Dxi gupa Jesús doce iza

Jesús ne xcaadxi xiiñiʼ José ne María gulézacaʼ ndaaniʼ guidxi Nazaret. Biʼniʼ José dxiiñaʼ de carpinteru para ganda gudii ni caquiiñeʼ familia stiʼ. Laaca bisiidibe laacaʼ de Jiobá ne de Ley stiʼ. Gupa familia stiʼ José costumbre de chiguni adorarcaʼ Dios ndaaniʼ sinagoga que ne checaʼ Jerusalén guiráʼ iza para guni celebrarcaʼ Pascua.

Dxi gupa Jesús 12 iza, guyé familia stibe Jerusalén, casi maca rúnicaʼ cada iza. Guizáʼ stale binni yeguni celebrar Pascua ndaaniʼ guidxi que. Biluxe si saa que, bibiguetaʼ José ne María ra lídxicaʼ peru zacaxácabe zeeda Jesús lade ca familia stícabe. Ora biyúbicabe laabe lade ca binni que, qué nidxélacabe laabe.

Ngue runi bibiguétacabe Jerusalén ziyúbicabe Jesús. Biaʼsi chonna gubidxa gudiʼdiʼ para bidxélacabe laabe ndaaniʼ templu. Raqué nuube, zúbabe galaa de ca maestru que, cucaadiágabe laacaʼ ne canabadiidxabe laacaʼ. Nabé bidxagayaa ca maestru que guiráʼ ni guníʼ Jesús ne maʼ laacaʼ bizulú gunabadiidxacaʼ laabe. Guizáʼ bidxagayaacabe modo bicabi Jesús. Bidiicabe cuenta nabé riénebe Ley stiʼ Jiobá.

Nabé guyuu José ne María xizaa. María guníʼ: «Xiiñeʼ, maʼ birá ladu biyúbidu lii. ¿Paraa guyuuluʼ pue?». Bicabi Jesús laabe: «¿Ñee qué gánnatu pa naquiiñeʼ chuaaʼ ra lidxi Bixhozeʼ la?».

Biguetané Jesús bixhoze ne jñaa Nazaret. Raqué, bisiidiʼ José laabe dxiiñaʼ de carpinteru. ¿Lii, xi riníʼ íqueluʼ? ¿Ximodo guca Jesús dxi joven laa? Laga ziniisi Jesús ziyaca ti binni jma nuu xpiaaniʼ. Pur ngue nabé gunnaxhii Dios ne gunnaxhii binni laabe.