Ximodo zanda guidxíñanu Dios

1. Ñee rucaadiaga Dios guiráʼ oración runi binni la?

Cayuni invitar Dios guiráʼ binni guidxíñacaʼ laabe ora guni orarcaʼ (Salmo 65:2). Peru qué riníʼ diʼ nga rucaadiágabe guiráʼ oración runi binni laabe. Biblia na pa qué runi respetar ti hombre xheelaʼ la? zanda «uchiiña» ni ora guni orar Dios (1 Pedro 3:7). Casi dxi qué nusaana ca israelita de ñúnicaʼ cosa dxabaʼ, qué niná Dios nucaadiaga laacabe. Peru rucaadiágabe oración stiʼ ca binni ni biʼniʼ xiixa cosa nabé malu pa gaca arrepentircaʼ. Biindaʼ Isaías 1:15 ne Hechos 3:19.

Biiyaʼ videu ni láʼ ¿Ñee rucaadiaga Dios guiráʼ oración runi binni la?

2. Ximodo naquiiñeʼ guni orarnu

Ora runi orarnu Jiobá la? laaca cayuni adorarnu laabe, nga runi laasíbe nga naquiiñeʼ guni orarnu (Mateo 4:10; 6:9). Ne cumu nácanu binni ruchee la? naquiiñeʼ guni orarnu Dios lu lá Jesús, purtiʼ laa guti para quixe ca donda stinu (Juan 14:6). Jiobá qué riuulaʼdxiʼ diʼ guininu ngueca ca ngueca ora guni orarnu laa o guidúʼndanu xiixa oración ni cá lu ti guiʼchiʼ, sínuque riuuláʼdxibe iquiiñenu diidxaʼ ni guiree de ndaaniʼ ladxidoʼno. Biindaʼ Mateo 6:7 ne Filipenses 4:6, 7.

Dios ni bizáʼ laanu rucaadiaga dede né ca oración ni rúninu ndaaniʼ ladxidoʼno (1 Samuel 1:12, 13). Ne laabe runi invitarbe laanu guni orarnu laabe ora tiisi, siadóʼ o huadxí, ora chidoʼno ne ora guidxaagalunu xiixa guendanagana. Biindaʼ Mateo 15:36 ne 1 Pedro 5:7.

3. Ximodo racané ca guendaridagulisaa ca laanu

Nabáninu lade binni ni qué gapa fe Dios ne dede runi búrlacaʼ laabe purtiʼ nabe mayaca guibani binni sin tinde lu Guidxilayú riʼ. Ca cosa riʼ zanda cuee cani gana laanu ne ma cadi gúninu stipa pur guidxíñanu laabe (2 Timoteo 3:1, 4; 2 Pedro 3:3, 13). Nga runi, caquiiñeʼ guidagulisaanenu xcaadxi xpinni Cristu para uguucabe gana laanu. Ne laaca caquiiñeʼ uguʼnu gana laacabe. Biindaʼ Hebreos 10:24, 25.

Ora guidxaaganu binni ni nadxii Dios zuni sentirnu nuunu jma gaxha de laabe. Ca guendaridagulisaa stiʼ ca testigu stiʼ Jiobá riguu cani gana laanu ora guidúʼyanu pabiáʼ fe napa ca xpinni Cristu. Biindaʼ Romanos 1:11, 12.

4. Ximodo zanda guidxíñaluʼ Dios

Zanda guidxíñaluʼ laabe ora guiníʼ íqueluʼ cani maʼ biziidiluʼ lu Biblia. Guníʼ ique guiráʼ ni bíʼnibe, ca conseju stibe ne cani naguixhe íquebe gúnibe. Ora guiníʼ íqueluʼ cani zeeda lu Stiidxaʼ Dios ne guni orarluʼ laabe, zacanécani lii guiéneluʼ pabiáʼ nadxii Dios binni ne pabiáʼ nuu xpiaanibe. Biindaʼ 1 Timoteo 4:15, 16.

Zanda chuʼluʼ gaxha de Dios pa guni creluʼ ne gápaluʼ fe laabe. Ne fe ca zeeda gácani casi ti yaga ni caquiiñeʼ guzeecabe para guiniisi. Nga runi para guiniisi fe stiluʼ naquiiñeʼ guiníʼ íqueluʼ xi razón nápaluʼ para guni creluʼ cani zeeda lu Biblia. Biindaʼ Mateo 4:4 ne Hebreos 11:1, 6.

5. Xi zabeenduluʼ pa chuʼluʼ gaxha de Dios

Jiobá rizaalaʼdxiʼ guiráʼ ca binni ni nadxii laa. Zanda gápabe laacaʼ para cadi chuʼ xiixa ni gucaa laacaʼ gusaanacaʼ de gápacaʼ fe ne ni guxheleʼ laacaʼ de guicaacaʼ guendanabani ni qué zaluxe (Salmo 91:1, 2, 7-10). Laaca riguixhenabe laacaʼ ti gánnacaʼ xii nga ca cosa ni zanda guni huará laacaʼ ne xi zucueeza laacaʼ para cadi guibánicaʼ nayecheʼ ne rusiidibe laacaʼ ximodo guibánicaʼ jma galán. Biindaʼ Salmo 73:27, 28 ne Santiago 4:4, 8.