Zinándacabe «Dendxu huiini»
«Ca ngue nga cani [...] canananda ca Dendxu huiini que ladu tiica cheʼ.» (APO. 14:4)
1. Ximodo bisihuinni cani dxandíʼ xpinni Jesús qué ninacaʼ nusaanacaʼ laabe.
MAʼ GUDIʼDIʼ biaʼ chupa iza arondaʼ de bizulú Jesús cucheeche diidxaʼ. «Ora bina diaga cani canazá né laabe ni uníʼ be» ndaaniʼ yuʼduʼ stiʼ guidxi Capernaum que, stale de laacaʼ «ma qué ninanda ru ca laabe». Peru ora gunabadiidxabe ca doce apóstol stibe pa laaca racaláʼdxicaʼ gusaanacaʼ laabe, bicabi Simón Pedru: «Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe. Ma runi cre du ne ma nanna dxichi du lii nga Cristu Xiiñi Dios ni nabani» (Juan 6:48, 59, 60, 66-69). Cani dxandíʼ xpinni Jesús qué ninacaʼ nusaanacaʼ laabe. Ne dxi maʼ gulí Dios laacaʼ pur espíritu santu jmaruʼ si qué ninacaʼ nusaanacaʼ de ninándacaʼ laabe (Hech. 16:7-10).
2. 1) Tuu nga «mozo ni nuu xpiaaniʼ ne ni runi jneza» ne «mayordomo ni runi jneza». 2) Xii nga ca cosa galán ni maʼ biʼniʼ mozo riʼ.
2 Ñee laaca zinanda ca xpinni Cristu ni bibí pur espíritu santu ni nabani ca dxi stinu riʼ Jesús la? Dxi bizeeteʼ Jesús «xi seña ihuinni dxi mayaca gueed[a] ne iluxe guidxilayú», laaca bizeetebe ziuu ti «mozo ni nuu xpiaaniʼ ne ni runi jneza» ne ti «mayordomo ni runi jneza», ne laacaʼ nga zeeda gácacaʼ guiráʼ ca binni ni gulí Dios pur espíritu santu ni nabani lu Guidxilayú riʼ (Mat. 24:3, 45; Luc. 12:42, NM). Guiráʼ ca binni ni zeeda gaca mozo ca rusihuínnicaʼ qué huasaana de chinándacaʼ «Dendxu huiini que ladu tiica cheʼ» (biindaʼ Apocalipsis 14:4, 5). Cada tobi de laacabe nayácabe nezalú Dios purtiʼ qué ninándacabe ni rusiidiʼ «Babilonia, guidxi roʼ», ni zeeda gaca guiráʼ ca religión ni qué rusiidiʼ ni dxandíʼ ne ra qué ñúnicabe guiráʼ ni rúnicaʼ (Apo. 17:5). «Qué ñuu dxi» nusiidicabe ni cadi jneza ne laaca nayácabe ra qué ñúnicabe modo runi ca binni ni nuu ndaaniʼ guidxilayú stiʼ Binidxabaʼ riʼ (Juan 15:19). Ne ca binni ni bibí ni nabani lu Guidxilayú riʼ zinándacaʼ Dendxuʼ huiiniʼ ca guibáʼ (Juan 13:36).
3. Xi razón nápanu para guni crenu zanda gacané mozo ca laanu.
3 Maʼ bisaana Jesús lu naʼ mozo ni nuu xpiaaniʼ ne ni runi jneza ca gudii ni caquiiñeʼ «irá xpinni» o ni caquiiñeʼ cada tobi de laacabe. Peru laaca maʼ bisaanabe lu naʼ mozo ca guiráʼ cani nápabe (Mat. 24:45-47). Lade cani nápabe ca zeeda guiráʼ ca binni ni chiguibani lu Guidxilayú riʼ ni zeeda gaca casi «xcaadxi dendxu» stiʼ Jesús (Apo. 7:9; Juan 10:16). Ñee cadi dxandíʼ galán guni cré cada tobi de cani bibí ne «xcaadxi dendxu» ca zanda gacané mozo ni bisaana Jesús riʼ laacaʼ la? Nuu stale razón para guni crenu zanda gacané mozo ca laanu, peru chiguzéʼtenu chupa si de cani jma risaca: 1) Jiobá nanna dxichi zanda guni mozo ca xhiiñaʼ ne 2) Jesús laaca nanna zanda gápabe cani maʼ bisaana lu nabe. Guidúʼyanu ca razón ni napa Jiobá ne Jesús para guni crecaʼ zanda guni mozo ni nuu xpiaaniʼ ne ni runi jneza ca dxiiñaʼ ni maʼ bisaananécabe laa.
Jiobá nanna dxichi zanda guni mozo ca dxiiñaʼ bisaananebe laa
4. Xiñee zanda guni crenu biáʼsipeʼ nga guiráʼ ni rudii mozo ni nuu xpiaaniʼ ne ni runi jneza ca laanu.
4 Tuu nga racané mozo ni nuu xpiaaniʼ ne ni runi jneza ca para ganda gudii guiráʼ ni gacané laanu órapeʼ caquiiñenu cani yaʼ. Jiobá guníʼ: «Zudiéʼ lii guendariene, ne zusiideʼ lii saluʼ lu neza ni naquiiñeʼ cheluʼ. Dxandipeʼ zudiéʼ conseju lii ne qué zaxhaluáʼ luguialuʼ» (Sal. 32:8). Ca diidxaʼ ca rusihuínnicani Jiobá nga rabi mozo ca xi naquiiñeʼ guni. Nga racané laanu guni crenu jneza modo riquiiñeʼ mozo ca cani zeeda lu Stiidxaʼ Dios para gacanebe laanu, gusiene laanu ne gabi laanu xi caquiiñeʼ gúninu.
5. Xiñee rihuinni dxichi cayacané espíritu stiʼ Dios mozo ni nuu xpiaaniʼ ne ni runi jneza ca.
5 Jiobá laaca rudii espíritu santu stiʼ para gacané mozo ni nuu xpiaaniʼ ne ni runi jneza ca. Neca guirutiʼ zanda guʼyaʼ stipa riʼ, peru zanda gúʼyanu modo racané espíritu ca binni. Guiníʼ íquenu xi huabeendú mozo ca ne dxiiñaʼ ni gucuaa para guiníʼ de Jiobá, Jesús ne de Reinu. Ca xpinni Jiobá cucheechecaʼ diidxaʼ ndaaniʼ jma de chupa gayuaa treinta guidxi ni nuu lu guidubi naca Guidxilayú. Ñee cadi rusihuinni nga cayacané espíritu stiʼ Dios mozo ca la? (Biindaʼ Hechos 1:8.) Grupu riʼ naquiiñeʼ guiníʼ ique chaahuiʼ ora quixhe ique guni xiixa para gudii ni caquiiñeʼ ca xpinni Jiobá ni nuu lu guidubi naca Guidxilayú. Ora gúnicabe zacá rusihuínnicabe nadxiicabe laanu, nadóʼcabe ne laaca rusihuínnicabe xcaadxi guenda ni rudii espíritu santu (Gál. 5:22, 23).
6, 7. Xi zudii Jiobá mozo ca purtiʼ nánnabe qué ziuudxí gucheené laabe.
6 Jiobá nanna qué ziuu dxi gucheené mozo ni nuu xpiaaniʼ ne ni runi jneza ca laa, nga runi maʼ guniʼbe xi chigudiibe cada tobi de laacaʼ. Apóstol Pablu bicaa: «Zaxidxi trompeta que ne óraque zandisa Dios ca gueʼtuʼ, ne ziasa né ca ti cuerpu ni qué ziuʼdxuʼ, ne zuchaa be irá nu. Purti riquiiñe aca cuerpu ni riuʼdxu ne ni rati ri ti cuerpu ni qué zati» (1 Cor. 15:52, 53). Pa ca binni ni bibí riʼ qué gucheenecaʼ Dios dede dxi gáticaʼ la? zusaanacaʼ cuerpu de beela sticaʼ ne zandisaʼ Dios laacaʼ ne ti cuerpu de espíritu. Peru cadi zabanisícabe sin gáticabe, sínuque gastiʼ zanda guuti laacabe. Textu ca na laaca zacaacabe «ti cuerpu ni qué ziuʼdxuʼ». Ximodo yaʼ. Purtiʼ zápacabe ti cuerpu ni qué zanda guinitilú ne zándaca maʼ qué zaquiiñeʼ gudii tuuxa stipa laacabe para guibánicabe. Apocalipsis 4:4 caníʼ zúbacabe lu trono ne nuu corona de oro íquecabe, ne nga rusihuinni zácacabe rey. Peru nuuruʼ xcaadxi cosa ni zacaacabe.
7 Apocalipsis 19:7 ne 8 na: «Ma bidxiña dxi ichaganá Dendxu huiini que, ma zuchaahui ni chi chaganáʼ. Nacu lari chaʼhuiʼ, nayá ne ruzaaniʼ. Laa zanda gacu ni purti zeda gaca lari que casi enda nachaʼhui ni biʼni ca xpinni Dios». Jiobá maʼ gulí ca xpinni Cristu ni bibí pur espíritu santu para gueeda gácacaʼ xnovia Xiiñibe. Casi maʼ bidúʼyanu ca, maʼ bidiibe laacaʼ ti cuerpu ni qué zanda gati ne ni qué zanda guinitilú, laaca maʼ gudíxhebe gácacaʼ rey ne gácacaʼ xnovia Dendxuʼ huiiniʼ. Nga rusihuinni nanna Jiobá qué ziuu dxi gucheené ca binni ni bibí ca laabe, cani zinanda «Dendxu huiini que ladu tiica cheʼ».
Jesús nanna dxichi zanda guni mozo ca dxiiñaʼ bisaananebe laa
8. Xi rusihuinni nanna dxichi Jesús zanda guni ca xpinni ni bibí dxiiñaʼ bidiibe laacaʼ.
8 Xi rusihuinni nanna dxichi Jesús zanda guni ca xpinni ni bibí pur espíritu santu dxiiñaʼ ni bidiibe laacaʼ yaʼ. Gueelaʼ ante gátibe gúdxibe ca once apóstol ni bizuubaʼ stiidxabe que sicaríʼ: «Laatu huayuu né tu naa lu irá ni nagana huadideʼ». De raqué gúdxibe laacaʼ: «Zudiee guni mandar tu casi bidii Bixhoze ni naa, ti gue né tu naa ne go né tu naa ruaa mexa ra gune mandar. Ne zaca tu juez sti irá ni za de idubi doce xiiñi Israel» (Luc. 22:28-30). Biaʼsi 144,000 binni ni bibí nga chichuu lu pactu ni biʼniné Jesús ca once apóstol que (Luc. 12:32; Apo. 5:9, 10; 14:1). Guiníʼ íquenu ndiʼ: ñee niná Jesús ñuni mandarné laacabe pa nanna cadi jneza zaquiiñecabe poder ni gudii laacabe la?
9. Xi guiráʼ nga ca cosa nuu lade «irá ni napa» Jesús.
9 Jesucristu laaca maʼ bisaana lu naʼ mozo ni nuu xpiaaniʼ ca «irá ni napa», o ca cosa ni napa Reinu ca lu Guidxilayú riʼ (Mat. 24:47). Caadxi de ca cosa ni bisaanané Jesús laacabe nga guiráʼ ca yoo Betel stiʼ ca testigu stiʼ Jiobá, Yoo ra raca ca guendaridagulisaa roʼ, ca Yoo stiʼ Reinu ni nuu lu guidubi naca Guidxilayú, ne dxiiñaʼ gucuaacabe de gucheechecabe diidxaʼ ne de gusiidicabe binni. Cadi dxandíʼ guirutiʼ niná nusaanané ca cosa risaca stiʼ tuuxa pa nanna qué zapa binni cani la?
10. Xi sti cosa rusihuinni racané Jesús ca xpinni ni bibí.
10 Dxi biasa Jesús de lade gueʼtuʼ ne ante chebe guibáʼ, bihuínnibe nezalú ca discípulo stibe ne gúdxibe laacaʼ: «Ganna ca tu qué ziuu dxi ixele de laatu dede dxi iluxe guidxilayú» (Mat. 28:20). Ñee huayúnibe ni guniʼbe ca la? Lu ca últimu quince iza gudiʼdiʼ ca, maʼ bidale ca neza binni ridagulisaa stiʼ ca testigu stiʼ Jiobá jma de cuarenta por ciento: de setenta mil yanna maʼ nuu jma de ti gayuaa mil. Panda binni ni nacubi guca xpinni Cristu guyuu ndaaniʼ xquidxi Dios yaʼ. Lu ca iza ni maʼ guninu ca guyuunisa biaʼ tapa millón arondaʼ de binni, casi ñaca ñuunisa xhono gayuaa binni ti dxi. Pur modo cadale ca binni ca ndaaniʼ xquidxi Dios rihuinni dxíchica Cristu nga cayacané ca xpinni ni bibí lu ca guendaridagulisaa sticaʼ ne ra cayacanebe laacaʼ para gusiidicaʼ xcaadxi binni.
Nuu xpiaaniʼ mozo ca ne runi ni jneza
11, 12. Ximodo maʼ bisihuinni mozo ca nuu xpiaaniʼ ne runi ni jneza.
11 Jiobá ne Jesús nanna dxíchicaʼ jneza modo runi mozo ca dxiiñaʼ gucuaa, ñee cadi laaca naquiiñeʼ guni crenu zúnibe ni jneza la? Ne maʼ huahuinni zacá huayúnibe ni. Nánnanu zacá ni purtiʼ maʼ napa jma de ti gayuaa treinta iza de cayaca revista Torre stiʼ ni rapa. Ne stobi nga ca guendaridagulisaa ni rápanu guiráʼ semana ne ca guendaridagulisaa roʼ ca racanécani laanu iguidxi fe stinu.
12 Mozo ni nuu xpiaaniʼ ca laaca runi ni jneza. Zacá rihuinni ni ora ribézabe gusiene Jiobá laabe xiixa para gusiidibe ni ne zacá rusihuínnibe qué rudxiibabe laca laabe. Peru ora maʼ bisiene Jiobá laabe xiixa, qué rudiibe lugar tiidiʼ stale tiempu para gusiidibe ni. Guzéʼtenu ti ejemplu. Ca xaíque stiʼ ca religión ni qué rusiidiʼ ni dxandíʼ ca rudiicaʼ lugar guni xpínnicaʼ guendaquéiquiiñeʼ ne guyúbicaʼ puru para laasicaʼ. Peru mozo ca jneza modo riguixhená laanu de ca trampa stiʼ Binidxabaʼ ne riguixhená laanu órapeʼ caquiiñenu ni ne zanda gúnibe ni purtiʼ Jiobá ne Jesucristu caguu ndaayacaʼ laabe. Nga runi zanda guni crenu zacanebe laanu. Yanna, ximodo zanda gusihuínninu runi crenu laabe yaʼ.
Chinándanu ca xpinni Cristu ni bibí casi zinándacaʼ Dendxuʼ huiiniʼ
13. Ximodo na Zacarías zanda gusihuínninu runi crenu zacané mozo ni nuu xpiaaniʼ ne ni runi jneza ca laanu.
13 Libru stiʼ Zacarías cuzeeteʼ bidxiña «chii hombre» ra nuu «ti hombre ni naca judíu» ne gúdxicabe laa: «Zinedu laatu» (biindaʼ Zacarías 8:23). Casi maʼ bidúʼyanu ca, ora guniʼné ca binni riʼ «hombre» que biquiiñecaʼ diidxaʼ «laatu» ne nga rusihuinni zeeda gaca hombre que ti grupu de binni. Ca dxi stinu riʼ «hombre» ca zeeda gaca guiráʼ ca xpinni Cristu ni bibí pur espíritu santu ni nabániruʼ lu Guidxilayú, ne laacabe zeeda gácacabe «Israel stiʼ Dios» (Gál. 6:16, NM). Yanna, «chii hombre de guiráʼ diidxaʼ stiʼ ca guidxi ca» zeeda gácacaʼ guiráʼ binni ni chiguibani ndaaniʼ Guidxilayú riʼ. Ne cásica zinanda cani bibí ca Cristu, zaqueca runi guiráʼ ca binni ni chiguibani lu Guidxilayú riʼ ni. Ne cadi naquiiñeʼ guituí lucaʼ gacanecaʼ «cani ulee chu Dios para laa» (Heb. 3:1). Cadi guiaandaʼ laanu qué nituilú Jesús ora biʼniʼ biʼchiʼ cani bibí pur espíritu santu (Heb. 2:11).
14. Ximodo zanda gacanenu ca biʼchiʼ ne bizaʼnaʼ Cristu.
14 Jesucristu na ora racanenu ca bíʼchibe ne ca bizáʼnabe casi ñaca cayacanenu laabe (biindaʼ Mateo 25:40). Ximodo zanda gacané cani chiguibani lu Guidxilayú riʼ ca biʼchiʼ ne bizaʼnaʼ Cristu yaʼ. Ra gucheechenenu laacabe stiidxaʼ Reinu (Mat. 24:14; Juan 14:12). Ca biʼchiʼ ne ca bizaʼnaʼ Cristu ni nabani yanna riʼ zeʼ dxi jma zixieʼcaʼ, peru xcaadxi dendxuʼ stiʼ Jesús zeʼ dxi jma zidálecaʼ. Ora rucheeche xcaadxi dendxuʼ diidxaʼ la? cayacanécabe ca binni ni bibí pur espíritu santu para gaca xcaadxi binni xpinni Cristu. Ne ora randa la? rácacabe precursor (Mat. 28:19, 20). Laaca racanenu ora rudiʼnu bueltu stinu para ganda gaca dxiiñaʼ riʼ.
15. Ximodo ricaanu cani rudii mozo ni nuu xpiaaniʼ ne xi rúninu ora quíxhebe modo gaca xiixa ndaaniʼ xquidxi Dios.
15 Xi riníʼ ique cada tobi de laanu de ni rudii mozo ni nuu xpiaaniʼ laanu órapeʼ maʼ caquiiñenu casi ca libru, revista ne ca guendaridagulisaa yaʼ. Ñee riéchenu ora ricaanu cani ne nagueendaca rúninu ni na cani lu xquendanabáninu la? Xi rúninu ora quixhe xquidxi Dios gaca xiixa. Pa gúninu ni gabi mozo ca laanu, zusihuínninu caquiiñeʼ Jiobá laacabe para gusiidiʼ laanu ne laaca zusihuínninu jneza modo runi Jiobá ca cosa ca (Sant. 3:17).
16. Xiñee naquiiñeʼ gucaadiáganu ca biʼchiʼ Cristu.
16 Jesús guníʼ: «Runebiaʼya ca dendxu stinneʼ ne rucaa diaga ca naa, ne rizá nanda ca naa» (Juan 10:27). Dxandíʼ, zacá nga runi cani bibí pur espíritu santu ca. Xi naquiiñeʼ guni xcaadxi dendxuʼ ca yaʼ. Naquiiñeʼ gucaadiágacabe Jesús, peru laaca naquiiñeʼ gucaadiágacabe ca bíʼchibe, purtiʼ laacaʼ cayápacaʼ ne cusiidicaʼ xquidxi Dios. Yanna, ximodo nga rucaadiáganu laacabe yaʼ.
17. Ximodo rusihuínninu cucaadiáganu mozo ca.
17 Ca binni ni riníʼ pur mozo ni nuu xpiaaniʼ ne ni runi jneza ca nga Grupu ni Zaniruʼ stiʼ ca testigu stiʼ Jiobá, ne laacaʼ nga ruuyacaʼ guireeche diidxaʼ lu guidubi naca Guidxilayú. Cani nuu lu grupu riʼ nácacaʼ binnigola ni cayuni ni na Dios maʼ xadxí. Ne zanda guininu laacabe nga zanírucabe lu dxiiñaʼ riʼ (Heb. 13:7). Ca hombre riʼ cayúnicaʼ «xhiiña Señor biaʼ [...] ganda tiʼ», purtiʼ lu guidubi naca Guidxilayú nuu jma de gadxe millón de ni rucheeche diidxaʼ ndaaniʼ jma de ti gayuaa mil neza binni ridagulisaa (1 Cor. 15:58). Nga runi, ora rúninu ni riguixhe Grupu ni Zaniruʼ ca cusihuínninu cucaadiáganu mozo ca.
Ca ndaayaʼ ni ricaanu ora rucaadiáganu mozo
18, 19. 1) Xi ndaayaʼ ricaa cani rucaadiaga mozo ni nuu xpiaaniʼ ne ni runi jneza. 2) Xi naquiiñeʼ quixhe íquenu gúninu.
18 Dede dxi gulí Jesús mozo ni nuu xpiaaniʼ ne ni runi jneza ca nabé cayacanecaʼ stale binni guiziidiʼ guni ni jneza (Dan. 12:3). Lade ca binni riʼ zeeda cani chiguibani lu Guidxilayú guinitilú si ca binni qué iquiiñeʼ nuu luni. ¡Ti ndaayaʼ naroʼbaʼ nga guʼyaʼ Dios cayúninu ni jneza!
19 Ca dxi zeeda ca 144,000 binni ni bibí pur espíritu santu o, «Jerusalén cubi, guidxi roʼ sti Dios [ziete] de ibáʼ de ra nuu Dios. Zuchaahui casi ti gunaa ora chi chaganáʼ». Xi ndaayaʼ zacaa cani gucaadiaga mozo riʼ ora gaca ndiʼ yaʼ. Biblia na: «Ma nabeza Dios lade binni. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apo. 21:2-4). Nga runi, cadi Cristu si nga naquiiñeʼ gucaadiáganu, sínuque laaca naquiiñeʼ gucaadiáganu ca bíʼchibe ni bibí pur espíritu santu, purtiʼ cayúnicaʼ ni maʼ bisaanané Dios laacaʼ.
Xi biziidiluʼ
• Xi razón nápanu para guininu nanna dxichi Jiobá zanda guni mozo nuu xpiaaniʼ ne ni runi jneza ca dxiiñaʼ bidiibe laa.
• Xi rusihuinni nanna Jesús zanda gapa mozo ca ni bisaananebe laa.
• Xiñee naquiiñeʼ guni crenu zanda gacané mayordomo ni runi jneza ca laanu.
• Ximodo rusihuínninu runi crenu zacané mozo ca laanu.
[Dibuju/foto ni zeeda lu yaza 25]
Ñee nannuʼ tuu nga cani gulí Jiobá para gueeda gaca xnovia Xiiñiʼ la?
[Dibuju/foto ni zeeda lu yaza 26]
Jesucristu nanna zapa mozo ni nuu xpiaaniʼ ne ni runi jneza ca «irá ni napa»
[Dibuju/foto ni zeeda lu yaza 27]
Racanenu cani bibí pur espíritu santu ora rucheechenu diidxaʼ