Guluu ndaayaʼ Dios Abrahán ne binnilidxi

JIOBÁ maca nanna ziuu dxi zudii Xiiñiʼ ni jma nadxii xquendanabani. Neca cadi zacapeʼ nga zeedani lu ca diidxaʼ riguixhená stiʼ Génesis 3:15, peru nga nga ni riniʼni. Para ganna binni guidxilayú pabiáʼ naná yuubaʼ zapa Dios dxi gati Xiiñiʼ la? gudíxhebe guicá lu Biblia ni biʼniʼ sentir Abrahán dxi gunábabe laa guuti Isaac, tobi lucha xiiñiʼ ni nadxii.

Cadi guiaandaʼ laanu gudxi Dios laabe de Isaac nga gueeda ni chigulá que. Biʼniʼ crebe de guidubi ladxidoʼbe zuni Dios ni maʼ guníʼ que ne nánnabe zusibani Dios xiiñibe sti biaje pa caquiiñeʼ. Ngue runi bizuubabe diidxaʼ ne guníʼ íquebe gudiibe xiiñibe Dios. Peru maʼ para ñuutibe xiiñibe, biseendaʼ Jiobá ti ángel gabi laabe maʼ cadi gúnibe ni. Despué bisisaca Jiobá Abrahán pur fe ni gupa ne bizeetebe sti biaje ni maca gúdxibe laa.

Gudiʼdiʼ si dxi, beeda gapa Isaac chupa xiiñiʼ, tobi que láʼ Esaú ne stobi que Jacob. Peru Jacob si nga bisisaca ca cosa zeeda de Jiobá ne pur ngue gucuaa stale ndaayaʼ. Dios bichaa lá Jacob ne gulee lá laabe Israel ne ca doce xiiñibe que beeda gácacaʼ xaíque stiʼ ca tribu stiʼ Israel. Peru, ximodo beeda gaca familia que ti guidxi roʼ yaʼ.

Para beeda gaca familia que ti guidxi roʼ bizaaca stale cosa. Primé la? bizulú bidxiichiné ca biʼchiʼ José ni jma huaniisi laa. Nabé gucananaláʼdxicaʼ laabe dede bitoocaʼ laabe casi esclavu. Cani guzíʼ José que yenecaʼ laabe Egipto, ne raqué bidxaagalube stale guendanagana. Peru Dios gucané laabe, purtiʼ qué nusaana de ñúnibe ni na ne gúcabe nadxibalú ne ti dxi bidii faraón laabe ti dxiiñaʼ nabé risaca. Pur ngue gunda gucanebe binnilídxibe dxi birá guendaró xquídxicaʼ, ne cumu maʼ qué gápacaʼ ni gocaʼ la? bicaani Jacob guseendaʼ chupa chonna de ca xiiñiʼ chiyúbicaʼ ni gocaʼ ndaaniʼ guidxi Egipto. Peru, tu lu náʼ nuu guiráʼ ni gó binni ndaaniʼ guidxi que yaʼ. ¡Lu náʼ José! Despué de biechenebe ca bíʼchibe purtiʼ maʼ xadxí qué huayuuyacabe ne biiyabe maʼ guca arrepentircaʼ la? bitiidiláʼdxibe stóndacaʼ ne biseendacaabe guiráʼ binnilídxibe. Faraón bidii laacabe ca layú jma sicarú napa ne raqué bidálecabe ne gúpacabe stale cosa. José bidii cuenta biʼniʼ Jiobá guiráʼ ngue para gaca guiráʼ ni maʼ guníʼ.

Jacob bibani Egipto lade guiráʼ binnilidxi dede dxi guti. Dxi mayaca gátibe, guniʼbe binni ni chigulá que zaca ti rey ne zapa stale poder ne laa zeeda de Judá xiiñibe. Gudiʼdiʼ stale iza, José guníʼ zabee Dios ca binnilidxi Jacob de Egipto.

(Zeedani lu capítulo 20 dede 50 stiʼ Génesis ne Hebreos 11:17-22.)