Xi zanda gúninu para cadi gusaana de gannaxhiisaanu

1, 2. a) ¿Xiñee guníʼ apóstol Pablo «jma risaca» guendarannaxhii? b) ¿Xi chonna pregunta zacábinu?

ORA guníʼ apóstol Pablo de fe, esperanza ne amor, biluxe guniʼbe sicaríʼ: «Ni jma risaca lade guionnaʼ ni nga amor» (1 Cor. 13:13). ¿Xiñee guníʼ Pablo jma risaca guendarannaxhii yaʼ? Purtiʼ huidxegá zaca cumplir ca promesa ni caníʼ de ti guidxilayú cubi ne maʼ cadi caquiiñeʼ gápanu fe lu esperanza ni nápanu yanna. Peru qué zusaana de gannaxhiinu Jehová ne binni. Zaroobaʼ guendarannaxhii ni nápanu laacabe para siempre.

² Cumu qué zusaana de gusihuínninu guendarannaxhii la? guicábinu chonna pregunta. Primé, ¿xiñee caquiiñeʼ gannaxhiisaanu? Guiropa, ¿ximodo naquiiñeʼ guluinu nadxiisaanu? Ne, guionna, ¿xi zanda gúninu para cadi gusaana de gannaxhiisaanu?

¿XIÑEE CAQUIIÑEʼ GANNAXHIISAANU?

3. ¿Xi razón nápanu para gannaxhiisaanu?

³ ¿Xiñee nabé risaca gannaxhiisaanu? Tobi de ca razón ca nga, purtiʼ ra guluinu nadxiisaanu nga zusihuínninu dxandíʼ xpinni Cristu laanu. Gudxi Jesús ca apóstol stiʼ ca diidxaʼ riʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:35). Ne laaca racané guendarannaxhii ca laanu chuʼnu tobi si. Ngue runi guníʼ Pablo «dxandíʼ racané ni binni chuʼ unidu» (Col. 3:14). Ne nápanu stiʼ razón nabé risaca para gannaxhiisaanu. Bicaa apóstol Juan ra nuu ca xpinni Cristu ca diidxaʼ riʼ: «Tutiica gannaxhii Dios, laaca naquiiñeʼ gannaxhii hermanu stiʼ» (1 Juan 4:21). Nga runi, ora rusihuínninu nadxiinu ca hermanu, laaca rusihuínninu nadxiinu Jehová.

4, 5. Bizeeteʼ ti ejemplu ni rusihuinni pa nadxiinu Dios laaca nadxiinu ca hermanu stinu.

⁴ ¿Ximodo ra gannaxhiinu Dios laaca rusihuínninu nadxiinu ca hermanu stinu yaʼ? Para guiénenu ni la? guiníʼ íquenu ximodo nuu conectadu ladxidoʼno ne xcaadxi parte de xcuérpunu. Zanda ganna ti doctor ximodo nuu ladxidoʼno ora guicaa pulsu yanninanu. ¿Xi rizíʼdinu de ejemplu riʼ yaʼ?

⁵ Cásica ti doctor zanda ganna ximodo nuu ladxidóʼ ti binni ra guʼyaʼ pa débil o pa nadipaʼ nuu pulsu stibe, laanu laaca zanda gánnanu pabiáʼ nadxiinu Jehová ora guidúʼyanu pabiáʼ nadxiinu xcaadxi. Pa guidúʼyanu maʼ huaxiéʼ nadxiinu ca hermanu stinu la? zándaca laaca maʼ huaxiéʼ nadxiinu Jehová. Peru pa maʼ biaʼnu gusihuínninu nadxiinu ca hermanu stinu la? nga rusihuínninu guizáʼ nadxiinu Jehová.

6. ¿Xiñee naquiiñeʼ chuʼnu xizaa pa maʼ huaxiéʼ nadxiinu ca hermanu stinu? (1 Juan 4:​7-9, 11).

⁶ ¿Xiñee naquiiñeʼ chuʼnu xizaa pa maʼ huaxiéʼ nadxiinu ca hermanu stinu yaʼ? Purtiʼ pa maʼ huaxiéʼ nadxiinu ca hermanu stinu la? zusihuinni ni maʼ cusaana de chuʼnu gaxha de Jehová. Ca diidxaʼ ni guníʼ apóstol Juan rusihuinni zacá ni, laabe guniʼbe: «Pa cadi nadxiibe hermanu stibe nin ne ruuyabe laa, ximodo zanda gannaxhiibe Dios pa qué ruuyabe laa» (1 Juan 4:20). ¿Xi rusiidiʼ ni laanu yaʼ? Rusiidiʼ ni laanu pa gannaxhiisaanu, zusiéchenu Jehová (biindaʼ 1 Juan 4:​7-9, 11).

¿XIMODO ZANDA GUSIHUÍNNINU NADXIISAANU?

7, 8. ¿Ximodo zanda gusihuínninu nadxiisaanu?

⁷ Stale biaje riete lu Biblia mandamientu riʼ: «Lagannaxhiisaa» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Peru de ndaaniʼ ladxidoʼno nga riale guendarannaxhii ca; guirutiʼ zanda guʼyaʼ ni. Yanna, ¿ximodo zanda gusihuínninu nadxiinu ca hermanu stinu yaʼ? Zanda gusihuínninu ni pur ca diidxaʼ guininu ne pur ni gúninu.

⁸ Nuu stale modo zanda gusihuínninu nadxiinu ca hermanu stinu. Guidúʼyanu caadxi textu ni zeeda lu Biblia ni zacané laanu gúninu ni. «Naquiiñeʼ guiniʼtu ni dxandíʼ entre laatu» (Zac. 8:16). «Lachuu tobi si» (Mar. 9:50). «Primeca laatu nga gusihuínnitu runi respetartu xcaadxi binni» (Rom. 12:10). «Lachuu nayecheʼ ora guidxaagalutu stobi» (Rom. 15:7). «Laguni [ . . . ] perdonar» (Col. 3:13). «Pa nuu tu cadiʼdiʼ ra nagana la? lagacané laa» (Gál. 6:2). «Laguiníʼ guiráʼ ni maʼ bizéʼtenu riʼ para gatadxí ladxidoʼto» (1 Tes. 4:18). «Lagacané stobi guzuhuaa chaahuiʼ» (1 Tes. 5:​11, nota). «Cada tobi guni orar pur stobi» (Sant. 5:16).

9. ¿Xiñee rusihuínninu nadxiinu xcaadxi ora riguixhedxinu ladxidoʼcaʼ? (Biiyaʼ ca imagen ca).

⁹ Yanna, guidúʼyanu tobi de ca modo zanda guluinu guendarannaxhii ni bizéʼtenu lu párrafo gudiʼdiʼ ca. Guníʼ Pablo: «Gatadxí ladxidoʼto». Ora quixhedxinu ladxidóʼ xcaadxi, ¿xiñee nácani ti modo risaca gusihuínninu nadxiinu laacabe yaʼ? Ti libru ni caníʼ de Biblia cusiene diidxaʼ griegu ni biquiiñeʼ Pablo para guiníʼ «quixhedxí ladxidóʼ» riniʼni «chuʼnu gaxha de tuuxa para cuʼnu gana laa ora cadiʼdiʼ lu guendanagana». Nga runi, ora quixhedxinu ladxidóʼ tuuxa hermanu ni cayacaná cayacanenu laa cadi guiree de lu neza ni ziné lu guendanabani. Ne cada biaje quixhedxinu ladxidóʼ ti hermanu o ti hermana rusihuínninu nadxiinu laa (2 Cor. 7:​6, 7, 13).

10. ¿Xiñee caquiiñeʼ guianu binni para ganda quixhedxinu ladxidóʼ?

¹⁰ ¿Xiñee caquiiñeʼ guianu binni para quixhedxinu ladxidóʼ yaʼ? Ora ti binni riáʼ tuuxa ni cayacaná racalaʼdxiʼ quixhedxí ladxidóʼ binni ca ne guni xiixa para gacané laabe. Nga runi, primé rianu ne despué riguixhedxinu ladxidoʼbe. Ngaca nga rizaaca né Jehová. Bisiene Pablo riáʼ Jehová binni ne nga rucaa laabe quixhedxibe ladxidoʼcaʼ. Guniʼbe naca Jehová «Bixhózenu [ . . . ] ne riá laanu ne riguixhedxí ladxidoʼno» (2 Cor. 1:3). Ra guníʼ Pablo ca diidxaʼ «riá laanu» caniʼbe guizáʼ riáʼ Jehová laanu. Ne ruzeetebe naca Jehová «Bixhózenu» ne «riáʼ laanu» purtiʼ riale de laabe guiabe binni ne nga rucaa laabe quixhedxibe ladxidoʼno «lu guiráʼ guendanagana ridxaagalunu» (2 Cor. 1:4). Cásica ratadxí ladxidóʼ ti binni ni cayati nisa ora rindá ti lugar ra cadá nisa la? zaqueca nga riguixhedxí Jehová ladxidóʼ tuuxa ni cayacaná. ¿Xi zacané laanu guianu ne quixhedxinu ladxidóʼ xcaadxi cásica runi Jehová ni yaʼ? Gápanu cualidad ni zacané laanu quixhedxinu ladxidóʼ tuuxa. Guidúʼyanu caadxi de laacani.

11. Casi ná Colosenses 3:12 ne 1 Pedro 3:​8, ¿xi zacané laanu gannaxhiinu ne quixhedxinu ladxidóʼ xcaadxi?

¹¹ ¿Xi zacané laanu para cadi gusaana de gannaxhiisaanu ne quixhedxisaanu ladxidoʼno guiráʼ dxi yaʼ? Guni sentirnu ni cayuni sentir stobi, gannaxhiisaanu casi nadxiinu familia stinu ne gácanu nachaʼhuiʼ (biindaʼ Colosenses 3:12; 1 Pedro 3:8). Ora rianu binni ne rápanu xcaadxi cualidad casi laani la? riale de laanu quixhedxinu ladxidoʼcaʼ ora cadíʼdicaʼ lu guendanagana. Bisiene Jesús ni sicaríʼ: «Ni nuu ndaaniʼ ladxidóʼ binni nga riníʼ. Ti binni nachaʼhuiʼ la? ribee ca cosa galán nuu ndaaniʼ ladxidóʼ» (Mat. 12:​34, 35). Rihuinni dxíchica ti modo nabé risaca gusihuínninu nadxiinu ca hermanu stinu nga ora riguixhedxinu ladxidoʼcaʼ.

¿XI ZANDA GÚNINU PARA CADI GUSAANA DE GANNAXHIISAANU?

12. a) ¿Xiñee naquiiñeʼ gápanu cuidadu? b) ¿Xi pregunta zacábinu?

¹² Guiranu racaláʼdxinu chinándanu mandatu riʼ: «Cadi gusaana de gannaxhiisaanu» (1 Juan 4:7). Peru cadi naquiiñeʼ guiaandaʼ laanu ni guníʼ Jesús: «Stale binni zusaana de gannaxhii» (Mat. 24:12). Cadi caníʼ diʼ Jesús né ca diidxaʼ riʼ stale de ca discípulo stiʼ zusaanacaʼ de gannaxhiisaacaʼ. Neca zacá naquiiñeʼ gápanu cuidadu cadi guirá guendarannaxhii stinu, purtiʼ nga nga ni runi binni guidxilayú. Ra gánnanu ndiʼ zacábinu pregunta riʼ: ¿ñee nuu ti modo zanda gánnanu pa dxandíʼ nadxiinu ca hermanu stinu la?

13. ¿Xi zanda gusihuinni pa dxandíʼ nadxiinu ca hermanu stinu?

¹³ Ti modo zanda gánnanu pa dxandíʼ nadxiinu ca hermanu stinu nga ra guidúʼyanu xi rúninu ora ridxaagalunu xiixa guendanagana (2 Cor. 8:8). Ne apóstol Pedro bizeeteʼ tobi de laacani ra bicaa: «Ne ni jma naquiiñeʼ gúnitu nga gannaxhiisaatu, purtiʼ ti binni ni nadxii la? siempre nuu dispuestu guni perdonar» (1 Ped. 4:8). Nga runi, rihuinni pa dxandíʼ nadxiinu ca hermanu stinu ora gucheenecaʼ o guninacaʼ laanu xiixa.

14. Casi ná 1 Pedro 4:​8, ¿ximodo naquiiñeʼ gannaxhiinu? Bizeeteʼ ti ejemplu.

¹⁴ Guidúʼyanu chupa chonna cosa ni bizeeteʼ Pedro. Lu primé ndaa stiʼ versículo 8 cayabi laanu ximodo gannaxhiinu, nani: «Gannaxhiisaatu». Diidxaʼ griegu ni biquiiñeʼ Pedro para «gannaxhiisaatu» riniʼni «gannaxhiitu stale» o «ni rigaa». Lu guiropa ndaa stiʼ versículo riʼ caniʼni xi rizaaca ora rannaxhiinu stale: ruchii ni ca pecadu stiʼ ca hermanu stinu. Guendarannaxhii ca zeeda gácani casi ti lari ni zanda gusigaaluʼ dede guchiini cadi tobi o chupa pecadu si, sínuque stale pecadu. Lu nota stiʼ versículo riʼ zeeda diidxaʼ ruchii, ni riníʼ «guni perdonarnu». Cásica zanda guchii ti ndaa lari ti mancha la? zacaca zanda guchii guendarannaxhii ca ra cuchee ca hermanu stinu.

15. ¿Xi rusihuínninu ora runi perdonarnu xcaadxi? (Colosenses 3:13).

¹⁵ Pa laanu gannaxhiinu ca hermanu stinu stale la? nga zucaa laanu guni perdonarnu ni gúnicaʼ laanu neca gácani nagana para laanu (biindaʼ Colosenses 3:13). Ora runi perdonarnu xcaadxi, rusihuínninu guizáʼ nadxiinu ne racaláʼdxinu gusiéchenu Jehová. ¿Xiruʼ zanda gacané laanu guni perdonarnu ni gúnicabe laanu ne xi zanda gacané laanu guni huantarnu ca cosa ni qué riuuláʼdxinu de xcaadxi yaʼ?

16, 17. ¿Xiruʼ zanda gacané laanu guni perdonarnu ra gucheené xcaadxi laanu? Bizeeteʼ ti ejemplu. (Biiyaʼ ca imagen ca).

¹⁶ Biiyaʼ ca cosa galán ni runi xcaadxi ne cadi ra cucheecaʼ. Guníʼ ique nuuluʼ ra nuu caadxi hermanu ne gudixhe íquetu guireetu ti foto. Cumu racaláʼdxiluʼ gápaluʼ ti foto galán la? guleeluʼ chonna foto. Peru lu tobi de laacani biiyaluʼ cadi galán biree ti hermanu. ¿Xi zunineluʼ foto ca yaʼ? Zuxhialuʼ ni ne ziaananeluʼ xhupa foto que, purtiʼ raqué cuxídxitu.

¹⁷ Ca foto ni qué ruxhianu zeeda gácani casi ca recuerdu ni nápanu. Stale de laanu nápanu recuerdu galán de ora riuʼnu nayecheʼ né ca hermanu stinu. Peru zándaca tobi de ca biaje ca biʼniʼ ti hermanu xiixa o guníʼ xiixa ni cadi galán. ¿Xi zunineluʼ recuerdu ca yaʼ? ¿Xiñee qué guxhialuʼ ni casi ñácani ti foto yaʼ? (Prov. 19:11; Efes. 4:32). Cumu nápanu stale recuerdu galán stiʼ hermanu ca la? qué zaca nagana para laanu guxhianu ra qué ñúnibe ni jneza, casi ñaca ñápanu puru si «ca foto galán ra biréʼnenu laabe».

¿XIÑEE NABÉ RISACA GANNAXHIINU TIEMPU RIʼ?

18. ¿Gunáʼ nga ca puntu jma risaca bieeteʼ lu artículo riʼ?

¹⁸ ¿Xiñee racaláʼdxinu cadi gusaananu de gannaxhiisaanu yaʼ? Purtiʼ casi maʼ bidúʼyanu, ra gannaxhiinu ca hermanu stinu zusihuínninu laaca nadxiinu Jehová. ¿Ximodo zanda gusihuínninu nadxiinu ca hermanu ni zeeda gaca casi familia stinu yaʼ? Ti modo zanda gúninu ni nga, ra quixhedxinu ladxidóʼcabe, ne para cadi gusaana de gúninu ni, caquiiñeʼ guianu laacabe. ¿Ximodo cadi gusaana de gannaxhiisaanu yaʼ? Ra gúninu guiráʼ ni nuu lu nanu para guni perdonarnu ra gucheené xcaadxi laanu.

19. ¿Xiñee nabé risaca gannaxhiisaanu tiempu riʼ?

¹⁹ ¿Xiñee nabé risaca gannaxhiisaanu tiempu riʼ? Guidúʼyanu ni bizeeteʼ Pedro: «Maʼ zedadxiña dxi guiluxe guiráʼ cosa. Nga runi, […] ni jma naquiiñeʼ gúnitu nga gannaxhiisaatu» (1 Ped. 4:​7, 8). ¿Xi naquiiñeʼ cuézanu laga zeeda guidxiña fin stiʼ ca cosa riʼ? Sicaríʼ guníʼ zazaacaʼ ca discípulo stiʼ: «Zaca nanalaʼdxiʼ guiráʼ guidxi laatu pur nácatu xpinneʼ» (Mat. 24: 9). Para cadi gusaana de gúninu ni ná Jehová neca gaca nanaláʼdxicabe laanu la? naquiiñeʼ chuʼnu tobi si. Racalaʼdxiʼ Binidxabaʼ guxheleʼ laanu, peru pa nadxiisaanu qué zaca xcústube, purtiʼ guendarannaxhii ca «dxandíʼ racané ni binni chuʼ unidu» (Col. 3:14; Filip. 2:​1, 2).