Gunaazecabe Jesús

Guyé Jesús ne ca apóstol stiʼ lu dani Olivo ne gudíʼdicabe ndaaniʼ valle stiʼ Cedrón. Biaʼ galaa gueelaʼ ngue ne nuu Luna llena. Ora yendácabe ra jardín ni láʼ Getsemaní, gudxi Jesús laacabe: «Laguiaana raríʼ ne lagataná». De raqué, bixeleʼ Jesús de ra nuucabe ne bizuxibi. Cumu guizáʼ nuube xizaa, biʼniʼ orarbe Jiobá: «Gaca ni naluʼ». Óraque, biseendaʼ Jiobá ti ángel ra nuube para cuʼ gana laabe. Despué de ngue, bibiguétabe ra nuu chonna de ca apóstol stibe ne ora yendabe biiyabe nisiaasicaʼ. Ngue runi gúdxibe laacaʼ: «¡Laguiasa! Cadi ora gásitu ndiʼ. Mayaca guinaazeʼ ca enemigu stinneʼ naa».

Nin qué nindaa, beeda Judas Iscariote né ti grupu binni ni naaze espada ne palu. Nánnabe raqué zadxélabe Jesús purtiʼ stale biaje yené Jesús laabe ne ca apóstol stiʼ raqué. Maca gudxi Judas ca soldadu que, zuluiʼbe laacaʼ tuu nga Jesús. Casi zeʼ Judas bidxiñaʼ ra nuu Jesús ne gúdxibe laa: «Maestru», ne bidiibe laa ti bixiduʼ. Para ná Jesús rabi laabe: «¿Né ti bixiduʼ cayuni traicionarluʼ naa la?».

Bidxiñaʼ Jesús ra nuu ca hombre que ne gunabadiidxabe laacaʼ: «¿Tu cuyúbitu?». Laacaʼ bicábicaʼ: «Jesús de Nazaret». Laabe bicábibe: «Naa ndiʼ». Óraque gurisácabe atrá ne biábacabe layú. Bibiguetaʼ gunabadiidxaʼ Jesús laacabe: «¿Tu cuyúbitu?». Laacaʼ bicábicaʼ sti biaje: «Jesús de Nazaret». Gudxi Jesús laacabe: «Maʼ gudxeʼ laatu, naa ndiʼ. Lagudii lugar cheʼ ca hombre riʼ».

Ora bidii Pedro cuenta xi cayaca, gulee ti espada ne bigá diaga Malco, ni naca esclavu stiʼ sumo sacerdote que. Peru óraque gudaʼnaʼ Jesús diaga hombre que ne bisiándabe laa. Ne gudxi Jesús Pedro: «Guluu espada ca lugar stiʼ, purtiʼ guiráʼ ni cuʼ náʼ espada la? zati né espada». Gunaazeʼ ca soldadu que Jesús ne bindiibicaʼ nabe, óraque biree ca apóstol que zecaʼ. De raqué, yené ca binni que Jesús ra nuu sacerdote principal ni láʼ Anás. Gunabadiidxaʼ Anás laabe caadxi cosa ne de raqué biseendaʼ laabe ra lidxi sumo sacerdote Caifás. Peru, ¿xi guca xa de ca apóstol que yaʼ?