Guniʼné Jiobá Samuel

Gupa sumo sacerdote Elí chupa xiiñiʼ: Hofní ne Finehás. Gúcacabe sacerdote ne bíʼnicabe dxiiñaʼ ndaaniʼ tabernáculo. Peru qué ñúnicabe ni ná ca ley stiʼ Jiobá ne nabé feu modo biʼniʼ tratárcabe binni. Ora chiné ca israelita sacrificiu para Jiobá la? riaanané Hofní ne Finehás beela ni jma galán para laacaʼ. Nanna Elí cadi jneza ni cayuni ca xiiñiʼ, peru qué ñúnibe gastiʼ para nucueezabe laacaʼ. ¿Ñee rábiluʼ zuni Jiobá xiixa la?

Neca jma nahuiiniʼ Samuel que Hofní ne Finehás, qué ñúnibe ca cosa malu bíʼnicaʼ. Ngue runi, guyuulaʼdxiʼ Jiobá modo laabe. Ti gueelaʼ, nisiaasiʼ Samuel málasi binadiaga cucaa rídxicabe laa. Nagueendaca biásabe, ne biree guxooñebe zebe ra nuu Elí ne gúdxibe laa: «Raríʼ nuaaʼ». Peru bicabi Elí laabe: «Cadi naa diáʼ bicaa riʼdxeʼ lii. Guyé yegazi». Bibiguetaʼ Samuel lu cama stiʼ. Guca ndiʼ chupa biaje. Peru ra guionna biaje binadiaga Samuel ridxi que, bidii Elí cuenta Jiobá ngue caniʼné Samuel. Ngue runi bisiene Elí laabe pa gunadiágabe ridxi que sti biaje la? sicaríʼ nga naquiiñeʼ guicábibe: «Guníʼ Jiobá. Cucaadiaga siervu stiluʼ lii».

Ora bibiguetaʼ Samuel lu cama stiʼ binadiaga ridxi que sti biaje: «Samuel, Samuel». Laabe bicábibe: «Guníʼ Jiobá. Cucaadiaga siervu stiluʼ lii». Gudxi Jiobá laabe: «Gudxi Elí chiguneʼ castigar laa ne familia stiʼ. Nánnabe cayuni ca xiiñibe stale cosa malu ndaaniʼ tabernáculo stinneʼ, peru cadi cayúnibe gastiʼ para gucueezabe laacaʼ». Sti dxi que, bixheleʼ Samuel ca puertaʼ stiʼ tabernáculo que, casi maca rúnibe ni. Cadxíbibe gábibe sumo sacerdote que ni gudxi Jiobá laabe. Peru bicaa ridxi Elí laabe ne gunabadiidxaʼ laabe: «¿Xi gudxi Jiobá lii xiiñeʼ?». Óraque gudxi Samuel laabe xi guiráʼ gudxi Jiobá laa.

Biniisi Samuel, ne qué nusaana de ñaca xhamigu Jiobá. Ca israelita de guidubi guidxi que gúnnacaʼ gulí Jiobá laabe para gácabe profeta ne juez.