Xii nga Reinu stiʼ Dios

XINÁ BIBLIA

«Dios ni nuu guibáʼ zucuí ti reinu ni qué ziuu dxi guinitilú.» (Daniel 2:44, Traducción del Nuevo Mundo.)

«Tuuxa bidii laanu xiiñiʼ; ne guendaruni mandar ca ziuuni lu xíʼquebe.» (Isaías 9:6.)

XIMODO ZACANÉ NGA LAANU

• Laani nga ti gobiernu ni zuni ni jneza ne zanda gacaneni cada tobi de laanu (Isaías 48:17, 18).

• Maʼ cadi candaa, zacané gobiernu ca laanu guibáninu nayecheʼ ndaaniʼ ti guidxilayú cubi, ra qué zaca huaranu (Apocalipsis 21:3, 4).

ÑEE ZANDA GUNI CRENU NI NA BIBLIA LA?

Zanda pue, nuu chupa razón:

• Jesús bisihuinni xi zuni Reinu stiʼ Dios. Laabe bisiidibe ca xpínnibe guinábacaʼ lu oración sticaʼ gueeda Reinu stiʼ Dios ne gaca ni na Dios lu Guidxilayú (Mateo 6:9, 10). Laaca bisihuínnibe ximodo zaca ni canábanu lu oración ca.

  Dxi guyuu Jesús lu Guidxilayú, biyaanabe cani candaana, bisiándabe cani huará ne dede bisibánibe gueʼtuʼ (Mateo 15:29-38; Juan 11:38-44). Cumu laabe ngue chigácabe Rey lu Reinu stiʼ Dios la? bisihuínnibe xi guiráʼ cosa galán zuni Reinu ca pur binni (Apocalipsis 11:15).

• Modo nabáninu lu Guidxilayú riʼ cusihuínnini mayaca gueeda Reinu stiʼ Dios. Jesús guníʼ ante guedané Reinu stiʼ Dios guendariuudxí lu Guidxilayú riʼ, zaca stale guerra, ziuu guendarindaana ne zaca stale xu roʼ (Mateo 24:3, 7).

  Cadúʼyanu guiráʼ ca guendanagana riʼ yanna. Nga runi, zanda guni crenu mayaca guni chaahuiʼ Reinu stiʼ Dios cani.