Grupu ni Zaniruʼ ca riníʼ pur mayordomo ni runi jneza
«Tuu nga mayordomo nuu xpiaaniʼ, ni runi jneza, ni zusaana xpixuaanaʼ lu naʼ guiráʼ binni runi xhiiñaʼ para gudiibe ni gocaʼ órapeʼ caquiiñeʼ cani yaʼ.» (LUC. 12:42, NM)
1, 2. Xi gunabadiidxaʼ Jesús guníʼ si xi guiráʼ zahuinni lu ca últimu dxi riʼ.
GUNÍʼ si Jesús xi guiráʼ zahuinni lu ca últimu dxi riʼ, gunabadiidxabe: «Uná nga mozo ni zanda gusaana xpixuaana laa guʼya irá xpinni ne gudii ni iquiiñe cabe yaʼ. Ti mozo ni nuu xpiaani ne ni runi jneza». Despué guniʼbe zacaa mozo ca ndaayaʼ pur qué nucheené Dios. Xi ndaayaʼ ca yaʼ. Ziaananécabe guiráʼ ni napa xpixuaanacabe (Mat. 24:45-47).
2 Zacagá nga gunabadiidxaʼ Jesús chupa chonna beeu ante (biindaʼ Lucas 12:42-44, NM). Dxiqué bizeetebe esclavu que nga «mayordomo». Ti mayordomo nga ti binni ni rusaanacabe lu naʼ gapa ti yoo ne guʼyaʼ guni binni dxiiñaʼ. Yanna, tuu nga mozo o mayordomo ni bizeeteʼ Jesús que yaʼ. Ne ximodo rudii mozo ca ni caquiiñeʼ ca xpinni Jiobá órapeʼ caquiiñecaʼ ni yaʼ. Nabé risaca ca guendarinabadiidxaʼ ca, purtiʼ naquiiñeʼ ganna chaahuinu tu riquiiñeʼ Jiobá para gudii laanu ni caquiiñenu.
3. 1) Tuu nga na ca binni ni rusiene de Biblia zeeda gaca mozo ni bizeeteʼ Jesús ca. 2) Tuu nga mayordomo o mozo ca, ne ximodo nusiénenu tuu nga «guiráʼ binni runi xhiiñaʼ» Jesús ne «irá xpinni».
3 Stale binni ni rusiene de Biblia, nacaʼ lu relatu ni guníʼ Jesús riʼ cuzeetebe de ca binni ni napa xiixa dxiiñaʼ ndaaniʼ ca religión ni nacaʼ xpinni Cristu laacaʼ. Peru naquiiñeʼ gánnanu qué niníʼ diʼ Jesús ziuu mozo ca ndaaniʼ gadxé gadxé religión ni nuu yanna. Ne laabe guniʼbe ziuu ti mayordomo o ti mozo ni zapa guiráʼ ca cosa ni nápabe lu Guidxilayú riʼ. Nga runi, casi maʼ huasiene revista riʼ stale biaje, mayordomo riʼ nga ni zeeda gaca casi ti «grupu huiiniʼ de dendxuʼ» ni bibí pur espíritu santu. Evangeliu stiʼ Lucas na, de grupu ca nga guníʼ Jesús ante guzeeteʼ de mayordomo ca (Luc. 12:32, NM). Ora ruzeeteʼ Biblia de «guiráʼ binni runi xhiiñaʼ» Jesús ne «irá xpinni» laaca cuzeeteni de grupu ni bibí pur espíritu, peru maʼ caniʼni de dxiiñaʼ runi cada tobi de laacaʼ. Yanna, ñee guiráʼ xpinni Cristu ni bibí pur espíritu ca nga rudii ni caquiiñeʼ ca xpinni Jiobá órapeʼ caquiiñecaʼ ni la? Pa guʼyaʼ chaahuinu xiná Biblia la? zacaneni laanu guiénenu ni gunabadiidxanu ca.
Ti xpinni Dios ni guyuu dxiqué
4. 1) Ximodo gulee lá Jiobá guidxi Israel dxiqué. 2) Ne tu laa si bisiidiʼ ndaaniʼ guidxi Israel.
4 Dxiqué, ora guiníʼ Jiobá «xpinneʼ» caniʼbe de guidubi naca guidxi Israel. Gúdxibe laacaʼ: «Laatu nga ca testigu stinneʼ [raríʼ caniʼbe de stale binni] [...], ne xpinneʼ ni maʼ guliéʼ [raríʼ caniʼbe de ti binni si]» (Isa. 43:10). Casi maʼ bidúʼyanu ca, guiráʼ ca israelita que nga beeda gácacaʼ casi ti xpinni Dios. Neca zacá, cani ruzaaquiʼ guʼxhuʼ ne ca levita que si nga bisiidicaʼ guidubi guidxi que (2 Cró. 35:3; Mal. 2:7).
5. Xi guníʼ Jesús zazaaca ca judíu que.
5 Ñee de guidxi Israel que nga caníʼ Jesús ora bizeeteʼ de mozo que la? Coʼ, purtiʼ Jesús gudxi ca judíu ni bibani dxiqué sicaríʼ: «Cayabe laatu ziaaxha tu de lade ca xpinni Dios ne ma adxé tu guiuu jlugar tu, tobi ni zanda iquiiñe para laabe» (Mat. 21:43). Racá ridúʼyanu guníʼ Jesús zabí Jiobá sti guidxi cubi. Peru cadi guiráʼ diʼ binni ni nuu ndaaniʼ ni zusiidiʼ, sínuque mozo si ni bizeeteʼ Jesús que nga zúnini cásica gúcani ndaaniʼ guidxi Israel dxiqué.
Bihuinni tuu nga mozo ni nuu xpiaaniʼ
6. Xi guidxi nga gulí Dios lu iza 33 stiʼ Pentecostés, ne tuu nga ca binni zeeda gaca guidxi ca.
6 Guidxi ni gulí Jiobá que nga Israel stiʼ Dios, ni zeeda gaca guiráʼ ca binni ni bibí pur espíritu santu (Gál. 6:16; Rom. 2:28, 29; 9:6). Gulibe guidxi ca lu iza 33 stiʼ Pentecostés, dxi bisábabe espíritu santu luguiáʼ ca xpinni Cristu. Dede dxiqué guiráʼ binni ni cuí Dios ne espíritu santu zeeda gácacaʼ de guidxi ca. Ne guidxi ca nga zeeda gaca mozo ni gulí Jesucristu. Guiráʼ ca binni ca gucuaacaʼ ti dxiiñaʼ de gucheechecaʼ diidxaʼ ne gacanecaʼ binni gaca xpinni Cristu (Mat. 28:19, 20). Yanna, ñee guiráʼ ca binni ni bibí pur espíritu ca nga cudiicaʼ laanu guiráʼ ni caquiiñenu la? Guidúʼyanu ximodo ricabi Biblia ni gunabadiidxanu riʼ.
7. 1) Xi dxiiñaʼ jma risaca gucuaa ca apóstol que gúnicaʼ. 2) Xi sti dxiiñaʼ gucuaacabe despué.
7 Jesús gulí doce apóstol ne biseendabe laacaʼ gucheechecaʼ diidxaʼ. Nga nga ti dxiiñaʼ ni jma risaca gucuaacabe (biindaʼ Marcos 3:13-15). Dxiiñaʼ ni gucuaacabe ca biáʼsipeʼ ni ne diidxaʼ griegu apóstolos, ni zeeda de ti diidxaʼ ni riníʼ «guseendacabe tuuxa». Despué, dxi mayaca guzulú primé neza binni ridagulisaa de dxiqué, ca apóstol que bizulú biiyacaʼ guiráʼ dxiiñaʼ ni raca ndaaniʼ neza binni ridagulisaa que (Hech. 1:20-26).
8, 9. 1) Xi dxiiñaʼ gudixhe ique ca doce apóstol que gúnicaʼ dede dxi guca Pentecostés que. 2) Tu ca hombre gucuaa caadxi dxiiñaʼ nabé risaca.
8 Xi dxiiñaʼ jma gudixhe ique ca apóstol que gúnicaʼ. Para gánnanu xi dxiiñaʼ ca la? guidúʼyanu xi bizaaca gudiʼdiʼ si saa stiʼ Pentecostés que. Biblia ruzeeteʼ de ti guendanagana gupa ca xpinni Cristu, purtiʼ cadi jneza modo caguiizicaʼ guendaró para ca viuda que. Ngue runi, gupa xidé gulidxi ca apóstol que laacabe ne gúdxicaʼ laacabe: «Cadi jneza usaana du de güi du stiidxa Dios para iduʼya du guiaazi ni caquiiñe irá ca binni riʼ» (biindaʼ Hechos 6:1-6). Óraque gulícabe caadxi xpinni Cristu ni napa ca guenda ni canabaʼ Dios para biʼniʼ ca dxiiñaʼ que. Ca apóstol que bíʼnicaʼ zaqué ti jma ganda guiniʼnécabe binni de stiidxaʼ Dios. Ne guluu Dios ndaayaʼ laacabe pur ni gudixhe íquecabe gúnicabe que purtiʼ «ca dxi que jma rusi careeche stiidxa Cristu, ne cadale cani runi cre ndaani guidxi Jerusalén» (Hech. 6:7). Casi maʼ bidúʼyanu, ca apóstol que nga gucuaacaʼ dxiiñaʼ de gusiidicaʼ stiidxaʼ Dios ndaaniʼ neza binni ridagulisaa que (Hech. 2:42).
9 Despué bidiicabe caadxi dxiiñaʼ nabé risaca guni xcaadxi xpinni Cristu. Guidúʼyanu ejemplu stiʼ Pablu ne Bernabé. Espíritu santu gucané neza binni ridagulisaa ni nuu Antioquía para guseendaʼ laacabe de misioneru. Ne neca qué ñuucabe lade ca doce apóstol que peru laaca binibiáʼcabe laacaʼ casi apóstol (Hech. 13:1-3; 14:14; Gál. 1:19). Grupu ni Zaniruʼ ni nuu Jerusalén que, guníʼ gácacabe apóstol (Gál. 2:7-10). Qué nindaa de ngue gucané espíritu santu Pablu gucaa primé carta stiʼ ne zaqué gunda bisiidibe binni de Dios.
10. Ñee guiráʼ cani bibí pur espíritu ni bibani lu primé siglu que bidiicaʼ ni caquiiñeʼ neza binni ridagulisaa que la? Bisiene xiñee cacábiluʼ zacá.
10 Peru, ñee guiráʼ ca xpinni Cristu ni bibí que nga biiyacaʼ ximodo bireeche diidxaʼ ne bidiicaʼ ni caquiiñeʼ ca xpinni Dios la? Coʼ. Apóstol Pablu bicaa sicaríʼ: «Cadi irá xpinni Cristu naca apóstol ne laca cadi irá ruiʼ né binni ni gabi Dios laa, ne cadi irá rusiidiʼ, ne cadi irá runi milagru» (1 Cor. 12:29). Neca guiráʼ ca xpinni Cristu ni bibí pur espíritu que nga bicheechecaʼ diidxaʼ, xhono si de laacabe bicaa veintisiete libru stiʼ Biblia ni gucuá lu diidxaʼ griegu.
Tuu nga mozo ca yanna riʼ
11. Xii nga guiráʼ ni naquiiñeʼ gapa mozo ca.
11 Ca diidxaʼ guníʼ Jesús ni cá lu Mateo 24:45 ca cusiene chaahuiʼ cani ziuu ti mozo ni nuu xpiaaniʼ ne ni runi jneza lu ca últimu dxi riʼ. Apocalipsis 12:17 cuzeeteʼ grupu riʼ nga xcaadxi ni riaana de cani za de gunaa que. Grupu riʼ gucuaa ti dxiiñaʼ de guʼyaʼ guiráʼ ni napa Cristu lu Guidxilayú riʼ. Xii nga guiráʼ ni naquiiñeʼ gapa mayordomo ca yaʼ. Naquiiñeʼ gápabe guiráʼ ca binni ni chiguni mandar Reinu stiʼ Dios lu Guidxilayú riʼ, ne guiráʼ ca yoo Betel ni riquiiñeʼ para guireeche diidxaʼ.
12, 13. Ximodo zanda ganna ti xpinni Cristu pa maʼ bibí para cheʼ guibáʼ.
12 Ximodo zanda ganna ti xpinni Cristu pa bibí para cheʼ guibáʼ ne naca tobi de cani nuu lade xcaadxi de cani naca Israel stiʼ Dios yaʼ. Guidúʼyanu xi gudxi Pablu xcaadxi xpinni Cristu ni bibí para cheʼ guibáʼ cásica laabe: «Irá cani runi ni na Espíritu sti Dios, ca ngue nga xiiñi Dios. Cadi zácaxa tu ma biʼni be laatu esclavu para idxibi ru tu laabe, sínuque ma biʼni be laatu xiiñi be. Ne rabi Espíritu stibe laanu gabi nu laabe Bixhoze nu. Ne zaqué rusiene Espíritu stibe espíritu stinu ma xiiñi be laanu. Ne pa xiiñi be laanu la? laca zacaa nu de lú ni udii be ca xiiñi be. Ne pa chuʼ né nu Cristu tobi si lu enda naná stiʼ, laca zasaca né nu laa ne zacaa né nu laa de lu ni udii Dios laa» (Rom. 8:14-17).
13 Ni na textu riʼ nga ca binni ni zeeda gaca Israel stiʼ Dios bibícabe pur espíritu santu ne «ulee chu Dios [laacabe] para laa» (Heb. 3:1). Jiobá peʼ nga guleechú laacabe para laa. Ne nagueendaca rinácabe gácacabe xiiñiʼ Dios, runi crécabe dxandíʼ maʼ guleechú Dios laacabe para laa ne qué ridxíbicabe (biindaʼ 1 Juan 2:20, 21). Nga rusihuinni cadi laadícabe nga riníʼcabe pa ziécabe guibáʼ, sínuque Jiobá nga ribí laacabe ne espíritu santu stiʼ (2 Cor. 1:21, 22; 1 Ped. 1:3, 4).
Ximodo naquiiñeʼ guidúʼyanu ca binni gulí Dios
14. Ximodo naquiiñeʼ guʼyaʼ cani bibí para cheʼ guibáʼ premiu ni chiguicaacaʼ.
14 Ximodo naquiiñeʼ guʼyaʼ cani bibí para cheʼ guibáʼ premiu ni chiguicaacaʼ yaʼ. Laacabe nánnacabe neca maʼ gucuaacabe invitación sicarú riʼ, peru ti invitación si nga laani. Ne laaca nánnacabe para guicaacabe premiu riʼ cadi naquiiñeʼ gucheenécabe Dios dede ora gáticabe. Ne cumu qué rudxiibacabe laacabe la? runi stícabe ca diidxaʼ guníʼ Pablu riʼ: «Hermanu caʼ, cadi rabe diaʼ ma bigaanda irá nga, peru ni rune la? rusiaanda irá ni ma udiʼdiʼ, ne rudxiee luaʼ ni cabeza naa neza ziaaʼ, ti ganda chindaya icaa premiu ni naguixhe Dios ibáʼ para cani nuu né Cristu Jesús tobi si» (Fili. 3:13, 14). Xcaadxi de ca xpinni Cristu ni bibí ca naquiiñeʼ gúnicaʼ stipa para sacaʼ jneza, cadi gudxiibacaʼ laacaʼ ne guidxíbicaʼ Dios (Efe. 4:1, 2; Fili. 2:12; 1 Tes. 2:12).
15. Xi naquiiñeʼ gúninu ora guidúʼyanu gó ti xpinni Cristu pan ne gueʼ vinu dxi rietenaláʼdxinu guendaguti stiʼ Jesús, ne xi naquiiñeʼ guiníʼ ique cani bibí ca de laacaʼ.
15 Xi naquiiñeʼ gúninu ora guiníʼ ti xpinni Cristu gulí Dios laa para cheʼ guibáʼ ne guzulú gó pan ne gueʼ vinu dxi rietenaláʼdxinu guendaguti stiʼ Jesús. Guirutiʼ naquiiñeʼ guiníʼ xiñee cayúnibe ni, purtiʼ laasibe ne Jiobá nga nánnacabe ni (Rom. 14:12). Ca xpinni Cristu ni dxandíʼ maʼ bibí pur espíritu la? qué ribezadícabe guni binni jma pur laacabe que pur xcaadxi. Qué riníʼ íquecabe purtiʼ si maʼ gulí Dios laacabe riénecabe jma de lu stiidxaʼ Dios que xcaadxi xpinni Cristu ni maʼ xadxí nuu ndaaniʼ xquidxi Dios ni chiguibani lu Guidxilayú riʼ (Apo. 7:9). Ne laaca qué runi crécabe jma nápacabe espíritu santu que cani zeeda gaca casi «xcaadxi dendxu» (Juan 10:16). Qué ribézacabe gusisaca binni laacabe jma, ne qué riníʼ íquecabe jma risaca ni riníʼcabe que ni riníʼ ca binnigola ni nuu ndaaniʼ neza binni ridagulisaa purtiʼ si rócabe pan ne réʼcabe vinu.
16-18. 1) Ñee guiráʼ xixé cani bibí ca riguíxhecaʼ ximodo naquiiñeʼ guiénenu xiixa ni zeeda lu Biblia la? Bizeeteʼ ti ejemplu ni gusiene ni. 2) Xiñee cadi naquiiñeʼ gabi Grupu ni Zaniruʼ ca guiráʼ cani bibí xi cá íquecaʼ gaca.
16 Ñee guiráʼ xixé cani bibí ca riguíxhecaʼ ximodo naquiiñeʼ guiénenu xiixa ni zeeda lu Biblia la? Coʼ. Nécapeʼ mozo ni nuu xpiaaniʼ ca nga rusiidiʼ guiráʼ ca xpinni Cristu ni bibí pur espíritu, cada tobi de laacabe gadxé gadxé dxiiñaʼ rúnicabe (biindaʼ 1 Corintios 12:14-18). Casi maʼ bidúʼyanu ca, guiráʼ xpinni Cristu ni bibani lu primé siglu que bicheechecaʼ diidxaʼ, peru chupa chonna si de laacaʼ bicaacaʼ ca libru ni zeeda lu Biblia ne biiyacaʼ ximodo guca dxiiñaʼ ndaaniʼ neza binni ridagulisaa que.
17 Guzéʼtenu ti ejemplu para ganda guiénenu ni. Nuu tiru rieeteʼ lu Biblia naquiiñeʼ guni juzgar «irá ca hermanu» (Mat. 18:17). Peru, ni dxandíʼ la? ca binnigola ni riníʼ pur neza binni ridagulisaa ca nga ni runi juzgar. Qué rinabadiidxacabe cada tobi de cani rucheeche diidxaʼ para gúʼyacabe ximodo riníʼ íquecaʼ de xiixa ni naquiiñeʼ gaca. Laacabe rúnicabe dxiiñaʼ ni gucuaacabe ne intiica quíxhecabe gaca casi ñaca «irá ca hermanu» o ca binni ridagulisaa ca nga chiguni ni.
18 Cásica ejemplu ni bidúʼyanu ca, chupa chonna si de ca hombre ni bibí pur espíritu santu ca nga riníʼ pur mozo ca. Ne laacabe nga Grupu ni Zaniruʼ lade ca Testigu stiʼ Jiobá. Ca hombre riʼ nga cayuuyacaʼ ximodo cayaca xhiiñaʼ Reinu ne riguíxhecabe ximodo guiziidiʼ binni de Dios. Cásica guca lu primé siglu que, Grupu ni Zaniruʼ ni nuu yanna riʼ qué rinabadiidxacaʼ cada tobi de cani bibí ca ante guiniʼcaʼ xi naquiiñeʼ gaca (biindaʼ Hechos 16:4, 5). Peru guiráʼ cani bibí pur espíritu cayúnicaʼ ti dxiiñaʼ nabé risaca: cayanecaʼ guilá binni. Mozo ni nuu xpiaaniʼ ne ni runi jneza ca zeeda gaca casi ti cuerpu, nga runi gadxé gadxé dxiiñaʼ runi cada tobi de laacaʼ (1 Cor. 12:19-26).
19, 20. Ximodo naquiiñeʼ guʼyaʼ ca binni ni chiguibani lu Guidxilayú riʼ «mozo ni nuu xpiaaniʼ ne ni runi jneza» ne Grupu ni Zaniruʼ ni riníʼ pur laabe.
19 Ximodo naquiiñeʼ guʼyaʼ guiráʼ binni ni chiguibani ndaaniʼ Guidxilayú tema riʼ yaʼ. Ca xpinni Cristu, ni zeeda lade guiráʼ ni napa Jesús lu Guidxilayú riʼ, ne stale gana racanecaʼ Grupu ni Zaniruʼ, ni riníʼ pur «mozo ni nuu xpiaaniʼ ne ni runi jneza». Rudiicabe xquíxepeʼ pur guiráʼ ni rusiidiʼ Grupu ni Zaniruʼ ca laacabe. Ne neca runi respetárcabe mozo ca, riuucabe cuidadu para cadi gusisácabe tuuxa ni na naca de cani bibí pur espíritu. Nin ti xpinni Cristu ni dxandíʼ gulí Dios laa pur espíritu santu qué ribeza gúnicabe laa zacá (Hech. 10:25, 26; 14:14, 15).
20 Cásica pa nácanu de ca binni ni bibí pur espíritu santu o nácanu de ca binni ni chiguibani lu Guidxilayú riʼ, naquiiñeʼ quixhe íquenu gacanenu mayordomo ni runi jneza ne ni riníʼ pur laabe: Grupu ni Zaniruʼ ca. Cadi gusaana de gatananu ne cadi gusaana de gúninu ni na Jiobá dede ora guinitilú guidxilayú malu riʼ (Mat. 24:13, 42).
Nánnaluʼ xi guicábiluʼ la?
• Tuu nga «mozo ni nuu xpiaaniʼ ne ni runi jneza», ne tuu nga zeeda gaca «irá xpinni».
• Ximodo zanda ganna ti xpinni Cristu maʼ guleechú Dios laa para cheʼ guibáʼ.
• Tuu nga riguixhe modo guiziidiʼ binni de Dios.
• Xi naquiiñeʼ guiníʼ ique cani bibí ca de laacaʼ.
[Ca dibuju/foto ni zeeda lu yaza 23]
Cásica lu primé siglu que, Grupu ni Zaniruʼ ni nuu yanna riʼ riníʼ pur mozo ni nuu xpiaaniʼ ne ni runi jneza