Bilá ángel stiʼ Jiobá Ezequías

Maʼ biʼniʼ ganar ca asiriu reinu de chii tribu stiʼ Israel. Yanna, Senaquerib rey stiʼ Asiria, laaca nuu guni ganar reinu de chupa tribu stiʼ Judá. Ngue runi bizulú biʼniʼ ganarbe ca guidxi stiʼ Judá tobi pur tobi. Peru guidxi ni jma nuube guni ganarbe nga Jerusalén. Ni qué ganna Senaquerib nga Jiobá peʼ cayapa Jerusalén.

Ezequías, rey stiʼ Judá, gudixe stale bueltu Senaquerib para cadi gucaalú Jerusalén. Gucuaa Senaquerib bueltu que, peru nin ne ngue biseendaʼ ejércitu nadipaʼ stiʼ para gucaalú guidxi Jerusalén. Guizáʼ bidxibi ca binni de guidxi que, purtiʼ zeʼ ora jma gaxha zidxiña ca asiriu de guidxi Jerusalén. Óraque gudxi Ezequías laacabe: «Cadi guidxíbitu. Nadipaʼ ca asiriu, peru zuni Jiobá laanu jma nadipaʼ que laacabe».

Biseendaʼ Senaquerib Rabsaqué, mensajeru stiʼ, para guni burla ca binni de Jerusalén. Bizuhuaa Rabsaqué fuera de guidxi que ne bicaa ridxi: «Qué zanda gacané Jiobá laatu. Cadi gudiitu lugar quite Ezequías laatu. Nin ti dios qué zanda gulá laatu de lu nadu».

Gunabadiidxaʼ Ezequías Jiobá xi zanda guni, ne bicabi Jiobá laabe: «Cadi guidxíbiluʼ guiráʼ ni caníʼ Rabsaqué. Qué zuni ganar Senaquerib Jerusalén». Despué, biseendaʼ Senaquerib caadxi carta ra nuu Ezequías ra gudxi laabe: «Lagaca rendir. Qué zulá diʼ Jiobá laatu». Óraque biʼniʼ Ezequías ti oración: «Jiobá, bilá laadu por favor, ti ganna guiráʼ binni lii nga tobi lucha Dios ni dxandíʼ». Jiobá bicabi laabe: «Qué ziuu diʼ rey stiʼ Asiria ndaaniʼ guidxi Jerusalén. Naa zulaʼyaʼ xquidxeʼ».

Guyuu Senaquerib seguru zuni ganar guidxi Jerusalén. Peru gueelaʼ que biseendaʼ Jiobá ti ángel ra campamentu stiʼ ca asiriu, ni nuu fuera de guidxi que. ¡Biiti ángel que ti gayuaa ochenta y cinco mil soldadu! Guti ca soldadu jma nadipaʼ stiʼ Senaquerib ne maʼ qué ñanda ñuni gastiʼ ngue runi bibiguetaʼ ra lidxi. Zaqué nga bilá Jiobá Ezequías ne guidxi Jerusalén, cásica maca biʼniʼ prometer. Pa ñuuluʼ ndaaniʼ guidxi Jerusalén, ¿ñee ñápaluʼ confianza Jiobá la?