Ñee nabé ruyúbiluʼ gácaluʼ primé la?

ÑEE runibiaʼluʼ tuuxa ni nabé ruyubi gaca primé la?... Zándaca gulaanabe stuudxi para tiidibe primé pa nuube lu cola. Huayuuyaluʼ gaca nga la?... Maestru Ni Jma Nanna Gusiidiʼ que biiyabe cuyubi tuudxi binni huaniisi ra jma galán o ra jma risaca para cuicaʼ, ne qué ñuláʼdxidibe zaqué. Guidúʼyanu xi guca.

Biblia cuzeeteʼ de ti fariseu, ti hombre guizáʼ risaca ni nabé rié yuʼduʼ, biʼniʼ invitarbe Jesús chitó ralídxibe. Ora guyuu Jesús raqué la? biiyabe stuudxi binni ni guca invitar que cuyúbicaʼ cuicaʼ ra jma galán. Ngue runi, biquiiñebe ti ejemplu para gusiidibe laacaʼ xiixa. Ñee riuláʼdxiluʼ gunadiágaluʼ ni la?...

Jesús guníʼ: Ora guni invitar tuuxa lii ti guendaxheelaʼ la? cadi guyubuʼ ra jma galán cuiluʼ. Nannuʼ xiñee guníʼ Jesús zaqué la?... Purtiʼ zándaca nuu stobi ni jma risaca ni guca invitar. Casi ruuyuʼ lu dibuju riʼ, dueñu que zanda gueeda ne guiníʼ: Bidii cuí hombre riʼ ra zubuʼ ca, ne lii guyé raricaʼ. Ximodo ñuni sentir invitadu que yaʼ.... Nituí lú ñuuyaʼ guiráʼ binni que laa nití sti ladu ra huaxiéʼ risaca.

Jesús gucalaʼdxiʼ guluíʼ laacabe cadi galán diʼ nga chuláʼdxicabe cuícabe ra jma risaca. Gúdxibe laacaʼ: Ora guni invitar tuuxa lii ti guendaxheelaʼ la? cadi guyúbiluʼ ra jma risaca para cuiluʼ. Ti ora gueeda ni biʼniʼ invitar lii que, gabi lii: Gudáʼ, xhamiguaʼ, cheríʼ nuu ti lugar jma galán para lii. Zacá zasácaluʼ nezalú xcaadxi nuu raqué ora ucuícabe lii ra jma galán (Lucas 14:1, 7-11).

Ñee biéneluʼ ni nuu Jesús nusiidiʼ ne ejemplu riʼ la?... Chigúʼyanu pa biéneluʼ ni. Guníʼ ique zichíbaluʼ ndaaniʼ ti carru dxaʼ binni. Ñee nagueendaca nuyúbiluʼ ra nibiluʼ ne nudiiluʼ lugar zaa zuhuaa ti binni huaniisi la?... Ñulaʼdxiʼ Jesús ñúniluʼ nga la?...

Zándaca chuʼ tu guiníʼ qué rulabi diʼ Jesús nga. Peru raʼbuʼ zacá ni la?... Ora nuu Jesús ralidxi fariseu ni biʼniʼ invitar laabe guendaró que la? biiyabe modo gulí ca binni que ra guricaʼ. Ñee cadi raʼbuʼ laaca nuu Jesús ganna xi rúninu la?... Yanna cumu maʼ nuu Jesús guibáʼ la? jmaruʼ si ruuyaʼ chaahuibe guiráʼ ni rúninu.

Ora tuuxa gacalaʼdxiʼ gaca primé la? zándaca chuʼ tu tinde. Stale biaje zadindenécabe ne zadxiichinécabe laabe. Nuu tiru rácani ora ca baʼduʼ ca maʼ zeecaʼ ndaaniʼ carru. Cásipeʼ guixaleʼ puertaʼ stini, ruxooñecabe para quíbacabe primé. Ne maʼ nuucaʼ cuicaʼ ra jma galán cueʼ ca ventana stini. Xi zaca óraque yaʼ.... Zadxiichi saacabe xa.

Ya, ora gacaláʼdxinu gácanu primé zanda guidxiichiné stobi laanu. Zacaca guca ca apóstol stiʼ Jesús. Casi modo bizíʼdinu lu capítulo 6 que, laacabe gudinde diidxacabe de tu laa nga ni jma risaca. Xi biʼniʼ Jesús yaʼ.... Guníʼnebe laacaʼ. Peru despué bibiguetaʼ bíʼnicabe ni sti biaje. Guidúʼyanu ximodo guca ni.

Ca apóstol ne stuudxi discípulo que zinécabe Jesús neza Jerusalén últimu viaje stiʼ. Jesús maca guniʼné laacabe de Reinu stiʼ, yanna Jacobo ne Juan nabé guníʼ íquecaʼ chigácacaʼ rey ne laabe. Ne dede gúdxicabe ni Salomé, jñaacabe (Mateo 27:56; Marcos 15:40). Ngue runi, ora zécabe neza Jerusalén la? Salomé bidxíñabe Jesús ne bizuxíbibe xañee ne gunábabe laa ti favor.

Xi racaláʼdxiluʼ, na Jesús rabi laabe. Laabe gunábabe cuí ca xiiñibe cueʼ Jesús ora maʼ guni mandar, tobi ca ladu derechu ne stobi ca ladu bigaʼ (izquierdu) stiʼ. Ximodo raʼbuʼ biʼniʼ sentir stuudxi apóstol que ora gúnnacaʼ de ni gudxi Jacobo ne Juan jñaacaʼ guinabaʼ yaʼ....

Ya, nabé bidxiichinécabe Jacobo ne Juan. Ngue runi, Jesús bidii ti conseju guizáʼ galán ca apóstol stiʼ. Gúdxibe laacaʼ ximodo ca xaíque stiʼ ca guidxi ca riuláʼdxicaʼ guisácacaʼ ne gácacaʼ nadipaʼ. Riuláʼdxicabe puestu jma risaca para guzuubaʼ binni stiidxacabe. Peru Jesús gudxi cani zinanda laa que cadi naquiiñeʼ diʼ gácacabe zacá, sínuque ni riulaʼdxiʼ gaca primé ládecabe la? naquiiñeʼ gaca esclavu stícabe. Guníʼ ique si nga (Mateo 20:20-28).

Ñee nannuʼ xi runi ti esclavu la?... Runi xhiiñaʼ binni ne qué ribeza diʼ gúnicabe dxiiñaʼ para laa. Riaana de últimu cadi primé diʼ. Qué rúnidibe laabe binni risaca, sínuque rúnibe laabe tobi ni huaxiéʼ risaca. Ne cadi guiaandaʼ lii, tu chulaʼdxiʼ gaca primé la? naquiiñeʼ gaca casi esclavu stiʼ stuudxi casi na Jesús que.

Yanna pue, xi raʼbuʼ riníʼ ni para laanu yaʼ.... Ñee nidinde ti esclavu ne dueñu stiʼ de tupeʼ nga cuí ra jma galán, o tuu nga gó primé la? Lii xi raʼbuʼ yaʼ.... Jesús guníʼ nabé riguu ti esclavu dueñu stiʼ primé (Lucas 17:7-10).

Nga runi, lugar de gacaláʼdxinu gácanu primé, xi riquiiñeʼ gúninu yaʼ.... Ya, gácanu casi esclavu stiʼ stuudxi. Nga riníʼ naquiiñeʼ uguʼnu laacabe primé ne guiníʼ íquenu risácacabe jma que laanu. Ximódoruʼ raʼbuʼ zanda gúninu para uguʼnu stuudxi gaca primé yaʼ.... Xiñee qué guibiguétaluʼ yaza 40 ne 41 para guietenaláʼdxinu ximodo zanda gacaneluʼ stuudxi, ne uguuluʼ laacabe primé.

Zietenaláʼdxiluʼ Maestru Ni Jma Nanna Gusiidiʼ que guluube stuudxi binni primé ora gucanebe laacaʼ. Gueelaʼ ante gátibe que, dede bizuxíbibe ne gudiibibe ñee ca apóstol stibe. Laanu laaca pa gacanenu stuudxi ne cuʼnu laacabe primé la? zúninu ni riulaʼdxiʼ Maestru Ni Jma Nanna Gusiidiʼ que ne Bixhózebe, Jiobá Dios.