Biniisi Jesús Nazaret

Biniisi Jesús Nazaret, ti guidxihuiiniʼ huaxiéʼ risaca ni nuu ladu guiaʼ de Judea. Nuu ni lade ca dani stiʼ región de Galilea, ladu oeste de nisadóʼ stiʼ Galilea.

Zándaca napa Jesús chupa iza dxi bireené bixhoze ne jñaa laa de guidxi Egipto ne yenecaʼ laabe lugar riʼ. Tiempu que laasibe nga xiiñiʼ bixhózebe ne jñaabe. Peru despué beeda gapa José ne María xcaadxi xiiñicaʼ: Santiago, José, Simón ne Judas. Ne zándaca laaca gúpacaʼ chupa dxaapahuiiniʼ. Nga runi, gupa Jesús tapa biʼchiʼ ne chupa o jma bizaʼnaʼ jma nahuiiniʼ que laa.

Napa Jesús xcaadxi familia. Maʼ runibiaʼnu Elisabet ne xiiñiʼ, Juan, ne nabézacaʼ stale kilómetru ladu gueteʼ de Judea. Peru gaxha de Galilea nabeza Salomé, zándaca benda María gunaa riʼ, ne pur nga zándaca xtiáʼ Jesús laabe. Xheelaʼ Salomé nga Zebedeo ne xiiñicabe nga Santiago ne Juan, zándaca xprimu Jesús laacabe. Qué gánnanu pabiáʼ tiempu guyuu Jesús gaxha de Santiago ne Juan dxi nahuiinicaʼ, peru despué guca xhamígube laacaʼ ne beeda gácacaʼ apóstol stibe.

Naca José carpinteru ne naquiiñeʼ guni dxiiñaʼ para gudii ni iquiiñeʼ familia stiʼ. Cumu bisiniisibe Jesús casi xiiñibe la? guiráʼ binni binibiáʼ Jesús casi «xiiñiʼ carpinteru» (Mateo 13:55). Ra maʼ ziniisi Jesús, bisiidiʼ José laa dxiiñaʼ de carpinteru ne nagueenda biziidiʼ dxiiñaʼ que. Ne ra gudiʼdiʼ tiempu binibiáʼcabe Jesús casi ti «carpinteru» (Marcos 6:3).

Ni jma risaca para José ne familia stiʼ nga guni adorarcaʼ Jehová. Casi runi mandar Ley stiʼ Dios guni binni napa xiiñiʼ, bisiidiʼ José ne María ca xiiñiʼ de Jehová ra tiica si nuucaʼ: ra lídxicaʼ, ora maʼ zecaʼ paxaraa, ora gátacaʼ ne ora guiásacaʼ (Deuteronomio 6:6-9). Laaca nuu ti sinagoga Nazaret. Ne gatigá riné José familia stiʼ raqué para guni adorarcaʼ Dios. Gupa Jesús costumbre cheʼ ndaaniʼ sinagoga sábadu (Lucas 4:16). Laaca guyuulaʼdxiʼ familia stiʼ José cheʼ ndaaniʼ templu ni nuu Jerusalén, casi zadúʼyanu lu sti capítulo ca.