Carta stiʼ Grupu ni Zaniruʼ

Bíʼchidu ne bizáʼnadu ni nadxiidu:

Lii nannuʼ ruzeeteʼ Biblia de caadxi binni ni dxandíʼ bibani. Luni rieeteʼ relatu stiʼ hombre ne gunaa ni biʼniʼ ni na Dios ni bidxaagalú guendanagana cásica cadxaagalunu ne biʼniʼ sentircaʼ ni runi sentirnu (Santiago 5:17). Nuu de laacaʼ bireecaʼ gana pur ca guendanagana bidxaagalucaʼ o gucaná ladxidoʼcaʼ pur xiixa ni biʼniʼ ti xpinni Dios laacaʼ. Ne stale bichiiñaʼ xquendabiaaniʼ laa pur ni biʼniʼ.

Ñee bisaanapeʼ ca binni riʼ de gannaxhiicaʼ Jiobá la? Coʼ. Stale de laacaʼ guniʼcaʼ casi guníʼ ti salmista ora biʼniʼ orar Jiobá: «Cananiteʼ casi ti dendxuʼ. Biyubi xpínniluʼ, purtiʼ qué huasiaandaʼ ca mandamientu stiluʼ» (Salmo 119:176). Ñee huayuu dxi guiníʼ íqueluʼ zacá la?

Qué rusiaandaʼ Jiobá ca xpinni ni rireechú de xquidxi. Ruyúbibe laacaʼ ne nuu tiru riquiiñebe ca xpínnibe ni nuu ndaaniʼ congregación. Guníʼ ique ximodo gucané Jiobá Job, ti hombre ni gudiʼdiʼ lu stale desgracia. Binítibe guiráʼ ni gúpabe, guti guiráʼ ca binni ni nadxiibe ne gúpabe ti guendahuará ni guluu xquendanabánibe ra naxoo. Laaca biʼniʼ huantarbe ca diidxaʼ naná ni gudxi ca binni ni gulézabe ñacanecaʼ laabe. Neca qué ñuu dxi nudxiidéchebe Jiobá, guyuu ora guníʼ íquebe ni cadi jneza (Job 1:22; 2:10). Ximodo gucané Jiobá laabe guchaabe modo riníʼ íquebe yaʼ.

Biquiiñeʼ Jiobá ti xpinni ni láʼ Elihú para gacané laabe. Ora caníʼ Job guiráʼ desgracia ni cadiʼdiʼ, bicaadiaga Elihú laabe ne oraqueruʼ gudxi laabe xi caníʼ ique. Yanna, xi gabi hombre riʼ laabe yaʼ. Ñee zadindené laabe la? Ñee zugaaniʼ donda luguiabe o zusituí lube la? Ñee zusihuinni jma nanna que laabe. Qué ñúnibe nin tobi de ca cosa riʼ. Biquiiñeʼ Dios Elihú pur espíritu santu stiʼ para gabi Job: «Cásica lii zaqueca naa nezalú Dios ni dxandíʼ, laaca de beñe bizaʼbe naa». Óraque gúdxibe Job cadi guidxibi pur ni chitídxibe laa (Job 33:6, 7). Para cadi guninabe Job jma la? biyúbibe modo gudiibe conseju ne cuʼbe gana laa.

Cásica biʼniʼ Elihú ante gudii conseju, zacaca bínidu ante gucaʼduʼ folletu riʼ. Primeru bicaadiaga chaahuidu caadxi xpinni Cristu ni bireechú de xquidxi Dios ne xi bicaa laacaʼ guixélecaʼ (Proverbios 18:13). Despué biʼniʼ orardu ne bidúʼndadu ca relatu zeeda lu Biblia ni cusihuinni ximodo gucané Jiobá ca xpinni ni gudiʼdiʼ lu guendanagana cásica cadiʼdiʼ ca xpínnibe yanna. Ne últimu la? bichaagadu ca relatu zeeda lu Biblia né cani cadiʼdiʼ binni yanna. Nga runi, rinábadu lii cueeluʼ tiempu para gúʼndaluʼ ni. Gunna guizáʼ nadxiidu lii.

Grupu ni Zaniruʼ stiʼ ca Testigu stiʼ Jiobá