Naquiiñeʼ gucaananu guiráʼ cosa malu ni ruquiinde laanu

ÑEE huayuu ora guinábacabe lii gúniluʼ xiixa ni cadi jneza la?... Huayábicabe lii qué zanda diʼ gúniluʼ ni la? o huayábicabe lii galanpeʼ nga pa gúniluʼ ni purtiʼ cadi malu diʼ ni la?... Binni ni rabi lii sicaríʼ la? cuquiindebe lii gúniluʼ xiixa.

Xi naquiiñeʼ gúninu ora uquiindecabe laanu gúninu xiixa ni malu yaʼ. Ñee naquiiñeʼ gúninu ni neca malu ni la?... Nga qué riulaʼdxiʼ diʼ Jiobá. Peru, nannuʼ tu laa guizáʼ ñecheʼ la?... Nga nga Binidxabaʼ.

Binidxabaʼ nga xhenemigu Dios ne xhenemígunu. Qué zanda diʼ gúʼyanu laabe purtiʼ ti espíritu nga laabe, peru laabe zanda gúʼyabe laanu. Ti dxi la? biquiindebe Jesús, Maestru Ni Jma Nanna Gusiidiʼ que para guni xiixa. Guidúʼyanu xi bíʼnibe ti gánnanu xi gúninu ora uquiindecabe laanu.

Jesús nabé guyuulaʼdxiʼ guni ni na Bixhoze, ne bisihuínnibe ni ora guyuunísabe ndaaniʼ guiiguʼ Jordán. Cadi xadxí diʼ de guyuunísabe ora biquiinde Binidxabaʼ laabe. Biblia na «bixale ibáʼ» para Jesús (Mateo 3:16). Zándaca ora guca ndiʼ la? bizulú bietenaláʼdxibe modo bibaninebe Dios guibáʼ.

Despué de guyuunisa Jesús, guyebe lu ti desiertu para guiníʼ íquebe de cani bietenaláʼdxibe. Gudiʼdiʼ cuarenta dxi ne cuarenta gueelaʼ. Ca dxi guyuube raqué la? qué ñódibe, ngue runi guizáʼ maʼ candaanabe. Óraque nga guyé Binidxabaʼ ra nuube para uquiinde laabe gúnibe xiixa.

Binidxabaʼ gudxi laabe: «Pa dxandí Xiiñi Dios lii la? gudxi ca guie ca gaca pan». ¡Pabiáʼ nanixe nga ñó Jesús ti ndaa pan, njaʼ! Peru, ñanda ñuni Jesús ca guié que pan la?... Ñanda pue, Xiiñiʼ Dios laabe yaʼ, ne nápabe poder para gúnibe ni.

Pa ñabi Binidxabaʼ lii nicaaluʼ ti guié ne ñúniluʼ ni pan, ñúniluʼ ni la?... Jesús candaana. Ñee cadi ñápabe razón para ñúnibe ni neca ti tiru si la?... Jesús maca nanna cadi galán diʼ nga iquiiñebe poder bidii Jiobá laabe para gúnibe ni racaláʼdxibe, sínuque iquiiñebe ni para guchíñabe binni ra nuu Bixhózebe ne cadi para gacané diʼ ni laabe.

Ngue runi, lugar de ñuni Jesús ni na Binidxabaʼ la? gúdxibe laa ca diidxaʼ ni cá ndaaniʼ Biblia: «Cadi pan si nga ibani né binni sínuque irá ca diidxa ni iree de ruaa Dios». Jesús nanna ni jma risaca nga gúninu ni riulaʼdxiʼ Jiobá que gápasinu ni guidoʼno.

Peru Binidxabaʼ gucalaʼdxiʼ nuquiinde laabe sti biaje. Ne yanna riʼ maʼ yenebe Jesús guidxi Jerusalén ne bizuhuaabe laa ique ti yuʼduʼ ra jma nasoo ne na rabi laabe: «Yanna, pa dxandí Xiiñi Dios lii la? uyuu bi de racá, purti cá lu Xquiʼchi Dios zuseenda ca ángel sti para cuʼ ná xiʼque lu ti cadi gacaná lu lu guie».

Xiñee guníʼ Binidxabaʼ zacá yaʼ.... Purtiʼ guyuube nuquiindebe Jesús para ñuni xiixa ni ñuniná laa. Peru Jesús qué nulabi diʼ laabe, sínuque gudxi laabe: «Laca cá lu Xquiʼchi Dios, cadi inaba cabe xiixa Dios para quite si cabe laa». Jesús nanna cadi galán diʼ nga quítesinu Jiobá ne uguʼnu xquendanabáninu ra nagana.

Peru Binidxabaʼ qué ñaanadxí diʼ de nuchiichi laabe. Yenebe Jesús lu ti dani guizáʼ nasoo ne biluiʼbe laa guiráʼ ca reinu, o gobiernu, ni nuu lu Guidxilayú riʼ ne pabiáʼ risaca cani. Óraque gúdxibe Jesús: «Zudiee lii irá ni pa guzuxibi lu xañeeʼ usisaca lu naa».

Guníʼ ique si ni cudii Binidxabaʼ laabe riʼ. Nouʼ dxandíʼ nga stiʼ Binidxabaʼ ca reinu, o gobiernu nuu lu guidxilayú riʼ la?... Biaa, Jesús qué niníʼ diʼ cadi stiʼ diʼ Binidxabaʼ cani. Pa Binidxabaʼ nusiguii la? ñabi Jesús ni laabe. Ya, Binidxabaʼ nga xaíque stiʼ guiráʼ guidxi ni nuu lu Guidxilayú. Biblia na laabe nga «ni runi mandar ndaani ni» (Juan 12:31).

Xi ñuʼnuʼ pa Binidxabaʼ niníʼ zudii lii xiixa pa guni adorarluʼ laa yaʼ.... Jesús nanna cadi jneza diʼ nga guni adorarnu Binidxabaʼ, neca nudiibe laanu ni racaláʼdxinu. Ngue runi gúdxibe laa sicaríʼ: «Biree de ra nuaa binidxabaʼ, purti cá lu Xquiʼchi Dios, Dios si nga naquiiñe usisaca cabe ne guni cabe ni na» (Mateo 4:1-10; Lucas 4:1-13).

Laanu laaca rápanu stale ni ruquiinde laanu. Ñee nannuʼ gunáʼ ndiʼ tuudxi de laacani la?... Cásixa pa nizíʼ jñaaluʼ ti ndaa pastel, ne ñabi lii cuézaluʼ de ora maʼ nuutu guiratu ti goto ni, peru lii guizáʼ candaanaluʼ ne cuquiinde lii goloʼ ni. Ñee zuzuubaluʼ stiidxabe la?... Binidxabaʼ qué racalaʼdxiʼ guzuubaluʼ diidxaʼ.

Bietenalaʼdxiʼ laaca candaana Jesús ngue ora biquiindebe laa, peru nánnabe jma risaca nga gúnibe ni riulaʼdxiʼ Dios que gobe. Lii zusihuínniluʼ nácaluʼ casi Jesús pa guzuubaluʼ stiidxaʼ jñaaluʼ.

Zándaca stuudxi hombrehuiiniʼ gabi lii cúbaluʼ guixi purtiʼ pa guʼnuʼ ni ziuuluʼ galán. Peru zándaca guni huará ni lii o dede guuti ni lii. O zándaca chuʼ tu gudii lii ti gueza, stobi ni laaca zuniná lii, ne gábicabe lii: «Qué zagúʼbaluʼ ni yaʼ». Xi gúniluʼ yaʼ....

Bietenalaʼdxiʼ de Jesús. Binidxabaʼ gucalaʼdxiʼ ñuniná Jesús laca laa ora gúdxibe laa chuʼ bi de ique yuʼduʼ que. Peru qué ñúnidibe ni. Xi ñúniluʼ pa tuuxa nucaa lii ñúniluʼ xiixa ni zuniná lii yaʼ.... Jesús qué nulabi diʼ Binidxabaʼ. Lii laaca cadi naquiiñeʼ diʼ gunadiágaluʼ tuuxa ni cuquiinde lii para guʼnuʼ cosa malu.

Zándaca chuʼ dxi gábicabe lii guni adorarluʼ ti bidóʼ, peru Biblia rusiidiʼ cadi jneza diʼ ni (Éxodo 20:4, 5). Ndiʼ zanda gúnicabe ni lii ra scuela lu homenaje, ne gábicabe lii pa qué naluʼ guni adorarluʼ ni, zaládxicabe lii. Xi gúniluʼ yaʼ....

Cadi nagana diʼ nga gúninu ni jneza ora guiráʼ binni runi ni, peru nagana rácani pa nuu tu cucuudxi laanu gúninu ni malu. Zándaca nácabe cadi málupeʼ ni cayúnicabe. Peru ni jma riquiiñeʼ gánnanu nga: xiná Dios de laani, purtiʼ laabe nánnabe jma que laanu.

Nga runi, neca intiica guiníʼ binni la? qué chuʼ dxi gúninu xiixa ni na Dios cadi jneza. Zacá zusiéchenu Dios guiráʼ ora ne qué ziuu dxi gúninu ni riulaʼdxiʼ Binidxabaʼ.