Bisibani Jesús Lázaro

Bidxaagalú si Jesús Marta ne María gaxha de Betania, zecaʼ ra baʼ stiʼ Lázaro, ti cueva ni, ne ti guié nga daʼguʼ ruaa ni. Yendá si Jesús raqué, guníʼ: «Lacuee guié ca». Qué ganna Marta xii ngue chiguni Jesús, ngue runi guníʼ: «Señor, maʼ candáʼ yuudxube, purtiʼ maʼ gudiʼdiʼ tapa gubidxa». Para gunabadiidxaʼ Jesús laabe: «¿Cadi maʼ gudxeʼ lii zuuyaluʼ poder stiʼ Dios pa guni creluʼ la?» (Juan 11:39, 40).

Para guleecabe guié que. Óraque gundisalú Jesús guibáʼ ne biʼniʼ orar: «Bixhozeʼ, rudieeʼ xquixe peʼ lii purtiʼ maʼ bicaadiágaluʼ naa. Maca nannaʼ siempre rucaadiágaluʼ naa, peru canieeʼ pur ca binni ni zuhuaa raríʼ, ti guni crécabe lii biseendaluʼ naa». Biʼniʼ orar Jesús nezalú ca binni que, para gánnacaʼ Dios nga chigudii laabe poder para gúnibe ti milagru. Biluxe si biʼniʼ orarbe, bicaabe ti ridxi reciu: «¡Lázaro, biree!». Ne oraqueca biree Lázaro. Liibi venda náʼ ne ñee ne renda ti lari lú. Para ná Jesús: «Lacuee ca venda ca ládibe ne lagudii lugar chebe» (Juan 11:41-44).

Stale judíu ni yeganna María ne Marta, biiyacaʼ milagru riʼ ne gúpacaʼ fe Jesús. Peru xcaadxi guyé ra nuu ca fariseu ne guniʼcaʼ ni biʼniʼ Jesús. Para biʼniʼ reunir ca fariseu ne ca sacerdote principal Sanedrín que, laa ni nga tribunal jma risaca stiʼ ca judíu. Tobi de ca ni nuu lu Sanedrín que nga Caifás, ni naca sumo sacerdote. Nuu de laacabe guníʼ: «¿Xi gúninu pue? Purtiʼ cayuni hombre riʼ stale milagru. Pa gudíʼrunu lugar laabe la? guiráʼ binni zapa fe laabe ne zeeda ca romanu ne záxhacaʼ laanu templu ne nación stinu» (Juan 11:47, 48). Nánnacabe runi Jesús stale milagru, purtiʼ rabi binni ni huayuuyaʼ ca milagru ni laacabe. Neca zacá, qué riéchecabe pur ca milagru cayuni Dios pur mediu de Jesús. Ni jma riguu xizaa laacabe nga guníticabe puestu stícabe ne gusaana de guni respetar binni laacabe.

Nánnanu qué runi cré ca saduceu pa zanda guibani binni ni maʼ guti, ngue runi, ora binadiágacaʼ bibani Lázaro, jmaruʼ si bidxiichicaʼ. Óraque bicabi Caifás, laa laaca saduceu laa, ne ná: «Laatu qué riénetu gastiʼ. ¿Ñee qué gánnatu pa jma risaca ti guidxi que ti binni la? Jma galán gátibe que guinitilú nación stinu» (Juan 11:49, 50; Hechos 5:17; 23:8).

Peru qué niníʼ diʼ Caifás ca diidxaʼ riʼ de guendabiaaniʼ si stiʼ, cumu nácabe sumo sacerdote iza que la? biquiiñeʼ Dios laabe para guniʼbe profecía ca. Ni racalaʼdxiʼ Caifás nga guuticabe Jesús, purtiʼ cadxibi gusaana de guni respetar binni ca líder stiʼ ca religión. Peru profecía ni guníʼ Caifás que, rusihuínnini ra gatiʼ Jesús zanda guilá ca judíu, ne cadi laasicaʼ, sínuque laaca né «ca xiiñiʼ Dios ni reeche ndase» (Juan 11:51, 52).

Últimu la? bicuudxi Caifás Sanedrín que para guuticaʼ Jesús. Peru casi maʼ bizíʼdinu, lade Sanedrín que nuu ti hombre láʼ Nicodemo, ni riuulaʼdxiʼ ni rusiidiʼ Jesús. ¿Ñee zábibe Jesús xi nuu Sanedrín que guni la? Qué gánnanu, peru biree Jesús de Jerusalén ne pur ngue maʼ qué ñuuticabe laa ante ganda dxi gudixe Dios gátibe.