Guníʼ ca ángel maʼ gule Jesús

César Augusto, gobernador stiʼ Roma biʼniʼ mandar cheʼ guiráʼ ca judíu guidxi ra gúlecaʼ para guicá lacaʼ. Ngue runi guyé José ne María Belén purtiʼ de raqué familia stiʼ José. Mayaca gapa María baʼduhuiiniʼ.

Ora yendácabe Belén, qué nidxélacabe paraa ñaanacabe, ngue runi biaanacabe ndaaniʼ ti establo ne raqué gule Jesús. Bichenda María laabe lari naguudxi ne gudixhe laabe ndaaniʼ ti cajón ra ró maniʼ guixi.

Gaxha de guidxi Belén, cayapa caadxi pastor dendxuʼ huaxhinni lu layú. Málasi biiyacabe ti ángel, ne bizaaniʼ biaaniʼ stiʼ Dios laacabe. Guizáʼ bidxibi ca pastor que, peru ángel que gudxi laacabe: «Cadi guidxíbitu, zedaniáʼ caadxi diidxaʼ galán para laatu. Yannadxí gule Mesías Belén». Óraque, bihuinni stale ángel guibáʼ ne guniʼcaʼ: «Guisaca Dios ni nuu guibáʼ, ne chuʼ guendariuudxi ndaaniʼ Guidxilayú». Despué de ngue maʼ qué nihuinni ca ángel que. ¿Xi biʼniʼ ca pastor que yaʼ?

Ca pastor que guniʼcaʼ: «Chuu Belén nagásica». Ngue runi guyécabe Belén ne raqué bidxélacabe José, María ne baʼduhuiiniʼ que nuucaʼ ndaaniʼ ti establo.

Guizáʼ bidxagayaa binni ora gúnnacaʼ xi gudxi ángel que ca pastor que. Qué ñuu dxi nusiaandaʼ María ca diidxaʼ gudxi ángel que laa. Bibiguetaʼ ca pastor que ra nuu ca dendxuʼ sticaʼ, ne guizáʼ nayecheʼ zecaʼ zigudiicaʼ xquíxepeʼ Jiobá pur guiráʼ ni bíʼyacaʼ ne ni binadiágacaʼ.