Guti Jesús ti lugar ni láʼ Gólgota

Yené ca sacerdote principal Jesús ra palaciu stiʼ gobernador stiʼ Roma. Raqué gunabadiidxaʼ Poncio Pilato laacabe: «¿Xi guiráʼ nga natu maʼ biʼniʼ hombre riʼ yaʼ?». Laacaʼ bicábicaʼ: «¡Nabe rey laabe!». Gunabadiidxaʼ Poncio Pilato Jesús: «¿Ñee lii nga rey stiʼ ca judíu la?». Para bicabi Jesús laabe: «Cadi de Guidxilayú riʼ nga Reinu stinneʼ».

De raqué, biseendaʼ Poncio Pilato laabe ra nuu Herodes, gobernador stiʼ Galilea para guʼyaʼ pa guidxela donda luguiabe. Bidii Herodes cuenta qué huayuni Jesús nin ti cosa malu ne biseendaʼ laabe ra nuu Poncio Pilato sti biaje. Ngue runi, gudxi Poncio Pilato ca binni que: «Nin naa nin Herodes qué guidxéladu donda luguiáʼ hombre riʼ. Chigundaa laabe». Peru ca binni que bicaacaʼ ridxi: «¡Biiti laabe! ¡Biiti laabe!». Bininá ca soldadu que Jesús, bichá xhínnicaʼ lube ne gudíñecaʼ laabe. Guluucaʼ ti corona de guichi íquebe ne biʼniʼ búrlacaʼ laabe, ne guniʼcaʼ: «¡Viva rey stiʼ ca judíu!». Óraque gudxi Poncio Pilato ca binni que sti biaje: «Qué guidxelaʼ donda luguiáʼ hombre riʼ». Peru ca binni que bicaacaʼ ridxi: «¡Bicaa laabe lu maderu!». Ngue runi bidii Poncio Pilato lugar chinécabe Jesús para guuticabe laa.

Ngue runi yenécabe Jesús ti lugar ni láʼ Gólgota. Bicaacabe laabe lu ti maderu ne bisaanacabe laabe raqué. Óraque biʼniʼ orar Jesús Jiobá, ne ná: «Bixhozeʼ, biʼniʼ perdonar laacabe, qué gánnacabe xi cayúnicabe». Ca binni que biʼniʼ búrlacaʼ laabe, ne nacaʼ: «¡Pa dxandíʼ Xiiñiʼ Dios lii, biete ne bilá laca lii!».

Tobi de ca gubaanaʼ ni cá cueʼbe que gudxi laabe: «Jesús, bietenalaʼdxiʼ naa ora guiuuluʼ lu Reinu stiluʼ». Biʼniʼ prometer Jesús laabe: «Ziuuneluʼ naa ndaaniʼ Paraísu». Para huadxí que, biaʼ chonna hora bicahui guibáʼ. Caadxi de ca discípulo stiʼ Jesús biaanacaʼ gaxha de ra nuube, tobi de laacabe nga María, jñaa Jesús. Gunabaʼ Jesús Juan gapa María casi ñaca jñaa.

Últimu la? guníʼ Jesús: «¡Maʼ guca cumplir guiráʼ ni!». Bisaba ique ne guti. Óraque guca ti xu roʼ. Cortina ni didi galaa Santo ne Santísimo stiʼ templu que gureza ni chupa ndaa. Óraque, tobi de ca soldadu stiʼ ejércitu que guníʼ: «Dxandíʼ Xiiñiʼ Dios hombre riʼ».