Capítulo 14
Ximodo runi mandar Jiobá ca xpinni para guni xhiiñabe
1. Xi cayabi Biblia laanu de ca xpinni Jiobá ni runi xhiiñabe, ne xiñee risaca gánnanu ni.
ÑEE napa Dios ti grupu ni runi xhiiñabe la? Nápabe, ne Stiidxabe racané laanu gánnanu ximodo nuu caadxi de grupu ca guibáʼ ne guidxagayaanu modo rúnicabe dxiiñaʼ (Ezequiel 1:1, 4-14; Daniel 7:9, 10, 13, 14). Neca qué zanda guidúʼyanu laacabe purtiʼ nuucabe guibáʼ la? nabé racanécabe cani dxandíʼ runi adorar Jiobá yanna riʼ (2 Reyes 6:15-17). Jiobá laaca napa xcaadxi xpinni lu Guidxilayú riʼ. Biblia racané laanu gánnanu tu laacabe ne ximodo runi mandar Jiobá laacabe.
Tuu nga ca xpínnibe ni nuu lu Guidxilayú riʼ
2. Tuu nga beeda gaca ca xpinni Dios despué.
2 Guidxi Israel que nga guca xpinni Dios ti mil gaayuʼ gayuaa cuarenta y cinco iza (Hechos 7:38). Peru cumu qué ninándacabe ley stibe ne bicaanácabe Xiiñibe la? laaca bicaanabe laacaʼ. Sicaríʼ gudxi Jesús ca judíu que: «Ma biaana stubi lidxi tu ne iruti culabi laa» (Mateo 23:38). Ngue runi biyubi Jiobá xcaadxi binni para gácacaʼ xpínnibe ne bíʼninebe laacaʼ ti pactu cubi. Biaʼsi 144,000 binni nga gulí Dios para chuʼcaʼ tobi si ne Xiiñibe guibáʼ (Apocalipsis 14:1-4).
3. Xi bizaaca lu Pentecostés stiʼ iza 33 ni bisihuinni maʼ gadxé binni nga cani chiguiquiiñeʼ Dios.
3 Ca binni ni guyuu primé lade cani guca xpinni Dios despué que la? gulí Jiobá laacabe ne espíritu santu stiʼ lu Pentecostés stiʼ iza 33 que. Sicaríʼ cayeeteʼ de ni guca ca: «Runi ca judíu ti saa, rabi cabe ni Pentecostés. Ne dxi biaba laní que nuu ca xpinni Cristu que tobi si lugar. Mala uxidxi biete xiixa de xaibáʼ casi ora rundubi ti bi yooxhoʼ. Bidxá ni ndaani yoo ra nuu cabe que. Ne biiya cabe casi ludxi bele. Bireeche ni luguiá cada tobi de laacabe Ne bidxá ladxidóʼ cabe de Espíritu Santu» (Hechos 2:1-4). Espíritu santu que nga bisihuinni maʼ ca binni que nga chiguiquiiñeʼ Jiobá para guni xhiiñabe modo guni mandar Jesucristu laacaʼ dede guibáʼ.
4. Tuu nga ca binni ni cayuni xhiiñaʼ Jiobá lu Guidxilayú riʼ.
4 Yanna riʼ maʼ xcaadxi si de 144,000 binni ca nuu lu Guidxilayú riʼ. Peru Biblia maca guníʼ zadaaguʼ stale binni ni naca de «xcaadxi dendxu» ca laacabe, ne ca binni ca maʼ millón de laacaʼ. Jesús, Pastor ni jma nanna gapa dendxuʼ que, maʼ bitagulisaa laacabe para gácacabe tobi si ti zacá sanándacabe ti Pastor si, nga nga laabe (Apocalipsis 7:9; Juan 10:11, 16). Guirácabe nga xpinni Jiobá ni nuucaʼ tobi si, laacabe nga cayúnicabe xhiiñabe lu Guidxilayú riʼ.
Dios nga cayuni mandar ca binni ni cayuni xhiiñabe
5. Tuu nga cayuni mandar grupu ni runi xhiiñaʼ Dios, ne ximodo rúnibe ni.
5 Ora ruzeeteʼ Biblia laacabe nga ca «xpinni Dios ni nabani» ca la? rihuinni dxíchica tuu nga cayuni mandar laacabe. Dios nga cayuni mandar laacabe. Riquiiñebe Jesús para guluiʼbe xquídxibe neza cheʼ, purtiʼ laa nga guluube casi Xaíque lade ca xpínnibe lu Guidxilayú, ne laaca riquiiñebe Stiidxabe, Biblia (1 Timoteo 3:14, 15; Efesios 1:22, 23; 2 Timoteo 3:16, 17).
6. 1) Ximodo bihuinni lu primé siglu que Dios ngue runi mandar ca xpinni. 2) Xi rusihuinni Jesús nga Xaíque stiʼ ca xpinni Dios dede yanna.
6 Ca dxi guca saa stiʼ Pentecostés que bihuinni chupa chonna biaje Dios nga ni runi mandar ca binni ca (Hechos 2:14-18, 32, 33); casi dxi gucané ángel stiʼ Jiobá para guireeche ca diidxaʼ nacubi ne galán que neza África; dxi guca Saulo de Tarso xpinni Cristu que binadiágabe stidxi Jesús ora cusiene laabe xi gúnibe, ne dxi bizulú Pedru bicheeche diidxaʼ lade ca binni ni cadi judíu que (Hechos 8:26, 27; 9:3-7; 10:9-16, 19-22). Despué maʼ qué ñunadiaga binni ridxi de guibáʼ, maʼ guirutiʼ tu ñuuyaʼ ángel ne maʼ qué nicaadícabe espíritu para ñúnicabe milagru. Peru Jesús maca gudxi laacabe: «Ganna ca tu qué ziuu dxi ixele de laatu dede dxi iluxe guidxilayú» (Mateo 28:20; 1 Corintios 13:8). Yanna riʼ la? ca testigu stiʼ Jiobá rudiicabe lugar gusiidiʼ Jesús laacabe. Purtiʼ pa ñaca qué nusiidiʼ Jesús laacabe la? qué ñanda nucheechecabe stiidxaʼ Reinu lade ca binni ni rucaalú laacabe.
7. 1) Tuu nga cani naca «mozo ni nuu xpiaani ne ni runi jneza» ca, ne ximodo nánnanu ni. 2) Xi dxiiñaʼ bidii Jesús «mozo» stiʼ guni.
7 Dxi mayaca gati Jesús que, bizeetebe lu ca discípulo stibe de ti «mozo ni nuu xpiaani ne ni runi jneza», ni chigusaananebe laa ti dxiiñaʼ risaca purtiʼ laabe nga Xpixuaanaʼ. Dxi biree Jesús zeʼ guibáʼ que la? maʼ nuu «mozo» ca, ne cayúniruʼ dxiiñaʼ dxi guibiguétabe casi Rey stiʼ Reinu, peru maʼ guirutiʼ zuuyaʼ laabe. Cani bizéʼtenu ca rusihuínnicani cadi ti binni si nga mozo ca, sínuque ca xpinni Cristu ni bibí ca nga naca ni. Cumu ne rini stibe nga guziʼbe laacaʼ la? zanda guiniʼbe nácacaʼ «mozo» stibe. Cani naca mozo que gúdxibe laacaʼ gacanecaʼ binni gaca discípulo stibe ne chaahuidugá gusiidicaʼ laacabe, ra «gudii[caʼ] ni iquiiñe cabe» para gánnacabe de Jiobá (Mateo 24:45-47; 28:19; Isaías 43:10; Lucas 12:42; 1 Pedro 4:10).
8. 1) Xi dxiiñaʼ nga napa cani naca mozo ca yanna. 2) Xiñee naquiiñeʼ chinándanu ni cusiidiʼ mozo guluu Dios ca.
8 Lu iza 1914, dxi bibiguetaʼ Xpixuaanaʼ mozo que sin nihuinni la? cayuni mozo que dxiiñaʼ cásipeʼ gudxi Xpixuaanaʼ laa guni, ne pur cani huayúnicabe rihuinni bidiirube laa jma dxiiñaʼ lu iza 1919. Dede lu iza ca hasta yanna la? huaníʼcabe lu guidubi naca Guidxilayú ximodo runi mandar Dios ne maʼ bidagulisaa jma binni ni cayuni adorar Jiobá para guilacaʼ lu dxi ni nabé naná ca (Mateo 24:14, 21, 22; Apocalipsis 7:9, 10). Laacabe laaca caquiiñeʼ guiziidicabe de Jiobá, ne cani naca mozo ca nga rusiidiʼ laacabe. Nga runi, para gusiéchenu Jiobá la? naquiiñeʼ guicaanu ne chinándanu ni gusiidicabe laanu purtiʼ laacabe nga riquiiñeʼ Jiobá para gusiene laanu.
9, 10. 1) Ximodo bíʼnicabe ora nuucabe gánnacabe de xiixa ni runi crécabe ne ximodo bíʼnicabe para bicheechecabe diidxaʼ lu primé siglu que. 2) Ximodo rata chaahuiʼ dxiiñaʼ ni runi ca xpinni Jiobá ca dxi stinu riʼ.
9 Nuu biaje rinabadiidxaʼ binni pa jneza ni runi crecaʼ o ni cayúnicaʼ. Xi naquiiñeʼ gaca óraca yaʼ. Lu capítulo 15 stiʼ Hechos cusiene laanu xi bíʼnicabe ora gudinde diidxaʼ caadxi binni pur cani cadi naca judíu ni beeda gácacaʼ xpinni Cristu. Ni bizaaca que bichíñacabe ni dede ra nuu ca apóstol ne ca binnigola ni nuu Jerusalén, ni nácacaʼ grupu ni zaniruʼ que. Nécaxa binni ruchee ca hombre que la? biquiiñeʼ Dios laacabe para guni chaahuicabe ni cayaca que. Biindasicabe xiná Biblia ne biluíʼ si espíritu santu laacabe maʼ zanda gucheechecabe diidxaʼ ra nuu ca binni ni cadi judíu que la? guníʼcabe xi gaca. Dios guluu ndaayaʼ modo bíʼnicabe que (Hechos 15:1-29; 16:4, 5). Grupu ni zaniruʼ que laaca biseendacabe stale hombre para gacané guireeche stiidxaʼ Reinu.
10 Ca dxi stinu riʼ, Grupu ni Zaniruʼ ni runi xhiiñaʼ Jiobá ca nga caadxi hombre ni bibí ne espíritu ne nácacabe de gadxé gadxé guidxi. Grupu ca nga riguixhe ximodo gaca dxiiñaʼ stiʼ ca testigu stiʼ Jiobá ne nuucabe Nueva York. Jesucristu cayuni mandar laacabe, nga runi cayacanécabe binni guni adorar Dios jneza lu guidubi naca Guidxilayú. Grupu riʼ riguixhe ximodo gucheeche ca testigu stiʼ Jiobá diidxaʼ, laacabe nuucabe lade stale mil de neza binni ridagulisaa. Guiráʼ cani nuu lu Grupu ni Zaniruʼ ca riníʼ íquecabe cásica apóstol Pablu, sicaríʼ bicaabe ra nuu ca bíʼchibe ni zinanda Cristu: «Cadi cuyubi du quixhe du xi guni cre tu, purti ma zuhuaa chaahui tu lu ni runi cre tu. Ni cuyubi du la? nga acané du guieche tu» (2 Corintios 1:24).
11. 1) Ximodo ribícabe tuu nga gaca binnigola o siervu ministerial. 2) Xiñee naquiiñeʼ gacanenu cani maʼ naca binnigola ne siervu ministerial.
11 Ca testigu stiʼ Jiobá rudiicabe lugar Grupu ni zaniruʼ ca nga cuicaʼ ca hombre ni nanna pora nga zanda gaca tuuxa ti binnigola o ti siervu ministerial para gápacaʼ ca binni ridagulisaa. Ndaaniʼ Biblia nga cá ximodo naquiiñeʼ gaca cani cuícabe ca ne xi naquiiñeʼ gúnicaʼ ne qué rusiaandacabe gulené ca hombre ca donda, nga runi rucheecaʼ. Cásica ca binnigola ni riniʼcaʼ tu zanda gaca binnigola ne siervu ministerial ne zaqueca cani na zaa gácacabe ni la? nánnacabe cadi guendariguite diʼ dxiiñaʼ ni nápacabe ca nezalú Dios (1 Timoteo 3:1-10, 12, 13; Tito 1:5-9). Nga runi, rinábacabe laabe espíritu stibe ne ruyúbicabe gusiénebe laacaʼ ne Stiidxabe (Hechos 6:2-4, 6; 14:23). Gusihuínninu rudiʼnu xquíxepeʼ Dios purtiʼ ca binni ni «bidii be gracia [...] para guni xhiiña be» ca nga racanecaʼ laanu «gaca nu tobi si lu ni runi cre nu» (Efesios 4:8, 11-16).
12. Ximodo riquiiñeʼ Jiobá ca gunaa ca ndaaniʼ xquidxi.
12 Biblia na hombre si nga naquiiñeʼ guʼyaʼ ni runi ca binni ridagulisaa. Peru nga qué rindétedini gunaa, purtiʼ caadxi de laacabe ziuu lu Reinu de guibáʼ, ne guiráʼ ca gunaa ca nga jma rucheechecaʼ diidxaʼ (Salmo 68:11). Ne ora rúnicabe dxiiñaʼ stícabe ra lídxicabe la? laaca racanécabe guiníʼ binni galán de ca binni ridagulisaa (Tito 2:3-5). Peru lade ca binni ridagulisaa ca la? ca hombre ni maʼ nácacaʼ binnigola ne siervu ministerial nga rusiidiʼ (1 Timoteo 2:12, 13).
13. 1) Casi na Biblia, ximodo naquiiñeʼ guʼyaʼ ca binnigola ca puestu sticaʼ. 2) Xi dxiiñaʼ nga zanda guni guiranu.
13 Ndaaniʼ Guidxilayú riʼ rusisácacabe binni ni napa xiixa puestu ni risaca. Peru ndaaniʼ xquidxi Dios la? ndiʼ nga ni rinándacabe: «Ni jma huaxiéʼ risaca lade tu la? nga nga ni jma risaca» (Lucas 9:46-48; 22:24-26). Biblia cayabi ca binnigola ca cadi gácacaʼ casi xpixuaanacabe, sínuque quíxhecaʼ ti ejemplu galán nezalú ca xpinni Dios (1 Pedro 5:2, 3). Cadi caadxi si binni nga gulí Dios para gusiidiʼ de labe ne de Reinu stibe guiráʼ ladu, sínuque guiráʼ ca testigu stiʼ Jiobá, cásica hombre ne gunaa nga bidiibe dxiiñaʼ ca.
14. Biquiiñeʼ ca textu ca para guicábiluʼ cani zeeda despué de párrafo riʼ.
14 Galán guinabadiidxanu laca laanu: «Ñee dxandíʼ nga rieneʼ ximodo runi mandar Jiobá ca xpinni ni runi xhiiñabe lu Guidxilayú riʼ la? Ñee rusihuinneʼ ni pur modo nacaʼ, lu cani rinieʼ ne lu cani runeʼ la?». Guinabadiidxanu laca laanu cani zeeda despué de párrafo riʼ la? zacanécani laanu gánnanu xi riníʼ íquenu.
Pa dxandíʼ ruzuubaʼ stiidxaʼ Cristu, ni naca Xaíque stiʼ guiráʼ ca xpinni Jiobá, xii nga naquiiñeʼ guneʼ casi na ca versículo zeeda raríʼ (Mateo 24:14; 28:19, 20; Juan 13:34, 35).
Ora riuuladxeʼ guicaa guiráʼ ni rudii mozo ne Grupu ni Zaniruʼ ca laanu para guiziidinu de Jiobá, tuu ndiʼ cusihuinneʼ napa respetu yaʼ (Lucas 10:16).
Ximodo naquiiñeʼ gaca ca binni ridagulisaa ne ca bíʼchicaʼ, ne jmaruʼ si ne ca binnigola (Romanos 12:10).
15. 1) Xi rusihuínninu ora rinándanu ni na xquidxi Jiobá. 2) Ximodo zanda gusihuínninu rusiguii Binidxabaʼ ne gusiéchenu ladxidóʼ Jiobá.
15 Jiobá riquiiñebe xquídxibe ni nuu lu Guidxilayú riʼ ne ruzuubacaʼ stiidxaʼ Cristu para guni mandar laanu. Nga runi, modo ruzúʼbanu stiidxacabe nga rusihuínninu pa nuunu pur Jiobá tobi lucha ni napa derechu guni mandar (Hebreos 13:17). Binidxabaʼ na jma rizaaláʼdxinu laca laanu. Nga runi, pa gudíʼnanu xcaadxi binni ni caquiiñeʼ gacanenu laacaʼ ne cadi guyúbinu gúninu xiixa para si cúʼcabe naróʼ stinu la? zusihuínninu rusiguii Binidxabaʼ. Ora nadxiinu ne rápanu respetu cani napa xiixa puestu lade ca binni ridagulisaa peru qué ruganu laacabe para si udiicabe laanu ni racaláʼdxinu la? rusiéchenu Jiobá (Judas 16; Hebreos 13:7). Pa cadi gusaananu xquidxi Jiobá la? zusihuínninu Laabe nga Dios stinu ne tobi si nuunu para guni adorarnu laabe (1 Corintios 15:58).
Ni guietenaláʼdxinu
• Tuu nga cani runi xhiiñaʼ Jiobá lu Guidxilayú riʼ yanna. Xi dxiiñaʼ rúnicabe.
• Tuu nga naca Xaíque stiʼ ca xpinni Jiobá, ne xi riquiiñebe para guni mandarbe laanu ne guendarannaxhii.
• Ximodo naquiiñeʼ gácanu ne ca binni ni zaniruʼ ndaaniʼ xquidxi Jiobá.
[Dibuju/foto ni zeeda lu yaza 133]
Jiobá riquiiñebe ca xpínnibe ni runi xhiiñabe ne ruzuubacaʼ stiidxaʼ Cristu ca para guluiʼbe laanu neza chuunu