Jesús bisiidiʼ laanu gácanu nachaʼhuiʼ

ÑEE galán nga guiníʼ íqueluʼ mal de stobi ante gunibiaʼluʼ laa la?... Coʼ, purtiʼ nga rusihuinni qué riuláʼdxiluʼ binni ca purtiʼ si riníʼ sti diidxaʼ o cadi naca casi lii.

Galán nga raʼbuʼ guiníʼ íqueluʼ zacá la?... Coʼ, guiníʼ íquenu zacá la? cadi jneza diʼ ni ne qué rusihuinni diʼ ni nacháʼhuinu. Cadi naquiiñeʼ gúninu laacabe zacá purtiʼ si cadi casi laanu laacabe.

Guníʼ ique ndiʼ: runibiaʼluʼ tuuxa ni riníʼ sti diidxaʼ o de sti color laa la?... Zándaca runibiaʼluʼ tuuxa ni guca xiixa o ni maʼ biʼniʼ feu guendahuará laa. Rusihuínniluʼ nacháʼhuiluʼ o nadxiiluʼ ca binni ni cadi naca casi lii la?...

Pa gucaadiáganu Maestru Ni Jma Nanna Gusiidiʼ que, Jesucristu, zácanu nachaʼhuiʼ ne guiráʼ binni, sin gúʼyanu de xi guidxi zeedacabe ne xi color laacabe. Neca cadi guiráʼ binni riníʼ ique naquiiñeʼ gácanu nachaʼhuiʼ, Jesús bisiidiʼ modo gácanu ni. Guidúʼyanu ximodo.

Ti judíu ni guníʼ ique mal de stobi bidxíñabe Jesús ne gunabadiidxabe laa: Xi guneʼ para guicaa guendanabani ni qué zaluxe ca pue. Jesús bidii cuenta racalaʼdxiʼ hombre que gábibe laa naquiiñeʼ gaca nachaʼhuiʼ ne raza si stiʼ o ne binni xquidxi si. Ngue runi, lugar de nicabi Jesús laabe la? gunabadiidxaʼ laabe: Xi cayabi ley stiʼ Dios laanu gúninu yaʼ.

Hombre que bicabi: Gunnaxhii Jiobá Dios stiluʼ de guidubi ladxidoʼloʼ, ne gunnaxhii sti binni casi nadxiiluʼ lii. Na Jesús rabi laabe: Jneza guniʼluʼ. Bíʼniruʼ casi cayúniluʼ ca ne zacaaluʼ guendanabani ni qué zaluxe.

Peru hombre que qué náʼ diʼ gaca nachaʼhuiʼ ne gannaxhii sti binni ni cadi naca casi laa. Ngue runi gucaláʼdxibe niguítebe Jesús ne gunabadiidxabe laa sti biaje: «Tuu nga [...] ni naquiiñe ganaxhiee yaʼ». Zándaca gucaláʼdxibe ñabi Jesús laabe: «Ni naquiiñeʼ gannaxhiiluʼ nga ca xhamíguluʼ», o «Ca binni ni naca casi lii». Peru Jesús bicabi laabe ne ti historia stiʼ ti judíu ne ti samaritanu, ti hombre de sti guidxi.

Ti dxi zeeda yete ti judíu de Jerusalén, zebe Jericó. Neza zebe que biree caadxi gubaanaʼ lube, gúxhacaʼ laabe xpuéltube ne xhábabe. Bininacaʼ laabe dede yaca ñátibe ne bisaanacaʼ laabe lu neza que.

Despué gudiʼdiʼ tobi de ca ni ruzaaquiʼ guʼxhuʼ (sacerdote) neza que ne biiyabe hombre que raqué mayaca gati. Lii xi ñúniluʼ pa ñuuyaluʼ hombre que yaʼ.... Ni ruzaaquiʼ guʼxhuʼ que gudiʼdiʼ laaga si ne qué nidxiña ra nuu hombre que. Qué ñúnibe gastiʼ pur ñacanebe laa.

Laaca gudiʼdiʼ sti hombre naca levita ni guizáʼ ruundaʼ ley stiʼ Dios. Laabe rúnibe dxiiñaʼ ndaaniʼ yuʼduʼ stiʼ Jerusalén. Ñee zuzuhuaadxibe para gacanebe hombre cayati riʼ la?... Coʼ. Levita que biʼniʼ cásica ni ruzaaquiʼ guʼxhuʼ que.

Últimu zeeda ti samaritanu. Zanda guʼyuʼ laabe zeeda guidxiñabe lu neza ca la?... Samaritanu que biiyabe nexheʼ judíu que layú ne naná modo nuu. Dxiqué la? ca judíu que qué ridxaagadicabe ca samaritanu que (Juan 4:9). Yanna, zie samaritanu que sin gacané hombre que la? O zaníʼ íquebe sicaríʼ: Naa qué gápadiáʼ xidé gacaniáʼ judíu riʼ. Laabe qué ñacanédibe naa pa naa ñuaa casi modo nuube ca.

Samaritanu que biiyadxibe hombre nexheʼ lu neza que ne biabe laa. Qué ninádibe nusaanabe hombre que raqué para gati. Ngue runi biétebe deche maniʼ dxíʼbabe que, bidxíñabe judíu que ne guluube aceite ne vinu guiráʼ ra gucaná laa. Despué bichéndabe venda laa.

Samaritanu que gudíxhebe hombre que chaahuidugá deche maniʼ zinebe que. Óraque zinebe laa chaahuiʼ chaahuiʼ, dede guyuucabe ndaaniʼ ti yoo ra riziilaʼdxiʼ binni. Samaritanu que gudixe ti cuartu para ni huará que ne gúpabe laa raqué.

Biluxe si Jesús historia que, gunabadiidxabe hombre ni caníʼnebe que: De lu guionnaʼ hombre que, tu raʼbuʼ bisihuinni nadxii sti binni yaʼ. Lii xi niniʼluʼ yaʼ. Ni ruzaaquiʼ guʼxhuʼ que la? levita que la? o samaritanu que....

Hombre que bicabi: Ni bizuhuaa ne gucané ni gucaná que xa. Jesús guníʼ: Nga nga laani. Guyé ne biʼniʼ zacaca (Lucas 10:25-37).

Ñee cadi guizáʼ galán historia riʼ la? Nayaguieʼpeʼ cusiéneni laanu tuu nga sti binni ni naquiiñeʼ gannaxhiinu. Cadi ca xhamígusinu o binni ni napa color si stinu o ni riníʼ diidxaʼ si ni rininu. Jesús bisiidiʼ laanu gannaxhiinu guiráʼ binni, neca zeedabe de gadxé ladu, o modo tiica laabe o intiisi diidxaʼ riniʼbe.

Jiobá zacá laa. Qué rucaanádibe binni purtiʼ si gadxé laa. Jesús guníʼ: Bixhózetu ni nuu guibáʼ, laabe ribeebe gubidxa stibe para guzaaniʼ luguiáʼ cani nachaʼhuiʼ ne ni cadi nachaʼhuiʼ, ne rusábabe nisaguié para cani runi ni nabe ne cani qué runi ni nabe. Nga runi naquiiñeʼ gusihuínninu nacháʼhuinu ne guiráʼ binni, cásica runi Dios (Mateo 5:44-48).

Yanna pa gúʼyaluʼ tuuxa ni gucaná, xi guʼnuʼ yaʼ.... Pa de sti guidxi laabe, o de sti color laabe yaʼ. Neca zacá, naquiiñeʼ gannaxhiiluʼ ne gacaneluʼ laabe. Pa nannuʼ qué zanda gúniluʼ ni lii si la? gunabaʼ ti binni huaniisi gacané lii. Zanda gucaarídxiluʼ ti puliciá o ti maestru. Zacá nga gaca binni nachaʼhuiʼ, cásica guca samaritanu que.

Maestru Ni Jma Nanna Gusiidiʼ que racalaʼdxiʼ gácanu nachaʼhuiʼ ne gacanenu xcaadxi binni, neca tutiica laacabe. Ngue runi guniʼbe historia stiʼ samaritanu ni nachaʼhuiʼ que.