Ca binni ni maʼ guníʼ Dios zanda cheʼ ra candani nisa rudii guendanabani
«Zapa Dendxu [...] que laacabe. Ziné laacabe ra candani nisa rudii enda nabani.» (APO. 7:17.)
1. Tuu nga na Stiidxaʼ Dios zeeda gaca ca xpinni Cristu ni bibí ne espíritu, ne xi dxiiñaʼ bidii Jesús laacaʼ.
STIIDXAʼ Dios na zeeda gaca ca xpinni Cristu ni bibí ne espíritu casi «ti mozo ni nuu xpiaaniʼ ne ni runi jneza», ne mozo riʼ nga cayapa guiráʼ ni napa Cristu lu Guidxilayú riʼ. Dxi beeda guuyaʼ Jesús mozo riʼ lu iza 1918 la? biiyaʼ cayúnibe dxiiñaʼ ni bisaanané laabe: gudiibe ni iquiiñeʼ ca xpinni. Ne pur nga bisaanané Jesús laabe «irá ni napa» (biindaʼ Mateo 24:45-47). Nga runi, ante cheʼ ca binni ni bibí ne espíritu ca guibáʼ la? cayacanecaʼ xcaadxi xpinni Cristu lu Guidxilayú riʼ.
2. Xii nga cani napa Jesucristu lu Guidxilayú riʼ.
2 Binni nga riguixhe ximodo iquiiñeʼ guiráʼ ni napa. Zacaca nga runi Jesucristu, Rey ni bicuí Jiobá guibáʼ, purtiʼ laa laaca napa stale cosa lu Guidxilayú riʼ, ne laacani nga guiráʼ xhiiñaʼ Reinu stiʼ Dios ni cayaca ne guiráʼ ca binni ni runi ni na Reinu ca. Lade ca binni riʼ nga nuu cani biiyaʼ Juan lu ti visión, ne guníʼ de laacabe sicaríʼ: «Biya dxie ne biiya zuhuaa jma binni nezalú trono ne nezalú Dendxu huiini que, dede iruti ñanda nugaba laacaʼ. Za ca de irá ladu ne de irá guidxi ne irá idioma riníʼ binni. Nacu cabe lari quichiʼ, ne naaze cabe ziña» (Apo. 7:9).
3, 4. Xi ndaayaʼ nabé sicarú nga napa ca binni ni chiguibani lu Guidxilayú riʼ.
3 Guiráʼ ca binni ni chiguibani lu Guidxilayú riʼ nga cani zeedacaʼ lade «xcaadxi dendxu» ni bizeeteʼ Jesús que, laacabe cabézacabe guibánicabe lu Guidxilayú riʼ sin gáticabe ora maʼ gácani ti paraísu (Juan 10:16). Guirácabe nánnacabe «ziné [Jesús] laacabe ra candani nisa rudii enda nabani» ne nánnacabe «zucuiidxi Dios irá nisa riete lú cabe». Nga runi maʼ «udiibi ca xhaba caʼ ne bisiquichi né ca ni rini sti Dendxu huiiniʼ» (Apo. 7:14, 17). Cumu nápacabe fe lu guendaguti stiʼ Jesús la? para Dios casi ñaca nácucabe lari quichiʼ. Dios maʼ guníʼ rúnicabe ni jneza, nga runi maʼ xhamigu laacabe cásica guca xhamigu Dios Abrahán.
4 Ca binni ni zeeda gaca xcaadxi dendxuʼ ni cadale guiráʼ dxi la? maʼ guníʼ Dios rúnicaʼ ni jneza, nga runi nanna dxíchicaʼ zanda guilacaʼ ora guinitilú guiráʼ ca cosa ni qué iquiiñeʼ lu ca dxi ni «jma nagana» ca (Sant. 2:23-26). Laaca zanda guidxíñacabe Jiobá ne nácacabe ti grupu ni zalá lu Armagedón (Sant. 4:8; Apo. 7:15). Peru cadi nácacabe ti grupu ni runi ni gapa si gana. Laacabe cayúnicabe xhiiñaʼ Dios ne stale gana ne cayúnicabe ni modo cusiene Rey stícabe ni nuu guibáʼ ne modo cusiene ca biʼchiʼ rey ni nabánirucaʼ ndaaniʼ Guidxilayú riʼ.
5. Ximodo cayacané ca binni ni chiguibani lu Guidxilayú riʼ ca biʼchiʼ Cristu ni bibí.
5 Ca xpinni Cristu ni bibí ne espíritu ca nabé rucaalú ca binni ni cayuni ni na Binidxabaʼ laacaʼ. Peru cani bibí riʼ cayacané ca binni ni zeeda gaca xcaadxi dendxuʼ ca laacaʼ. Maʼ huaxieʼ nga ca binni ni bibí ne espíritu ni nuu lu Guidxilayú riʼ, peru ca binni ni chiguibani lu Guidxilayú riʼ cadálecaʼ guiráʼ iza. Qué zanda diʼ chuʼ ti xpinni Cristu ni bibí ndaaniʼ cada neza binni ridagulisaa purtiʼ nuu jma de ti gayuaa mil lu Guidxilayú riʼ. Nga runi de lade guiráʼ binni ni chiguibani lu Guidxilayú riʼ nga caree binnigola ni cayacané cada neza binni ridagulisaa. Ca binnigola riʼ racanecaʼ ca millón de ca xpinni Cristu ni biaanacaʼ lu naʼ «mozo ni nuu xpiaaniʼ ne ni runi jneza» ca.
6. Ximodo bisihuinni ca diidxaʼ ni guníʼ Isaías que zacané xcaadxi dendxuʼ que ca xpinni Cristu ni bibí.
6 Isaías maca guníʼ zacané xcaadxi dendxuʼ que ca xpinni Cristu ni bibí ora bicaa ca diidxaʼ riʼ: «Ndiʼ nga ni maʼ guníʼ Jiobá: “Cani runi dxiiñaʼ ne qué riáxacaʼ de guidxi Egipto ne cani rutoo de Etiopía ne ca sabeu, ca hombre nasoo ca, zaree chúcabe para lii, ne zaca stiluʼ laacabe. Zinándacabe lii”» (Isa. 45:14). Ca xpinni Cristu ni chiguibani lu Guidxilayú riʼ rúnicaʼ guiráʼ ni cusiidiʼ mozo ne Grupu ni Zaniruʼ stiʼ mozo ca, zacá nga casi ñaca zinándacabe laacaʼ. Xcaadxi dendxuʼ ca rúnicaʼ dxiiñaʼ sin guiáxacaʼ, ne de guidubi ladxidoʼcaʼ riquiiñecaʼ stipa sticaʼ ne cani nápacaʼ para ganda guireeche diidxaʼ lu guidubi naca Guidxilayú, nga nga dxiiñaʼ bisaanané Cristu ca binni ni bibí para gúnicaʼ lu Guidxilayú riʼ (Hech. 1:8; Apo. 12:17).
7. Xi para cusiidiʼ cani bibí ne espíritu ca guiráʼ binni ni chiguibani lu Guidxilayú riʼ.
7 Guiráʼ binni ni chiguibani lu Guidxilayú riʼ cadi cayacanésicaʼ ca xpinni Cristu ni bibí ca, sínuque laaca caziidicaʼ xi naquiiñeʼ gúnicaʼ para ganda gácacaʼ ca primé binni ni chiguibani lu Guidxilayú riʼ tiidiʼ si Armagedón. Nga runi naquiiñeʼ guzuhuaacabe dxiichiʼ lu Stiidxaʼ Dios, ne guzuubacabe stiidxaʼ Jesús, peru naquiiñeʼ gúnicabe ni de guidubi ladxidóʼcabe. Guiranu nga zanda gusihuínninu yanna zanda iquiiñeʼ Rey Jesucristu laanu dxi ca. Pa gápanu fe ne qué gusaana de guzúʼbanu diidxaʼ la? zusihuínninu laaca zuzúʼbanu stiidxabe lu guidxilayú cubi ca.
Rusihuinni ca binni ni chiguibani lu Guidxilayú riʼ nápacaʼ fe
8, 9. Ximodo rusihuinni ca binni ni chiguibani lu Guidxilayú riʼ nápacaʼ fe.
8 Ca compañeru stiʼ cani bibí ca rusihuínnicaʼ nápacaʼ fe de stale modo. Ti modo rúnicabe ni nga racanécabe cani bibí ca guireeche stiidxaʼ Reinu stiʼ Dios (Mat. 24:14; 28:19, 20). Ne stobi nga rúnicabe ni gabi Grupu ni Zaniruʼ ca laacabe de guidubi ladxidóʼcabe (Heb. 13:17; biindaʼ Zacarías 8:23).
9 Guionna modo nga zinándacabe ca conseju stiʼ Dios, zacá laaca rusihuínnicabe cayacanécabe ca bíʼchicabe ni bibí. Rúnicabe stipa pur chinándacabe ni na conseju riʼ: «Cani zinanda ni na Espíritu Santu la? nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gál. 5:22, 23). Dxandíʼ nga huaxieʼ binni rihuinni zacá laa, purtiʼ jma «zinanda [binni] ni na ique». Peru guiráʼ binni ni cabeza guibani lu Guidxilayú riʼ maʼ bixélecaʼ de ca binni ni «riuu né ni cadi xheelaʼ, ricá ique ni nadxabaʼ, ne nisi nga si ruyubi guni. Rusisaca bidóʼ ne runi brujeriá. Raca nanalaʼdxi stobi ne ruyubi diidxaʼ, ne rapa envidia, ne ruyubi para laa si. Gasti si acaʼ maca cadxiichi, ne ruyubi xpinni. Rizabilaʼdxi sti stobi, ne ruuti binni. Rixudxi, ne rizá gueelaʼ, ne cadi nga si, sínuque runi ru jma ni cadi jneza» (Gál. 5:19-21).
10. Xi maʼ gudixhe ique guiráʼ ca binni ni chiguibani lu Guidxilayú riʼ guni.
10 Cumu binni ruchee laanu la? nagana huiiniʼ zaca para laanu gusihuínninu ca guenda ni rudii espíritu santu, laaca zaca nagana gusaana de gúninu ni na íquenu ne guixélenu de guiráʼ ca binni ni cayuni ni na Binidxabaʼ. Neca zacá qué riabayúdinu, qué zará diʼ fe stinu ne qué zusaana de gannaxhiinu Jiobá purtiʼ si rucheʼnu guiráʼ ora, o purtiʼ qué randa rúninu guiráʼ ni na Jesús, nin pur xiixa guendahuará nápanu. Nanna dxíchinu zapa Jiobá guiráʼ ca binni ni chiguibani lu Guidxilayú riʼ ora gueeda ca dxi jma nagana ca, casi maʼ bidii stiidxabe gúnibe ni.
11. Xi huaquiiñeʼ Binidxabaʼ para gusirá fe stiʼ ca xpinni Cristu.
11 Neca nánnanu rapa Jiobá laanu la? naquiiñeʼ gatananu purtiʼ Binidxabaʼ peʼ nga xhenemígunu ne laa qué zusaana diʼ de gucaa laanu guchéʼnenu Dios (biindaʼ 1 Pedro 5:8). Binidxabaʼ rucaa laanu guiníʼ íquenu cadi dxandíʼ diʼ nga cani rusiidiʼ mozo ni nuu xpiaaniʼ, ne para gúnibe ni rucaabe ca binni ni guyuu ndaaniʼ xquidxi Dios dxiqué gucaalucaʼ laanu ne laaca riquiiñebe xcaadxi cosa. Peru gástipeʼ huabeendube ne ca binni ni riquiiñebe riʼ. Laaca huacaabe xcaadxi binni sananda laanu, ne nuu tiru randa rucueezabe dxiiñaʼ stinu, peru stale biaje jma nga riguidxi fe stinu ora maʼ gudiʼdiʼ cani. Nga runi, jma ruyúbibe cueebe gana laanu purtiʼ nánnabe zacá jma nagueenda zusaananu de gúninu ni na Dios. Ca xpinni Cristu ni bibani lu primé siglu que gúnnacaʼ zanda gusaana de gúnicaʼ ni na Dios pa gucaadiágacaʼ ca binni ni cuee gana laacaʼ. Laacabe gucuaacabe conseju para chinándacabe ejemplu stiʼ Cristu, purtiʼ laa biʼniʼ huantar neca «bininá cani ruchee» que laa. Yanna, xiñee naquiiñeʼ chinándacabe ejemplu stibe ya. Para cadi guidxágacabe ne cadi cuizácabe atrá (Heb. 12:3).
12. Gunáʼ nga ca conseju ni zeeda lu Biblia ni zanda gacané cani maʼ caree gana.
12 Ñee huayuu ora huaníʼ íqueluʼ maʼ qué zándaruʼ gúniluʼ xhiiñaʼ Dios la? Ñee riuu ora runi sentirluʼ gastiʼ cabeenduluʼ la? Pa zacá ni la? cadi gudiiluʼ lugar cuee Binidxabaʼ gana lii para maʼ cadi gúniluʼ xhiiñaʼ Jiobá jneza. Biindaʼ chaahuiʼ Biblia, biʼniʼ orar de guidubi ladxidoʼloʼ, guyé guiráʼ ca guendaridagulisaa ca ne bidxaaga ca xpinni Cristu. Guiráʼ ndiʼ zacané lii para cadi guidxágaluʼ ne cadi cuísaluʼ atrá. Jiobá maʼ bidii stiidxaʼ zacané ca xpinni para gápacaʼ stipa sti biaje, ne laabe rúnibe guiráʼ ni riniʼbe (biindaʼ Isaías 40:30, 31). Cadi gusaana de gúniluʼ xhiiñaʼ Reinu; cadi gunítiluʼ tiempu lu ca cosa ni qué risácapeʼ; bicaa ique gacaneluʼ xcaadxi binni. Pa guʼnuʼ zacá la? zápaluʼ stipa para guni huantarluʼ neca chuʼ tu cuee gana lii (Gál. 6:1, 2).
Zalácabe lu ca dxi jma nagana ne ziuucabe lu guidxilayú cubi
13. Xi dxiiñaʼ zapa cani guilá lu Armagedón.
13 Tiidiʼ si Armagedón ziasa stale binni ni cadi nachaʼhuiʼ, ne napa xidé gánnacabe gunáʼ nga ca neza stiʼ Jiobá (Hech. 24:15). Qué zaziidisícabe ximodo rulá guendaguti stiʼ Jesús binni, sínuque laaca zánnacabe naquiiñeʼ gápacabe fe lu guendaguti ca, purtiʼ zacatiʼ nga zacaneni laacabe. Nápacabe xidé gusaanacabe guiráʼ ni cadi jneza biʼniʼ crécabe dxiqué, ne laaca zusaanacabe modo bibánicabe. Laaca napa xidé gusihuínnicabe maʼ gadxé laacabe ti guihuinni dxandíʼ maʼ xpinni Cristu laacabe (Efe. 4:22-24; Col. 3:9, 10). Guiráʼ cani guilá lu Armagedón zápacaʼ stale dxiiñaʼ ora maʼ gudiʼdiʼ ni. Nabé nayecheʼ zúnicabe xhiiñaʼ Jiobá dxi ca, purtiʼ maʼ qué ziuu binni malu para guchiiñaʼ laacabe.
14, 15. Xi zanda gusíʼdinu ca binni nachaʼhuiʼ ni guibani sti biaje, ne xi zanda gusiidicabe laanu.
14 Ca xpinni Dios ni bizuubacaʼ stiidxabe ne gúticaʼ ante gueeda Jesús ndaaniʼ Guidxilayú riʼ para guni xhiiñaʼ Bixhoze la? laaca nuuruʼ stale ni naquiiñeʼ guiziidicaʼ ora guiásacaʼ sti biaje. Zánnacabe tuu nga Mesías ni bieeteʼ gueeda ne gulézacabe laa que, peru qué ñanda ñunibiáʼcabe laa. Dxi bibani ca binni riʼ bisihuínnicaʼ dxandíʼ racaláʼdxicaʼ gusiidiʼ Jiobá laacaʼ. Ñee ruxuíʼluluʼ pabiáʼ ziéchenu nga gusiénenu Daniel ximodo guca ni na ca diidxaʼ riguixhená ni bicaa, peru nin laa qué ñene cani dxi bibani la? (Dan. 12:8, 9.)
15 Neca zusíʼdinu stale cosa galán ca binni ni nachaʼhuiʼ ni guiasa ca la? laacabe laaca zusiidicabe laanu stale cosa. Zanda guicábicabe guiráʼ ni guinabadiidxanu laacabe de ca historia ni qué rieetepeʼ lu Biblia. ¡Guníʼ ique pabiáʼ sicarú nga gucaadiáganu Juan ni Riguunisa que guiníʼ guiráʼ ni nanna de Jesús xprimu que! Nanna dxíchinu nabé zacané guiráʼ ni gusiidiʼ ca xpinni Dios ni bizuubaʼ diidxaʼ ca laanu para guiene chaahuinu Stiidxaʼ Dios. Ca xpinni Jiobá ni guti dxiqué ne cani gati lu ca últimu dxi riʼ zabánicaʼ sti biaje ne maʼ qué ziuuruʼ dxi gáticaʼ. Guirácabe bibánicabe ndaaniʼ ti guidxilayú ra runi mandar Binidxabaʼ dxi bizulú cayúnicabe ni na Jiobá. ¡Nabé sicarú zuni sentírcabe gúnicabe ni na Dios ndaaniʼ guidxilayú cubi stiʼ, ra maʼ qué ziuuruʼ guiráʼ cosa malu nuu yanna riʼ! (Heb. 11:35; 1 Juan 5:19.)
16. Xiná ca diidxaʼ riguixhená zeeda lu Biblia zazaaca dxi cuidxi Dios cuenta binni.
16 Dxi maʼ cabidxi Dios cuenta binni, ziuu ti ora zaxeleʼ caadxi rollo, ca rollo riʼ ne Biblia nga cani chiguiquiiñeʼ para gaca juzgar ca binni ni guibani lu Guidxilayú riʼ. Zacá zahuinni pa zanda guicaacabe guendanabani ni qué zaluxe ca (biindaʼ Apocalipsis 20:12, 13). Dxi cuidxi Dios cuenta binni la? guiráʼ ca binni ni cueza lu Guidxilayú riʼ zápacaʼ stale tiempu para gusihuínnicaʼ lu xquendanabánicaʼ pa Jiobá nga napa derechu guni mandar guibáʼ ne lu guidubi naca Guidxilayú. Cada tobi de laacabe zusihuinni pa zuni ni na Reinu stiʼ Dios ne pa zudii lugar chiné Dendxuhuiiniʼ ca laa «ra candani nisa rudii enda nabani», o pa zudxiidéchecaʼ Reinu ca ne qué guzuubacaʼ stiidxaʼ ni (Apo. 7:17; Isa. 65:20). Ora maʼ guiluxe dxi ca la? maʼ qué zapa binni pecadu ni bisaanané Adán laacaʼ ne maʼ qué ziuu binni malu ni gucaa laacaʼ gúnicaʼ xiixa, nga runi ni cuícabe gúnicabe maʼ de laacabe ziale ni. Guirutiʼ tu zaníʼ cadi jneza modo biʼniʼ juzgar Jiobá binni. Ca binni si ni qué naʼ guzuubaʼ diidxaʼ nga zanitilucaʼ tobi si tiru (Apo. 20:14, 15).
17, 18. Xiñee racalaʼdxiʼ ca xpinni Cristu ni cheʼ guibáʼ ne cani chiguibani ndaaniʼ Guidxilayú gueeda dxi cuidxi Dios cuenta binni.
17 Ca xpinni Cristu ni bibí pur espíritu ni nabani yanna riʼ maʼ guníʼ Dios jneza ni rúnicaʼ ne zanda guni mandarcaʼ lu Reinu stiʼ Dios, nga runi nabé maʼ rápacaʼ gana guni mandarcaʼ lu Guidxilayú riʼ ora maʼ gaca juzgar binni. ¡Guizáʼ ziéchecabe gúnicabe nga! Ne nga nga ni rucaa laacabe gúnicabe ni na conseju bidii Pedru ca biʼchiʼ ni bibani lu primé siglu que: «Lauyubi usihuinni tu dxandí uníʼ né Dios laatu ne ulí laatu. Zacá qué ziuu dxi guiaba tu, ne zuxhele ndaga Dios puerta para laatu ora ma chi chuu tu ra nuu Jesucristu Señor stinu ni bilá laanu» (2 Ped. 1:10, 11).
18 Guiráʼ ca binni ni chiguibani lu Guidxilayú riʼ nabé riéchecaʼ gánnacaʼ zuni mandar ca bíʼchicaʼ ne ca bizáʼnacaʼ guibáʼ, ne maʼ gudixhe íquecaʼ gacanecaʼ laacabe lu guiráʼ cosa. Cumu maʼ xhamígucabe Dios la? racaláʼdxicabe gúnicabe xhiiñaʼ dede biaʼ gándatiʼ ca dxi riʼ. Ne dxi cuidxi Dios cuenta binni, dxi chiné Jesús laacabe ra candani nisa rudii guendanabani zúnicabe guiráʼ ni gabi Jiobá laacabe de guidubi ladxidóʼcabe ne zúnicabe ni ne stale guendanayecheʼ. ¡Guizáʼ ziéchecabe ora gabi Jiobá laacabe zanda guibánicabe sin gáticabe ndaaniʼ Guidxilayú riʼ para gúnicabe ni na! (Rom. 8:20, 21; Apo. 21:1-7.)
Rietenalaʼdxuʼ la?
• Xi guiráʼ nga ni napa Jesús lu Guidxilayú riʼ.
• Ximodo cayacané ca binni ni chiguibani lu Guidxilayú riʼ ca xpinni Cristu ni cheʼ guibáʼ.
• Xi ndaayaʼ napa ca binni ni chiguibani lu Guidxilayú riʼ ne xi cabézacabe gaca para laacabe.
• Xi runi sentirluʼ ora guiníʼ íqueluʼ de dxi cuidxi Dios cuenta binni.
[Dibuju/foto ni zeeda lu yaza 25]
Ca binni ni chiguibani lu Guidxilayú riʼ maʼ gudiibicaʼ xhábacaʼ ne maʼ bisiquíchicani ne rini stiʼ Dendxuhuiiniʼ
[Dibuju/foto ni zeeda lu yaza 27]
Xi ziuuláʼdxiluʼ guinabadiidxaluʼ ca binni ni nachaʼhuiʼ ni chiguibani sti biaje ca