Bíʼnicabe ti promesa Jiobá

Biaʼ chupa beeu despué de biree ca israelita de Egipto, yendacaʼ lu dani Sinaí ne biaanacaʼ raqué. Óraque gunabaʼ Jiobá Moisés quibaʼ lu dani que ne gúdxibe laa: «Naa bilaʼyaʼ ca israelita. Pa guzuubacabe stiidxaʼ ne gúnicabe ni ná ca ley stinneʼ, zácacabe ti guidxi especial para naa». Ora biete Moisés de lu dani que, gúdxibe ca israelita xi gudxi Jiobá laabe. ¿Xi bicábicabe yaʼ? Guníʼcabe: «Zúnidu guiráʼ ni gabi Jiobá laadu».

De raqué, bibiguetaʼ gudxiʼbaʼ Moisés lu dani Sinaí. Raqué gudxi Jiobá laabe: «Dentru de chonna gubidxa zanieniáʼ guidxi riʼ. Gudxi laacabe cadi gacaláʼdxicabe quíbacabe lu dani riʼ». Biete Moisés ne gúdxibe ca israelita chuʼcaʼ listu para gucaadiágacaʼ Jiobá.

Gudiʼdiʼ si chonna gubidxa, biiyaʼ ca israelita que caree biaaniʼ ne nuu ti za cahui lu dani que. Laaca binadiágacaʼ guizáʼ reciu caxidxi rayu ne caxidxi ti cachu. De raqué biete Jiobá lu dani que lade bele. Nabé bidxibi ca israelita que. Bidxii dani que de guʼxhuʼ ne guizáʼ reciu biniibi dxacha ni. Ne ra zidiʼdiʼ hora jma reciu caxidxi cachu que. Óraque guníʼ Jiobá: «Naa nga Jiobá. Cadi naquiiñeʼ guni adorartu sti dios».

Bibiguetaʼ gudxiʼbaʼ Moisés lu dani que sti biaje, ne raqué bidii Jiobá laabe caadxi ley para guidxi que. Lu ca ley que gúdxibe laacaʼ ximodo naquiiñeʼ guni adorarcaʼ laabe ne ximodo guibánicaʼ. Bicaa Moisés ca ley que ne despué biindabe cani nezalú ca israelita. Laacaʼ biʼniʼ prometercaʼ: «Zúnidu guiráʼ ni guinabaʼ Jiobá laadu». Nga runi bíʼnicabe ti promesa Dios, peru ¿ñee zuni cumplírcabe ni la?