Bidii Jesús xcaadxi conseju risaca ca apóstol stiʼ

Casi biluxe bisiidiʼ Jesús ximodo naquiiñeʼ gaca ca xpinni. Bisiidibe naquiiñeʼ gácacaʼ casi xcuidi, purtiʼ humilde laacaʼ ne qué riníʼ íquecaʼ jma risácacaʼ que xcaadxi. Laaca naquiiñeʼ chinanda ca discípulo ejemplu stiʼ Jesús ra gúnicaʼ stipa pur gápacaʼ cualidad casi ni napa ca xcuidihuiiniʼ (Mateo 18:5).

Huayuni discutir ca apóstol que tuu nga ni jma risaca ládecaʼ, nga runi naquiiñeʼ chinándacaʼ ni bisiidiʼ Jesús laacaʼ. Óraque gudxi Juan Jesús ti cosa ni cadi xadxí de bizaaca: «Maestru, bidúʼyadu ti binni caquiiñeʼ laluʼ para cuee demonio, gucaláʼdxidu nucueezadu laabe, purtiʼ cadi canazanebe laanu» (Lucas 9:49).

¿Ñee guníʼ ique Juan ca apóstol que si nga nápacaʼ autoridad para gusiándacaʼ ne cueecaʼ demonio la? Pa laasicabe zanda gúnicabe ni, ¿xiñee cabee judíu riʼ demonio yaʼ? Zándaca caníʼ ique Juan cadi naquiiñeʼ guni hombre que ca milagru riʼ purtiʼ cadi canazané Jesús ne ca apóstol.

Para gudxi Jesús laabe ti cosa ni cadi cabézabe: «Cadi gacaláʼdxitu gucueezatu laabe purtiʼ tuuxa ni iquiiñeʼ laʼyaʼ para guni ti milagru qué zanda guiníʼ mal de naa oraqueca. Purtiʼ tuuxa ni cadi cucaalú laanu la? nuu pur laanu. Ne dxandíʼ peʼ cayabeʼ laatu, tu gudii laatu ti vasu nisa purtiʼ nácatu discípulo stiʼ Cristu, qué ziuu dxi guniti premiu stiʼ» (Marcos 9:39-41).

Nga runi, cadi naquiiñeʼ peʼ chinanda hombre que Cristu para gusihuinni nuu pur laabe. Tiempu riʼ caʼruʼ gaca formar congregación stiʼ ca xpinni Cristu, nga runi cadi purtiʼ si cadi zinanda hombre que Cristu nácabe enemigu stiʼ o nuu guindisaʼ ti religión falsu. Rihuinni napa hombre que fe lu lá Jesús ne ni guníʼ Jesús riʼ bisihuinni ni zareendú ni cayuni hombre que.

Peru guizáʼ malu nga pa gucaa ca apóstol que hombre riʼ guchee, pur ni gúnicaʼ o pur ni guiniʼcaʼ. Jesús guníʼ: «Tu guni pur guchee tobi de ca ni nahuiiniʼ ni napa fe, jma galán para laa nugaandacabe ti guié molinu yanni casi ni rucaa bieque ti burru ne nusábacabe laa ndaaniʼ nisadóʼ» (Marcos 9:42). Laaca guníʼ Jesús pa gucaa nácabe, ñeecabe o guié lúcabe laacabe gucheecabe o guchee stobi la? naquiiñeʼ gáxhacabe ni. Jma galán para laacabe chúʼcabe lu Reinu stiʼ Dios né ti chú si ñeecabe, nácabe o guié lúcabe, que gulácabe guidubi cuerpu stícabe ne guilaacabe lu Gehena (valle de Hinón). Zándaca maʼ biiyaʼ ca apóstol que valle riʼ gaxha de Jerusalén, ra ruzaaquicabe guixi, ngue runi nánnacabe nácani ti lugar ra rinitilú xiixa para siempre.

Gudxi Jesús laacabe: «Laguuyaʼ qué chigúnitu despreciu tobi de ca ni nahuiiniʼ riʼ, purtiʼ cayabeʼ laatu siempre cayuuyadxí ca ángel stícabe ni nuu guibáʼ lú Bixhozeʼ ni nuu guibáʼ». ¿Pabiáʼ risaca ca «ni nahuiiniʼ riʼ» nezalú Jehová yaʼ? Óraque gudxi Jesús laacabe historia stiʼ ti hombre ni napa 100 dendxuʼ ne biniti tobi de laacame. Bisaanabe 99 que ne yeyúbibe ni cananiti que, ne ora bidxélabe laame jma biéchebe pur laame que pur 99 que. Óraque ná Jesús: «Zacaca nga Bixhozeʼ ni nuu guibáʼ: qué racalaʼdxiʼ guiniti nin tobi de ca ni nahuiiniʼ riʼ» (Mateo 18:10, 14).

Despué bidii Jesús conseju riʼ laacabe, zándaca purtiʼ biʼniʼ discutírcabe tuu nga ni jma risaca: «Lagaca casi zidi ne lachuu tobi si» (Marcos 9:50). Racané zidi para guiree guendaró nanixe. Zacaca zeeda gaca ca diidxaʼ sicarú ni rininu, purtiʼ racaneni binni ne racaneni chuʼ paz ládenu, ni qué riuu ora maʼ cadinde binni (Colosenses 4:6).

Bisiene Jesús laacabe xi naquiiñeʼ gúnicabe ora chuʼ ti guendanagana naroʼbaʼ: «Yanna, pa guni pecar ti bíʼchiluʼ contra lii, guyé ne gudxi laabe paraa bicheebe, peru lii si ne laabe. Pa gucaadiágabe lii la? maʼ biʼniʼ ganarluʼ bíʼchiluʼ». Peru, pa qué gucaadiágabe lii yaʼ? Jesús guníʼ: «Yené tobi o chupa binni, purtiʼ para guihuinni pa dxandíʼ o pa cadi dxandíʼ xiixa asuntu la? caquiiñeʼ testimonio stiʼ chupa o chonna testigu». Peru pa qué gucaadiágabe laacaʼ la? gudxi ni «congregación», o ca ancianu ni zanda guni chaahuiʼ asuntu ca. Peru pa nin ca ancianu qué gucaadiágabe la? Jesús guníʼ: «Gupa laabe casi binni de xcaadxi nación ne casi tobi ni runi cobrar impuestu», binni ni qué ridxaaga ca judíu (Mateo 18:15-17).

Naquiiñeʼ chinanda ca ancianu de congregación ni ná Stiidxaʼ Dios. Pa gúʼyacabe napa binni ca donda ne caquiiñeʼ gaca disciplinar, zaliibi decisión ni guicaacabe ca guibáʼ. Peru pa gúʼyacabe qué gapa binni ca donda la? zaxegueʼ decisión ni gucuaacabe ca guibáʼ. Guizáʼ zaquiiñeʼ ca instrucción riʼ ora maʼ gaca formar congregación stiʼ ca xpinni Cristu. Ndiʼ nga ni cayabi Jesús ca hermanu ni runi tender xiixa asuntu casi ni maʼ guninu riʼ: «Ra nuu chupa o chonna xpinneʼ reunidu la? nuaaʼ galaa de laacaʼ» (Mateo 18:18-20).