Biyubi chaahuiʼ Josías tu gaca xhamigu

Ñee nagana nga guni binni ni na Jiobá la?... Stale binni riníʼ nabé nagana ni. Peru Biblia rusiidiʼ laanu cadi zacá ni. Ruzeeteni historia stiʼ Josías, ti hombrehuiiniʼ ni nabé bicaa ique guni ni na Jiobá. Ne gunda bíʼnibe ni purtiʼ biyubi chaahuibe tu gaca xhamígube. Guidúʼyanu xi zanda guizíʼdinu de Josías ne de ca xhamigu.

Bixhoze Josías nga Amón ne laa guca rey stiʼ guidxi Judá. Guizáʼ malu guca Amón ne biʼniʼ adorar dios ni cadi dxandíʼ. Guti si Amón, beeda gaca Josías rey stiʼ guidxi Judá. Nannuʼ panda iza napa Josías dxi bíʼnicabe laa rey la? ¡Xhono iza! Ñee gúcabe malu cásica bixhózebe la?... Coʼ, qué ñácadibe malu.

Maca riuulaʼdxiʼ Josías guni ni na Jiobá dede nahuiiniʼ. Ngue runi, biyubi chaahuibe tu gaca xhamígube. Gulibe gaca xhamígube ca binni ni nadxii Dios ne laacaʼ nga gucanecaʼ laabe guzuubabe stiidxaʼ Jiobá. Tuu nga ca binni guca xhamigu Josías yaʼ.

Tobi de laacabe nga profeta Sofonías. Laabe gúdxibe ca binni de Judá ca diidxaʼ riʼ: «Zápatu guendanagana pa qué gusaana de guni adorartu ca dios ni cadi dxandíʼ». Xi biʼniʼ Josías yaʼ. Ñee bíʼnibe ni na profeta que la? Bíʼnibe. Ngue runi, qué nusaana de ñuni adorarbe Jiobá ne qué ninabe ñuni adorarbe ca dios ni cadi dxandíʼ.

Stobi de ca xhamigu Josías nga Jeremías. Zándaca biaʼca iza nápacabe ne gaxha ra gulézacabe dxi gúcacabe nahuiiniʼ. Gucanesaa Jeremías ne Josías para gunda bíʼnicaʼ xhiiñaʼ Jiobá. Nabé guca xhamígucabe, ngue runi, dxi gutiʼ Josías dede bicaa Jeremías ti canción para guiníʼ pabiáʼ triste nuu.

Cadi dxandíʼ stale ni rusiidiʼ ejemplu stiʼ Josías laanu la?... Dede nahuiinibe maca gucuá íquebe gúnibe ni na Dios. Ne para gúnibe ni, gupa xidé guca xhamígube binni ni nadxii Jiobá. Cadi dxandíʼ laaca racalaʼdxuʼ guʼnuʼ ni na Jiobá la? Nga runi, naquiiñeʼ guyúbiluʼ gaca xhamíguluʼ ca binni nadxii Dios.