Ti Reinu ni qué ziuu dxi gusaana de guni mandar

Ti gueelaʼ guníʼ xcaandaʼ Nabucodonosor ti cosa ni qué ñanda ñene. Dede qué ñanda ñasi tantu guníʼ ique ni. Biseendacaabe ca magu stibe ne gúdxibe laacaʼ: «Lagusiene naa ni gunieeʼ xcaandaʼ». Ca hombre que bicábicaʼ laabe: «Gudxi laadu xi guníʼ xcaandaluʼ rey». Peru Nabucodonosor gudxi laacabe: «¡Coʼ! Lagabi naa xi gunieeʼ xcaandaʼ. Pa qué gábitu ni naa la? zuuteʼ laatu». Ca hombre que gúdxicaʼ laabe sti biaje: «Gudxi laadu xi guníʼ xcaandaluʼ, ne despué zábidu lii xi riníʼ ni». Óraque ná rey que rabi laacabe: «Nuutu quítetu naa. ¡Lagabi naa xi gunieeʼ xcaandaʼ!». Ca hombre que gúdxicaʼ laabe: «Nin ti binni de Guidxilayú riʼ qué zanda diʼ guni ni naluʼ ca rey. Purtiʼ nagana ni».

Guizáʼ bidxiichi Nabucodonosor dede biʼniʼ mandar guuticabe guiráʼ ca hombre nuu xpiaaniʼ de guidxi que. Laaca zuuticabe Daniel, Sadrac, Mesac ne Abednego. Peru gunabaʼ Daniel rey que gudii laa ti tiempu. Óraque Daniel ne ca xhamigu biʼniʼ orarcaʼ Jiobá para gacané laacaʼ. ¿Xi biʼniʼ Jiobá yaʼ?

Lu ti visión biluíʼ Jiobá Daniel xi guníʼ xcaandaʼ Nabucodonosor ne gúdxibe laa xi riníʼ ni. Sti dxi que, guyé Daniel ra nuu hombre runi xhiiñaʼ rey que ne gúdxibe laa: «Cadi guutitu ca hombre nuu xpiaaniʼ. Naa zanda gusiene ni guníʼ xcaandaʼ rey ca». Yené hombre riʼ laabe dede ra nuu Nabucodonosor. Daniel gudxi rey que: «Maʼ biluíʼ Dios lii xi chiguizaaca despué. Ndiʼ nga ni guníʼ xcaandaluʼ: biiyaluʼ ti estatua naroʼbaʼ, de oro ique ni, xpechu ni ne guiropaʼ chu náʼ ni de plata, ndaaniʼ ni ne xcoʼre ni de cobre, de guiibaʼ (o hierru) ñeeni ne de guiibaʼ nuchaʼ beñe batañeeni. Ni málasi biree ti guié lú ti dani ne bidxelasaa ni batañee estatua que. Biaba estatua que ne guca dé ni, ne ziné bi ni. Guca guié que ti dani ne bichii ni guidubi Guidxilayú».

Despué, guníʼ Daniel: «Ndiʼ nga riníʼ ni guníʼ xcaandaluʼ: reinu stiluʼ nga zeeda gaca ique de oro stiʼ estatua riʼ. Xpechu ni ne guiropaʼ chu naʼ de plata ca nga ti reinu ni zeeda despué de reinu stiluʼ. Ndaaniʼ ni ne guiropaʼ coʼre de cobre ca nga sti reinu ni gueeda despué de laani, ni zuni mandar lu guidubi Guidxilayú. De raca ziuu sti reinu ni nadipaʼ casi guiibaʼ. Últimu la? ziuu ti reinu ni qué ziuu tobi si purtiʼ zapa ni parte nadipaʼ casi guiibaʼ ne parte naguudxi casi beñe. Guié ni guca ti dani que nga Reinu stiʼ Dios ni zunitilú guiráʼ ca reinu ne qué ziuu dxi gusaana de guni mandar ni».

Bizuxibi Nabucodonosor ne gundeteʼ ique nezalú Daniel ne guníʼ: «Dios stiluʼ nga bisiene lii ni gunieeʼ xcaandaʼ. Gástiruʼ sti Dios casi laabe». Qué ñuuti diʼ Nabucodonosor Daniel, laga biʼniʼ laabe xaíque stiʼ guiráʼ ca hombre nuu xpiaaniʼ ne bidii laabe guni mandarbe tobi de ca guidxi stiʼ Babilonia. ¿Ñee bidiiluʼ cuenta ximodo bicabi Jiobá oración stiʼ Daniel la?