¿Xi rusiidiʼ Biblia de ca ángel?

Racalaʼdxiʼ Jehová gunibiaʼnu familia ni napa guibáʼ. Ndaaniʼ familia riʼ nuu ca ángel, laacabe nga ca «xiiñiʼ Dios» (Job 38:7). ¿Xi rusiidiʼ Biblia laanu de ca ángel? ¿Ñee zanda gacanécabe o guninácabe binni la? ¿Ñee guiráʼ ángel nga naca parte de familia stiʼ Dios la?

1. ¿Tuu nga ca ángel?

Ante guzáʼ Jehová Guidxilayú, bizaʼbe ángel casi laabe. Qué zanda guidúʼyanu laacabe purtiʼ nácacabe ti espíritu cásica Dios, ne nabézacabe guibáʼ (Hebreos 1:14). Nuu stale millón de ángel ne gadxé gadxé modo laacabe (Apocalipsis 5:11). Ca ángel riʼ rúnicaʼ ni gabi Jehová laacaʼ «purtiʼ ruzuubacaʼ stiidxabe» (Salmo 103:20). Dxiqué biseendaʼ Jehová ángel para chiné xiixa mensaje ra nuu ca xpinni, para gacané ne para gulá xquidxi. Yanna riʼ, racané ca ángel riʼ ca xpinni Cristu para ganda guidxélacaʼ binni ni napa gana guiziidiʼ de Dios.

2. ¿Tuu nga Binidxabaʼ ne ca demonio stiʼ?

Nuu caadxi ángel ni maʼ qué nuzuubaʼ stiidxaʼ Jehová. Primé ni bicaalú laabe nga ni láʼ Diablu ne Binidxabaʼ, «ni caguite guiráʼ binni guidxilayú» (Apocalipsis 12:9). Gucalaʼdxiʼ Binidxabaʼ maʼ laa nga ñuni mandar, ngue runi gudxítebe primé hombre ne primé gunaa guyuu ndaaniʼ Guidxilayú riʼ para gucaalucaʼ Dios. Ne laaca gudxítebe xcaadxi ángel. Ca ángel ni qué nuzuubaʼ diidxaʼ riʼ rábicabe laacaʼ demonio. Guladxi Jehová laacabe guibáʼ ne bilaa laacabe lu Guidxilayú riʼ ne maʼ cadi candaa zunitilube laacaʼ (biindaʼ Apocalipsis 12:9, 12).

3. ¿Ximodo racalaʼdxiʼ Binidxabaʼ ne ca demonio stiʼ quiteʼ binni?

Riquiiñeʼ Binidxabaʼ ne ca demonio stiʼ espiritismo ne xcaadxi cosa para quítecaʼ binni. Nuu binni ruundaʼ horóscopo, rié ra nuu ca astrólogo, ca ni runi adivinar, ca ni riníʼ xi chiguizaaca, laaca riécabe ra nuu ca curanderu ne ca bruju. Xcaadxi ricaacaʼ xiixa tratamientu ni zeeda de espiritismo. Ne nuu binni ná riniʼné ca binni ni maʼ guti. Peru Jehová caguixhená laanu: «Cadi chetu ra nuu ca espiritista ne cadi chiguuyatu xi ná ca ni runi adivinar» (Levítico 19:31). Ni racalaʼdxiʼ Jehová nga quixhená laanu para cadi quiteʼ Binidxabaʼ ne ca demonio stiʼ laanu, purtiʼ enemigu stiʼ Dios laacabe ne ni nuucabe nga guninácabe laanu.

GUIZÍʼDIRUNU JMA

4. Racané ca ángel gunibiáʼ binni Jehová

Neca qué runi predicar ca ángel stiʼ Dios binni, peru racanécabe ca xpinni Dios guidxélacaʼ binni ni racalaʼdxiʼ gunibiáʼ laabe. Laguundaʼ Apocalipsis 14:6, 7 ne laiquiiñeʼ ca pregunta riʼ para güitu diidxaʼ:

• ¿Xiñee caquiiñeʼ gacané ca ángel ca laanu para guni predicarnu?

• ¿Xi runi sentirluʼ ora gánnaluʼ zanda chiné ca ángel ca lii ra nuu ti binni ni racalaʼdxiʼ guiziidiʼ de lu Biblia? ¿Xiñee runi sentirluʼ zacá yaʼ?

5. Bixeleʼ de espiritismo

Enemigu stiʼ Jehová nga Binidxabaʼ ne ca demonio stiʼ, ne laaca enemigu stinu laacabe. Laguundaʼ Lucas 9:38-42 ne laiquiiñeʼ pregunta riʼ para güitu diidxaʼ:

• ¿Ximodo runi tratar ca demonio binni?

Cadi gudiʼnu lugar quiteʼ ca demonio ca laanu. Laguundaʼ Deuteronomio 18:10-12 ne laiquiiñeʼ ca pregunta riʼ para güitu diidxaʼ:

• ¿Ximodo racalaʼdxiʼ ca demonio ca quítecaʼ ne guiníʼnecaʼ laanu? ¿Xi ca cosa ni zeeda de espiritismo jma rihuinni neza ra nabézaluʼ?

• ¿Ñee rábiluʼ jneza nga canabaʼ Dios laanu guixélenu de ca cosa ni zeeda de espiritismo la? ¿Xiñee riníʼ íqueluʼ zacá yaʼ?

Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:

VIDEU: «Lagucaalú Binidxabaʼ» (5:02)

• ¿Ñee rábiluʼ qué zuchiiñaʼ ca demonio familia stiʼ Palesa pur amuletu nuu náʼ xiiñiʼ la? ¿Xiñee riníʼ íqueluʼ zacá yaʼ?

• ¿Xi biʼniʼ Palesa para cadi guchiiñaʼ ca demonio laa?

Ca ni dxandíʼ xpinni Cristu rixélecaʼ de ca demonio. Laguundaʼ Hechos 19:19 ne 1 Corintios 10:21, ne laiquiiñeʼ pregunta riʼ para güitu diidxaʼ:

• ¿Xiñee risaca gusáʼbiluʼ o gucaaguiluʼ intiica cosa nápaluʼ ni zeeda de espiritismo?

6. Cadi gudiiluʼ lugar gusaba Binidxabaʼ ne ca demonio stiʼ lii

Binidxabaʼ nga runi mandar ca demonio. Peru xaíque stiʼ ca ángel ni ruzuubaʼ diidxaʼ nga arcángel Miguel, sti lá ni napa Jesús. ¿Pabiáʼ poder napa Miguel? Laguundaʼ Apocalipsis 12:7-9 ne laiquiiñeʼ ca pregunta riʼ para güitu diidxaʼ:

• Tu napa jma poder: ¿Miguel ne ca ángel stiʼ la? o Binidxabaʼ ne ca demonio stiʼ?

• ¿Ñee naquiiñeʼ guidxibi ca xpinni Cristu Binidxabaʼ ne ca demonio stiʼ la?

Zanda guni ganarluʼ Binidxabaʼ ne ca demonio stiʼ. Laguundaʼ Santiago 4:7 ne laiquiiñeʼ pregunta riʼ para güitu diidxaʼ:

• ¿Xi zanda gúniluʼ para cadi quiteʼ Binidxabaʼ ne ca demonio stiʼ lii?

XI BIZÍʼDINU

Racané ca ángel ni ruzuubaʼ diidxaʼ laanu. Naca Binidxabaʼ ne ca demonio stiʼ enemigu stiʼ Jehová, ne riquiiñecabe espiritismo para quítecabe binni.

Xi biziidiluʼ

• ¿Xi runi ca ángel chaʼhuiʼ para gunibiáʼ binni Jehová?

• ¿Tuu nga Binidxabaʼ ne ca demonio stiʼ?

• ¿Xiñee caquiiñeʼ guixéleluʼ de ca cosa ni zeeda de espiritismo?

BIIYAʼ XIRUʼ ZANDA GUIZIIDILUʼ

Biiyaʼ xiñee Jesús nga arcángel Miguel.

«¿Tuu nga arcángel Miguel?» (Tema ni zeeda lu jw.org)

Biiyaʼ xi prueba nuu para guni crenu dxandíʼ nuu Binidxabaʼ.

«¿Ñee dxandíʼ nuu Binidxabaʼ la?» (Tema ni zeeda lu jw.org)

Biiyaʼ xi biʼniʼ ti gunaa para bisaana ca demonio de guchiiñaʼ laa.

«Maʼ nabaneʼ jma nayecheʼ» (Torre stiʼ ni rapa, 1 de julio de 1993)

Biiyaʼ ximodo riquiiñeʼ Binidxabaʼ espiritismo para quiteʼ binni.

«Padé zeeda magia, hechicería ne brujería» (¿Maʼ bidxélaluʼ neza ni ziné lu guendanabani ni qué zaluxe la? Ndaa 5)