Ni gusiiditu ca xiiñitu

Josías gudixhe ique guni ni jneza

ÑEE raca nagana para lii guʼnuʼ ni jneza la?a... Pa rábiluʼ nagana ni la? cadi lii si nga riníʼ íqueluʼ zacá. Stale binni riuu zacaca, dede ne cani maʼ huaniisi. Peru xiñee nabé nagana raca ni pue. Guidúʼyanu xi bizaaca Josías. Ñee nánnaluʼ tu laabe la?...

Bixhoze Josías nga Amón, ti rey nabé malu ni guyuu Judá, gúpabe Josías dxi nápabe 16 iza. Bixhozebídabe Manasés laaca qué ñuni gobernar diʼ jneza stale iza. Ngue runi gunaazeʼ ca asiriu laabe ne yenecaʼ laabe de esclavu Babilonia, ti guidxi zitu. Ra deguyoobe que gunábabe Jiobá gutiidilaʼdxiʼ donda stibe, ne biʼniʼ Jiobá ni.

Bindaasícabe Manasés la? bibiguétabe Jerusalén ne gúcabe rey raqué sti biaje. Nagueendaca biʼniʼ chaahuibe ca cosa malu ni bíʼnibe ne gucanebe binni guni ni na Jiobá. Ñee ruxuíʼluluʼ pabiáʼ triste guyuube ora bíʼyabe qué ñuni diʼ Amón xiiñibe modo bíʼnibe la? Ca dxi que nga gule Josías, xhiágabe. Biblia cadi caníʼ diʼ pabiáʼ tiempu guzané Manasés laabe, peru, cadi raʼbuʼ bisiidiʼ bixhozebídabe laabe gúnibe ni na Jiobá la?...

Josías napa xhoopaʼ iza dxi guti Manasés ne guca Amón rey lugar stibe, peru huaxiéʼ iza biʼniʼ gobernarbe, purtiʼ deruʼ chupa iza de zúbabe casi rey ora biiti ca xpínnibe laabe. De raqué maʼ guca Josías rey stiʼ Judá, xhono si iza nápabe dxi que (2 Crónicas, capítulo 33). Xi raʼbuʼ zuni Josías yaʼ. Zinándabe ejemplu stiʼ bixhózebe, Amón, neca cadi jneza ni biʼniʼ la? O zinándabe ejemplu sicarú ni bisaanané bixhozebídabe, Manasés, laabe...

Neca nahuiiniruʼ Josías, peru maʼ naguixhe ique guni ni na Jiobá. Nga runi, lugar de ñúnibe ni na ca xhamigu bixhózebe la? bicaadiágabe ca binni ni nadxii Jiobá. Xhono si iza nga nápabe, peru maʼ nánnabe galán nga gucaadiaga binni cani nadxii Dios (2 Crónicas 34:1, 2). Ñuuláʼdxiluʼ ñunibiaʼluʼ caadxi de ca xhamigu Josías, cani bidii conseju sicarú laabe la?...

Tobi de laacabe nga ti hombre riguixhená láʼ Sofonías. Zándaca xfamíliabe nga Josías, purtiʼ ruluíʼ si zá profeta riʼ de rey Ezequías, bixhoze Manasés. Ca primé iza de naca Josías rey, bicaa Sofonías ti libru ni zeeda lu Biblia ni ziné labe. Lu libru ca bicaabe xi zazaaca ca binni ni qué guni ni jneza, ne rihuinni bicaadiaga Josías ni guniʼbe que.

Sti ejemplu sicarú para laabe nga Jeremías. Zándaca huayunadiágaluʼ de hombre riguixhená riʼ, purtiʼ laaca bicaabe ti libru zeeda lu Biblia ni ziné labe. Nahuiiniruʼ guirópacabe ne gaxha de ra biniisicabe. Nabé gunnaxhiisaacabe, ngue runi ora guti Josías lu ti guendaridinde, bicaa Jeremías ti canción para gusihuinni pabiáʼ triste nuu (2 Crónicas 35:25). ¡Zanda guiníʼ íquenu pabiáʼ guluusaacabe gana laacabe para gúnicabe ni na Jiobá!

Peru xi zanda guiziidiluʼ de Josías... Tu rábiluʼ zanda guiniʼné lii de Dios pa bixhózeluʼ laaca qué runi ni na Jiobá yaʼ. Zanda guni jñaaluʼ ni, bixhozebídaluʼ o sti familia stiluʼ. O zándaca gudii jñaaluʼ lugar gusiidiʼ sti xpinni Jiobá lii ni cá lu Biblia.

Neca cadi nuuluʼ casi guyuu Josías, peru zanda gúniluʼ casi bíʼnibe. Casi maʼ bidúʼyanu ca, neca nahuiinirube, peru biénebe naquiiñeʼ gaca xhamígube ca binni si ni runi ni na Jiobá. ¡Lii laaca zanda quixhe íqueluʼ gúniluʼ ni jneza!

[Cani cá ñee yaza]

Guendarinabadiidxaʼ:

❍ Tuu nga bixhoze ne bixhozebida Josías. Ñee gúcacabe nachaʼhuiʼ la? o malu.

❍ Ximodo bichaa bixhozebida Josías.

❍ Tu láʼ guiropaʼ hombre riguixhená ni gucané Josías guni ni jneza. Xiñee rábiluʼ riquiiñeʼ gaca xhamígunu binni casi laacabe.

[Ca dibuju/foto ni zeeda lu yaza 25]

Ximodo gucané Sofonías ne Jeremías Josías para guni ni jneza