼdunguiiu ricu ni naca xaíque stiʼ ti guidxi gunabadiidxabe Jesús: «Xi naquiiñe gune para gapa enda nabani ni qué zaluxe» yaʼ. Jneza modo bibani baʼdunguiiu riʼ ne gucanebe binni, peru jma gunnaxhiibe cani nápabe, qué ñanda diʼ nusaanabe guiráʼ ni nápabe ti ninándabe Cristu. Ngue runi maʼ qué ñácabe tobi de cani chichuuné Cristu lu Reinu guibáʼ. Óraque nga guníʼ Jesús: «Aque nagana raca para ca ricu udii ca lugar guni mandar Dios laacaʼ [«chuʼcaʼ lu reinu stiʼ Dios», NM]» (Marcos 10:17-23).
5. 1) Xii nga cani na Pablu guiechené Timoteu, ne xiñee. 2) Ximodo riquiiñeʼ Binidxabaʼ «enda ranaxhii bidxichi» ca para cueechu laanu ti gátinu yaʼ.
5 Chupa chonna iza despué, dxi nuu Timoteu Éfeso (ti guidxi ra nabé guyuu negocio), bicaa Pablu ti carta ra nuube ne bisietenalaʼdxiʼ laabe: «Gasti qué ñedané nu ndaani guidxilayú ne gasti qué ziné nu ra chuu nu. Nga runi, zaa naca gapa nu bidxichi, inque si napa nu ni idóʼ no ne ni gacu nu, nga si guieche né nu». Jneza nga gúninu dxiiñaʼ para laanu ne para binnilídxinu ti gápanu «ni idóʼ no ne ni gacu nu». Peru Pablu gudixhenaca laacabe: «Cani ruyubi gapa bidxichi la? riaba ndaani ná binidxabaʼ, ne rizabilaʼdxi ni qué iquiiñeʼ, ni runiná si binni. Rusiuʼdxu ni xpida cabe ne runitilú ni laacabe». Binidxabaʼ nanna dxiichi gusiguii, primeru riquiiñebe cosa ni nahuiiniʼ para uquiindebe binni ne despué rucaabe laacaʼ gúnicaʼ xiixa jma narobaʼ; cásixa pa ra dxiiñaʼ gudiicabe laabe ti puestu jma risaca o guchaabe de dxiiñaʼ ti guni ganarbe jma bueltu, peru maʼ qué zápabe tiempu gúnibe cani na Dios casi rúnibe dxiqué. Pa qué gápanu laanu la? «enda ranaxhii bidxichi» ca zucaani laanu maʼ cadi gusisácanu ca cosa stiʼ Reinu. Sicaríʼ guníʼ Pablu: «Nuu tu huaree chu de Dios pur laani ne nabé huayacaná» (1 Timoteo 6:7-10).
6. 1) Xi naquiiñeʼ gúninu ti cadi guicaa íquenu nisi bidxichi. 2) Neca stale binni cadiʼdiʼ lu guendapobre, tu ndiʼ nánnanu zacané laanu.
6 Cumu dxandipeʼ gunnaxhii Pablu Timoteu casi xpinni Cristu la? gúdxibe laa: «Bixele de irá nga. [...] Bidxii lú ni runi cre luʼ» (1 Timoteo 6:11, 12). Nga runi, naquiiñeʼ gúninu stale stipa para cadi guicá íquenu nisi bidxichi ti cadi guixélenu de Jiobá. Pa gúninu stipa pur guibáninu casi modo rizíʼdinu la? qué ziuu dxi gusaana Jiobá laanu. Neca nagana nabani binni ne gástipeʼ dxiiñaʼ la? laabe zuuyabe gápanu cani caquiiñenu. Sicaríʼ bicaa Pablu: «Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: “Qué zusaana laatu ne qué ziaana dxie de acaniá laatu.” Nga runi zanda iní nu sin chuʼ nu xizaa: “Racané Señor naa. Nga runi qué zadxibe ni guni binni naa”» (Hebreos 13:5, 6). Zacaca bicaa rey David: «Gucaʼ nahuiiniʼ, yanna maʼ bioʼxhuáʼ, peru qué huayuuyaʼ nin tobi ni nachaʼhuiʼ guiaana laa si, nin ca xiiñiʼ cananabaʼ ni gó» (Salmo 37:25).
Ejemplu ni bidii ca primé discípulo
7. Ximodo gudxi Jesús ca discípulo stiʼ checaʼ ora gucheechecaʼ diidxaʼ, ne xiñee biaʼsi ni guniʼbe ca.
7 Bisiene chaahuiʼ si Jesús ca apóstol stiʼ xi gúnicaʼ la? biseendabe laacaʼ chigucheechecaʼ ca diidxaʼ nacubi ne galán que ne guiniʼcaʼ: «Ma zeda dxiña dxi guni mandar Dios». ¡Guizáʼ bisiecheʼ ni guniʼbe ca! Purtiʼ laabe ngue Rey ni gueeda que, ne nuube ládecaʼ. Cumu xhiiñaʼ Dios ngue cayuni ca apóstol que la? gudxi Jesús laacabe ganna dxíchicabe zacané Dios laacabe. Gúdxibe laacaʼ: «Cadi chiné tu gasti ni iquiiñe tu neza, nin bastón, nin ixhiapa, nin pan, nin vueltu. Lachiné lari ni nacu si tu. Ne ra guiete tu la? laguiaana ndaani yoo que dede dxi ma iree tu de guidxi que» (Mateo 10:5-10; Lucas 9:1-6). Jiobá ngue chiguyubi xcaadxi israelita, ni nabé ridxagalucaʼ binni, para gudii laacabe ni caquiiñecabe.
8. 1) Ante gati Jesús que, xiñee maʼ gadxé modo guniʼbe cheʼ ca discípulo stibe ora chigucheecaʼ diidxaʼ. 2) Xi cadi naquiiñeʼ gusaana de guyubi ca discípulo stiʼ Jesús primeru lu xquendanabánicaʼ.
8 Xcaadxi si dxi ante gati Jesús, gúdxibe ca apóstol stibe maʼ gadxé modo checaʼ ora chigucheechecaʼ diidxaʼ. Cumu zucaalú cani naca xaíque stiʼ Israel xhiiñacabe la? zándaca pur ngue maʼ qué zadxagalú ca israelita laacabe cásica ante que. Ne qué liica zandaa para guzulú gucheechecabe stiidxaʼ Reinu ndaaniʼ ca guidxi ni cadi judíu que. Óraque nga maʼ naquiiñeʼ chinécabe «ixhiapa» ne «vueltu». Nécaxa nápacabe xidé sícabe cani iquiiñecabe la? jma nga naquiiñeʼ guyúbicabe primeru Reinu stiʼ Jiobá ne guendaruni jneza stibe, ne guni crécabe zaguu Dios ndaayaʼ stipa gúnicabe para gápacabe ni gócabe ne ni gácucabe (Lucas 22:35-37).
9. Ximodo bisihuinni Pablu jma bisisaca xhiiñaʼ Reinu lu xquendanabani sin nusaanabe de nuyúbibe ni caquiiñebe, ne xi conseju bidiibe.
9 Jnézapeʼ modo yenanda apóstol Pablu conseju stiʼ Jesús, purtiʼ jma bisisácabe xhiiñaʼ Cristu lu xquendanabánibe (Hechos 20:24, 25). Peru, ora chebe paxaraa chigucheechebe diidxaʼ la? rúnibe dxiiñaʼ ti gápabe ni caquiiñebe, dede ruzaʼbe carpa, o yoo de lari ne qué ribézadibe xcaadxi binni gudii ni laabe (Hechos 18:1-4; 1 Tesalonicenses 2:9). Peru pa ca xpinni Cristu gabi laabe chebe ra lídxicaʼ la? riebe ne ora gusigáʼdecaʼ laabe xiixa para gusihuínnicaʼ nadxiicaʼ laabe la? ricaabe cani ne rudiibe xquíxepeʼ laacaʼ (Hechos 16:15, 34; Filipenses 4:15-17). Pablu qué ñabi diʼ ca xpinni Cristu cadi gulábicaʼ binnilídxicaʼ pur chigucheechecaʼ diidxaʼ, sínuque gúdxibe laacaʼ gánnacaʼ ximodo gúnicaʼ guiropaʼ dxiiñaʼ riʼ. Gúdxibe laacaʼ gúnicaʼ dxiiñaʼ, gannaxhiicaʼ binnilídxicaʼ ne laaca gudiicaʼ ni nápacaʼ xcaadxi binni (Efesios 4:28; 2 Tesalonicenses 3:7-12). Gúdxibe laacaʼ guni crecaʼ zacané Dios laacaʼ, ne cadi bidxichi diʼ, ne pur modo guibánicabe gusihuínnicabe nánnacabe gunáʼ nga cani jma risaca. Ne casi bisiidiʼ Jesús que, ni naquiiñeʼ gúnicabe nga guyúbicabe primeru Reinu ca ne gúnicabe ni jneza casi na Dios (Filipenses 1:9-11).
Cadi gusaananu de guyúbinu primeru Reinu ca lu xquendanabáninu
10. Ximodo zanda guyúbinu primeru Reinu ca.
10 Pabiáʼ tiempu ribeenu para gucheechenu ca diidxaʼ nacubi ne galán ca yaʼ. Modo nabáninu ne pabiáʼ rudiʼnu xquíxepeʼ Dios nga chiguluíʼ laanu pabiáʼ tiempu zanda cueenu. Guiníʼ íquenu cadi guníʼ diʼ Jesús: «Laguyubi Reinu ca ora maʼ gastiʼ ni gúnitu». Cumu nánnabe pabiáʼ risaca gobiernu ca la? sicaríʼ guniʼbe ni na Bixhózebe gaca: «Cadi gusaanatu de guyúbitu reinu stibe» (Lucas 12:31, NM). Neca stale de laanu naquiiñeʼ guni dxiiñaʼ para gapa ni caquiiñeʼ ne ni gudii binnilidxi la? laaca zuni xhiiñaʼ Reinu ca pa napa fe, purtiʼ maʼ bidii Dios laanu gúninu dxiiñaʼ ca (1 Timoteo 5:8).
11. 1) Ximodo bisihuinni Jesús cadi ngueca diʼ tiempu zanda cuee guiranu para gucheechenu stiidxaʼ Reinu. 2) Xii nga cani chiguluíʼ laanu pabiáʼ tiempu zanda cueenu.
11 Nuu de laanu zanda cuee jma tiempu para gucheeche ca diidxaʼ nacubi ne galán stiʼ Reinu ca que xcaadxi. Peru ora bidii Jesús ti ejemplu ra bichaagabe ladxidóʼ binni ne gadxé gadxé layú la? guniʼbe ca binni ni napa ladxidóʼ casi layú galán ca zúnicaʼ ni nabe casi ñaca nudiicaʼ cuananaxhi. Pabiáʼ zudiicabe yaʼ. Cadi biaʼ queca diʼ zudii guiranu purtiʼ gadxé gadxé modo nabáninu, nuu tu nahuiiniʼ o maʼ bioʼxhoʼ, nuu tu nazaaca o maʼ huará ne nuu tu caquiiñeʼ gacané binnilidxi. Neca zacá, ora riale ndaaniʼ ladxidoʼno gúninu xhiiñaʼ Reinu la? zanda gúninu ni dede biaʼ gándatiʼ (Mateo 13:23).
12. Xi zanda quixhe ique cani nahuiiniʼ ca gúnicaʼ lu xhiiñaʼ Reinu.
12 Galán nga quixhe íquenu gúninu xiixa ni gacané laanu cueenu jma tiempu para gucheechenu stiidxaʼ Reinu. Cani nahuiiniʼ ca naquiiñeʼ guiníʼ ique chaahuicabe ejemplu sicarú bidii Timoteu, ti baʼdunguiiu ni guca xpinni Cristu (Filipenses 2:19-22). Ñee cadi jma galán para laacabe nucheechecabe diidxaʼ jma stale hora guiluxesícabe scuela stícabe la? Cani huaniisi ca pa quixhe íquecaʼ chigucheechecaʼ diidxaʼ la? laaca zacané nga laacabe.
13. 1) Tuu ndiʼ riníʼ pabiáʼ zanda guni cada tobi de laanu lu xhiiñaʼ Reinu. 2) Xi zusihuínninu ora dxandíʼ cuyúbinu primé Reinu ca.
13 Lugar de guininu tuuxa ni rábinu zanda guni jma lu dxiiñaʼ ca la? naquiiñeʼ ucaa fe stinu laanu gúninu dxiiñaʼ ca jma jneza, ti zacá gúninu ni na Dios dede biaʼ gándatiʼ (Romanos 14:10-12; Gálatas 6:4, 5). Casi rihuinni lu ni bizaaca Job que, Binidxabaʼ na ni jma risaca para laanu nga gápanu guiráʼ cosa risaca, guibáninu galán ne cadi gacananu, zacá nga casi ñaca niniʼbe rúninu ni na Dios purtiʼ si racaláʼdxinu xiixa. Nga runi, pa guyúbinu primeru Reinu ca la? zacanenu guihuinni pabiáʼ nga rusiguii Binidxabaʼ, ne zacá zusihuinni dxíchinu ni jma risaca lu xquendanabáninu nga gúninu ni na Dios. Ne lu cani rininu ne ni rúninu laaca zusihuínninu nadxiinu Jiobá de guidubi ladxidoʼno, qué zudxiidéchenu derechu ni nápabe de guni mandarbe ne zusihuínninu nadxiinu binni (Job 1:9-11; 2:4, 5; Proverbios 27:11).
14. 1) Xiñee galán nga quíxhenu ti hora para chigucheechenu diidxaʼ. 2) Panda hora rucheeche ca testigu stiʼ Jiobá diidxaʼ.
14 Pa quixhe chaahuinu cani gúninu zacané nga laanu gápanu jma tiempu. Dede Jiobá naguixhe ti tiempu para guni ni maʼ bizabiruaa (Éxodo 9:5; Marcos 1:15). Pa ganda la? galán guireʼnu ti biaje o jma de ti biaje lu ti semana para chigucheechenu diidxaʼ. Stale testigu stiʼ Jiobá ni nuu lu guidubi naca Guidxilayú huayácacabe precursor auxiliar, ne para nga rucheechecabe diidxaʼ biaʼ chupa hora guiráʼ dxi. Ne sti gayuaa mil de laacabe naca precursor regular, rúnicabe biaʼ chupa hora arondaʼ ti dxi lu dxiiñaʼ ca. Ca precursor especial ne ca misioneru jma stale tiempu rúnicabe lu xhiiñaʼ Reinu. Laaca zanda guyúbirunu ximodo guininu de ni chiguni Reinu ca ne tutiica binni ni riuulaʼdxiʼ gucaadiaga (Juan 4:7-15). Naquiiñeʼ guinabaʼ ladxidoʼno laanu gúninu dxiiñaʼ ca dede biaʼ ganda gúninu ni, purtiʼ ndiʼ nga guníʼ Jesús chigaca: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14; Efesios 5:15-17).
15. Xiñee raʼbuʼ jneza conseju ni cá lu 1 Corintios 15:58 para gacané ni laanu gucheechenu diidxaʼ yaʼ.
15 Ca testigu stiʼ Jiobá ni nuu lu guidubi naca Guidxilayú, neca de gadxé gadxé guidxi laacabe tobi si nuucabe lu dxiiñaʼ ni cayúnicabe riʼ. Ricaacabe conseju ni bidii Dios ni cá lu Biblia riʼ: «Lauzuhuaa chaahuiʼ, ne cadi iree cueʼ tu, ne qué chuʼ dxi usaana tu de guni tu xhiiña Señor biaʼ ra ganda tiʼ, purti maca nanna tu cadi pur gana si cayuni tu ni» (1 Corintios 15:58).
Ni guietenaláʼdxinu
• Ora na Jesús «cadi guiaanadxitu de guyúbitu primeru Reinu stiʼ Dios», xii nga nabe gúninu despué.
• Xi naquiiñeʼ gúninu para gápanu cani caquiiñenu ne ni caquiiñeʼ binnilídxinu. Ximodo zacané Dios laanu.
• Xi guiráʼ modo zanda gúninu xhiiñaʼ Reinu.
[Dibuju/foto ni zeeda lu yaza 107]
Ca testigu stiʼ Jiobá cucheechecabe ca diidxaʼ nacubi ne galán ca ndaaniʼ guiráʼ guidxi ante gueeda fin