NDAA 3
Ora guninácabe ladxidoʼno: Nuu biaje nápanu «xiixa queja» né stobi
«Ti bendaʼ de congregación stinneʼ guníʼ gulanaʼ xpueltu, neca cadi dxandíʼ. Ora gunna xcaadxi xpinni Cristu ni, nuu tu guyuu pur naa ne nuu tu guyuu pur laabe. Despué bidiibe cuenta cadi naadiáʼ gucuaaʼ ni. Neca gunábabe naa gutiidelaʼdxeʼ stóndabe, bineʼ sentir qué ziuu dxi gusiaandaʼ ni bíʼnibe naa que.» (Linda)
ÑEE huayuninácabe lii casi bíʼnicabe Linda la? Nabé biuubaʼ ladxidoʼbe pur ni biʼniʼ xpinni Cristu riʼ laabe. Triste guininu ni, stale tu rusaana de guni ni na Dios ora guizaaca nga. Ñee huayúnicabe lii zacá la?
Ñee «zanda uxhele [tuuxa] laanu de Dios ni nadxii laanu» la?
Ora guniná ti xpinni Cristu laanu, zándaca gaca nagana para laanu gutiidiláʼdxinu stonda. Xiñee yaʼ. Purtiʼ cumu xpinni Cristu laabe, naquiiñeʼ nusihuínnibe nadxiibe laanu (Juan 13:34, 35). Nga runi, ora tuuxa de congregación stinu guniná laanu riuubaʼ ladxidoʼno purtiʼ cadi cabézanu ñúnibe ni laanu (Salmo 55:12).
Biblia ruzeeteʼ zándaca ziuu biaje gapa ti xpinni Cristu xiixa queja né stobi (Colosenses 3:13). Peru ora laanu nga guninácabe la? raca nagana gusiáʼndanu ni bíʼnicabe laanu. Xi zacané laanu yaʼ. Guiníʼ íquenu ca conseju zeeda lu Biblia. Guidúʼyanu chonna de laacani.
Nanna Bixhózenu ni nuu guibáʼ ximodo nuunu. Ruuyaʼ Jiobá guiráʼ ni cayaca, dede né ora gúnicabe laanu xiixa ni cadi jneza ne pur nga gacananu (Hebreos 4:13). Peru cadi ngasi: riuubaʼ ladxidoʼbe ora gacananu (Isaías 63:9). Qué rudiibe lugar chuʼ xiixa ni «uxhele laanu» de laabe, casi ca guendanagana stinu, cani riguu xizaa laanu o intiica cosa, dede nin tobi de ca xpínnibe (Romanos 8:35, 38, 39). Cumu racaláʼdxinu chinándanu Jiobá la? qué zudiʼnu lugar chuʼ xiixa o tuuxa guxheleʼ laanu de laabe.
Gutiidiláʼdxinu donda casi runi Jiobá. Ora gutiidiláʼdxinu stonda tuuxa, qué riníʼ diʼ nga cadi cayuubaʼ ladxidoʼno pur ni biʼniʼ laanu ne laaca cadi caninu bíninu laa xiixa pur nga bicheené laanu. Qué ruguuchayú Jiobá ni guni tuuxa ora guchee, peru ora gúʼyabe zanda la? rutiidiláʼdxibe stonda (Salmo 103:12, 13; Habacuc 1: 13). Cadi xadxipeʼ ridaa Jiobá xiana, ne cumu racaláʼdxibe gúninu cásica rúnibe la? canábabe laanu gutiidiláʼdxinu stonda binni (Salmo 103:9; Mateo 6:14).
Ribeendunu ni galán ora qué ridaʼnu xiana. Xiñee yaʼ. Guníʼ ique nicaaluʼ ti guié ni nanaa biaʼ ti kilu ne nusigaanaluʼ. Zándaca zuni huantarluʼ ti ratu. Peru pa guiaanuʼ zacá xadxí yaʼ. Pa tiidiʼ chupa chonna minutu de nualuʼ ni, ti hora o jma, cadi dxandíʼ nidxaga naluʼ la? Neca biaʼ queca nanaa guié que, peru ra tiidiʼ tiempu zuni sentirluʼ jma maʼ nanaa ni. Ngaca nga rizaaca ora ridaʼnu xiana: pa tiidiʼ stale tiempu sin cueenu ni ndaaniʼ ladxidoʼno, neca cadi tan naróʼbapeʼ ni, zuninanu laanu. Nga runi, cayabi Jiobá laanu cadi guidaʼnu xiana, purtiʼ nánnabe jma galán ziuʼnu (Proverbios 11:17).
Ribeendunu ni galán ora qué ridaʼnu xiana
«Casi ñaca naapiaʼ ngue caniʼné Jiobá»
Xi gucané Linda para cadi guidaa xiana pur ni biʼniʼ xpinni Cristu que laa yaʼ. Guníʼ íquebe ca razón ni rudii Biblia para gutiidiláʼdxinu donda stiʼ stobi (Salmo 130:3, 4). Ni bicaa laabe guiníʼ íquebe jma nga ora beedasilú laabe pa gutiidiláʼdxinu donda stiʼ stobi laaca zutiidilaʼdxiʼ Jiobá donda stinu (Efesios 4:32–5:2). Sicaríʼ cusiénebe modo gucané ca textu que laabe: «Casi ñaca naapiaʼ ngue caniʼné Jiobá».
Gudiʼdiʼ si tiempu, gulee Linda xiana nuu ndaaniʼ ladxidóʼ ne bitiidilaʼdxiʼ benda, ne yanna nabé xhamígacaʼ. Dede yanna cayúniruʼ Linda ni na Jiobá. Gunna dxichi laaca racalaʼdxiʼ Jiobá guʼnuʼ ni na biaʼ dxi guibániluʼ.