LECCIÓN 05
Ni racalaʼdxiʼ Dios gánnanu nga ni cá lu Biblia
Maʼ bidii Jehová laanu ti regalu guizáʼ galán, laani nga Stiidxabe Biblia. Nápani 66 libru nahuiiniʼ, peru zándaca guinabadiidxaluʼ: «¿De padé zeeda Biblia? ¿Tu bicaa ni?». Para ganda guicábinu ca pregunta riʼ, guidúʼyanu xi guiráʼ bizaaca para gunda beeda gápanu Stiidxaʼ Dios ca dxi stinu riʼ.
1. ¿Ximodo nga naca Biblia Stiidxaʼ Dios pa binni bicaa ni?
Biaʼsi 40 hombre nga bicaa Biblia, gadxé gadxé dxiiñaʼ biʼniʼ ca hombre riʼ, nuu de laacabe guca binni ricu, peru laaca nuu de laacabe guca binni pobre. Bizulú gucuá Biblia lu iza 1513 ante de ca dxi stiʼ Jesús ne biluxe gucuá ni lu iza 98 despué de ca dxi stiʼ Jesús. Biaʼsi biaʼ 1,600 iza nga bindaa para gucuá guidubi Biblia. Peru neca zacá, tobi si ni cusiidini. ¿Ximodo gunda guca ndiʼ yaʼ? Purtiʼ Dios nga guníʼ xi guicá luni (biindaʼ 1 Tesalonicenses 2:13). Cadi ni ná ique ca hombre bicaa Biblia nga guiráʼ ni zeeda luni, «sínuque gucané espíritu santu ca hombre riʼ para guiniʼcaʼ xii nga racalaʼdxiʼ Dios» (2 Pedro 1:21).a Biquiiñeʼ Dios espíritu santu stiʼ para gucané ca hombre riʼ gucaacaʼ ni racaláʼdxibe guicá lu Stiidxabe (2 Timoteo 3:16).
2. ¿Tu guiráʼ zanda guʼndaʼ Biblia?
Zanda gacané ca noticia galán zeeda lu Biblia «binni de guiráʼ nación, tribu, idioma ne guidxi» (biindaʼ Apocalipsis 14:6). Racalaʼdxiʼ Dios gapa binni de guiráʼ idioma Biblia. Ne laani nga libru ni jma huayaca traducir. Guiráʼ binni nga zanda ganna xi ná Biblia, gastiʼ naca xi idioma riníʼ nin paraa nabeza.
3. ¿Ximodo bilá Jehová Biblia?
Gucuá Biblia lu caadxi material ni nagueenda raca feu, casi rollo ni rúnicabe de guidiladi tuuxa maniʼ o rollo de ti yaga ni láʼ papiro. Peru cumu guyuu caadxi hombre ni bisisaca Stiidxaʼ Dios ni biʼniʼ copiar ni ná Biblia la? nga runi dede yanna nápanu ni. Neca guyuu stale binni ni gucalaʼdxiʼ gunitilú Biblia, laaca guyuu stale binni ni gupa ni ne dede guyuucaʼ dispuestu gudiicaʼ xpídacaʼ pur laani. Gastiʼ huacueeza Jehová para guni ni racalaʼdxiʼ ne ni racaláʼdxibe nga gápanu Stiidxabe ne guidúʼndanu ni. Biblia cayabi laanu: «Qué ziuu dxi guinitilú stiidxaʼ Dios stinu» (Isaías 40:8).
GUIZÍʼDIRUNU JMA
Guidúʼyanu ximodo biquiiñeʼ Dios espíritu santu stiʼ para gucané ca hombre guicá Biblia. Ne xi guiráʼ huayúnibe para gápabe Stiidxabe ti ganda gápanu ni ca dxi stinu riʼ.
4. Laca Biblia nga rabi laanu tu guníʼ xi guicá luni
Laguuyaʼ VIDEU riʼ. Despué laguundaʼ 2 Timoteo 3:16 ne laiquiiñeʼ ca pregunta riʼ para güitu diidxaʼ:
Pa hombre bicaa Biblia, ¿xiñee runibiáʼcabe ni casi Stiidxaʼ Dios yaʼ?
¿Runi creluʼ Stiidxaʼ Dios nga Biblia neca hombre bicaa ni la? ¿Xiñee riníʼ íqueluʼ zacá ni yaʼ?
Cásica riquiiñeʼ ti jefe ti secretariu para gucaa ni racalaʼdxiʼ lu ti carta, zacaca bizaaca né Biblia: biquiiñeʼ Dios hombre para gucaa ca ni racalaʼdxiʼ lu Biblia.
5. Neca gucaláʼdxicabe nunitilúcabe Biblia peru qué ñanda
De Dios nga zeeda Biblia, nga runi rápabe ni. Maʼ raca stale iza guyuu stale gobernante ni gucalaʼdxiʼ nunitilú Biblia. Laaca guyuu caadxi líder stiʼ ca religión ni qué niná ñuundaʼ binni Biblia. Peru neca zacá, stale binni guyuu dispuestu gatiʼ para gapa Stiidxaʼ Dios. Para gunibiaʼluʼ tobi de ca binni riʼ la? laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
Ra gánnaluʼ xi guiráʼ biʼniʼ hombre riʼ para bicaachiʼ Biblia ne gupa ni, ¿ñee rucaani lii gusisácaluʼ Biblia ne gúʼndaluʼ ni la? ¿Xiñee riníʼ íqueluʼ zacá yaʼ?
Laguundaʼ Salmo 119:97 ne laiquiiñeʼ pregunta riʼ para güitu diidxaʼ:
¿Xiñee guyuu stale binni dispuestu gatiʼ para guni traducir Biblia ne ganda gapa binni ni?
6. Guiráʼ binni zanda gapa libru riʼ
Biblia nga libru ni jma huayaca traducir ne stale binni napa ni. Laguundaʼ Hechos 10:34, 35 ne laiquiiñeʼ ca pregunta riʼ para güitu diidxaʼ:
¿Xiñee racalaʼdxiʼ Dios gaca traducir Stiidxaʼ lu stale idioma ne gapa stale binni ni?
¿Xii nga ni jma riuuláʼdxiluʼ de Biblia?
Casi
100%
de binni nuu lu guidubi naca Guidxilayú
zanda guʼndaʼ Biblia lu diidxaʼ ni riníʼ
Nuu guidubi Biblia o parte si de laani lu jma de
3,000
idioma
Biaʼ
5,000 millón
de copia stiʼ Biblia nga huayaca imprimir.
Nin sti libru qué huayaca imprimir biaʼ maʼ guca imprimir Biblia
NUU TU NÁ: «Laaca binni nga bicaa Biblia».
¿Lii xi riníʼ íqueluʼ yaʼ?
¿Xi rusihuinni naca Biblia Stiidxaʼ Dios?
XI BIZÍʼDINU
Naca Biblia Stiidxaʼ Dios ne racaláʼdxibe gapa binni de guiráʼ guidxi ni ne guʼndaʼ ni.
Xi biziidiluʼ
¿Ximodo biquiiñeʼ Dios espíritu santu stiʼ para bisiene ca hombre bicaa Biblia xi naquiiñeʼ gucaacaʼ?
¿Xi jma ridxagayaaluʼ de modo bilá Biblia neca birá si ni bíʼnicabe para gunitilúcabe ni? ¿Xii nga ni jma ridxagayaaluʼ de modo huayaca traducir Biblia para ganda gapa jma binni ni?
¿Xi runi sentirluʼ yanna ra maʼ nánnaluʼ xi guiráʼ biʼniʼ Dios para ganda gápaluʼ Stiidxaʼ ne ganda gunibiaʼluʼ laa?
BIIYAʼ XIRUʼ ZANDA GUIZIIDILUʼ
Biiyaʼ xi guiráʼ bizaaca para gunda beeda gápanu Biblia ca dxi nabáninu riʼ.
Biiyaʼ gunáʼ nga guionnaʼ enemigu gupa Biblia ne ximodo gunda bilá ni.
Biiyaʼ xi guiráʼ bizaaca caadxi binni para gunda biʼniʼ traducircaʼ Biblia.
Neca nuu stale copia ne traducción stiʼ Biblia, ¿ximodo zanda chuʼluʼ seguru qué nuchaacabe gastiʼ de ni racalaʼdxiʼ Dios gánnaluʼ?
«¿Ñee maʼ bichaacabe mensaje stiʼ Biblia la?» (Tema ni zeeda lu jw.org)
a Espíritu santu nga stipa stiʼ Dios ni riquiiñeʼ para ganda guni cumplir ni racalaʼdxiʼ, zazíʼdinu jma de laani lu lección 07.