Zeʼ Jesús ne familia stiʼ Jerusalén

Ma gunda primavera, tiempu riʼ nga rié familia stiʼ José, ca xhamigu ne ca pariente stiʼ Jerusalén. Guiráʼ iza riécabe raqué para guni celebrárcabe Pascua casi runi mandar Ley gúnicabe (Deuteronomio 16:16). Riaana Nazaret biaʼ 120 kilómetru de Jerusalén. Guirácabe nuucabe nayecheʼ ne caguucabe listu ni chinécabe. Napa Jesús 12 iza, ne maʼ nuu cheʼ saa que ne cheʼ ndaaniʼ templu que sti biaje.

Riaana Jesús ne familia stiʼ caadxi dxi Jerusalén. Despué de Pascua que raca Saa stiʼ Pan Sin Levadura ne rindaani gadxe gubidxa (Marcos 14:1). Saa riʼ laaca rácani lu Pascua que. Ora rireecabe Nazaret ne ribiguétacabe sti biaje, rindaacabe biaʼ chupa semana. Peru iza riʼ, bindaacabe jma purtiʼ bizaaca Jesús xiixa ne maʼ zécabe neza ora bidiicabe cuenta.

Laga zécabe ladu guiaʼ, zácaxa José ne María nuu Jesús lade ca familia sticaʼ ne ca xhamígucaʼ. Peru qué nidxélacabe Jesús ora gulezadxícabe para guiziiláʼdxicabe gueelaʼ que. Biyúbicabe laabe lade ca binni ni runibiáʼcabe peru qué nidxélacabe laabe. ¡Nin ti ladu qué nidxélacabe hombrehuiiniʼ que! Ngue runi bibiguetaʼ José ne María Jerusalén sti biaje para guyúbicaʼ Jesús.

Chupa gubidxa biyúbicabe Jesús peru qué nidxélacabe laa. Ra guionna gubidxa que bidxélacabe laa ndaaniʼ templu que, zuba galahuiʼ de ca maestru, cucaadiaga ne canabadiidxaʼ laacabe. Guizáʼ cadxagayaa ca maestru que pabiáʼ riénebe ca cosa ni zeeda de Dios.

Ora biʼyaʼ María laabe, guníʼ: «Xiiñeʼ, ¿xiñee biʼnuʼ ndiʼ laadu pue? Naa ne bixhoʼzoʼ maʼ birá ladu biyúbidu lii» (Lucas 2:48).

Bidxagayaa Jesús xiñee qué ganna jñaa ne bixhozeʼ paraa nuu. Nga runi, gúdxibe laacaʼ: «¿Xiñee canayúbitu naa yaʼ? ¿Qué gánnatu naquiiñeʼ chuaaʼ ra lidxi Bixhozeʼ la?» (Lucas 2:49).

Óraque bibiguetané Jesús laacabe Nazaret ne bizuubaruʼ stiidxacabe ne biʼniʼ respetar laacabe. Ra ziniisi Jesús ziyaca ti binni nuu xpiaaniʼ ne cayuulaʼdxiʼ Dios ni runi ne zaqueca binni. Ca joven de tiempu riʼ, zanda guiziidicaʼ stale cosa de ejemplu stiʼ Jesús, purtiʼ dede nahuiiniʼ gudixhe ique guni ni ná Dios primé lu xquendanabani ne gupa respetu jñaa ne bixhoze.