«Natu naquiiñeʼ gaca naguidxi»
«Natu naquiiñeʼ gaca naguidxi, laatu cani cucaadiaga ca diidxaʼ guníʼ cani riguixhená que ca dxi riʼ.» (ZACARÍAS 8:9.)
1, 2. Xiñee riquiiñeʼ guidúʼyanu xiná ca libru stiʼ Ageo ne Zacarías.
NECA gucuá ca diidxaʼ riʼ raca jma de chupa mil gaayuʼ gayuaa iza, ca diidxaʼ riguixhená ni bicaa Ageo ne Zacarías nabé risaca cani para laanu. Ca diidxaʼ ni cá lu guiropaʼ libru riʼ cadi historia si cani. Laacani zeeda cani lade «irá ni ucuá lu Xquiʼchi Dios [...] para usiidi laanu» (Romanos 15:4). Stale de ni cá lu libru stiʼ Ageo ne Zacarías rucaa cani laanu guiníʼ íquenu lu cani huayaca dede iza 1914, dxi bizulú Reinu stiʼ Dios cayuni mandar guibáʼ.
2 Ora cuzeeteʼ apóstol Pablu de ni guca ne modo bibani xquidxi Dios dxiqué la? guniʼbe: «Irá nga bizaaca ca bixhoze gola nu ne ucuá ni lu Xquiʼchi Dios para iziʼdi nu iduʼya gá nu laanu, cani nabani nu ra ma zeda iluxe guidxilayú riʼ» (1 Corintios 10:11). Nga runi zanda guinabadiidxanu laca laanu: «Pabiáʼ risaca ca diidxaʼ ni cá lu libru stiʼ Ageo ne Zacarías para laanu ca dxi stinu riʼ yaʼ».
3. Xii nga ni jma bizeeteʼ ca diidxaʼ riguixhená guníʼ Ageo ne Zacarías.
3 Casi bidúʼyanu lu tema ni gudídinu que, ca diidxaʼ riguixhená ni guníʼ Ageo ne Zacarías guca cani ora bibiguetaʼ ca judíu que lu layú bidii Dios laacaʼ, bireesicaʼ de esclavu Babilonia. Ca diidxaʼ riguixhená guníʼ ca hombre riʼ nabé bizeeteʼ cani zabí yuʼduʼ stiʼ Dios sti biaje, ne ca judíu que gundaacaʼ, o gundísacaʼ base stini lu iza 536 ante gueeda Cristu. Ca dxi que caadxi judíu ni maʼ nagola guyuucaʼ triste ora bietenaláʼdxicaʼ modo guyuu yuʼduʼ que dxiqué, peru guidubi guidxi que nabé guyuu nayecheʼ. Yanna ca dxi stinu riʼ maʼ guca ti cosa ni jma risaca. Xidé ndiʼ caninu yaʼ (Esdras 3:3-13).
4. Xi guca gudiʼdiʼ si primé guendaridinde ni guca lu guidubi naca Guidxilayú.
4 Gudiʼdiʼ si primé guendaridinde ni guca lu guidubi naca Guidxilayú, ca binni ni gulí Dios que bireecabe de esclavu ndaaniʼ naʼ Babilonia Guidxi Roʼ. Ora bireecabe de esclavu que bihuinni nápacabe ndaayaʼ stiʼ Dios. Dxi nuuruʼ Cani Ruundaʼ Biblia que de esclavu la? ruluíʼ maʼ binduuxeʼ ca xaíque stiʼ ca religión ne ca políticu que dxiiñaʼ ni cayúnicabe de gucheechecabe diidxaʼ ne gusiidicabe binni (Esdras 4:8, 13, 21-24). Peru Jiobá gulee guiráʼ cani cucueeza dxiiñaʼ ni cayúnicabe ti ganda gucheecherucabe diidxaʼ ne gacanécabe binni gaca xpinni Cristu. Lu guiráʼ ca iza ni maʼ gudiʼdiʼ dede 1919, cahuinni ziroobaʼ, o ziniisi dxiiñaʼ ni cayúnicabe riʼ ne guirutiʼ qué zanda gucueeza ni.
5, 6. Xii nga chigaca casi na Zacarías 4:7.
5 Cumu Jiobá cayuuyaʼ cayaca dxiiñaʼ riʼ la? nanna dxíchinu zacanebe cani cuzuubaʼ stiidxabe ti gucheecherucaʼ diidxaʼ ne gusiidirucaʼ binni ca dxi stinu riʼ. Zacarías 4:7 na: «Laabe dxandipeʼ zeedanebe guié ni guiluxen[é] [yuʼduʼ que]. Zuni binni ridxi: “¡Guizáʼ sicarú! ¡Guizáʼ sicarú!”». Ca diidxaʼ stiʼ Zacarías culuíʼ zaluxe ti dxiiñaʼ, ximodo chigaca ndiʼ yaʼ.
6 Zacarías 4:7 caníʼ de ora maʼ guni adorar guiráʼ binni Señor ni Jma Nandxóʼ casi modo racalaʼdxiʼ ndaaniʼ Guidxilayú riʼ, o lu patiu stiʼ yuʼduʼ stiʼ Dios. Yuʼduʼ ca nga ni riquiiñeʼ Jiobá para guidxíñacabe ne guni adorárcabe laa pur guendaguti stiʼ Cristu ni racané laanu chuʼnu galán ne Laabe. Dxandíʼ, neca yuʼduʼ roʼ stiʼ Dios ca bizuluni lu primé siglu, peru modo raca adorar Dios ndaaniʼ guidxilayú yanna riʼ caquiiñeruʼ gácani cásipeʼ modo racaláʼdxibe. Ca dxi nabáninu riʼ, millón de binni cayuni adorar Dios lu guidxilayú. Cásica laacabe ne zaqueca cani chiguiasa lade gueʼtuʼ zácacabe binni ni qué gapa donda ora guni mandar Jesucristu pur ti mil iza. Guiluxe si ti mil iza ca la? Guidxilayú riʼ zácani nayá ne guiráʼ binni guibani luni zuni adorar Dios jneza.
7. Xi dxiiñaʼ cayuni Jesús para gaca adorar Dios cásipeʼ modo racalaʼdxiʼ ca dxi stinu riʼ, ne xiñee naquiiñeʼ cuʼ nga gana laanu.
7 Gobernador Zorobabel ne Josué xaíque stiʼ cani ruzaaquiʼ guʼxhuʼ, biiyacabe ra biluxe yuʼduʼ que lu iza 515. Cásica dxiiñaʼ ni bíʼnicabe ca, Zacarías 6:12, 13 caníʼ xi dxiiñaʼ chiguni Jesús ti guni adorar guiráʼ binni Dios cásipeʼ modo racalaʼdxiʼ: «Ndiʼ nga ni na Jiobá Dios stiʼ stale binni nanda guiibaʼ: “Raríʼ nuu hombre ni láʼ Biitu, ne de ra nuube zandánibe, ne zúnibe yuʼduʼ stiʼ Jiobá. Ne [...] zusisácacabe laabe, ne zuni mandarbe dede lu trono stibe, ne zácabe ni ruzaaquiʼ guʼxhuʼ dede lu trono stibe”». Jesús nga «Biitu» ca, purtiʼ beedabe lade ca xiiñiʼ David ne laabe nuube guibáʼ ne cayacanebe gaca xhiiñaʼ Reinu ndaaniʼ yuʼduʼ stiʼ Dios. Pur nga, ñee raʼbuʼ nuu tu laa zanda gucueeza dxiiñaʼ ca la? ¡Coʼ xa! Ñee qué rucaa nga laanu gucheecherunu diidxaʼ, ne cadi gudiʼnu lugar gucueeza ca cosa ni riguu xizaa laanu ca de gúninu ni la?
Dxiiñaʼ ni jma risaca gúninu
8. Xiñee jma risaca gúninu dxiiñaʼ ni cayaca ndaaniʼ yuʼduʼ stiʼ Dios.
8 Para guicaanu ndaayaʼ stiʼ Jiobá la? naquiiñeʼ guiénenu jma risaca nga gúninu dxiiñaʼ stiʼ Dios ndaaniʼ yuʼduʼ stiʼ. Cadi gácanu casi ca judíu ni guníʼ: «Caʼruʼ diʼ guedandá dxi», sínuque laanu naquiiñeʼ guietenaláʼdxinu nabáninu «lu ca últimu dxi» (Ageo 1:2; 2 Timoteo 3:1, NM). Jesús maca guníʼ zucheeche ca xpínnibe diidxaʼ ne zusiidicaʼ binni ca diidxaʼ nacubi ne galán stiʼ Reinu para gácacaʼ xpínnibe. Nga runi, gúninu stipa para cadi gusaananu de gucheechenu diidxaʼ, purtiʼ laani nga ti dxiiñaʼ guizáʼ risaca nápanu. Dxiiñaʼ de guireeche diidxaʼ ne guiziidiʼ binni riʼ biaanadxini caadxi dxi purtiʼ guyuu tu bicaalú ni, peru bizuluni sti biaje lu iza 1919, ne dede yanna caʼruʼ guiluxe ni. Peru nanna dxíchinu zaluxe ni.
9, 10. Xi naquiiñeʼ gúninu para guicaanu ndaayaʼ stiʼ Jiobá, ne ximodo zahuinni nápanu ni.
9 Pa gúninu xhiiñaʼ Jiobá sin guireʼnu gana la? guiranu ne cada tobi de laanu zacaanu ndaayaʼ stibe. Guidúʼyanu dxandíʼ nga ni na Jiobá riʼ. Ora bizulú ca judíu que gundaacaʼ base stiʼ yuʼduʼ que ne biʼniʼ adorárcabe Dios de guidubi ladxidóʼcabe sti biaje la? Jiobá gudxi laacabe: «Dede yannadxí zuzabeʼ ndaayaʼ laatu» (Ageo 2:19). Dxandíʼ, laacabe ziuucabe galán ne Dios sti biaje. Guidúʼyanu ca ndaayaʼ ni guníʼ Dios riʼ: «Ziuu biidxiʼ de guendariuudxi; ne yaga uva zudii cuananaxhi stiʼ, ne guidxilayú riʼ zudii guendaró, ne guibáʼ zusaba gupa lu guidxilayú riʼ; ne dxandipeʼ zudiéʼ guiráʼ ca cosa riʼ ca binni ni guiaana de guidxi riʼ» (Zacarías 8:9-13).
10 Cásica guluu Jiobá ndaayaʼ ca judíu que ra bisiidibe laacaʼ de lu stiidxabe ne bidiibe ni guibaninecaʼ la? zaqueca zaguube ndaayaʼ laanu pa gúninu xhiiñabe sin guireʼnu gana ne pa gúninu ni ne guendanayecheʼ. Caadxi de ca ndaayaʼ ca nga ziuu guendariuudxi ládenu ne guirutiʼ zuchibi laanu, zápanu ni iquiiñenu ne zaniisinu lu stiidxaʼ Dios. Peru cadi naquiiñeʼ guiaandaʼ laanu zacaanu ca ndaayaʼ ca pa gúninu dxiiñaʼ ndaaniʼ yuʼduʼ stiʼ Dios casi modo racalaʼdxiʼ.
11. Ximodo zanda gánnanu xi racaláʼdxinu gúninu primeru lu guendanabani stinu.
11 Yanna nga tiempu para quixhe cada tobi de laanu ladxidóʼ «lu ca neza» stiʼ (Ageo 1:5, 7). Para gúninu nga la? naquiiñeʼ gúʼyanu xii nga cani riuuláʼdxinu gúninu primeru lu guendanabani stinu. Jiobá riguu ndaayaʼ cani cusisaca labe ne stale gana ne cani cadi cusaana de guni dxiiñaʼ ndaaniʼ yuʼduʼ stibe. Zanda guinabadiidxanu: «Xii nga ni jma risaca para naa. Ñee cayúneruaʼ ni na Jiobá de guidubi ladxiduaʼ, nabaneʼ casi modo na ca conseju stibe ni cá lu Biblia ne cucheecheruaʼ Stiidxabe ne stale gana cásica dxi guyuaanisaʼ la? Ñee cusaanaʼ de guneʼ xhiiñaʼ Jiobá ne Reinu stiʼ purtiʼ racalaʼdxeʼ guibaneʼ jma galán la? Ñee maʼ cadi cusisacaʼ lá Jiobá purtiʼ ridxibeʼ binni o purtiʼ cadxibeʼ guiníʼcabe naa la?» (Apocalipsis 2:2-4).
12. Xi cusiene Ageo 1:6, 9 de modo bibani ca judíu que.
12 Laanu qué racaláʼdxinu gusaana Dios de uguu ndaayaʼ laanu purtiʼ cadi cusisácanu labe. Guietenaláʼdxinu xi biʼniʼ ca judíu que ora bibiguétacaʼ xquídxicaʼ: bizulucaʼ bicuicaʼ yuʼduʼ que ne stale gana peru despué «nagueendaca, cada tobi de laacaʼ [gucuá íquecaʼ jma pur] lídxicaʼ» na Ageo 1:9. Ca judíu que bíʼnicaʼ puru si xhiiñacaʼ ne biyúbicaʼ modo guibánicaʼ galán. Pur nga la? maʼ qué ñapapécabe ni ñócabe, ni ñéʼcabe ne nin ni ñácucabe. Ageo biluíʼ ximodo guyuucabe ne ca diidxaʼ riʼ: «Huaxiéʼ cudii cani» (Ageo 1:6). Dxandíʼ, Jiobá maʼ qué niguu ndaayaʼ laacabe. Ñee rusiidiʼ ca nga laanu xiixa la?
13, 14. Ximodo zanda gúninu ni cusiidiʼ Ageo 1:6, 9, ne xiñee risaca gúninu ni.
13 Pa laanu nápanu gana guicaarunu ndaayaʼ stiʼ Dios la? cadi naquiiñeʼ guyúbinu puru para laasinu ne maʼ cadi gusisácanu laabe. Lade cani nuu gachelunu gápanu bidxichi, guyúbinu xiixa dxiiñaʼ ra zanda gápanu bueltu nagueendaca, guicá íquenu gúʼndanu ti scuela roʼ para gácanu ti binni risaca, chuunu ca cursu ni zacané laanu gúninu guiráʼ ni racaláʼdxinu, o intiica si cosa ni gucueeza laanu de gúninu xhiiñaʼ Dios.
14 Zándaca cadi malu diʼ cani. Peru pa nánnanu xi caquiiñeʼ gúninu para gápanu guendanabani ni qué zaluxe la? zadúʼyanu cani casi «dxiiñaʼ ni maʼ guti» (Hebreos 9:14, NM). Ximodo nga maʼ guti cani yaʼ. Para Jiobá zeeda gaca cani casi xiixa ni qué risaca ne ni qué iquiiñeʼ. Pa guicá íquenu cani la? zándaca guxheleʼ cani laanu de Dios. Zacá bizaaca caadxi binni ni gulí Dios dxi stiʼ ca apóstol que (Filipenses 3:17-19). Ne zacaca huayaca caadxi de ca xpinni Cristu ca dxi stinu riʼ. Zándaca runibiaʼnu tuuxa ni chaahuidugá bisaana de guni xhiiñaʼ Dios, maʼ qué nidaagulisaané laanu ne yanna maʼ qué liica rusihuinni racalaʼdxiʼ guni ni na Jiobá sti biaje. Dxandipeʼ nga racaláʼdxinu guibiguétacabe, peru pa laanu chinándanu ca «dxiiñaʼ ni maʼ guti» ca la? zándaca guxheleʼ cani laanu de Dios ne maʼ qué zacaanu ndaayaʼ stibe. Guizáʼ naná nga pa gueeda guizaacanu zacá, purtiʼ maʼ qué ziuʼnu nayecheʼ ne qué zápanu guendariuudxi ni rudii espíritu stiʼ Dios laanu. ¡Ne guiníʼ íquenu pabiáʼ naná zaca para laanu guireʼnu ndaaniʼ xquidxi Jiobá ra nuu ca bíʼchinu ne ca bizáʼnanu ni nadxii laanu! (Gálatas 1:6; 5:7, 13, 22-24.)
15. Ximodo ruluíʼ Ageo 2:14 nabé risaca nga modo runi adorarnu Dios.
15 Nabé risaca nga cani caninu riʼ. Guidúʼyanu ximodo biiyaʼ Jiobá ca judíu ni qué nuzuubaʼ stiidxabe ne maʼ qué ñúnicaʼ lídxibe purtiʼ biʼniʼ chaahuicaʼ lídxicaʼ ne yaga ni jma galán. Zándaca dxandíʼ bíʼnicabe lídxicabe zacá o zándaca biʼniʼ chaahuisícabe ni para guihuínnini jma galán. Ageo 2:14 caníʼ modo guyuucabe: «Zacá nga ca binni riʼ, ne zacá nga guidxi riʼ nezaluáʼ, ne zacá nga guiráʼ dxiiñaʼ ni rúnicabe, ne intiica ni rudiicabe racá. Nabiidiʼ ni, nga nga ni na Jiobá». Biaʼ tiempu qué ñuni adorárcabe Jiobá modo racalaʼdxiʼ la? intiica ni bidiicabe lu altar que, qué nicaadibe cani (Esdras 3:3).
Dios na dxandíʼ zacané cani runi adorar laabe casi modo racaláʼdxibe
16. Xi biʼniʼ cré ca judíu que dxandíʼ zaca pur ca visión gucuaa Zacarías que.
16 Jiobá biquiiñeʼ xhono visión para gúdxibe Zacarías zacanebe ca judíu ni gucuí yuʼduʼ stibe que sti biaje. Primé visión que na zaluxe yuʼduʼ que, ne laaca zapa ca guidxi stiʼ Jerusalén ne Judá ni guibaninecaʼ biaʼ dxi gúnicaʼ dxiiñaʼ bidii Dios laacaʼ (Zacarías 1:8-17). Lu guiropa visión que gudxi Jiobá laacabe zunduuxeʼ ca gobiernu ni cadi cudii lugar laacabe guni adorárcabe Dios casi modo racalaʼdxiʼ (Zacarías 1:18-21). Lu xcaadxi visión que Jiobá guníʼ zapa laacabe laga cucuícabe yuʼduʼ stibe, ne guniʼbe ziuu stale binni de guiráʼ guidxi ndaaniʼ lídxibe ora maʼ biluxe ni. Laaca ziuu guendariuudxi ndaaniʼ guidxi que ne guirutiʼ qué zuchibi laacabe, ne zabeebe guiráʼ guendanagana guidxagalúcabe ora maʼ cucuícabe yuʼduʼ que. Ne laaca gúdxibe laacaʼ zabeebe guiráʼ guendaquéiquiiñeʼ ne zaquiiñebe ca ángel stibe para gápabe ne gúʼyabe laacaʼ (Zacarías 2:5, 11; 3:10; 4:7; 5:6-11; 6:1-8). Ne modo guníʼ Jiobá gacané laacabe riʼ la? zanda guiénenu xiñee ca judíu ni bizuubaʼ diidxaʼ que bichaacaʼ modo nabánicaʼ ne gucuá íquecaʼ gúnicaʼ dxiiñaʼ ni bidii Dios laacaʼ purtiʼ para ngue guleebe laacaʼ de esclavu.
17. Cumu nánnanu dxandíʼ zaca guiráʼ ni na Dios, xi naquiiñeʼ guinabadiidxanu laca laanu.
17 Zacaca yanna riʼ, laanu nánnanu zadxiña dxi guni adorar guiráʼ binni Jiobá casi modo racalaʼdxiʼ, ne nga naquiiñeʼ gucaa laanu guiníʼ ique chaahuinu xi dxiiñaʼ naquiiñeʼ gúninu ndaaniʼ yoo ra raca adorar Jiobá. Guinabadiidxanu laca laanu: «Pa nannaʼ yanna nga jma caquiiñeʼ gusiideʼ binni de Reinu ne gacaniáʼ laacabe gácacabe xpinni Cristu, ñee risihuínneni lu guiráʼ ni cá iqueʼ guneʼ ne modo nabaneʼ la? Ñee ribee tiempu biaʼ caquiiñeʼ para guieneʼ ca diidxaʼ riguixhená ni cá lu Biblia, ne guinieniáʼ ca xpinni Cristu ne xcaadxi binni de laani la?».
18. Xii nga ni chigaca casi na capítulo 14 stiʼ Zacarías.
18 Zacarías laaca guníʼ zanitilú Babilonia Guidxi Roʼ ne de racá zeeda guendaridinde ni láʼ Armagedón. Guidúʼndanu xiná ni: «Zeeda gácani ti dxi ne zánnacabe stiʼ Jiobá ni. Qué ziuu ridxíʼ ne laaca qué ziuu huaxhinni; ne ora maʼ ziyaca huadxí la? ziaaniʼ». Dxi stiʼ Jiobá ca zácani ti dxi nacahui ne nananda para ca binni rucaalú laabe, peru para cani runi adorar Dios modo na la? zácani ti dxi nayaʼniʼ ne zacaacabe ndaayaʼ. Zacarías laaca bizeeteʼ zusihuinni guiráʼ cani chuʼ lu guidxilayú cubi ca Jiobá nga ti Dios ni nayá. Jiobá si nga zuni adorárcabe modo racalaʼdxiʼ ndaaniʼ yuʼduʼ stiʼ lu guidubi naca Guidxilayú riʼ (Zacarías 14:7, 16-19). ¡Guizáʼ sicarú nga gánnanu dxandíʼ zácani! Zadúʼyanu gaca guiráʼ ni guníʼ Jiobá ne modo guihuinni laasibe nga nápabe derechu para guni mandarbe. Dxi «stiʼ Jiobá» ca qué ziuu dxi guiaandaʼ ni.
Ca ndaayaʼ ni qué ziuu dxi guirá
19, 20. Xiñee nabé riguu ca diidxaʼ ni cá lu Zacarías 14:8, 9 gana laanu.
19 Gaca si nga la? zadaguyoo Binidxabaʼ ne ca demonio stiʼ ne maʼ qué zanda diʼ gúnicabe gastiʼ (Apocalipsis 20:1-3, 7). Tiidiʼ si nga la? laga cayuni mandar Cristu pur ti mil iza, ziuu stale ndaayaʼ para guiráʼ binni. Zacarías 14:8, 9 na: «Dxi que dxandíʼ zadá nisa ni gudii guendanabani dede Jerusalén, galaa de laani zie lu nisadóʼ ni nuu neza ra rindani gubidxa ne sti galaa zie lu nisadóʼ ni nuu neza ra riaaziʼ gubidxa. Zácani gusibá ne tiempu nanda. Ne Jiobá zeeda gaca rey lu guidubi naca guidxilayú. Ne dxi que Jiobá nga zeeda gaca tobi lucha si, ne labe tobi si».
20 Dede ra zuba Reinu stiʼ Dios zadá «nisa ni rudii enda nabani», ya, «ti guiigu [ra] riree nisa ni rudii enda nabani»; nisa ca nga guiráʼ ni rudii Jiobá para gápanu guendanabani (Apocalipsis 22:1, 2). Guiráʼ binni runi adorar Jiobá ni tiidiʼ nabani lu Armagedón la? maʼ qué ziuu dxi gáticaʼ. Dede ca gueʼtuʼ ca zabánicaʼ sti biaje. Zacá zuzulú ti modo nacubi guni mandar Jiobá lu Guidxilayú riʼ. Guiráʼ binni ni guibani lu Guidxilayú riʼ zánnacaʼ laabe nga ti Dios Ni Jma Nandxóʼ ni nuu lu guidubi naca guibáʼ ne Guidxilayú, ne laasibe nga naquiiñeʼ guni adorárcabe.
21. Xi naquiiñeʼ gúninu yanna.
21 Pur guiráʼ ni maʼ guníʼ Ageo ne Zacarías chigaca ne cani maʼ guca la? nápanu stale razón para cadi gusaana de gúninu dxiiñaʼ ni maʼ bidii Jiobá laanu lu patiu stiʼ yuʼduʼ stiʼ ndaaniʼ Guidxilayú riʼ. Laga cabézanu dxi guni adorar guiráʼ xixé binni Jiobá cásipeʼ modo racalaʼdxiʼ la? naquiiñeʼ gúninu xhiiñaʼ Reinu stiʼ Dios primeru lu guendanabani stinu. Zacarías 8:9 cayabi laanu: «Natu naquiiñeʼ gaca naguidxi, laatu cani cucaadiaga ca diidxaʼ guníʼ cani riguixhená que ca dxi riʼ».
Rietenalaʼdxuʼ la?
• Xi cuzeeteʼ ca libru stiʼ Ageo ne Zacarías guca dxiqué ni naquiiñeʼ gánnanu yanna.
• Xi rusiidiʼ Ageo ne Zacarías laanu ti gánnanu gunáʼ nga ca cosa ni naquiiñeʼ gúninu primeru.
• Xiñee racané ca libru stiʼ Ageo ne Zacarías laanu gánnanu dxandíʼ zaca ni cabézanu guni Dios.