Capítulo 16
Lagannaxhiisaa laatu de guidubi ladxidoʼto
1. Xii nga ni jma ridxagayaa ca binni ni deruʼ primé checaʼ ca guendaridagulisaa roʼ stiʼ ca testigu stiʼ Jiobá.
NI JMA ridxagayaa ca binni ni deruʼ primé checaʼ ca guendaridagulisaa stiʼ ca testigu stiʼ Jiobá nga modo rihuinni nadxiisaacabe. Ruuyacaʼ zacá ni purtiʼ sicarú modo ridxagalúcabe binni ne modo nácacabe ne xcaadxi de laacabe. Ni runi ca Testigu riʼ laaca ribídxini cani rié ca guendaridagulisaa roʼ stícabe. Sicaríʼ na ti periódicu de tobi de ca guendaridagulisaa ca: Guirutiʼ nuu raqué naxudxi ne uduʼbaʼ guixi. Guirutiʼ tu cayuni ridxi ne culaanáʼ stobi. Guirutiʼ tu cuguu dí ne caníʼ xiixa chiste nin diidxaʼ guidxa nin tu caníʼ diidxaʼ dxabaʼ. Guirutiʼ tu caguʼbaʼ gueza o cusaʼbiʼ lata lu ca guixi gáʼ que. Qué huahuinni diʼ xiixa zacá. Guca ni zacá purtiʼ nadxiisaa ca binni que, ne cumu ora nadxiiluʼ stobi la? «qué zaníuʼ xiixa diidxa para guniná lu laa, [ne] qué zuyubu para lii siouʼ» (1 Corintios 13:4-8).
2. 1) Xi naquiiñeʼ gusihuínninu ra jma guiniisinu lu Stiidxaʼ Dios. 2) Ximodo nga naquiiñeʼ gannaxhiinu casi biʼniʼ Cristu.
2 Pur nadxiicabe casi ñaca bichipécabe ne bizáʼnacabe nga rihuinni dxandíʼ xpinni Cristu laacabe (Juan 13:35). Laga jma guiniisinu lu Stiidxaʼ Dios la? jma zusihuínninu nadxiinu binni. Apóstol Pablu gunábabe Jiobá gacané ca bíʼchibe ni zinanda Cristu ti «jma rusi ganaxhii» saacaʼ (Filipenses 1:9). Ne apóstol Juan guníʼ naquiiñeʼ gannaxhiinu neca gacananu. Sicaríʼ bicaabe: «Biluíʼ Jesucristu laanu xi pe nga enda ranaxhii ra guti pur laanu. Ne laanu laca naquiiñe quixhe nu xpida nu pur stobi» (1 Juan 3:16; Juan 15:12, 13). Ñee dxandíʼ nga nudiʼnu xquendanabáninu pur ca bíʼchinu ne bizáʼnanu ni zinanda Cristu la? Nécaxa cadi guiráʼ diʼ ora nga caquiiñepeʼ gúninu ni, peru dede pabiáʼ nga rúninu stipa pur gacanenu laacabe yanna, neca naná gácani para laanu.
3. 1) Ximodo ndiʼ jma zanda gusihuínninu nadxiinu cani zinanda Cristu. 2) Xiñee nabé naquiiñeʼ gannaxhiisaanu laanu ca dxi riʼ.
3 Cadi riquiiñeʼ si gusihuínninu racananu pur racanenu ca bíʼchinu ne ca bizáʼnanu ni zinanda Cristu, sínuque laaca naquiiñeʼ gusihuínninu dxandíʼ nadxiinu laacabe. Stiidxaʼ Dios cayabi laanu gúninu sicaríʼ: «Laganaxhii saa casi enda biʼchiʼ» (Romanos 12:10). Nuu caadxi binni nga ni nadxiinu zacá. Peru, ñee ñanda ñannaxhiinu jma binni la? Cumu maʼ cadxiña dxi guinitilú guiráʼ cani nuu ndaaniʼ Guidxilayú riʼ la? naquiiñepeʼ nga jma guidaagunu ca bíʼchinu ne ca bizáʼnanu ni zinanda Cristu. Biblia na: «Ma zeda dxiña dxi iluxe irá xixé ni nuu ndaani guidxilayú. [...] Ne ni jma naquiiñe la? ganaxhii saa tu, purti pa nadxii tu stobi la? neca uchee né laatu qué zuquixe tu ni laa» (1 Pedro 4:7, 8).
Ora gucheʼnu
4. 1) Xiñee ziuu ora gucheʼnenu ca binni ridagulisaa. 2) Xi zabeendunu pa chinándanu ca conseju stiʼ Biblia, neca cadi guiráʼ ora ziuuláʼdxinu gúninu ni.
4 Cumu nácarunu binni ruchee la? ziuu tiru zucheʼnenu ca bíʼchinu ne ca bizáʼnanu ni zinanda Cristu, ne laacabe laaca zucheenecabe laanu lu intiica cosa (1 Juan 1:8). Xi gúninu ora guizaaca ndiʼ yaʼ. Lu Stiidxaʼ Dios cá xi gúninu, peru cadi guiráʼ diʼ ora riuuláʼdxinu chinándanu ni purtiʼ binni ruchee laanu (Romanos 7:21-23). Peru pa gúninu stipa pur chinándanu ca conseju stiʼ Biblia la? zusihuínninu dxandíʼ racaláʼdxinu gúninu ni riuulaʼdxiʼ Jiobá ne jma zannaxhiinu sti binni.
5. Pa guniná tuuxa binni laanu, xiñee cadi naquiiñeʼ guquíxenu ni laabe yaʼ.
5 Ora guninácabe laanu la? nuu tiru ruyúbinu modo guquíxenu ni laacabe. Peru nga qué liica zacané laanu. Pa caquiiñeʼ gácabe xiixa pur ni bíʼnibe la? gusaananu ni lu náʼ Dios (Proverbios 24:29; Romanos 12:17-21). Xcaadxi binni maʼ qué riná guidxaaga tuuxa ni bininá laa. Peru laanu cadi naquiiñeʼ diʼ gácanu zacá ne ca bíʼchinu ne ca bizáʼnanu ni zinanda Cristu, purtiʼ tobi de cani canabaʼ Dios gúninu para chuuláʼdxibe modo runi adorarnu laabe nga gannaxhiinu laacabe (1 Juan 4:20). Nga runi, Pablu bicaa sicaríʼ: «Cadi ixhacalaʼdxi saa tu, ne laguni perdonar ni guni stobi laatu. Casi bini perdonar [Jiobá] laatu, zacaca laguni» (Colosenses 3:13). Ñee zanda chinándaluʼ conseju riʼ la?
6. 1) Panda tiru nga naquiiñeʼ gutiidiláʼdxinu ni guni cani zinanda Cristu laanu yaʼ. 2) Xii nga naquiiñeʼ guiénenu ti ganda gutiidiláʼdxinu ni gúnicabe laanu.
6 Xi naquiiñeʼ gúninu pa tuuxa gucheené laanu stale tiru, peru ni rúnibe riʼ cadi málupeʼ ni para gábinu naquiiñeʼ cueecabe laabe de ndaaniʼ xquidxi Jiobá yaʼ. Ora guníʼ apóstol Pedru gutiidiláʼdxinu ni gúnicabe laanu «biaʼ gadxe» tiru la? Jesús gudxi laabe: «Cadi gadxe si, sínuque setenta [n]e gadxe». Guníʼsibe nga bisihuínnibe pabiáʼ stale nga nuzáʼbinu Dios que ni guzaabi binni laanu (Mateo 18:21-35). Stale modo nga rucheʼnenu Jiobá guiráʼ dxi ne sin gudiʼnu cuenta, cásixa ora guyúbinu para laasinu, ora qué gúninu ni naquiiñeʼ gúninu, ne pur ni rininu o ni riníʼ íquenu (Romanos 3:23). Peru neca zacá cadi cusaanabe de guilaseláʼdxibe laanu (Salmo 103:10-14; 130:3, 4). Nga runi, ribézabe laaca guilaseláʼdxinu binni (Mateo 6:14, 15; Efesios 4:1-3). Pa gúninu nga la? zusihuínninu nadxiinu laacabe ne qué ziúʼnenu laacabe xiana (1 Corintios 13:4, 5; 1 Pedro 3:8, 9).
7. Xi naquiiñeʼ gúninu pa tuuxa de ca xpinni Cristu cadxiichiné laanu yaʼ.
7 Nuu biaje neca laanu cadi cadxiichinenu tuuxa de ca xpinni Cristu peru zándaca gudiʼnu cuenta laa cadxiichiné laanu. Nuu chupa cosa ni zanda gúninu: cadi guquíxenu laabe ni bíʼnibe laanu, casi na 1 Pedro 4:8, o guyúbinu guienenenu laabe para chuʼnu galán ne laabe (Mateo 5:23, 24).
8. Pa ti xpinni Cristu guni xiixa ni guchiichi laanu, xi zanda gúninu.
8 Zándaca ti xpinni Cristu cayuni xiixa ni cuchiichi laanu ne laaca cuchiichini xcaadxi binni. Ñee cadi jma jneza nga guinínenu laabe la? Zándaca jneza ni. Pa liipeʼ gusiéneluʼ laabe ni cayúnibe ca ne guiniʼluʼ galán la? zándaca guiénebe. Peru ante guiníʼneluʼ laabe naquiiñeʼ guiníʼ íqueluʼ: «Ñee cadi zinándabe ni na Stiidxaʼ Dios pur modo cayúnibe ca o naa si nga cayuuyaʼ cadi jneza ni purtiʼ maʼ gadxé modo biniiseʼ que laabe la?». Gupa lii ti cadi guiniʼluʼ cadi jneza nga ni cayuni xcaadxi binni purtiʼ si lii nga raʼbuʼ zacá nga laani (Santiago 4:11, 12). Jiobá rudii lugar guidxiña guiráʼ clase binni laa neca gadxé gadxé modo biniisicaʼ ne runi huantarbe laacaʼ laga guiniisicaʼ lu Stiidxabe.
9. 1) Tuu nga cani naquiiñeʼ guiniʼné ca binni ridagulisaa ora gúnicaʼ xiixa ni nabé naxoo. 2) Pora ndiʼ naquiiñeʼ cheʼ ni gucaná riʼ ra nuu ni bininá laabe, ne xi para yaʼ.
9 Pa tobi de ca binni ridagulisaa ca guni xiixa ni nabé naxoo, casi gatanebe tuuxa ni cadi xheelabe la? nagueendaca naquiiñeʼ guiníʼnecabe laabe. Tu naquiiñeʼ guni ni yaʼ. Ca binnigola ca (Santiago 5:14, 15). Peru, ora ti binni gucheené tuuxa pur negocio o pur guiníʼ mal de laabe la? ni gucaná riʼ naquiiñeʼ guiníʼnebe primeru ni bininá laabe ca laasicabe (Mateo 18:15). Pa qué guicaabe diidxaʼ la? ni gucaná ca naquiiñeʼ guni casi cá lu Mateo 18:16, 17. Cumu nadxiinu bíʼchinu o bizáʼnanu ni bichee ca ne racaláʼdxinu gacanenu laabe la? zuyúbinu modo ganda chindanu ndaaniʼ ladxidoʼbe (Proverbios 16:23).
10. Ximodo naquiiñeʼ guidúʼyanu ora guchee tuuxa yaʼ.
10 Ora guchee tuuxa, pa naxoo ni bíʼnibe o coʼ la? gúninu stipa pur guiénenu ximodo ruuyaʼ Jiobá ni. Laabe qué riuuláʼdxidibe nin ti cosa malu ni runi binni, ne laabe maʼ nánnabe pora nga cueebe de ndaaniʼ xquídxibe ca binni ni cucheepecaʼ ne qué nacaʼ gaca arrepentircaʼ. Peru cadi guiaandaʼ laanu guiranu nga rucheʼnu ne óraca nga riquiiñenu guilaselaʼdxiʼ Dios laanu ne ribézanu cadi guidxiichinégabe laanu. Zacá nga caguixhe Jiobá nezalunu xi naquiiñeʼ gúninu ora tuuxa gucheené laanu. Pa rilaseláʼdxinu binni la? zusihuínninu nadxiinu binni cásica laabe (Efesios 5:1, 2).
Guyúbinu modo gannaxhiinu jma binni
11. Xiñee gudxi Pablu ca binni ni guyuu ndaaniʼ guidxi Corinto que gannaxhiicaʼ laabe yaʼ.
11 Pablu gudiʼdiʼ stale beeu para bidii stipa ca binni ridagulisaa ni guyuu Corinto que, ti guidxi stiʼ Grecia. Nabé bíʼnibe stipa pur gacanebe cani zinanda Cristu ni nuu raqué, ne gunnaxhiibe laacaʼ. Peru chupa chonna de ca binni que huaxiéʼ gunnaxhiicaʼ laabe ne nabé guninacaʼ laabe, ngue runi Pablu gudxi laacabe gannaxhiicabe laa (2 Corintios 6:11-13; 12:15). Guiranu naquiiñeʼ guʼyaʼ chaahuinu dede pabiáʼ nga nadxiinu xcaadxi binni ne guyúbinu ximodo gannaxhiinu jma binni (1 Juan 3:14).
12. Ximodo zanda gannaxhiinu jma cani ridagulisaanenu.
12 Ñee raca nagana para laanu guidxaaganu caadxi de cani ridagulisaanenu la? Pa zacá ni la? gúninu stipa pur cadi gulábipenu modo nácacabe cásica ñuláʼdxinu ñúnicabe laanu, ne zacá jma galán zanínenu laacabe. Ne pa guidúʼyanu ca cosa galán ni rúnicabe la? zuchaʼnu modo nácanu ne laacabe ne zannaxhiinu laacabe jma (Lucas 6:32, 33, 36).
13. Ximodo zanda gannaxhiinu xcaadxi de cani ridagulisaanenu yaʼ.
13 Naquiiñeʼ gánnanu cadi guiráʼ diʼ ora zanda gúninu ni racaláʼdxinu para chuʼnu galán ne guiráʼ binni. Zándaca cadi guiráʼ diʼ ca bíʼchinu ne ca bizáʼnanu nga zanda ugapadiúxinu cada guidagulisaanenu laacaʼ ne nuu tiru cadi guirácabe nga zanda guni invitarnu ora gúninu xiixa guendaró ra lídxinu. Peru, ñee ñanda ñannaxhiinu xcaadxi binni ra nibeenu ti tiempuhuiiniʼ para ñacabiaʼnu tuuxa de cani ridagulisaanenu la? Maʼ guníʼ íquenu guni invitarnu tuuxa ni huaxiéʼ runibiaʼnu para gucheechenenu laa diidxaʼ la?
14. Ora nuunu lade xcaadxi xpinni Cristu ni qué racabiaʼnu, ximodo zanda gannaxhiinu laacabe de guidubi ladxidoʼno.
14 Ca guendaridagulisaa roʼ ni rápanu ca racanécani laanu ti ganda gannaxhiinu xcaadxi bíʼchinu ne bizáʼnanu. Nécapeʼ qué zanda gunibiaʼnu guiráʼ ni nuu raqué, purtiʼ nabé stálecabe, peru zanda gusihuínninu ruyúbinu chúʼcabe jma galán que laanu. Laaca zusihuínninu rizaaláʼdxinu binni pa galaa dxi ca guyúbinu guinínenu cani nuu gaxha de laanu ti gacabiaʼnu laacabe. Ziuu ti dxi guiráʼ xixé cani nuu lu Guidxilayú riʼ zaca bíʼchinu ne zaca bizáʼnanu ne ziuʼnu tobi si para guni adorarnu Dios ni dxandíʼ ne Bixhoze cada tobi de laanu. ¡Guizáʼ ziéchenu nga ora gacabiáʼsaanu! Cumu nadxiinu laacabe stale la? nga zucaa laanu gúninu ni. Xiñee cadi guzulunu dédeca yanna yaʼ.
Ni guietenaláʼdxinu
• Ora guchee tuuxa de ca xpinni Cristu, xi naquiiñeʼ gúnicabe, ne xiñee.
• Ra jma ziguiniisinu lu Stiidxaʼ Dios, xi guiráʼ modo nga zanda gannaxhiinu jma.
• Xi zanda gúninu para gannaxhiinu de guidubi ladxidoʼno guiráʼ ca xpinni Cristu ne cadi cani jma si ridxaaganu yaʼ.
[Dibuju/foto ni zeeda lu yaza 148]
Stale modo zanda gusihuínninu nadxiinu ca xpinni Cristu, cásixa ora guidagulisaanenu laacabe