Paraa ne padxí gule Jesús

Biʼniʼ mandar emperador César Augusto gaca ti censu para gaca registrar guiráʼ binni. Ngue runi gupa xidé guyé José ne María guidxi Belén ni riaana ladu gueteʼ de Jerusalén, purtiʼ raqué gule José.

Cumu guyé stale binni ndaaniʼ guidxi Belén para gaca registrar la? ngue runi, maʼ gastiʼ lugar ra guiaana José ne María ne gupa xidé biaanacabe ndaaniʼ ti establo, ti lugar ra rieeguyoo burru ne xcaadxi maniʼ. Ne raqué nga gule Jesús. Bichenda María laabe caadxi tira de lari ne gudixhe laabe ndaaniʼ ti pesebre o ti cajón ra ró maniʼ guixi.

Nánnanu biquiiñeʼ Dios César Augusto para biʼniʼ mandar gaca registrar binni. ¿Xiñee nánnanu ni yaʼ? Purtiʼ gayuaa iza ante maca biete lu Stiidxaʼ Dios ndaaniʼ guidxi Belén nga zale tobi ni guni mandar (Miqueas 5:2). Pur ni biʼniʼ mandar César Augusto, gule Jesús ndaaniʼ guidxi Belén, guidxi ra gule bixhozebiidabe, rey David.

Bizaaca xiixa nabé risaca gueelaʼ que. Málasi bizaaniʼ ti biaaniʼ lu ca layú ra nuu caadxi pastor. ¡Laani nga gloria stiʼ Jehová! Ne gudxi ti ángel laacabe: «Cadi guidxíbitu, purtiʼ, laguuyaʼ, niaʼ noticia galán ni zusiecheʼ guiráʼ binni. Purtiʼ yannadxí gule tobi ndaaniʼ xquidxi David, ni gulá laatu, ne laabe nga Cristu, Señor. Ndiʼ nga señal para gánnatu tu laabe: Zadxélatu ti baʼduhuiiniʼ renda tira de lari ne nexheʼ ndaaniʼ ti pesebre». De raqué bihuinni jma ángel ne bizulú guniʼcaʼ: «Gloria Dios ni nuu guibáʼ, ne chuʼ paz lu guidxilayú lade ca binni ni riuuláʼdxibe ni rúnicaʼ» (Lucas 2:10-14).

Ne ora zeʼ ca ángel que, bizulú guníʼ ca pastor que: «Caquiiñeʼ chuunu Belén, modo tiisi, para guidúʼyanu ni guca, ni maʼ gudxi Jehová laanu riʼ» (Lucas 2:15). Nagueendaca bireecabe ziguuyacabe baʼduhuiiniʼ que ne bidxélacabe laa nexheʼ ndaaniʼ ti pesebre. Ne ora guníʼcabe ni gudxi ángel que laacabe de baʼduhuiiniʼ que, guizáʼ bidxagayaa guiráʼ ca ni binadiaga. Peru caníʼ ique María ne cayapa guiráʼ ca diidxaʼ que ndaaniʼ ladxidóʼ.

Ca dxi riʼ, stale binni runi cré gule Jesús 25 de diciembre. Peru beeu diciembre riʼ, nabé nananda raca ne riaba nisaguié ndaaniʼ guidxi Belén. Dede nuu tiru riaba hielu. Ngue runi guizáʼ nagana cheʼ ca pastor lu layú para gápacaʼ ca dendxuʼ sticaʼ. Laaca zándaca qué niná emperador que nuseendacaa ca binni que para gaca registrarcaʼ purtiʼ nananda ca dxi que, ne jmaruʼ si purtiʼ nuu ca binni que gucaalú laabe. Ndiʼ rusihuinni qué ñale diʼ Jesús tiempu nananda, sínuque zándaca gúlebe lu beeu octubre, ti beeu huaxiéʼ nananda.