Bibiguetaʼ bibani xiiñiʼ ti viuda

Ca dxi qué ñaba nisaguié, gudxi Jiobá Elías: «Guyé Sarepta. Raqué nuu ti viuda gudii ni goloʼ». Ra puertaʼ guidxi que, biiyaʼ Elías ti gunaa canatopa yaga ne gunábabe laa ti vasu nisa. Ora zicaa gunaa que nisa la? gudxi Elías laabe: «Rinabaʼ lii, laaca gudiiluʼ naa ti ndaa pan». Peru viuda que bicabi laabe: «Qué gápadiaʼ pan, xii nga gudieeʼ lii. Napaʼ caadxi harina ne caadxi aceite para guneʼ xiixa ni gahuaʼ ne ni gó xiiñeʼ». Gudxi Elías laabe: «Maʼ guníʼ Jiobá, pa gúniluʼ ti pan huiiniʼ para naa la? qué ziaadxaʼ aceite ne harina ndaaniʼ lídxiluʼ biaʼ tiempu guiaadxaʼ ni gó binni».

Ngue runi zeʼ viuda que ra lidxi ne biʼniʼ ti pan para profeta stiʼ Jiobá que. Gupa viuda ne xiiñiʼ que ni gó biaʼ tiempu qué ñapa binni ni ñó, cásipeʼ modo guníʼ Jiobá ni. Qué nirá ni nuu ndaaniʼ jarru harina ne jarru aceite stibe.

Despué guca ti cosa guizáʼ triste. Gucahuará hombrehuiiniʼ xiiñiʼ viuda que ne guti, ne gunabaʼ gunaa que Elías gacané laa. Óraque, gucuaa Elías hombrehuiiniʼ que ne guyuáʼ laabe, ne gudxiʼbané laabe lu guiropa pisu stiʼ yoo que. Despué, gudíxhebe hombrehuiiniʼ que lu cama que ne biʼniʼ orarbe: «Jiobá, rinabaʼ lii, bisibani hombrehuiiniʼ riʼ». ¿Nánnaluʼ xiñee ti guendaridxagayaa pa guni Jiobá ndiʼ la? Purtiʼ para tiempu que, qué huayuu dxi guibani ti binni ni maʼ guti. Ne stobi nga, purtiʼ viuda que ne xiiñiʼ cadi israelita laacaʼ.

Óraque bizulú gucuaa hombrehuiiniʼ que bi sti biaje ne bibani. Gudxi Elías viuda que: «¡Biiyaʼ! Maʼ nabani xiiñiluʼ sti biaje». Guizáʼ biecheʼ gunaa que ne gúdxibe Elías: «Yanna huaxa maʼ nannaʼ Dios biseendaʼ lii. Raca guiráʼ ni riniʼluʼ purtiʼ zeeda cani de Jiobá».