Biiyaʼ stale binni Jesús ante de pentecostés que

Biasa si Jesús de lade gueʼtuʼ, gúdxibe 11 apóstol stibe checaʼ lu dani stiʼ Galilea para gúʼyabe laacaʼ raqué. Laaca nuu biaʼ gaayuʼ gayuaa discípulo raqué. Nuu de laacaʼ caʼruʼ guni crecaʼ pa dxandíʼ nabani Jesús, peru ni chitidxi Jesús laacabe riʼ bicaani laacabe guni crécabe (Mateo 28:17; 1 Corintios 15:6).

Bisiene Jesús laacabe maʼ bidii Dios laa autoridad guibáʼ ne lu Guidxilayú, ne biʼniʼ mandarbe laacaʼ: «Laché ne lagacané binni de guiráʼ guidxi gaca discípulo stinneʼ. Lacuunisa laacaʼ lu lá Bixhozeʼ, lu lá Xiiñiʼ ne lu lá espíritu santu. Lagusiidiʼ laacaʼ gúnicaʼ guiráʼ ni maʼ bineʼ mandar laatu» (Mateo 28:18-20). Dxandíʼ peʼ nabani Jesús ne nuu guni predicárcabe ca noticia galán stiʼ Reinu.

Guiráʼ ca xpinni Jesús —hombre, gunaa ne xcuidi— gucuaacaʼ dxiiñaʼ de gúnicaʼ discípulo. Neca gacalaʼdxiʼ ca enemigu gucueezacaʼ laacabe de guni predicárcabe ne gusiidicabe, Jesús gudxi laacabe: «Ma gucuaaʼ guiráʼ xixé autoridad guibáʼ ne lu guidxilayú». ¿Xii nga nuu Jesús gusiidiʼ? Laabe bisiénebe: «Laguietenalaʼdxiʼ, qué ziuu dxi guixeleʼ de laatu dede ora guiluxe guidxilayú riʼ». Cadi caníʼ diʼ Jesús guiráʼ ca ni guni predicar ca noticia galán zúnicaʼ milagru. Peru zacané espíritu santu laacabe.

Biaʼsi «40 dxi» nga bihuinni Jesús nezalú ca discípulo stiʼ. Ne biquiiñebe gadxé gadxé cuerpu para bihuínnibe nezalucaʼ ne «chuʼcaʼ seguru dxandíʼ nabánibe. [...] Ne guníʼnebe laacaʼ de Reinu stiʼ Dios» (Hechos 1:3; 1 Corintios 15:7).

Zándaca nuuruʼ ca apóstol que Galilea ora gudxi Jesús laacaʼ checaʼ Jerusalén. Ne ora guca reunírnebe laacaʼ raqué biʼniʼ mandarbe laacaʼ: «Cadi guireetu de Jerusalén. Lacueza gueeda ni maʼ biʼniʼ prometer Bixhozeʼ, ni maca gudxeʼ laatu. Purtiʼ biʼniʼ bautizar Juan né nisa, peru laatu ziuunísatu né espíritu santu, ne maʼ zedadxiña dxi gaca ni» (Hechos 1:4, 5).

Despué, guca reunírnebe ca apóstol que sti biaje. Ne «bireenebe laacaʼ fuera de guidxi que dede yendácabe Betania», ni nuu ñee dani Olivo (Lucas 24:50). Neca maʼ bisiene Jesús laacabe mayaca cheʼ, peru caníʼ íquerucabe lu Guidxilayú nga chichuu Reinu stiʼ Jesús (Lucas 22:16, 18, 30; Juan 14:2, 3).

Ngue runi gunabadiidxaʼ ca apóstol que laabe: «Señor, ¿ñee cudxiguétaluʼ reinu que lu náʼ Israel tiempu riʼ la?». Para bicábibe laacaʼ: «Bixhozeʼ siaʼ nga napa autoridad para quixheʼ padxí gaca guiráʼ cosa, laatu cadi caquiiñeʼ gánnatu ni». De raqué sti biaje ca bizeetebe dxiiñaʼ ni naquiiñeʼ gúnicaʼ: «Peru zacaatu poder ora gueeda espíritu santu luguiatu. Ne zácatu testigu stinneʼ Jerusalén, guidubi Judea ne Samaria, ne dede ra jma zitu lu guidxilayú» (Hechos 1:6-8).

Nuuruʼ ca apóstol que lu dani Olivo, málasi bizulú biásabe zebe guibáʼ ne nagueendaca bichii ti za laabe. Biásasibe de lade gueʼtuʼ, bihuínnibe nezalú ca discípulo stibe né gadxé gadxé cuerpu de beela. Yanna, bichaabe cuerpu de beela que, ni bihuínninebe biaje riʼ nezalú ca discípulo stibe, ne zebe guibáʼ casi espíritu (1 Corintios 15:44, 50; 1 Pedro 3:18). Laga cayuuyadxí ca apóstol que Jesús zeʼ guibáʼ, «málasi bihuinni chupa hombre nacu lari blancu cuéʼcabe». Chupa ángel ni napa cuerpu de beela ngue, ne gunabadiidxacaʼ laacabe: «Hombre de Galilea caʼ, ¿xiñee zuhuaatu raríʼ cayuuyadxitu guibáʼ pue? Jesús, ni guyuu ládetu ne zeʼ guibáʼ la? zabiguetaʼ cásica bíʼyatu zeʼ guibáʼ» (Hechos 1:10, 11).

Zeʼ Jesús guibáʼ sin ñuni stale bulla. Ca xpínnisibe biʼyaʼ laabe ora zebe guibáʼ. Ne ora guibiguétabe, cásica zebe guibáʼ, qué zúnibe bulla. Ca xpínnisibe zudiicaʼ cuenta maʼ nuu presencia stibe casi Rey.

Guca si ndiʼ, biguetaʼ ca apóstol que Jerusalén, ne gudiʼdiʼ si caadxi dxi, guca reunírnecaʼ xcaadxi discípulo. Ládecabe nuu «María jñaa Jesús ne ca biʼchiʼ» (Hechos 1:14). Guirácabe cayuni orárcabe Dios. Ne canábacabe laa gacané laacabe guidxela ti discípulo chuʼ lugar Judas Iscariote para guizaacabe 12 apóstol (Mateo 19:28). Nuucabe guidxélacabe ti discípulo ni biʼyaʼ ca cosa ni biʼniʼ Jesús ne ora biasa de lade gueʼtuʼ. Ngue runi guleecabe suerte para gánnacabe xi racalaʼdxiʼ Dios. Ndiʼ nga últimu biaje riete lu Biblia guleecabe suerte (Salmo 109:8; Proverbios 16:33). Ne biaba suerte que luguiáʼ Matías, zándaca guyuube lade ca 70 binni biseendaʼ Jesús chiguni predicar. Ne dede óraque «biuube lade ca 11 apóstol que» (Hechos 1:26).

Chii gubidxa despué de biguetaʼ Jesús guibáʼ, biʼniʼ celebrar ca judíu Saa stiʼ Pentecostés stiʼ iza 33. Biaje riʼ, nuu biaʼ 120 discípulo stiʼ Jesús ndaaniʼ ti cuartu lu guiropa pisu stiʼ ti yoo ni nuu Jerusalén. Málasi binadiágacabe ti ruidu, casi ora rundubi ti bi reciu, ne biuu ni ndaaniʼ yoo que. Biiyaʼ ca discípulo bihuinni caadxi belehuiiniʼ, casi ludxi bele, ne bireeche ni, biaana tobi luguiáʼ cada tobi de laacabe. Ne bizulú guníʼcabe gadxé gadxé idioma. Zaqué nga guca cumplir ni biʼniʼ prometer Jesús laacabe, ziaba espíritu santu luguiácabe (Juan 14:26).