Guietenaláʼdxinu Jiobá ne Xiiñiʼ

GUNÍʼ ique guyuu tuuxa bisigaʼdeʼ lii xiixa guizáʼ sicarú. Ximodo ñuni sentirluʼ yaʼ.... Ñee nudiisiluʼ xquíxepeʼ laabe ne despué nusiaandaluʼ laabe la? O ñetenaláʼdxiluʼ de binni ca ne ni bisigáʼdebe lii....

Jiobá Dios bisigáʼdebe laanu xiixa guizáʼ risaca. Biseendabe Xiiñibe lu Guidxilayú riʼ para gueeda gati pur laanu. Ñee nannuʼ xiñee guti Jesús pur laanu la?... Pur xiixa ni guizáʼ risaca ni riquiiñeʼ guiene chaahuinu.

Casi modo bizíʼdinu lu capítulo 23 que, Adán bichee purtiʼ qué ninándadibe ni na ley stiʼ Dios. Yanna laanu biaananenu donda stiʼ Adán, bixhoze guiráʼ binni guidxilayú. Yanna, xi raʼbuʼ caquiiñenu yaʼ.... Casi ora caquiiñenu sti bixhózenu, tobi ni qué ñapa donda ni bibani lu Guidxilayú riʼ. Tuu nga raʼbuʼ binni ca yaʼ.... Laabe nga Jesús.

Jiobá biseendabe Jesús lu Guidxilayú para gueeda gaca bixhózenu laabe ne maʼ cadi Adán diʼ. Biblia cusiene: «“Adán, primé hombre uca binni nabani”. Peru zanda gabi nu Cristu nga rairopa Adán, ne laa naca ti espíritu ni rudii enda nabani». Tuu nga guca primé Adán riʼ yaʼ.... Hombre ni bizáʼ Dios de yú que. Tuu ndiʼ guiropa Adán ca yaʼ.... Laabe nga Jesús. Biblia culuíʼ ni ra na: «Za primé hombre que [Adán] de guidxilayú, purti de yu uyáʼ, ne stobi que [Jesús] za de ibáʼ» (1 Corintios 15:45, 47; Génesis 2:7).

Dios gucuaabe xquendanabani Jesús ne guluube ni ndaaniʼ ti gunaa láʼ María. Ngue runi Jesús qué ñalenédibe donda stiʼ Adán, sínuque gúcabe ti binni qué gapa donda (Lucas 1:30-35). Ne laaca pur nga ti ángel gúdxibe tuudxi pastor ora gule Jesús: «Yanadxí gule tobi ni ulá laatu» (Lucas 2:11). Peru para gaca baʼduhuiiniʼ riʼ tobi ni gulá laanu, xi naquiiñeʼ gaca primé yaʼ.... Naquiiñeʼ guiniisibe ne gácabe ti hombre, cásica Adán. Oracaruʼ maʼ zanda gácabe ra guiropa Adán.

Jesús, ni gulá laanu ca, laaca zácabe Bixhózenu ne qué zusaana de gácabe ni, casi modo ruzeeteʼ Biblia (Isaías 9:6, 7). Ya, Jesús ni guca ti hombre sin donda que, zanda gácabe bixhózenu ne maʼ cadi Adán diʼ, ni guca ti binni napa donda despué de bichee que. Zacá la? zanda cuinu guiropa Adán ca para gaca bixhózenu. Jesús laaca napa Bixhoze, Jiobá Dios.

Ora gueeda gunibiaʼnu Jesús la? maʼ runi crenu laabe nga chigulabe laanu. Rietenaláʼdxinu xidé ndiʼ chigulabe laanu la?... De donda ne de guendaguti ni bisaanané Adán laanu. Jesús bidii guendanabani sin donda stiʼ pur laanu, zacá la? gudíxebe pur ca stóndanu. Jiobá nga bidii quíxebe ne xquendanabánibe pur laanu para guixá ca stóndanu (Mateo 20:28; Romanos 5:8; 6:23).

Qué liica racaláʼdxinu gusiaandanu ni biʼniʼ Dios ne Xiiñiʼ pur laanu, njaʼ.... Jesús biluiʼbe cani zinanda laabe ximodo guietenaláʼdxicabe ni bíʼnibe. Guidúʼyanu xi laani.

Guníʼ ique nuuluʼ ndaaniʼ ti cuartu ni nuu luguiáʼ stiʼ ti yoo ni nuu Jerusalén. Ne maʼ huaxhinni ngue. Jesús ne ca apóstol stiʼ zúbacaʼ ruaa ti mexaʼ ra nexheʼ beelaʼ dendxuʼ ni biguii lu buu, pan ni qué gapa levadura ne vinu tintu. Guendaroxhi ni cayúnicabe que nabé risaca ni. Nannuʼ xiñee la?...

Guendaroxhi riʼ gúcani para gusietenaláʼdxini laacabe ni biʼniʼ Jiobá maʼ raca gayuaa iza dxi guyuu Xquídxibe, ca israelita, casi esclavu Egipto. Dxi que la? Jiobá gúdxibe Xquídxibe: Laguutiʼ ti dendxuhuiiniʼ ne lagunéʼ rini stime ruaa puertaʼ stitu. Óraque gúdxibe laacaʼ: Lachuu ralídxitu ne lagó laame.

Ca israelita que bíʼnicaʼ ni, ne gueelaʼ queca ángel stiʼ Jiobá gudiʼdiʼ Egipto. Stale de ca yoo ra gudiʼdiʼ ángel que biiti ca baʼduʼ primé stícabe. Peru ra ruuyabe néʼ rini que ruaa puertaʼ stiʼ ca yoo que la? ridiʼdiʼ laagabe ne raqué qué rati diʼ nin ti xiiñicabe. Faraón, rey stiʼ Egipto, guizáʼ bidxibi pur ni biʼniʼ ángel stiʼ Jiobá que ngue runi gúdxibe ca israelita que: Zanda chetu de raríʼ. ¡Laguiree de Egipto! Para gucuaacabe guiráʼ ni nápacabe bidxiibacabe ni deche ca camellu ne ca burru stícabe, ne bireecabe zécabe.

Jiobá qué niná diʼ nusiaandaʼ xquídxibe ximodo bilabe laacaʼ. Ngue runi guniʼbe: Ti dxi lu ti iza naquiiñeʼ góxhitu sicaríʼ cásica cayúnitu ni gueelaʼ riʼ. Guendaroxhi ni biree lá Pascua ca, zusietenalaʼdxiʼ ni laacabe gueelaʼ que nga «gudiʼdiʼ laaga» ángel stiʼ Dios ca yoo ni néʼ rini que (Éxodo 12:1-13, 24-27, 31).

Jesús ne ca apóstol stiʼ guníʼ íquecabe de laani ora gudoxhícabe lu Pascua que. Ora bilúxecabe la? Jesús biʼniʼ xiixa guizáʼ risaca. Peru Judas, apóstol ni bidxiideche laabe que maʼ qué guinni diʼ. Óraque gucuaa Jesús tobi de ca pan ni biaana que ne despué de bíʼnibe ti oración la? gundaabe ni ne bidiibe ni ca discípulo stibe. Gúdxibe laacaʼ: «Laicaa ne lagó». Oraqueruʼ bisiénebe laacaʼ: Pan riʼ zeeda gácani cuerpu stinneʼ ni chigudiéʼ ora gateʼ pur laatu.

Despué gucuaa Jesús ti copa daʼ vinu tintu ndaaniʼ. Ne bidiisibe xquíxepeʼ Dios la? bidiibe laacaʼ copa que ne nabe: «Laguéʼ ni, irá xixé tu». Ne guníʼrube: Vinu riʼ zeeda gácani rini stinneʼ, ni chiguxhiee para gulaʼyaʼ laatu de donda. Cadi guiaanadxitu de gúnitu sicaríʼ para guietenaláʼdxitu naa (Mateo 26:26-28; 1 Corintios 11:23-26).

Ñee biiyaluʼ gudxi Jesús ca discípulo stiʼ cadi guiaanadxicaʼ de gúnicaʼ ni para guietenaláʼdxicaʼ laabe la?... Dede dxiqué, lugar de ñúnicabe Pascua que, maʼ chigúnicabe guendaroxhi riʼ ti biaje lu ti iza para guietenaláʼdxicabe Jesús, ne guendaguti stiʼ. Guendaró nabé risaca riʼ lani Guendaroxhi stiʼ Señor. Yanna riʼ laaca runibiaʼnu ni casi dxi rietenaláʼdxinu guendaguti stiʼ Jesús. Xiñee yaʼ.... Purtiʼ riquiiñeʼ ni para guietenaláʼdxinu ni biʼniʼ Jesús ne Bixhózebe, Jiobá Dios, pur laanu.

Pan ca riquiiñeʼ gusietenalaʼdxiʼ ni laanu cuerpu stiʼ Jesús, ni bidiibe para ganda gápanu ti guendanabani ni qué zaluxe. Yanna vinu tintu ca yaʼ.... Vinu ca riquiiñeʼ gusietenalaʼdxiʼ ni laanu pabiáʼ risaca rini stiʼ Jesús. Rini stibe que jma risaca ni que stiʼ dendxuhuiiniʼ ni biiticabe lu Pascua dxi guyuucabe Egipto. Nannuʼ xiñee la?... Biblia na, pur rini stiʼ Jesús ca rixiá ca stóndanu. Ne ora maʼ guixiá guiráʼ xixé ni la? maʼ guirutiʼ tu zacahuará, zioʼxhoʼ ne zati. Naquiiñeʼ guiníʼ íquenu ndiʼ dxi guietenaláʼdxinu guendaguti stiʼ Jesús.

Guiráʼ tu cheʼ para guietenaláʼdxinu guendaguti stiʼ Jesús ca, ñee naquiiñeʼ gócabe pan ca ne guécabe vinu ca la?... Jesús gúdxibe cani ró pan ca ne reʼ vinu ca sicaríʼ: Laatu chichuunetu naa lu reinu stinneʼ ne zabínetu naa lu trono guibáʼ (Lucas 22:19, 20, 30). Nga riníʼ ziécabe guibáʼ para gácacabe rey ne Jesús. Nga runi ca binni si ni cabézacaʼ guni gobernarnecaʼ Jesús guibáʼ nga naquiiñeʼ gocaʼ pan ne guecaʼ vinu.

Peru dede ne binni ni qué ró pan ca ne qué reʼ vinu ca naquiiñeʼ chécabe para guietenaláʼdxinu guendaguti stiʼ Jesús. Nannuʼ xiñee la?... Purtiʼ Jesús bidii guendanabani stiʼ pur guiranu. Pa laanu chuunu para guietenaláʼdxinu guendaguti ca la? zusihuínninu caʼruʼ gusiaandadinu laabe. Ne laaca zietenaláʼdxinu Dios nga bisigaʼdeʼ laanu xiixa guizáʼ sicarú.