Guzúʼbanu stiidxaʼ Cristu ne stiidxaʼ mozo ni nuu xpiaaniʼ

«Zusaana né xpixuaana be laabe irá ni napa.» (MATEO 24:45-47.)

1, 2. 1) Tuu nga na Stiidxaʼ Dios naca Xaíque stinu. 2) Ximodo nánnanu Cristu nga ni riníʼ xi guni ca binni ridagulisaa.

TI BIAJE guníʼ Jesús sicaríʼ: «Cadi chuʼlaʼdxi tu guni cabe laatu xaíque purti tobi si nga xaíque stitu, ne laa nga Cristu» (Mateo 23:10). Ne ca diidxaʼ riʼ bisiene Jesús ca discípulo stiʼ cadi naquiiñeʼ gápacaʼ ti xaíque lu Guidxilayú riʼ. Xaíque si ni gápacabe nga Jesucristu, purtiʼ laa nga ni gulí Dios para gaca Xaíque. Ya, Jiobá «undisa be Cristu de lade gueʼtuʼ [...] ne biʼni laabe xaíque sti ca xpinni be. Ca xpinni be zeda gaca casi cuerpu stibe» (Efesios 1:20-23).

² Cumu Jesús nga «xaíque sti irá xixé» neza binni ridagulisaa la? nga runi riniʼbe xi naquiiñeʼ gúnicaʼ ne nanna dxíchibe xi cayaca ládecaʼ. Laabe cayuuyaʼ chaahuibe pa jneza cayuni adorar ca neza binni ridagulisaa Dios. Lu visión gucuaa Juan ra ziluxe primé siglu que zeeda gusiene chaahuiʼ ni guninu riʼ. Luni cayeeteʼ guniʼné Jesús gadxe neza binni ridagulisaa ne gaayuʼ biaje gúdxibe laacaʼ nánnabe xi guiráʼ rúnicaʼ ne xi qué rúnicaʼ, nga runi nuu biaje guluube gana laacaʼ ne nuu biaje bidiibe conseju laacaʼ (Apocalipsis 2:2, 9, 13, 19; 3:1, 8, 15). Ne nánnanu laaca gunna dxichi Jesús modo biʼniʼ adorar xcaadxi neza binni ridagulisaa que Dios, casi cani guyuu Asia Menor, Palestina, Siria, Babilonia, Grecia, Italia o cani guyuu sti lugar (Hechos 1:8). Ñee laaca nánnabe ximodo nuu ca xpínnibe yanna riʼ la?

Ti mozo ni nuu xpiaaniʼ

3. Xiñee biáʼsipeʼ nga bichaaga Pablu neza binni ridagulisaa ca ti cuerpu ne ique ca Cristu.

³ Biasa si Jesús de lade gueʼtuʼ ne caadxi dxi ante chebe guibáʼ para chúʼnebe Bixhózebe raqué la? guniʼbe: «Irá xixé ni nuu ibáʼ ne ni nuu guidxilayú ma nexhe ladxi nayaʼ». De raqué guniʼbe: «Ne ganna ca tu qué ziuu dxi ixele de laatu dede dxi iluxe guidxilayú» (Mateo 28:18-20). Qué zaxélebe de laacaʼ purtiʼ laabe nga culuiʼbe laacaʼ ximodo gúnicaʼ xhiiñacaʼ. Lu ca carta ni bicaa apóstol Pablu ra nuu ca xpinni Cristu de Éfeso ne Colosas la? bichaagabe ca neza binni ridagulisaa casi ti «cuerpu», ne ique stini nga Cristu (Efesios 1:22, 23; Colosenses 1:18). Ejemplu riʼ «cusihuinni cadi guiʼdiʼ si ique ca lu cuerpu ca, sínuque ique ca nga riníʼ xi guni cuerpu ca, purtiʼ cuerpu ca nga ni riquiiñeni para gúnini xiixa» (The Cambridge Bible for Schools and colleges). Yanna, xi grupu nga caquiiñeʼ Cristu para guni ni na dede dxi gucuaa derechu guni mandar lu Reinu stiʼ Dios lu iza 1914 que yaʼ (Daniel 7:13, 14).

4. Ximodo bidxela Jiobá ne Jesús yuʼduʼ stiʼ ora biʼniʼ juzgarcaʼ ni, casi na ca diidxaʼ riguixhená stiʼ Malaquías.

⁴ Malaquías maca guníʼ zeeda guuyaʼ ne zuni juzgar Jiobá ndaaniʼ yuʼduʼ stiʼ ra runi adorárcabe laa, ne zeedanebe «ni rizané diidxaʼ stiʼ pactu» (Jesucristu, Xiiñibe ni nacubi gurí lu trono stiʼ). Guiráʼ ni huayaca ca cusihuínnicani guca juzgar primé cani nuu ndaaniʼ lidxi Dios lu iza 1918 (Malaquías 3:1; 1 Pedro 4:17).a Zacá nga guca juzgar guiráʼ cani na xpinni Dios laa ne na cayuni adorar laabe jneza lu Guidxilayú riʼ. Guiráʼ ca yuʼduʼ ca bicaanáʼ Cristu laacaʼ purtiʼ maʼ zinecaʼ gayuaa iza de cusiidicaʼ stale cosa ni cadi dxandíʼ de Dios, ne purtiʼ laacaʼ nga jma biiticaʼ binni lu primé Guendaridinde ni guca lu guidubi naca Guidxilayú riʼ. Peru, xcaadxi de ca xpinni Cristu ni bibí pur espíritu santu ni nabani ca dxi que la? biacaʼ casi riá oro ora gaca fundir lu guí dxi gudíʼdicabe lu stale guendanagana, ne guyuulaʼdxiʼ Jiobá modo cayuni adorárcabe laa. Laacabe beeda gácacabe para Jiobá binni ni cayuni ni jneza zacá nga casi ñaca nudiicabe laabe ti ofrenda (Malaquías 3:3).

5. Tuu nga mozo ni nuu xpiaaniʼ ni maca guníʼ Jesús ziuu ora guibiguétabe sti biaje.

⁵ Ca discípulo stiʼ Jesús que gúdxicaʼ laabe: «Padxí nga nouʼ gaca irá ni guʼdxu laadu que. Ne xi seña ihuinni dxi mayaca gueedu». Jesús bidii laacabe ti señal ra zahuinni stale cosa ni zacané laacabe gánnacabe ora maʼ gácacani. Tobi de cani zeeda lu señal ca culuíʼ zahuinni ti «mozo» casi cuzeeteʼ ca diidxaʼ riguixhená stiʼ Malaquías ni. Jesús guníʼ: «Uná nga mozo ni zanda gusaana xpixuaana laa guʼya irá xpinni ne gudii ni iquiiñe cabe yaʼ. Ti mozo ni nuu xpiaani ne ni runi jneza. Dichoso de mozo que pa cayuni zacá ora gueeda xpixuaanaʼ. Gabe caʼ laatu zusaana né xpixuaana be laabe irá ni napa» (Mateo 24:3, 45-47). Lu iza 1918, ora beeda Cristu para guʼyaʼ xi cayuni «mozo» que, xi bidxélabe ora beedandabe yaʼ. Bidxélabe caadxi de cani bibí pur espíritu santu, ne cani bibí riʼ caquiiñecaʼ dede 1879 revista riʼ ne xcaadxi libru ni cusiene ni na Biblia para gusiidicaʼ binni de Dios órapeʼ caquiiñecaʼ ni, casi bisaana Jesús gácani. Ngue runi nabe laacaʼ nga «mozo» stibe, o ni chigusaananebe laa xiixa, ne lu iza 1919 bisaanabe lu naʼ guiráʼ ni nápabe lu Guidxilayú riʼ.

Ni caguixhe ximodo iquiiñeʼ cani napa Cristu lu Guidxilayú riʼ

6, 7. 1) Xi sti lá bidii Jesús «mozo» ni nuu xpiaaniʼ que. 2) Xiñee biáʼsipeʼ nga iquiiñeʼ Jesús diidxaʼ «mayordomo».

⁶ Chupa chonna beeu ante guiníʼ Jesús de señal ni gusihuinni ora gueedabe, ra cayeeteʼ de mozo ni chiguiquiiñebe lu Guidxilayú riʼ la? laabe maruʼ bizeetebe de mozo ca ne biquiiñebe sti diidxaʼ ora bizeetebe de laa, ne nga racané laanu guiénenu xi dxiiñaruʼ chiguni mozo riʼ, nabe: «Tuu nga mayordomo nuu xpiaaniʼ, ni runi jneza, ni zusaana xpixuaanaʼ lu naʼ guiráʼ binni runi xhiiñaʼ para gudiibe ni gocaʼ órapeʼ caquiiñeʼ cani yaʼ. Dxandipeʼ cayabeʼ laatu: Zusaanaʼ lu nabe guiráʼ ni napaʼ» (Lucas 12:42, 44, NM).

⁷ Textu ca cuzeeteni de mozo riʼ casi «mayordomo», lu diidxaʼ griegu biquiiñecabe diidxaʼ riʼ para ti «binni ni rusaanacabe lu naʼ ti yoo o ti ranchu roʼ». Nga runi, ca binni ni zeeda gaca casi mayordomo stiʼ Cristu riʼ cadi nacadícabe ti grupu de binni ni ruundaʼ si Biblia para gusiene ca cosa si ni jma risaca zeeda luni. Coʼ, purtiʼ aparte de gudiicabe revista ne libru ni cusiene jma de Stiidxaʼ Dios ti gacanécabe laacaʼ órapeʼ caquiiñecaʼ la? laaca cayápacabe guiráʼ neza binni ridagulisaa ne cayuuyacabe ximodo iquiiñeʼ guiráʼ ni napa Cristu lu Guidxilayú riʼ. Xii nga guiráʼ napa Cristu lu Guidxilayú riʼ yaʼ.

8, 9. Xii nga «guiráʼ ni napa» Cristu ni cayapa mozo ni nuu xpiaaniʼ ca.

⁸ Tobi de cani runi mozo riʼ nga guʼyaʼ xi cayaca ra runi ca testigu stiʼ Jiobá dxiiñaʼ lu guidubi naca Guidxilayú casi, ca oficina stícabe, yoo ra raca ca libru ne ca revista, ne ca yoo ra runi adorárcabe Dios casi Yoo stiʼ Reinu ne Yoo ra raca ca guendaridagulisaa roʼ ca. Ne nuu sti cosa ni jma risaca runi mozo riʼ, ruuyabe xi guiuundaʼ lu ca guendaridagulisaa ni raca guiráʼ semana ne lu ca guendaridagulisaa roʼ ca ti iguidxi fe stiʼ ca xpinni Cristu. Lu ca guendaridagulisaa ca rieeteʼ ximodo cayaca ni na ca diidxaʼ riguixhená zeeda lu Biblia ca dxi stinu riʼ, ne racá rizíʼdinu ximodo chinándanu ca conseju stini lu xquendanabáninu.

⁹ Sti dxiiñaʼ ni napa mozo riʼ nga guʼyaʼ guireeche ca diidxaʼ nacubi ne galán stiʼ Reinu ne gusiidicaʼ binni ni nabeza ndaaniʼ guiráʼ xixé guidxi para gácacaʼ discípulo sti Cristu. Para gaca nga naquiiñeʼ gusiidicabe ca binni ca gúnicaʼ guiráʼ ni cayuni mandar Cristu, Xaíque stiʼ ca neza binni ridagulisaa, ne naquiiñeʼ gácani yanna lu ca últimu dxi riʼ (Mateo 24:14; 28:19, 20; Apocalipsis 12:17). Pur dxiiñaʼ ni cayaca riʼ la? cadale jma binni ni cuzuubaʼ diidxaʼ cásica cayuni xcaadxi de ca xpinni Cristu ni bibí pur espíritu santu. Ca binni ni cadale riʼ zeeda gácacaʼ «ca cosa ni jma risaca stiʼ ca guidxi ca», ne laaca nuucabe lade «guiráʼ ni napa» Cristu ni cayapa mozo ni nuu xpiaaniʼ ca lu Guidxilayú riʼ (Apocalipsis 7:9; Ageo 2:7).

Grupu ni zaniruʼ ca riníʼ pur mozo ni nuu xpiaaniʼ

10. Xi grupu nga ni gudixhe xi gaca lu primé siglu que, ne ximodo riuu ca neza binni ridagulisaa que ora gunadiágacaʼ ni guiníʼcabe gaca.

¹⁰ Casi maʼ bidúʼyanu ca, stale dxiiñaʼ nga napa mozo ca para guni, nga runi laabe nga riniʼbe ximodo guni xquidxi Dios dxiiñaʼ. Lu primé siglu que la? ca apóstol ne ca binnigola de guidxi Jerusalén que nga cani guníʼ xi naquiiñeʼ guni guiráʼ ca xpinni Cristu, zaqué nga beeda gácacabe grupu ni guníʼ pur mozo que (Hechos 15:1, 2). Ora riguixhe grupu que gaca xiixa la? ruseendacabe carta ra nuu ca neza binni ridagulisaa para gánnacaʼ de laani ne laaca ruseendacabe ca binnigola ni riganna laacaʼ ti guiniʼcaʼ ni. Ca xpinni Cristu que guizáʼ riéchecaʼ ora gunadiágacaʼ guiráʼ ni riguixhe grupu que gaca, ne ora guirácabe gúnicabe cani de guidubi ladxidóʼcabe la? riuucabe tobi si ne qué ridíndecabe (Hechos 15:22-31; 16:4, 5; Filipenses 2:2).

11. Xi grupu nga riquiiñeʼ Cristu yanna riʼ para gacané ca neza binni ridagulisaa stiʼ, ne xi naquiiñeʼ gúninu ora quíxhecabe gaca xiixa.

¹¹ Cásica dxiqué la? yanna riʼ laaca puru binnigola ni bibí pur espíritu santu nga cani nuu lu Grupu ni Zaniruʼ stiʼ ca xpinni Cristu ni nuu lu Guidxilayú riʼ. Cristu, Xaíque stiʼ guiráʼ ca neza binni ridagulisaa, caquiiñebe «ná be ladu derechu», ni zeeda gaca stipa stibe para gacanebe ca hombre ni ruuyaʼ ximodo gaca dxiiñaʼ stiʼ Reinu (Apocalipsis 1:16, 20). Albert Schroeder, tobi de cani guyuu xadxí lade Grupu ni Zaniruʼ ca, bicaa de grupu riʼ ante guiluxe xhiiñaʼ lu Guidxilayú riʼ, nabe: «Ridagulisaa Grupu riʼ guiráʼ miércoles ne ruzulunécabe ti oración para guinábacabe gacané espíritu stiʼ Jiobá laacabe. Guizáʼ rúnicabe stipa pur gúnicabe cásipeʼ modo na Biblia ora guiníʼcabe de xiixa tema ne ora quíxhecabe gaca xiixa».b Naquiiñeʼ guni crenu zacané ca xpinni Cristu ni bibí pur espíritu riʼ laanu. Cumu laacabe nga zanírucabe la? nga runi naquiiñeʼ chinándanu conseju bidii apóstol Pablu riʼ: «Lauzuuba stiidxa cani nuu de xaíque stitu. Laguni ni gabi ca laatu purti qué rixhacalaʼdxi ca de gapa ca laatu» (Hebreos 13:17).

Gápanu respetu mozo ni nuu xpiaaniʼ

12, 13. Xi razón nápanu para gápanu respetu mozo ca, casi na Biblia.

¹² Tobi de ca razón nabé risaca para gápanu respetu mozo ni nuu xpiaaniʼ ca nga purtiʼ zacá zusihuínninu nápanu respetu Xaíque stícabe, Jesucristu. Pablu bicaa ca diidxaʼ riʼ para ca xpinni Cristu ni bibí pur espíritu santu: «Ne cani cadi naca esclavu dxi uníʼ né be laa la? ma naca esclavu stibe. Ma uzíʼ Dios laatu, ne naroʼba gudixe be saca tu» (1 Corintios 7:22, 23; Efesios 6:6). Nga runi, ora laanu cuzúʼbanu stiidxaʼ mozo ni nuu xpiaaniʼ ca ne Grupu ni Zaniruʼ stiʼ la? laaca cuzúʼbanu stiidxaʼ Cristu, Xaíque stiʼ mozo ca. Dxandíʼ, ora runi respetarnu ca binni ni riquiiñeʼ Cristu para quixhe ximodo iquiiñeʼ cani napa lu Guidxilayú riʼ la? cusihuínninu «nezalú iráʼ: “Jesucristu nga Señor”, ne zacá usisaca ca Dios Bixhoze be» (Filipenses 2:11).

¹³ Nuu sti razón para gápanu respetu cani bibí pur espíritu santu ni nabani lu Guidxilayú riʼ. Biblia na zeeda gácacabe casi «yuʼduʼ» ra nabeza Jiobá purtiʼ nuu «espíritu» stiʼ luguiácabe, nga runi, «ma ulee chu Dios yuʼdu ca para laa» (1 Corintios 3:16, 17; Efesios 2:19-22). Jesús maʼ bisaana lu naʼ mozo ni zeeda gaca casi yuʼduʼ ca guiráʼ ni napa lu Guidxilayú riʼ. Nga runi caadxi de ca dxiiñaʼ ni raca lade ca binni ridagulisaa la? mozo si ca nga zanda gúnicaʼ ni. Pur nga guiranu naquiiñeʼ guzúʼbanu stiidxaʼ mozo ca ne Grupu ni Zaniruʼ stiʼ, purtiʼ zacá nga cuzúʼbanu stiidxaʼ Dios. Risácapeʼ nga para «xcaadxi dendxu» ca guniné laacabe xhiiñaʼ Jesús, Xaíque stícabe (Juan 10:16).

Cadi gusaana de gacanenu cani bibí pur espíritu

14. Casi guníʼ Isaías que, ximodo nga zinanda xcaadxi dendxuʼ ca mozo ni nuu xpiaaniʼ ca, ne xiñee riétecabe casi ni dxiiñaʼ ne qué riaxa.

¹⁴ Isaías maca bizeeteʼ lu ca diidxaʼ riguixhená stiʼ zuzuubaʼ xcaadxi dendxuʼ que stiidxaʼ cani bibí pur espíritu, ni zeeda gaca «Israel stiʼ Dios» ca, laabe guniʼbe: «Ndiʼ nga ni maʼ guníʼ Jiobá: “Cani runi dxiiñaʼ ne qué riáxacaʼ de guidxi Egipto ne cani rutoo de Etiopía ne ca sabeu, ca hombre nasoo ca, zaree chúcabe para lii, ne zaca stiluʼ laacabe. Zinándacabe lii; nuucabe cadena, ne zuzuxíbicabe nezaluluʼ. Zuni orárcabe lii ne zaníʼcabe: «Dxandipeʼ nuuné Dios lii, guirútiruʼ stobi nuu, gastiʼ sti Dios»”» (Isaías 45:14). Ximodo nga zinanda xcaadxi dendxuʼ ca mozo ca ne Grupu ni Zaniruʼ ca yaʼ. Rúnicabe ni ora gúnicabe guiráʼ ni quíxhecaʼ gaca. Yanna, xiñee riétecabe casi ni runi dxiiñaʼ ne qué riaxa yaʼ. Riétecabe zacá purtiʼ rudiicabe guiráʼ stipa stícabe ne guiráʼ ni ganda para gúnicabe dxiiñaʼ ni bisaanané Cristu ca xpinni ni bibí pur espíritu sin guiáxacabe (Hechos 1:8; Apocalipsis 12:17).

15. Xiná Isaías 61:5, 6 cayuni xcaadxi dendxuʼ ca.

¹⁵ Mozo ni nuu xpiaaniʼ ca ne Grupu ni Zaniruʼ nga caguíxhecaʼ dxiiñaʼ ni cayuni xcaadxi dendxuʼ ca, ne guizáʼ nayecheʼ nuu ca dendxuʼ ca purtiʼ zacá nga cayúnicabe ni na Jiobá ne rudiicabe xquíxepeʼ laabe. Nánnacabe cani bibí pur espíritu ca nga cani zeeda gaca «Israel stiʼ Dios» (Gálatas 6:16). Xcaadxi dendxuʼ ca zeeda gácacaʼ casi «binni de sti guidxi» ne casi «dxuʼ» ni cayacané Israel stiʼ Dios. Guizáʼ nayecheʼ rúnicabe dxiiñaʼ casi binni ni runi dxiiñaʼ lu layú ne rudxiibaʼ uva, ne rúnicabe ni modo na ca xpinni Cristu ni bibí pur espíritu santu, ni nácacaʼ «cani ruzaaquiʼ guʼxhuʼ stiʼ Jiobá» ne «cani runi xhiiñaʼ Dios» (Isaías 61:5, 6). Qué rireecabe gana gucheechecabe stiidxaʼ Reinu ne gusiidicabe binni de guiráʼ guidxi para gácacaʼ xpinni Cristu. Laacabe racanécabe mozo ca para guiaapaʼ ca dendxuʼ cubi ca ne gápacaʼ ni caquiiñecaʼ.

16. Xi rucaa xcaadxi dendxuʼ ca gacanecaʼ ne guzuubacaʼ stiidxaʼ mozo ni nuu xpiaaniʼ ne ni runi jneza.

¹⁶ Xcaadxi dendxuʼ ca nánnacaʼ pabiáʼ racané guiráʼ ni rusiidiʼ mozo ca laacaʼ, purtiʼ laacaʼ rudiicaʼ ni iquiiñecabe órapeʼ caquiiñecabe ni. Laaca nánnacabe pa ñaca qué ñuu mozo ca la? qué ñánnacabe gastiʼ de cani rusiidiʼ Biblia, casi pa napa Jiobá derechu de guni mandar, pabiáʼ naquiiñeʼ guisaca labe, xii nga Reinu stibe, xii nga guibáʼ cubi ne guidxilayú cubi, xii nga alma, ximodo nuu ca gueʼtuʼ ca, tupeʼ nga Jiobá, tuu nga Xiiñiʼ ne espíritu santu. Gánnacabe guiráʼ nga rucaa laacabe gudiicabe xquíxepeʼ Jiobá, guzuubacabe diidxaʼ ne gacanécabe ca biʼchiʼ Cristu ni bibí pur espíritu santu ni nabani lu Guidxilayú riʼ lu ca últimu dxi riʼ (Mateo 25:40).

17. Xi cayuni Grupu ni Zaniruʼ ca ra maʼ zixiéʼ ca xpinni Cristu ni bibí ca, ne xi chiguizíʼdinu lu sti tema ca.

¹⁷ Cumu zeʼ dxi jma zixiéʼ ca xpinni Cristu ni bibí pur espíritu santu ca la? qué zanda diʼ chúʼcabe lade guiráʼ neza binni ridagulisaa ca para gúʼyacabe ximodo iquiiñeʼ guiráʼ ni napa Cristu lu Guidxilayú riʼ. Nga runi Grupu ni Zaniruʼ ca ribí hombre de lade xcaadxi dendxuʼ ca para guʼyaʼ dxiiñaʼ ni raca lade ca neza binni ridagulisaa stiʼ ca testigu stiʼ Jiobá. Ora guzúʼbanu stiidxaʼ ca pastor riʼ, ñee laaca cuzúʼbanu stiidxaʼ Cristu ne mozo ni nuu xpiaaniʼ stibe ca la? Lu sti tema ca zazíʼdinu de laani.

[Cani cá ñee yaza]

Xi guicábiluʼ

• Tuu nga Xaíque stinu, ne xi rusihuinni nánnabe xi cayaca lade ca neza binni ridagulisaa.

• Ra guca juzgar yuʼduʼ que, tuu ngue bihuinni dxandíʼ cayuni dxiiñaʼ casi ti mozo ni nuu xpiaaniʼ, ne xi guiráʼ biaana lu nacaʼ gápacaʼ.

• Xi razón cudii Biblia laanu para cadi gusaana de gacanenu mozo ni nuu xpiaaniʼ.

[Dibuju/foto ni zeeda lu yaza 23]

Lade guiráʼ ni napa Cristu ndaaniʼ Guidxilayú ni cayapa mayordomo ca, nuu ca cosa ni risaca, cani riquiiñeʼ para guiziidiʼ binni de Dios ne guireeche Stiidxaʼ Dios

[Dibuju/foto ni zeeda lu yaza 25]

Xcaadxi dendxuʼ ca racanecaʼ mozo ca para gucheechecaʼ diidxaʼ ne stale gana