Capítulo 13
Nuu jma binni nezalú trono stiʼ Jiobá
1. 1) Xi naquiiñeʼ gaca ca xpinni Jiobá ni bibánicaʼ ante gueeda Cristu ne zaqueca 144,000 binni ni chiguni mandarné Cristu ante guicaacabe ni nexheʼ para laacabe. 2) Xi cabeza «jma binni» ni nabani yanna riʼ guicaacaʼ.
NÉCAXA ca xpinni Jiobá jma bisisácacaʼ gúnicaʼ ni nabe dede dxi bibani Abel hasta ca dxi bibani Juan ni guluunisa que la? guirácabe gúticabe, peru nánnacabe zabánicabe sti biaje lu Guidxilayú riʼ ora maʼ guni chaahuiʼ Dios ni. Ti gayuaa cuarenta y cuatro mil binni ni chiguni mandarné Cristu guibáʼ lu Reinu stiʼ Dios ca la? laaca naquiiñeʼ gáticabe ante gácacabe rey. Peru Apocalipsis 7:9 culuíʼ lu ca últimu dxi riʼ ziuu «jma binni» de guiráʼ guidxi ni qué záticaʼ para guicaacaʼ ti guendanabani ni qué zaluxe lu Guidxilayú riʼ. Ñee nuuluʼ ládecabe la?
Binibiáʼcabe tuu nga jma binni ca
2. Ximodo beeda guiene chaahuicabe tuu nga jma binni ni rieeteʼ lu Apocalipsis 7:9.
2 Lu iza 1923 biene ca xpinni Jiobá tuu nga ca binni ni chiguicaa ti guendanabani ni qué zaluxe lu Guidxilayú riʼ. Laacabe nga cani zeeda gaca ca «dendxu» ni bizeeteʼ Jesús lu ejemplu ni cá lu Mateo 25:31-46 ne «xcaadxi dendxu» ni rieeteʼ lu Juan 10:l6. Lu iza 1931 bihuinni laaca laacabe nga ca binni ni napa ti seña lucuá ni cuzeeteʼ Ezequiel 9:1-11. Ne últimu ni biénecabe lu iza 1935 nga nuu jma binni ca lade xcaadxi dendxuʼ ni bizeeteʼ Jesús que. Yanna riʼ, guiráʼ ca binni ni chiguicaa ndaayaʼ ca maʼ stálecabe dede maʼ bizaacabe millón.
3. Ximodo nánnanu cadi ná diʼ ca diidxaʼ zuhuaacabe «nezalú trono» ca zié jma binni ca guibáʼ.
3 Lu Apocalipsis 7:9 cadi cayeeteʼ diʼ nuu jma binni ca guibáʼ. Cadi purtiʼ si bihuinni zuhuaacabe «nezalú trono» stiʼ Dios nga guininu nuucabe guibáʼ. Ni cayábini laanu nga cayuuyaʼ Dios laacabe (Salmo 11:4). Para guiénenu cadi guibáʼ diʼ nga cheʼ jma binni ca la? ndiʼ si zanda guidúʼyanu, «iruti ñanda nugaba laaca[be]» na Apocalipsis 7:4-8 nga culuíʼ cadi nexheʼ diʼ pandapécabe, yanna Apocalipsis 14:1-4 na 144,000 binni nga cani cheʼ guibáʼ.
4. 1) Xii nga ra «jma nagana» chitiidiʼ jma binni ca ne zalacaʼ. 2) Casi na Apocalipsis 7:11, 12, tuu nga cani cayuuyaʼ jma binni ca ne runi adorarnecaʼ laacabe Dios tobi si.
4 Apocalipsis 7:14 cuzeeteʼ ni de jma binni ca sicaríʼ: «Ca nga nga ni udiʼdi ra jma nagana». Ca binni ca nga chiguilacaʼ lade guiráʼ guendanagana ni jma naná huayapa binni (Mateo 24:21). Ora gudiicabe xquíxepeʼ Jiobá ne Jesús purtiʼ bilacaʼ laacabe la? cani nuu guibáʼ ni bizuubacaʼ stiidxaʼ Dios zuni adorarnecaʼ laacabe Jiobá tobi si ora guiniʼcaʼ: «Amén. Qué chuʼ dxi guiaana dxí nu de usisaca nu Dios stinu ne udíʼ nu diuxquixe laa. Stibe irá enda nandxóʼ, irá enda biaaniʼ, irá enda risaca ne irá stipa» (Apocalipsis 7:11, 12).
Ximodo rusihuínnicabe naquiiñeʼ guilácabe
5. Ximodo zanda gánnanu xi naquiiñeʼ gúninu para chuʼnu lade jma binni ca.
5 Lu ca dxi nagana ca zulá Jiobá jma binni ca, ne zúnibe ni casi na ca ley stibe. Biblia cusiene chaahuiʼ modo chigaca xpiáʼ ca binni ni chiguilá ca, nga runi cani riuulaʼdxiʼ ni jneza ca zanda gúnicaʼ stipa pur gaca xpiacaʼ zacá ti gusihuínnicaʼ naquiiñeʼ guilacaʼ. Xi naquiiñeʼ gúnicabe yaʼ.
6. Xiñee jneza nga guininu zeeda gaca jma binni ca casi dendxuʼ.
6 Ca dendxuʼ ca nacháʼhuicaʼ ne nabé ruzuubacaʼ diidxaʼ. Nga runi, ora guníʼ Jesús napa xcaadxi dendxuʼ ni cadi nuu lade cani cheʼ guibáʼ ca la? caniʼbe de ca binni ni cadi riuuláʼdxisicaʼ guibánicaʼ lu Guidxilayú riʼ sin qué chuʼ dxi gáticaʼ, sínuque laaca zinándacaʼ cani bisiidibe. Nabe: «Runebiaʼya ca dendxu stinneʼ ne rucaa diaga ca naa, ne rizá nanda ca naa» (Juan 10:16, 27). Ca binni riʼ rusihuínnicaʼ rucaadiágacaʼ laabe ne ruzuubacaʼ stiidxabe, ne zacá rusihuínnicaʼ nácacaʼ discípulo stibe.
7. Ximodo naquiiñeʼ gaca cani zinanda Jesús.
7 Ximódoruʼ naquiiñeʼ gaca guiráʼ cani zinanda Jesús yaʼ. Sicaríʼ na Stiidxaʼ Dios: «Ma cadi ucaa ique tu ni ucuá ique tu chiqué [...]. Naquiiñe ibani tu modo naguixhe Dios ne usihuinni tu dxandí ma adxé laatu yanna, purti ma nayá xpida tu ne runi tu ni jneza» (Efesios 4:22-24). Ca discípulo stiʼ Cristu rúnicabe stipa pur gannaxhiicabe binni, chúʼcabe nayecheʼ, chuʼ dxí ladxidóʼcabe. Ne cadi guixhacaláʼdxicabe stobi, cadi guninácabe binni, gácacabe nachaʼhuiʼ, cadi guireechúcabe de neza sti Dios, gácacabe nadóʼ ne gaca xpiáʼcabe galán. Purtiʼ laacani nga racané laacabe chúʼcabe tobi si (Gálatas 5:22, 23).
8. Xi zazaaca jma binni ca pur cayacanecaʼ grupuhuiiniʼ ni zinanda Cristu ca yaʼ.
8 Jma binni ca racanecaʼ sti grupuhuiiniʼ ni cheʼ guibáʼ ni zaniruʼ lu guendarireeche diidxaʼ ca para ganda gúnicaʼ dxiiñaʼ ca (Mateo 24:14; 25:40). Xcaadxi dendxuʼ ca racané laacabe neca nánnacaʼ ziuu tu gucaalú laacaʼ, purtiʼ ra bizulú ca últimu dxi riʼ Jesús ne ca ángel stiʼ guleecabe Binidxabaʼ ne ca demonio stiʼ de guibáʼ. Xi bizaaca yaʼ. «Lagapa gá si laatu cani nuu ndaani guidxilayú ne ndaani nisadóʼ, purti ma biete binidxaba ra nuu tu ne cayó dí laa ti nanna ma huaxiéʼ dxi napa.» (Apocalipsis 12:7-12.) Nga runi, laga jma cadxiña dxi guinitilú ca cosa malu riʼ la? jma nadipaʼ modo cucaalú Binidxabaʼ ca xpinni Dios.
9. Xi huabeendú ca xpinni Dios pur rucheechecaʼ ca diidxaʼ nacubi ne galán ca, ne xiñee.
9 Neca nadipaʼ modo cucaalú binni cani rucheeche diidxaʼ ca la? qué guiaanadxídicabe de gúnicabe dxiiñaʼ ca. Dxi mayaca guiluxe Primé Guendaridinde ni guca lu guidubi naca Guidxilayú riʼ deruʼ chupa chonna mil si nga cani rucheeche stiidxaʼ Reinu, yanna la? maʼ nácacabe millón de binni, purtiʼ sicaríʼ bizabiruaa Jiobá: «Intiica guiibaʼ gúnicabe para gucaalúcabe lii, qué zabeendúcabe gastiʼ» (Isaías 54:17). Dede tobi de ca hombre ni naca justicia stiʼ ca judíu que bidii cuenta guirutiʼ zanda gucueeza ti dxiiñaʼ ni zeeda de Dios. Sicaríʼ gúdxibe ca fariseu ni bibánicaʼ lu primé siglu que de ca discípulo: «Laudii lugar che cabe. Purti pa binni gudixhe ni zinanda cabe ca la? qué zandaa ibiá ni. Peru pa de Dios zeeda ni la? qué zanda di uchiá tu ni. Ne pa uyubi tu guni tu ni la? zacá zucaa lú tu Dios» (Hechos 5:38, 39).
10. 1) Xi rusihuinni «seña» ni napa jma binni ca. 2) Ximodo cayuni ca xpinni Dios ni na ti ridxi ni zeeda de guibáʼ.
10 Jma binni ca rieeteʼ nápacabe ti seña para guilácabe (Ezequiel 9:4-6). «Seña» ca rusihuinni maʼ bidiicabe laacabe Jiobá, maʼ guyuunísacabe casi xpinni Jesús ne cayúnicabe stipa pur gápacabe ca guenda ni napa cani zinanda Cristu. Ca binni riʼ rúnicabe ni na ti ridxi ni zeeda de guibáʼ ni caníʼ de ca religión ni cadi dxandíʼ ca, cani runi mandar Binidxabaʼ laacaʼ: «Lairee de ndaani guidxi ca, xpinne caʼ, ti qué chuʼ tu lu enda ruchee stini, ne qué inaaze enda naná ni gueeda luguiá ni laatu» (Apocalipsis 18:1-5).
11. Ximodo rusihuinni jma binni ca nácacaʼ xpinni Jiobá.
11 Jesús laaca gudxi cani zinanda laa: «Pa ganaxhii saa tu zacá la? zanna binni xpinne laatu» (Juan 13:35). Peru ca binni ni nuucaʼ lade ca religión stiʼ guidxilayú riʼ la? rutisaacaʼ laacaʼ, stale biaje rúnicaʼ ni purtiʼ si de gadxé guidxi laacaʼ. Stiidxaʼ Dios na: «Rihuinni uná xiiñi Dios ne uná xiiñi binidxabaʼ: tutiica qué guni jneza ne cadi nadxii stobi la? cadi xiiñi Dios laa [...;] [laanu la?] naquiiñe ganaxhii saa nu. Cadi gaca nu casi Caín [biiti biʼchiʼ], purti laa xpinni binidxaba laa» (1 Juan 3:10-12).
12. Lu ca dxi ni nabé naná ni chigueeda ca, xi chiguni Jiobá ne ca religión ni nácacaʼ casi yaga ni rudii cuananaxhi ni qué iquiiñeʼ.
12 Ndiʼ bisiidiʼ Jesús: «Ti yaga ni nazaaca, zudii cuananaxhi galán, peru ti yaga yuudxu la? zudii cuananaxhi ni qué zaquiiñeʼ. Ti yaga ni nazaaca la? qué zacá biʼxhu cuananaxhi stiʼ, ne zaqueca ti yaga qué iquiiñe la? puru biʼxhu ricá lú. Irá yaga ni qué rudii cuananaxhi chaʼhui la? rugá cabe laa para icá gui. Nga runi rabe laatu, pur ni guni cabe zacabiáʼ tu tu laacabe» (Mateo 7:17-20). Pur ni runi ca religión ni nuu lu Guidxilayú riʼ rihuinni nácacani «yaga» yuudxuʼ, nga runi qué zandaa diʼ zunitilú Jiobá cani lu dxi ni nabé naná ca (Apocalipsis 17:16).
13. Ximodo rusihuinni jma binni ca tobi si nuu guiracaʼ ne zuhuaacaʼ «nezalú trono» stiʼ Jiobá.
13 Apocalipsis 7:9-15 cuzeeteʼ chupa chonna razón ni nuu para guilá jma binni ca. Rihuinni zuhuaacabe «nezalú trono» stiʼ Jiobá, ne tobi si nuucabe pur laabe casi tobi lucha ni napa derechu guni mandar. Laacabe nga cani maʼ «udiibi ca xhaba caʼ ne bisiquichi né ca ni rini sti Dendxu huiiniʼ», ne nga rusihuinni nánnacabe pabiáʼ risaca rini bixhii Jesús ora bidii xquendanabani para guxhá donda (Juan 1:29). Maʼ bidiicabe laacabe Dios ne maʼ bisihuínnicabe ni ora guyuunísacabe, nga runi maʼ nayá nuucabe nezalú Dios, nga nga ni zeeda gaca color naquichiʼ stiʼ lari que, ne «cusisaca cabe laa ridxí ne huaxhinni». Ñee nuuruʼ xiixa ni naquiiñeʼ gúniluʼ jma jneza para gácaluʼ tobi de ca binni riʼ la?
Ca ndaayaʼ ni cacaacabe yanna
14. Gunáʼ nga caadxi de ca ndaayaʼ ni huacaa ca xpinni Jiobá dédeca yanna.
14 Zándaca maʼ huayuuyaluʼ xii nga ca ndaayaʼ cacaa ca xpinni Jiobá dede ca yanna. Cásixa lii dxi biziidiluʼ de cani na Dios chiguni, gúnnaluʼ nuu xiixa guizáʼ sicarú ni cabézanu gaca. Nga runi, yanna maʼ nuu xi gucaa íqueluʼ gúniluʼ lu xquendanabániluʼ: gúniluʼ ni na Dios ni dxandíʼ ne cuézaluʼ ne guendanayecheʼ guibániluʼ ndaaniʼ ti paraísu lu Guidxilayú riʼ sin qué chuʼ dxi gátiluʼ. Ya, Rey Jesucristu ca nga «ziné [jma binni ca] ra candani nisa rudii enda nabani» (Apocalipsis 7:17).
15. Xi huabeendú ca testigu stiʼ Jiobá pur zinándacaʼ ca conseju ni cudii Biblia ra cayeeteʼ de política ne modo guibánicaʼ jneza.
15 Tobi de cani guizáʼ sicarú huabeendú jma binni ca nga nadxiisaacabe, nuucabe tobi si neca reechecabe lu guidubi naca Guidxilayú. Cumu ngueca nga ni cusiidiʼ Jiobá guiranu la? zinándanu laaca ca ley ne conseju ni cá lu Stiidxabe, ne laacani nga racanécani laanu ti cadi gudiʼnu lugar guindaasaa modo riníʼ ique ca políticu ca laanu o pur riníʼcabe jma risaca xquídxinu. Laaca zinándanu ni na ca ley risaca gudixhe Dios para ca xpinni ti guibánicaʼ jneza (1 Corintios 6:9-11). Nga runi, lugar de niníʼ íquecabe gadxé gadxé, nilaasaacabe ne ñúnicabe cosa malu ni nabé runi binni guidxilayú la? zanda guininu casi ñaca ñuu xquidxi Jiobá ndaaniʼ ti paraísu. Biiyaʼ ximodo cayeeteʼ ni lu Isaías 65:13, 14.
16. Xi ni galán ndiʼ cabeza jma binni ca gaca, neca cadíʼdicabe lu ca guendanagana ni rapa binni yaʼ.
16 Ca xpinni Jiobá la? nácacaʼ binni ruchee. Ne cadíʼdicabe lu ca guendanagana ni rapa binni, lade cani nga nuu ca desgracia ne ca guendaridinde stiʼ ca guidxi ca. Laaca raca huarácabe, rápacabe stale yuubaʼ ne ráticabe. Peru runi crécabe «zuchaa [Dios] nisa riete lú[cabe], ne ma qué ziuu ru enda guti nin enda ruuna nin enda racaná ladxidóʼ nin yuubaʼ» lu guidxilayú cubi ca (Apocalipsis 21:4).
17. Intiica guizaacanu yanna, xii nga ni nabé sicarú cabeza cani runi adorar Dios ni dxandíʼ ca gaca.
17 Neca gátiluʼ pur guendayooxhoʼ, guendahuará, pur xiixa desgracia o pur guzanándacabe lii la? zandisaʼ Jiobá lii ti chuʼluʼ ndaaniʼ Paraísu ca (Hechos 24:15). Nga runi lu ti mil iza guni mandar Cristu ca zusiidiruʼ Jiobá lii. Jma zannaxhiiluʼ Dios ora gúʼyaluʼ gúnibe cani bizabiruaabe ne jmaruʼ si ora gúnibe lii nazaaca casi chigúnibe guiráʼ binni (Isaías 25:6-9). ¡Guizáʼ sicarú nga ni cabeza xquidxi Dios gaca!
Ni guietenaláʼdxinu
• Xii nga ni guizáʼ risaca caníʼ Biblia chigaca ora ruzeeteʼ ni de jma binni ca.
• Pa dxandipeʼ racaláʼdxinu chuʼnu lade jma binni ni riuulaʼdxiʼ Dios ni rúnicaʼ, xi naquiiñeʼ gúninu yanna.
• Ximodo ruuyaluʼ ca ndaayaʼ ni napa jma binni ca yanna ne cani chiguicaacabe lu guidxilayú cubi stiʼ Dios ca.
[Dibuju/foto ni zeeda lu yaza 123]
Jma binni ni maʼ nácacaʼ millón ca, nuucabe tobi si cayuni adorárcabe Dios ni dxandíʼ ca