Guidúʼyanu ca cosa galán ni nuu ndaaniʼ xquidxi Jiobá

«Ziuʼdu nayecheʼ pur guiráʼ ca ndaayaʼ ni nuu ndaaniʼ liʼdxuʼ.» (SALMO 65:4.)

1, 2. 1) Xi para biquiiñeʼ xquidxi Dios yuʼduʼ que ne guiráʼ dxiiñaʼ ni guca ndaaniʼ ni. 2) Ximodo gucané David para gurí yuʼduʼ que.

DAVID nga tobi de ca hombre ni jma ruzeeteʼ Stiidxaʼ Dios. Laabe gúcabe pastor, músicu, ni riguixhená, rey stiʼ guidxi Israel ne dxandíʼ gúpabe fe Jiobá Dios. Cumu guizáʼ gunnaxhiibe Dios la? ngue runi biale de laabe gucuibe ti yuʼduʼ ra gaca adorar. Yuʼduʼ que nga ni biquiiñeʼ ca israelita para biʼniʼ adorarcaʼ Dios casi modo racalaʼdxiʼ. Cumu David nanna zaquiiñeʼ yuʼduʼ que ne guiráʼ dxiiñaʼ ni gaca ndaaniʼ ni para chuʼ xquidxi Dios nayecheʼ ne cueendú stale cosa galán la? ngue runi biindabe para Jiobá sicaríʼ: «Nayecheʼ ziuu binni ni cuiluʼ ne gucaaluʼ laa guidxiña, para cueza lu ca patiu stiluʼ. Dxandipeʼ ziuʼdu nayecheʼ pur guiráʼ ca ndaayaʼ ni nuu ndaaniʼ liʼdxuʼ, ndaaniʼ yuʼduʼ stiluʼ lugar ra nayá» (Salmo 65:4).

² Guizáʼ gupa David gana ñuuyaʼ nibí lidxi Jiobá, peru dxiiñaʼ sicarú que cadi para laadibe ni, sínuque para Salomón xiiñibe. Cadi purtiʼ si gulí Dios sti hombre para dxiiñaʼ que nucaa ngue laabe niguiche ruaabe. Para laabe ni jma risaca nga cuí yuʼduʼ que, ngue runi gucanebe lu dxiiñaʼ que de guidubi ladxidoʼbe. Bidiibe Salomón ca guiʼchiʼ ra cá ximodo na Jiobá gaca yuʼduʼ que, gudíxhebe ximodo guni ca levita que dxiiñaʼ ndaaniʼ ni ne bidiibe stale oro ne plata para laani (1 Crónicas 17:1, 4, 11, 12; 23:3-6; 28:11, 12; 29:1-5).

3. Xi runi ca xpinni Jiobá para gaca adorar Dios casi modo racalaʼdxiʼ.

³ Ca israelita ni bizuubaʼ diidxaʼ que yenándacaʼ modo nexheʼ gaca adorar Dios ndaaniʼ lidxi. Zacaca nga yanna riʼ, laanu, ca xpinni Jiobá, rúninu guiráʼ ni maʼ gudíxhebe para guni adorarnu laabe ndaaniʼ xquídxibe ni nuu lu Guidxilayú riʼ. Zacá rusihuínninu riníʼ íquenu casi guníʼ ique David. Lugar de quiche ruaanu pur modo runi xquidxi Dios dxiiñaʼ la? rúninu stipa pur guidúʼyanu ca cosa galán ni nuu ndaaniʼ ni. Maʼ huaníʼ íqueluʼ panda cosa galán nápanu para gudiʼnu xquíxepeʼ Jiobá la? Guidúʼyanu chupa chonna de laacani.

Rudiʼnu xquíxepeʼ pur cani zaniruʼ ndaaniʼ xquidxi Dios

4, 5. 1) Ximodo cayuni «mozo ni nuu xpiaaniʼ ne ni runi jneza» dxiiñaʼ ni gucuaa. 2) Xi runi sentir caadxi Testigu pur guiráʼ ni ricaacaʼ para guiziidicaʼ jma de Dios.

⁴ Nápanu stale razón para gudiʼnu xquíxepeʼ «mozo ni nuu xpiaaniʼ ne ni runi jneza», purtiʼ Jesucristu bisaana lu nácabe gúʼyacabe ca xpínnibe ni nuu ndaaniʼ Guidxilayú riʼ. Mozo ni nuu xpiaaniʼ riʼ nga ca xpinni Cristu ni bibí pur espíritu santu. Laacabe ruuyacabe guireeche ca diidxaʼ nacubi ne galán, rudiicabe guiráʼ ni naquiiñeʼ guiuundaʼ lu ca guendaridagulisaa ca ne rúnicabe stale libru ne revista ni cusiene xiná Biblia lu jma de tapa gayuaa diidxaʼ. Millón de binni ni nuu lu guidubi naca Guidxilayú rudiicaʼ xquíxepeʼ mozo ni nuu xpiaaniʼ ca, purtiʼ racanecaʼ laacabe guiziidicabe ni na Dios (Mateo 24:45-47). Dxandíʼ, qué gápadinu xi pur quiche ruaanu pur modo cayúnicabe dxiiñaʼ.

⁵ Elfi nga ti gunaa testigu stiʼ Jiobá ni maʼ huaniisi. Laabe nuudxí ladxidoʼbe purtiʼ riénebe ne rúnibe ni na guiráʼ ca conseju ni reeda lu ca libru ne ca revista ni rudii mozo ni nuu xpiaaniʼ. Cumu rudiibe xquíxepeʼ xquidxi Dios pur modo runi dxiiñaʼ la? riníʼ íquebe sicaríʼ: «Xi ñuneʼ pa qué ñuaa ndaaniʼ xquidxi Jiobá pue». Irmgard ne xheelabe Peter, maʼ nápacabe stale iza de cayúnicabe ni na Dios, ne laabe rudiibe xquíxepeʼ xquidxi Jiobá pur guiráʼ libru ne revista ni rudii laanu para guizíʼdinu. Lade guiráʼ cani rudii xquidxi Dios nuu stale cosa ni zanda iquiiñeʼ ca binni ni qué ruuyaʼ ne cani qué runadiaga para guiziidicaʼ jma de Dios.

6, 7. 1) Tu ruuyaʼ modo raca dxiiñaʼ ni runi ca testigu stiʼ Jiobá lu guidubi naca Guidxilayú. 2) Xi huaníʼ caadxi Testigu pur dxiiñaʼ ni cayuni xquidxi Jiobá ni nuu lu Guidxilayú riʼ.

⁶ «Mozo ni nuu xpiaaniʼ» ca nápabe caadxi binni ni riníʼ pur laabe. Ca binni ni riníʼ pur laabe ca nga Grupu ni Zaniruʼ stiʼ ca testigu stiʼ Jiobá, ti grupuhuiiniʼ de hombre ni bibí pur espíritu santu. Ca hombre riʼ rúnicabe dxiiñaʼ Brooklyn (Nueva York, EE.UU.), ne dede racá ruuyacabe dxiiñaʼ cayuni xquidxi Dios lu guidubi naca Guidxilayú. Grupu ni Zaniruʼ riʼ ribí lade ca xpinni Jiobá tu zanda guni dxiiñaʼ ndaaniʼ ca yoo Betel. Dede ndaaniʼ cani ruuyacabe dxiiñaʼ cayaca ndaaniʼ jma de noventa y ocho mil neza binni ridagulisaa ni nuu lu guidubi naca Guidxilayú. Ne laaca dede racá ribícabe hombre para gaca binnigola ne siervu ministerial lade ca binni ridagulisaa, purtiʼ maʼ rúnicaʼ guiráʼ ni rinabaʼ Biblia para guicaacabe dxiiñaʼ ca (1 Timoteo 3:1-9, 12, 13). Ca binnigola riʼ zanírucaʼ lade ca dendxuʼ ne rápacabe laacaʼ ne stale guendarannaxhii, purtiʼ maʼ bisaana Dios lu nácabe gúnicabe ni. ¡Dxandíʼ riguu ndaayaʼ Dios laanu purtiʼ nuunu lade ca dendxuʼ riʼ, ridúʼyanu pabiáʼ nadxiicabe laanu ne rudiʼnu cuenta nuunu tobi si ne guiráʼ ca bíʼchinu ne ca bizáʼnanu! (1 Pedro 2:17; 5:2, 3.)

⁷ Lugar de nidxiichi ca binni ridagulisaa pur intiica si la? rudiicabe xquíxepeʼ ca binnigola purtiʼ racanecaʼ laacabe guiziidicabe jma de Dios. Zacá nga ruuyaʼ ti xpinni Cristu ni láʼ Birgit, ti gunaa ni maʼ bichaganáʼ ni napa jma de treinta iza. Dxi nahuiinibe nabé bidxaagabe binni ni bicaa laabe nucheenebe Dios, ne dede bilá ñúnibe xiixa guizáʼ malu. Peru gunda bixélebe de ca binni que, purtiʼ bíʼnibe ni na ca conseju ni zeeda lu Biblia ni bidii ca binnigola laabe, ne laaca gucané ca bizáʼnabe ne ca béndabe ni zinanda Cristu laabe. Xi runi sentirbe yanna yaʼ. Laabe guniʼbe: «Guizáʼ rudiee xquíxepeʼ purtiʼ dede yanna nuaaruaʼ ndaaniʼ xquidxi Jiobá». Ti hombrehuiiniʼ de 17 iza ni láʼ Andreas guníʼ: «Ndiʼ nga dxandíʼ xquidxi Jiobá, ti guidxi ni jma galán ni nuu yanna». Cadi dxandíʼ riéchenu stale ne rudiʼnu xquíxepeʼ Jiobá purtiʼ nuunu ndaaniʼ xquidxi la?

Cani zaniruʼ ndaaniʼ xquidxi Dios laaca gulenécabe donda

8, 9. Xi biʼniʼ caadxi binni ni bidxaaga David, ne xi bíʼnibe laabe.

⁸ Dxandíʼ, ca hombre ni bibí para gacané laanu guni adorarnu Dios jneza laaca gulenecaʼ donda. Guirácabe rucheecabe, ne nuu tu raca nagana para laa guni guiráʼ ni na Dios ne runi stipa ti cadi gucheeruʼ. Ñee zadxiichinu pur nga la? Coʼ, purtiʼ dede ca israelita ni gupa ti dxiiñaʼ nabé risaca laaca bíʼnicaʼ cosa malu. Guidúʼyanu ni biʼniʼ rey Saúl. Dxi gupa ca binni runi xhiiñaʼ rey riʼ gana niguixhedxicaʼ ladxidoʼbe pur ca guendanagana cadíʼdibe que la? bedanécabe David ra nuube para guxhidxi saa gucaadiágabe. Peru qué nindaa diʼ gucalaʼdxiʼ Saúl ñuuti laabe, ngue runi David gupa xidé bixooñeʼ para guilá (1 Samuel 16:14-23; 18:10-12; 19:18; 20:32, 33; 22:1-5).

⁹ Cadi Saúl si diʼ nga bichee. Joab, xaíque stiʼ ca binni nanda guiibaʼ stiʼ David, laaca bicheebe purtiʼ biitibe Abner, ti binnilidxi Saúl. Absalón, xiiñiʼ David, bicaalú bixhoze purtiʼ gucalaʼdxiʼ ñuni mandar lugar stibe. Ne Ahitofel, hombre ni guizáʼ guca xhamigu David ni guyuu ra nuube para gudii conseju laabe, laaca bidxiideche laabe (2 Samuel 3:22-30; 15:1-17, 31; 16:15, 21). Neca zaqué, David nin ti ora qué niguiche ruaa ne qué ñapa xiana, ne qué nusaana de ñuni adorar Jiobá pur ngue. Cumu gúpabe stale guendanagana la? guyuube jma gaxha de Jiobá ne dxi guzananda Saúl laabe qué nusaana de ñúnibe ni jneza. Ca dxi que laabe biindabe sicaríʼ: «Bilaselaʼdxiʼ naa, Dios stinneʼ, bilaselaʼdxiʼ naa, purtiʼ lii si zanda gulaluʼ naa; ne ziuaa xaʼnaʼ xhiaaluʼ dede ora tiidiʼ ca guendanagana riʼ» (Salmo 57:1).

10, 11. Xi guníʼcabe de ti gunaa Testigu láʼ Gertrud dxi nahuiiniʼ, ne xi guniʼbe ora bicheené ca bizáʼnabe ne ca béndabe ni zinanda Cristu laabe.

¹⁰ Ca dxi stinu riʼ qué zanda diʼ guininu nuu tuuxa ni cudxiideche laanu ndaaniʼ xquidxi Dios. Purtiʼ nin Jiobá, nin ca ángel stiʼ nin ca binni ni cayapa ca dendxuʼ stiʼ Dios qué rudiicaʼ lugar chuʼ binni qué iquiiñeʼ lade ca binni ridagulisaa. Peru guiranu gulenenu donda, nga runi ruchéʼnenu binni cásica rucheenécabe laanu.

¹¹ Guidúʼyanu ni bizaaca ti gunaa Testigu ni biʼniʼ xhiiñaʼ Jiobá guidubi dxi pur stale iza ni láʼ Gertrud. Dxi nahuiinibe guyuu tu guníʼ cadi dxandíʼ diʼ bicheechebe diidxaʼ, sínuque gadxé nga ni bíʼnibe. Xi bíʼnibe ora guníʼcabe zaqué de laabe yaʼ. Ñee bidxiichibe pur ni guníʼ ca binni que la? Coʼ. Dxi mayaca gátibe, lu iza 2003, dxi nápabe 91 iza, bietenaláʼdxibe ni bizaacabe dxiqué ne guniʼbe: «Guiráʼ ni bizaacaʼ dxiqué ne cani bizaacaruaʼ, bisiidiʼ cani naa gannaʼ Jiobá nga cayuuyaʼ gaca dxiiñaʼ riʼ, neca riquiiñebe binni ni ruchee casi laanu». Ni gucané Testigu riʼ para gunda biʼniʼ huantar ora bicheené xcaadxi xpinni Dios laa nga biyúbibe gacané Jiobá laabe ne biʼniʼ orarbe laa de guidubi ladxidoʼbe.

12. 1) Xi biʼniʼ caadxi xpinni Cristu lu primé siglu ni qué riquiiñeʼ gúninu. 2) Xi naquiiñeʼ gúninu.

¹² Guietenaláʼdxinu laaca ruchee cani jma maʼ xadxí naca xpinni Cristu ne cani runi dxiiñaʼ ne stale gana. Nga runi, ora ti xpinni Cristu guchee la? galán chinándanu conseju ni na: «Laguni irá ni sin quiche ruaa tu» (Filipenses 2:14). ¡Cadi galán diʼ nga gúninu casi biʼniʼ caadxi xpinni Cristu ni bibani lu primé siglu que! Casi na discípulo Judas, guyuu caadxi maestru ni qué nusiidicaʼ ni dxandíʼ ne «qué [nuzuubacaʼ] stiidxa Dios ne [guluudicaʼ ca hombre] ni risaca nezalú Dios». Ca binni riʼ «nisi canadxiichi stubi caʼ, ne cananíʼ ca binni» (Judas 8, 16). Cadi gácanu binni riguiche ruaa ne ni riníʼ cadi jneza modo cayaca xiixa dxiiñaʼ cásica guca ca hombre ca, sínuque guidúʼyanu guiráʼ ca cosa galán ni cudii «mozo ni nuu xpiaaniʼ ne ni runi jneza» laanu. Gusihuínninu dxandíʼ rudiʼnu xquíxepeʼ xquidxi Jiobá ne gúninu guiráʼ dxiiñaʼ stinu sin quiche ruaanu.

«Nabé naná ca diidxa cusiidi be»

13. Xi biʼniʼ caadxi binni ora binadiágacaʼ ni cusiidiʼ Jesucristu.

¹³ Lu primé siglu que, caadxi binni caguiche ruaa pur modo cayuni ca hombre ni gulí Jiobá que dxiiñaʼ, ne xcaadxi caguiche ruaa pur cani cusiidiʼ Jesús. Guidúʼyanu xi guníʼ Jesús lu Juan 6:48-69: «Tu go cuerpu stinneʼ ne gue rini stinne la? ma napa enda nabani ni qué zaluxe». «Ora bina diaga cani canazá né laabe ni uníʼ be que la? na caadxi de laacaʼ: “Nabé naná ca diidxa cusiidi be ca. Tuu ndi zanda icaa cani”.» Jesús nanna «xi caníʼ ca discípulu stibe ra cuchaaga ruaa ca zaqué [ . . . ;] ne dede dxi que bigueta stale de cani canazá né laabe que, ma qué ninanda ru ca laabe». Peru cadi guirádicabe gudiche ruaacabe. Ora gunabadiidxaʼ Jesús ca doce apóstol stiʼ: «Laga laatu yaʼ, laca zabigueta tu la?», Pedru bicabi laabe: «Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe. Ma runi cre du ne ma nanna dxichi du lii nga Cristu Xiiñi Dios ni nabani».

14, 15. 1) Xiñee ridxiichi caadxi de ca xpinni Dios pur cani runi crenu. 2) Xi rizíʼdinu de ejemplu stiʼ Emanuel.

¹⁴ Ca dxi stinu riʼ, chupa chonna si de ca xpinni Cristu nga cani qué riuulaʼdxiʼ caadxi de cani runi crenu, ne riguiche ruaacaʼ pur modo cayuni xquidxi Dios dxiiñaʼ ndaaniʼ Guidxilayú riʼ. Xiñee rúnicabe ndiʼ yaʼ. Stale tiru la? purtiʼ qué riénecabe modo runi Dios dxiiñaʼ. Jiobá rusiidiʼ laanu cani naquiiñeʼ guni crenu chaahuidugá, nga runi riquiiñeʼ gánnanu ziuu ora zaca chaahuiʼ modo maca riénenu xiixa ni zeeda lu Stiidxaʼ Dios. Stale de ca xpinni Jiobá riéchecaʼ purtiʼ ze dxi jma jneza riénecaʼ ni cá lu Biblia, peru chupa chonna si de laacaʼ nga cani ridxiichi pur xiixa ni guidxaa ndaaniʼ xquidxi Dios, purtiʼ riuuláʼdxicaʼ ñácani jma jneza (Eclesiastés 7:16). Sti cosa ni zándaca gucaa caadxi de ca xpinni Dios guidxiichi nga guni crecaʼ laacaʼ ne gúnicaʼ ni na Dios modo racaláʼdxicaʼ. Intiica cosa ni gucaa laanu quiche ruaanu la? cadi jneza diʼ ni purtiʼ zuxhéleni laanu de xquidxi Dios ne zucaani laanu chinándanu casi runi binni guidxilayú.

¹⁵ Ti ejemplu de laani nga ni bizaaca Emanuel, ti Testigu ni guníʼ cadi jneza nuu caadxi de cani reeda lu ca libru ne ca revista ni rudii «mozo ni nuu xpiaaniʼ ne ni runi jneza» (Mateo 24:45). Laabe maʼ qué ninabe ñuundabe ca libru ne revista ca, ne gúdxibe ca binnigola stiʼ ca binni ridagulisaa maʼ qué racaláʼdxibe gácabe testigu stiʼ Jiobá. Galanpeʼ nga nagueenda bidiibe cuenta dxandíʼ guiráʼ cani rusiidiʼ xquidxi Dios. Laabe biyúbibe ca Testigu ne gúdxibe laacaʼ cadi jneza nuube, zacá gunda bibiguétabe lade ca binni ridagulisaa sti biaje. Yanna maʼ nuube nayecheʼ.

16. Xi zanda gúninu pa guiníʼ íquenu cadi jneza cani rusiidiʼ ca testigu stiʼ Jiobá.

¹⁶ Xi zanda gúninu pa ruluíʼ cadi jneza para laanu xiixa ni rusiidiʼ ca testigu stiʼ Jiobá ne gucaani laanu quiche ruaanu yaʼ. Cadi guidxiichinu nagueendaca. Zándaca cuee «mozo ni nuu xpiaaniʼ ne ni runi jneza» xiixa libru o revista ni gusiene cani rinabadiidxanu o ni rininu cadi jneza nuu. Laaca zanda guinabadiidxanu ca binnigola stiʼ ca binni ridagulisaa (Judas 22, 23). Ne laaca galán guni orarnu, guidúʼndanu Biblia laasinu ne chuʼnu lade ca xpinni Cristu ni dxandíʼ riuuláʼdxicaʼ guiziidicaʼ de Dios, purtiʼ zacané ca nga laanu guiníʼ íquenu jneza nga guiráʼ ni rusiidiʼ Biblia ne gudiʼnu xquíxepeʼ Dios pur laacani. Cadi guiaandaʼ laanu biguidxi fe stinu pur guiráʼ ni maʼ bizíʼdinu lu Biblia, ne bisiidiʼ Jiobá cani laanu ra biquiiñebe ca binni ni gulibe.

Gúninu dxiiñaʼ ne stale gana

17, 18. Lugar de quiche ruaanu, xi naquiiñeʼ gúninu, ne xiñee.

¹⁷ Nanna dxíchinu guiráʼ binni ralené donda, nga runi ruchee, ne nuu binni jma riguiche ruaa pur intiica si cosa (Génesis 8:21; Romanos 5:12). Peru pa guiaʼnu quiche ruaanu la? zaxélenu de Jiobá; nga runi cadi galán diʼ quiche ruaanu.

¹⁸ Lugar de quiche ruaanu pur cani raca lade ca binni ridagulisaa la? jma galán gacanenu gaca dxiiñaʼ ca ne stale gana. Ne laaca naquiiñeʼ quixhe íquenu gúninu ni na Dios guiráʼ dxi, gusisácanu laabe, cadi guchéʼnenu laabe ne chuʼnu nayecheʼ (1 Corintios 15:58; Tito 2:1-5). Jiobá cayuuyaʼ guiráʼ ni cayaca ndaaniʼ xquidxi, ne Jesús nanna xi cayaca ndaaniʼ cada neza binni ridagulisaa, cásica gúnnabe ni lu primé siglu que (Apocalipsis 1:10, 11). Naquiiñeʼ gusaananu cani lu naʼ Dios ne Cristu, ni naca Xaíque lade ca binni ridagulisaa. Laacabe zanda iquiiñecabe ca pastor ni runi dxiiñaʼ stiʼ jneza para guni chaahuiʼ intiica ni cadi jneza cayaca (Salmo 43:5; Colosenses 1:18; Tito 1:5).

19. Xi naquiiñeʼ gúninu laga cabézanu guedandá dxi guni chaahuiʼ Reinu stiʼ Cristu guidxilayú riʼ.

¹⁹ Mayaca guinitilú guiráʼ ca cosa malu nuu yanna riʼ, gaca si nga zuni mandar Reinu stiʼ Cristu guidxilayú riʼ. Nga runi, galán gúninu dxiiñaʼ ne stale gana laga cabézanu gueedandá dxi ca. Nga zacané laanu guidúʼyanu jneza nga dxiiñaʼ ni cayuni ca bíʼchinu ne bizáʼnanu, ne cadi guidúʼyanu ra cucheesicabe. Ziuʼnu nayecheʼ ora guidúʼyanu nabánicabe casi na Dios. Cadi galán diʼ quiche ruaanu purtiʼ zuninani laanu, ni jma galán gúninu nga guyúbinu ximodo chuʼnu nayecheʼ ne gúninu ni na Dios.

20. Xi ndaayaʼ ricaanu ora rúninu dxiiñaʼ ne stale gana.

²⁰ Pa gúninu dxiiñaʼ ne stale gana, zudiʼnu cuenta nápanu stale ndaayaʼ stiʼ Jiobá ndaaniʼ xquídxibe ni nuu lu Guidxilayú riʼ. Ndiʼ si nga guidxi ni qué rusaana de guni ni na Jiobá, Dios Ni jma Nandxóʼ lu guidubi naca guibáʼ ne Guidxilayú. Xi runi sentirluʼ pur nga ne pur cayuni adorarluʼ Jiobá, Dios ni dxandíʼ ca yaʼ. Galán nga guníʼ íqueluʼ casi David, hombre ni biindaʼ sicaríʼ: «[Lii] ni rucaadiaga oración, ra nuuluʼ zeeda guiráʼ binni. Nayecheʼ ziuu binni ni cuiluʼ ne gucaaluʼ laa guidxiña, para cueza lu ca patiu stiluʼ. Dxandipeʼ ziuʼdu nayecheʼ pur guiráʼ ca ndaayaʼ ni nuu ndaaniʼ liʼdxuʼ» (Salmo 65:2, 4).

Rietenalaʼdxuʼ la?

• Xiñee naquiiñeʼ gudiʼnu xquíxepeʼ Dios pur ca binni ni zaniruʼ lade ca binni ridagulisaa.

• Xi guiníʼ íquenu ora guchee ca hombre ni zaniruʼ ndaaniʼ xquidxi Dios.

• Xi riquiiñeʼ gúninu ora gaca chaahuiʼ modo maca riénenu xiixa ni zeeda lu Stiidxaʼ Dios.

• Xi zacané ti xpinni Cristu pa ruluíʼ cadi jneza para laa xiixa ni caziidiʼ.