«Gunaxhii stobi»
«Gunaxhii stobi cásica nadxii lu lii.» (MAT. 22:39)
1, 2. 1) Gunáʼ nga guiropa mandamientu ni jma risaca ni zeeda lu Ley. 2) Xi zacábinu lu tema riʼ.
DXI gunabadiidxaʼ ti fariseu Jesús gunáʼ nga mandamientu ni jma risaca zeeda lu Ley la? gúdxibe laa: «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ». Maʼ bidúʼyanu lu tema gudiʼdiʼ que xi riníʼ ca diidxaʼ ca. Peru Jesús laaca bizeeteʼ guiropa mandamientu ni jma risaca nga: «Gunaxhii stobi cásica nadxii lu lii» (Mat. 22:34-39).
2 Jesús guníʼ naquiiñeʼ gannaxhiinu sti binni cásica nadxiinu laanu. Peru, tuu nga sti binni ni naquiiñeʼ gannaxhiinu yaʼ. Ximodo zanda gúninu ni guníʼ Jesús ca yaʼ. Lu tema riʼ zacábinu ca guendarinabadiidxaʼ ca.
TUU NGA STI BINNI NI NAQUIIÑEʼ GANNAXHIINU
3, 4. 1) Xi parábola biquiiñeʼ Jesús para bicabi hombre ni gunabadiidxaʼ laa tu naquiiñeʼ gannaxhii. 2) Ximodo gucané samaritanu que judíu ni gucaná que. (Biiyaʼ dibuju ni zeeda ra ruzulú tema riʼ.)
3 Ti hombre gunabadiidxaʼ Jesús: «Tuu nga stobi ni riete lu ley ca naquiiñe ganaxhiee yaʼ». Jesús biquiiñeʼ parábola stiʼ ti samaritanu para bisiene laabe ximodo nga gannaxhiibe sti binni (biindaʼ Lucas 10:29-37). Jesús guníʼ de ti judíu ni bireecabe lú ne gúxhacabe cani ziné, gudíñecabe laa ne dede biaʼ qué ñuutisícabe laa. De raqué gudiʼdiʼ ti sacerdote ne despué gudiʼdiʼ ti levita. Ca binni riʼ naquiiñeʼ ñacanecaʼ laabe, peru qué ñúnicaʼ ni. Ora bíʼyacabe hombre riʼ qué nulábicabe laa. Peru ora gudiʼdiʼ ti samaritanu, bizuhuaadxí ne gucané laabe. Guendaridxagayaa nga ni biʼniʼ hombre riʼ, purtiʼ dxiqué ca judíu ne ca samaritanu la? qué ridxaagacaʼ (Juan 4:9).
Nagueendaca rusihuinni ca xpinni Dios nadxiicaʼ binni (Biiyaʼ párrafo 5)
4 Samaritanu que guxubi aceite ne vinu ladi hombre ni bininácabe que ti guianda. Despué yesaanabe laa ndaaniʼ ti yoo ra riziilaʼdxiʼ binni ne bidiibe binni runi tender raqué chupa denariu, ni riáxacabe chupa gubidxa dxiiñaʼ (Mat. 20:2). Pur ni biʼniʼ samaritanu riʼ bisihuinni nadxii sti binni. Parábola biquiiñeʼ Jesús riʼ rusiidiʼ ni laanu naquiiñeʼ gannaxhiinu sti binni ne guianu laacaʼ, gastiʼ naca xi guidxi laa o ximodo biniisicaʼ.
5. Ximodo bisihuinni ca xpinni Jiobá nadxiicaʼ sti binni gudiʼdiʼ si huracán Sandy.
5 Nabé nagana nga guidxélanu binni ni riá stobi ca dxi nabáninu riʼ; stale de laacaʼ nabé ridxiichicaʼ ne nabé malu laacaʼ, ne cadi nadxiicaʼ sti binni (2 Tim. 3:1-3). Ra ziluxe beeu octubre 2012 nabé bininá huracán Sandy ti guidxihuiiniʼ ni nuu Nueva York. Stale binni qué ñapa biaaniʼ nin ni guchaa laacaʼ ne xcaadxi cosa ni iquiiñecaʼ. Peru ni jma triste nga guyuu caadxi binni ni gulaʼnaʼ xcaadxi cosa ni bilá dxi gudiʼdiʼ huracán que. Peru ca testigu stiʼ Jiobá ni nuu lugar que gucanésaacaʼ ne gucanecaʼ xcaadxi binni. Xi pur bíʼnicabe ni yaʼ. Purtiʼ laanu ca xpinni Cristu nadxiinu sti binni. Ximódoruʼ zanda gusihuínninu nadxiinu sti binni yaʼ.
XIMODO ZANDA GUSIHUÍNNINU NADXIINU BINNI
6. Xiñee rusihuínninu nadxiinu binni ora rucheechenu diidxaʼ.
6 Gacanenu binni guiziidiʼ de Dios. Ora rinínenu binni de Stiidxaʼ Dios, riguixhedxinu ladxidoʼcaʼ (Rom. 15:4). Laaca rusihuínninu nadxiinu binni ora rinínenu laacaʼ ca diidxaʼ nacubi ne galán stiʼ Reinu (Mat. 24:14). Ti ndaayaʼ naroʼbaʼ nga guinínenu binni de cani chiguni Dios (Rom. 15:13).
7. 1) Xii nga Regla de Oro. 2) Xi ribeendunu ora rinándanu ni na Regla de Oro.
7 Chinándanu ni na Regla de Oro. Sicaríʼ bisiene Jesús xii nga Regla de Oro lu libana ni bidii lu dani: «Irá ni racalaʼdxi tu guni binni laatu la? ngue ca laguni laacaʼ, purti zacá nga na ley ne nga ca bicaa ca profeta» (Mat. 7:12). Ora rinándanu conseju bidii Jesús ca, rusihuínninu cayúninu ni na «ley» (libru stiʼ Génesis dede Deuteronomio) ne «ca profeta» (ca libru ni bicaa ca profeta lu diidxaʼ hebreu). Lúcani rihuinni riguu Dios ndaayaʼ cani rusihuinni nadxii sti binni. Profeta Isaías guníʼ ni gudxi Jiobá laa, sicaríʼ bicaabe: «Laguni ni na ca ley stinneʼ ne laguni ni jneza. [...] Nayecheʼ ribani hombre ni runi cani» (Is. 56:1, 2). Pa gusihuínninu nadxiinu sti binni ne chinándanu ni na Regla de Oro, zaguu Jiobá ndaayaʼ laanu.
8. 1) Xiñee naquiiñeʼ gannaxhiinu ca xhenemígunu. 2) Xi zándaca guizaaca pa gusihuínninu nadxiinu ca xhenemígunu.
8 Gannaxhiinu ca enemigu stinu. Sicaríʼ bisiidiʼ Jesús: «Laca na ley ganaxhii tu cani nadxii laatu, ne gaca nanalaʼdxi tu cani nanalaʼdxi laatu. Peru naa rabeʼ: “Laganaxhii cani nanalaʼdxi laatu, ne lainíʼ né Dios pur cani riguu dí laatu. Lagacané cani runi pur uchiichi laatu, ne lainaba lu Dios pur cani riladxi laatu. Laguni zacá ti chi ndee tu Bixhoze tu ni nuu ibáʼ”» (Mat. 5:43-45). Laaca zacaca nga conseju bidii apóstol Pablu ora guníʼ: «Pa candaana tobi ni nanalaʼdxi lii, bidii ni go, ne pa cayati nisa bidii nisa gueʼ» (Rom. 12:20; Prov. 25:21). Ley ni bidii Dios Moisés que na pa guʼyaʼ ti israelita naʼniʼ xiixa cosa nanaa ti maniʼ stiʼ xhenemigu la? naquiiñeʼ gacané laabe guiasa ni luguiame (Éx. 23:5). Pa gúnicabe zacá la? zacaneni laacabe gaca xhamígucabe neca guca nanaláʼdxicabe. Laaca zacaca ni ca dxi riʼ. Ora gannaxhiinu ca xhenemígunu dede cani rizananda laanu, zanda ucuudxinu laacaʼ ne guchaacaʼ modo laacaʼ. Ne nuu de laacaʼ dede zándaca gácacaʼ xpinni Jiobá.
9. Xi guníʼ Jesús zanda gúninu ora gapanenu ti hermanu xiixa guendanagana.
9 Gúninu «biaʼ ganda para cadi chuʼ dinde né [nu] irutiʼ» (Heb. 12:14). Pa naquiiñeʼ gannaxhiinu guiráʼ binni la? laaca naquiiñeʼ gannaxhiinu ca hermanu stinu. Jesús guníʼ: «Pa zeda saanu ti ofrenda lu altar para Dios ne guiétenalaʼdxu bichee neu tuuxa la? bisaana gá ofrenda stiuʼ raqué, uyé biene né ni bichee neu que, ne óraque bigueta yetixhe ofrenda stiuʼ lu altar» (Mat. 5:23, 24). Cada gápanu guendanagana né ti hermanu stinu, zanda gusihuínninu nadxiinu laabe ora guni chaahuinu guendanagana ni gapanenu laabe, pa gúninu zacá la? zaguu Jiobá ndaayaʼ laanu.
10. Xiñee cadi nisi ra cuchee xcaadxi binni nga guyúbinu.
10 Cadi guininu mal de sti binni. Jesús guníʼ: «Cadi gudxiiba lu donda ique stobi, ti qué quiba donda ique luʼ. Purti donda ca gudxiiba lu ique stobi que, ngue ca guiaana luguiá luʼ. Purti cásica guʼnu stobi la? zaqueca gaca luʼ. Pa nuu tindaa bandadi ndaani lú lu la? ximodo zanda guʼya lu tindaa guixi nuu lú stobi yaʼ. Ñee zaʼbu stobi que: “Dané cuee guixi nuu lú lu ca”, ne lii zaa nuu bandadi que lú lu la? Cadi quite lu binni, gulee ca bandadi nuu lú lu ca, ti ganda guʼya chaahui lu para cueeu guixi ni nuu lú stobi» (Mat. 7:1-5). Cadi dxandíʼ nabé risaca ni rusiidiʼ textu riʼ laanu la? Nga runi, cadi naquiiñeʼ guininu mal de tuuxa ora guchee pa laanu jma feu modo rucheʼnu.
TI MODO JMA GALÁN GUSIHUÍNNINU NADXIINU BINNI
11, 12. Gunáʼ nga ti modo jma galán gusihuínninu nadxiinu binni.
11 Jesús guníʼ ti modo jma galán gusihuínninu nadxiinu sti binni nga gucheechenu stiidxaʼ Reinu (Luc. 8:1). Jesús gudxi ca discípulo stiʼ ca diidxaʼ riʼ: «Laché ne lachigusiidiʼ binni de guiráʼ guidxi sananda naa» (Mat. 28:19, 20, TNM). Ora rúninu dxiiñaʼ riʼ, randa racanenu binni gusaana neza nalaga ni zeʼ lu guendaguti ne chuʼcaʼ lu neza nabéʼ ni ziné laacaʼ guicaacaʼ guendanabani (Mat. 7:13, 14). Nanna dxíchinu riuulaʼdxiʼ Jiobá gacanenu binni ne riguu ndaayaʼ laanu.
12 Cásica biʼniʼ Jesús, laanu laaca racanenu binni gudii cuenta caquiiñeʼ gunibiaʼcaʼ Jiobá (Mat. 5:3). Pa tuuxa chuulaʼdxiʼ guiziidiʼ jma la? racanenu laacaʼ guiziidicaʼ de Dios (Rom. 1:1). Rusíʼdinu laacabe zanda chuulaʼdxiʼ Jiobá ni gúnicabe ne gaca xhamígucabe laa pur guendaguti stiʼ Jesús (2 Cor. 5:18, 19). Nabé risaca nga gucheechenu diidxaʼ, purtiʼ laani nga ti modo zanda gusihuínninu nadxiinu binni.
13. Xi runi sentirluʼ ora rusiidiluʼ sti binni de Jiobá.
13 Ora riduʼndaʼ chaahuinu ante chigánnanu ti binni ne gudiʼnu estudiu laa la? riuʼnu nayecheʼ purtiʼ cayacanenu laabe guibánibe casi modo na ca ley stiʼ Dios. Nuu de laacabe naquiiñeʼ guni stipa para guchaa modo nabani (1 Cor. 6:9-11). Nabé riéchenu guidúʼyanu ximodo cayacané Dios ca binni ni «ma nexhe icaa enda nabani ni qué zaluxe» ne racanebe laacaʼ guchaacaʼ modo nabánicaʼ ti ganda gaca xhamígucaʼ laabe (Hech. 13:48). Ora guiziidicabe de Biblia riéchecabe gánnacabe xi chiguni Dios. Maʼ qué riuupécabe xizaa purtiʼ rápacabe confianza Jiobá. ¡Nabé nayecheʼ riuʼnu ora guidúʼyanu ziniisicabe lu stiidxaʼ Dios! Ti ndaayaʼ naroʼbaʼ nga gusihuínninu nadxiinu sti binni ora racanenu laa guiziidiʼ de Dios.
XI RINÍʼ BIBLIA DE GUENDARANNAXHII
14. Ximodo bisiene Pablu diidxaʼ guendarannaxhii lu 1 Corintios 13:4-8.
14 Apóstol Pablu bisiene xii nga guendarannaxhii. Pa chinándanu conseju stiʼ Pablu la? ziuulaʼdxiʼ Jiobá ni gúninu, qué zápanu guendanagana ne ziuʼnu nayecheʼ (biindaʼ 1 Corintios 13:4-8). Guidúʼyanu xi bicaa Pablu ne ximodo zanda gúninu ni guniʼbe ora guidxaaganu sti binni.
15. 1) Xiñee naquiiñeʼ gápanu paciencia ne gácanu nachaʼhuiʼ. 2) Xiñee cadi naquiiñeʼ gápanu envidia binni ne cadi gudxíʼbanu laca laanu.
15 «Pa nadxii lu stobi la? qué zadxiichi né gá lu laa, ne ziá lu laa.» Maʼ bisihuinni Jiobá napa paciencia ne nachaʼhuiʼ né guiráʼ binni gulené donda casi laanu. Ñee cadi laaca naquiiñeʼ gápanu paciencia ne gácanu nachaʼhuiʼ né xcaadxi binni ora gucheecaʼ ne dede ora gúnicaʼ laanu xiixa la? «Pa nadxii lu stobi la? qué zuyubu tidu lú.» Pa nadxiinu ca xpinni Cristu, qué zápanu envidia laacaʼ pur xiixa cosa ni nápacaʼ o xiixa guenda ni nápacaʼ ra ridagulisaanu. Ne pa dxandíʼ nadxiinu ca hermanu stinu, qué zudxíʼbanu laca laanu ne qué zaninu xi guiráʼ nápanu. Biblia na nanalaʼdxiʼ Jiobá guiráʼ «cani rudxiiba laca laa» (Sant. 4:6).
16, 17. Ximodo zanda gusihuínninu nadxiinu binni casi rieeteʼ lu 1 Corintios 13:5, 6.
16 Pa nadxiinu binni zacané ni laanu para cadi gusiguiinu laa, cadi cuánanu cani napa ne qué zúninu laabe xiixa ni uguu Jiobá triste. Laaca zucaani laanu guizaaláʼdxinu xcaadxi binni ne cadi guyúbinu para laasinu (Filip. 2:4).
17 Ora dxandíʼ nadxiiluʼ ti binni cadi «gasti si guni lii maca cadxiichi neu laa. Ne qué ziuu neu laa xiana». Ca diidxaʼ ca rusihuinni pa tuuxa guchiichi laanu, qué zadxiichinenu laa nagueenda. Ne laaca qué zugábanu panda biaje gucheenecaʼ laanu (1 Tes. 5:15). Qué zanda gusiéchenu Dios pa gápanu xiana sti binni. Pa gápanu xiana sti binni la? zeeda gácani casi ora cayaʼquiʼ xiixa ndaaniʼ ladxidoʼno, ne nga zuniná laanu ne zuninani sti binni (Lev. 19:18). Jma galán gutiidiláʼdxinu stonda binni ne gusiaandanu ni bíʼnicabe laanu. Pa nadxiinu stobi la? «qué zieche [nu] ora uchee», ne qué ziéchenu ora gacaná tuuxa binni ni nanalaʼdxiʼ laanu. Biblia na: «Ora guiaba xhenemíguluʼ, cadi guiécheluʼ; ne ora guirenda ñeebe, cadi guiecheʼ ladxidoʼloʼ, ti cadi guʼyaʼ Jiobá ni, ne qué chuulaʼdxiʼ ni, ne cadi guiaba xiana stiʼ luguiáʼ xhenemíguluʼ» (Proverbios 24:17, 18).
18. Xi naquiiñeʼ gúninu pa nadxiinu binni casi rieeteʼ lu 1 Corintios 13:7, 8.
18 Pablu na ora nadxiinu sti binni la? «zuni huantar [nu]» laa. Nga runi, ora gabi tuuxa laanu xiixa ni guniná laanu ne despué guinabaʼ gutiidiláʼdxinu stonda la? guendarannaxhii ca zucaa laanu gutiidiláʼdxinu laa. Ne laaca «zuni cre[nu]» guiráʼ cosa. Runi crenu guiráʼ ni rusiidiʼ Biblia ne rudiʼnu xquíxepeʼ Dios pur guiráʼ ni rusiidiʼ xquídxibe laanu. Laaca ribézanu guiráʼ cosa. Cabézanu guni Jiobá guiráʼ ni maʼ bidii stiidxaʼ; ne cumu nadxiinu binni la? rábinu laacaʼ cani chiguni Dios (1 Ped. 3:15). Ne ora cadídinu lu xiixa guendanagana, runi orarnu Jiobá ne ribézanu gacané laanu. Pa nadxiinu binni, «qué zaree [nu] gana» o zuni huantarnu guiráʼ cosa, neca gucheené tuuxa laanu o dede sanándacaʼ laanu. Ne últimu guníʼ Pablu «qué ziuu dxi initilú enda ranaxhii». Zacá nga laani, qué ziuu dxi gusaana ca xpinni Dios de gannaxhiicaʼ binni.
CADI GUSAANA DE GANNAXHIINU BINNI CÁSICA NADXIINU LAANU
19, 20. Xi textu stiʼ Biblia rusihuinni pabiáʼ risaca nga gannaxhiinu binni.
19 Pa chinándanu ca conseju stiʼ Biblia la? qué zusaana de gannaxhiinu binni cásica nadxiinu laanu (Mat. 22:39). Jiobá ne Jesús racaláʼdxicaʼ gúninu ni. Ne laaca racaláʼdxicabe gannaxhiinu guiráʼ binni, gastiʼ naca xi guidxi laa. Ñee nuu tiru raca nagana para laanu gusihuínninu nadxiinu tuuxa la? Pa zacá ni, guinábanu Jiobá gudii espíritu santu laanu. Ora gúninu zacá, zusiéchenu laabe, ne zacanebe laanu gannaxhiinu binni (Rom. 8:26, 27).
20 Naquiiñepeʼ gannaxhiinu binni cásica nadxiinu laanu, nga runi, lu Stiidxaʼ Dios na laani nga ley «ni jma risaca» (Sant. 2:8). Lu Ley ni bidii Jiobá Moisés, stale biaje biʼniʼ mandar Dios ca israelita gannaxhiicaʼ binni. Despué gudxi Jiobá Pablu gucaa ca diidxaʼ riʼ: «Ne pa nuu ru sti mandamientu la? zuni lu ni na ni pa guʼnu ni na ca diidxa riʼ: “Gunaxhii stobi cásica nadxii lu lii.” Pa nadxii lu stobi la? qué zuchee neu laa. Ne ra ganaxhii tu binni ma cayuni tu irá xixé ni na ley» (Rom. 13:8-10). Nga runi, cadi naquiiñeʼ gusaana de gannaxhiinu binni.
21, 22. Xiñee naquiiñeʼ gannaxhiinu Dios ne gannaxhiinu binni.
21 Ora riníʼ íquenu guiráʼ razón nápanu para gannaxhiinu binni, galán guietenaláʼdxinu ca diidxaʼ guníʼ Jesús de Bixhoze: «Purti laa rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na» (Mat. 5:43-45). Xi rusiidiʼ ca diidxaʼ riʼ laanu yaʼ. Rusiidiʼ cani laanu naquiiñeʼ gannaxhiinu binni, cásica ni nachaʼhuiʼ ne zaqueca cani cadi nachaʼhuiʼ. Ne casi maʼ bieeteʼ, ti modo jma zanda gusihuínninu nadxiinu binni nga güínenu laacaʼ de stiidxaʼ Reinu. Pa guicaacabe cani de guidubi ladxidóʼcabe, zanda gaca xhamígucabe Dios. Ne nga nga ndaayaʼ jma naroʼbaʼ zanda guicaacabe.
22 Nápanu stale razón para gannaxhiinu Jiobá de guidubi ladxidoʼno. Ne casi maʼ bidúʼyanu, nuu stale modo zanda gusihuínninu nadxiinu binni. Pa nadxiinu Dios ne nadxiinu binni la? zusihuínninu cayúninu ni na guiropaʼ mandamientu jma risaca. Peru ni jma risaca nga zusiéchenu Jiobá, Bixhózenu ni nuu guibáʼ.