Jiobá racané binni ni cadiʼdiʼ lu guendanagana

«Stale guendanagana ridxaagalú binni runi ni jneza, peru Jiobá ribee laabe de laacani.» (SALMO 34:19.)

1, 2. Xi guendanagana bidxaagalú ti xpinni Cristu, ne xiñee zándaca gueeda guni sentirnu casi laabe.

TI BAʼDUDXAAPAʼ láʼ Karinaa, napa jma de gande iza de naca testigu stiʼ Jiobá. Laabe gúcabe precursora regular chupa chonna iza, ne guizáʼ guyuuláʼdxibe dxiiñaʼ que. Neca zaqué, biʼniʼ sentirbe stúbibe ne guyuu ora qué nidxélabe xi ñúnibe. Laabe guniʼbe: «Nisi maʼ cayuunaʼ». Para maʼ cadi guni sentirbe zaqué la? guleebe jma tiempu para gúʼndabe Stiidxaʼ Dios. Laabe guníʼrube: «Neca zaqué, guyuaaruaʼ triste, dede guyuu ora gunabaʼ ñateʼ».

² Ñee huayuu ora guni sentirluʼ zacá dede maʼ qué guidxeʼluʼ xi guʼnuʼ la? Cumu testigu stiʼ Jiobá lii la? nuu stale razón para chuʼluʼ nayecheʼ, purtiʼ pa saluʼ modo na Dios «zaquiiñe [ni lii] lu enda nabani ni nap[uʼ] yanna riʼ ne ni gueeda ruʼ» (1 Timoteo 4:8). Yanna riʼ nuuluʼ ndaaniʼ ti paraísu ra cayuni adorarluʼ Dios. Ñee raʼbuʼ pur nga maʼ qué zápaluʼ guendanagana la? Coʼ xa, purtiʼ Biblia na: «Stale guendanagana ridxaagalú binni runi ni jneza» (Salmo 34:19). Cadi guendaridxagayaa diʼ nga, purtiʼ «naaze dxiichi binidxaba idubi guidxilayú» (1 Juan 5:19). Ne laanu ridúʼyanu dxandíʼ naaze Binidxabaʼ guidxilayú riʼ pur cani rihuinni luni (Efesios 6:12).

Ni runi sentirnu ora rápanu guendanagana

3. Guníʼ chupa chonna ejemplu de caadxi xpinni Dios ni gupa guendanagana ni guizáʼ bininá laacaʼ.

³ Ora maʼ qué guidxélanu xi gúninu, ruluíʼ nga maʼ biluxe guidxilayú para laanu (Proverbios 15:15). Guiníʼ íquenu ni bizaaca Job, ti hombre chaʼhuiʼ. Dxi gudíʼdibe ra nagana guniʼbe: «Hombre ni rale de gunaa, huaxiéʼ dxi ribani ne rixhacalaʼdxiʼ guiráʼ guendanagana ni rapa» (Job 14:1). Maʼ qué ñuudibe nayecheʼ, dede guníʼ íquebe maʼ bisaana Jiobá laabe (Job 29:1-5). Peru cadi Job si nga gupa stale yuubaʼ. Biblia laaca ruzeeteʼ nabé guyuu Ana triste purtiʼ qué ñanda ñapagabe xiiñibe (1 Samuel 1:9-11). Rebeca guníʼ ca diidxaʼ riʼ dxi nuu naná pur modo bibani ca binnilidxi: «Maʼ bixhacalaʼdxeʼ xquendanabaneʼ» (Génesis 27:46). Ne dxi bietenalaʼdxiʼ David guiráʼ ra bichee, guníʼ: «Guidubi dxi nuaa triste» (Salmo 38:6). Ca ejemplu riʼ rusihuinni cani laaca gupa ca hombre ne ca gunaa ni bibani casi na Dios guendanagana ni guizáʼ bininá laacaʼ.

4. Xiñee qué ridxagayaanu ora ridúʼyanu laaca riuu ca xpinni Cristu naná.

⁴ Xi zanda guininu de ca xpinni Cristu yaʼ. Apóstol Pablu gúdxibe ca binni de Tesalónica quixhedxicaʼ ladxidóʼ ca binni ni nuu naná (1 Tesalonicenses 5:14). Diidxaʼ griegu ni biquiiñeʼ apóstol Pablu ora bizeeteʼ de «binni ni nuu naná» lu textu riʼ la? zándaca caniʼni «de binni ni maʼ qué guidxela xi guni pur modo nabani», casi na ti libru ni cusiene diidxaʼ ca. Ca diidxaʼ ni guníʼ Pablu culuíʼ cani laaca nabé naná guyuu chupa chonna de ca binni ni bibí pur espíritu santu, cani guyuu lade ca binni ridagulisaa de Tesalónica. Ca dxi stinu riʼ laaca nuu xpinni Cristu ni nabé naná nuu. Xiñee nuucabe zacá yaʼ. Guidúʼyanu chonna cosa ni nabé rucaa binni chuʼ zacá.

Zándaca chuʼnu naná purtiʼ rucheʼnu

5, 6. Ximodo riguixhedxí ca diidxaʼ ni zeeda lu Romanos 7:22-25 ladxidoʼno.

⁵ Binni qué iquiiñeʼ la? qué riuubaʼ laa guni «intiica ni na ique», peru cani dxandíʼ xpinni Cristu riuubaʼ ladxidoʼcaʼ gánnacaʼ binni ruchee laacaʼ (Efesios 4:19). Zándaca guni sentírcabe cásica biʼniʼ sentir Pablu ora guníʼ: «Lu xquenda biaane rieche nia ley sti Dios, peru ruuya ma adxé ley nuu luguiaʼyaʼ ne nuu dinde né ni ley ni maca cá lu xquenda biaaneʼ, ne laani nga rucaa ni naa yaga lu ná pecadu ni runi mandar naa». Ne guníʼrube: «Pobre de naa. Nanna xi gueda iree xaʼyaʼ» (Romanos 7:22-24).

⁶ Ñee huayuu tiru guni sentirluʼ casi biʼniʼ sentir Pablu la? Cadi malu diʼ nga guietenaláʼdxinu binni ruchee laanu, purtiʼ rucaani laanu guiníʼ íquenu malu nga gucheʼnu, ne racaneni laanu guzuhuaʼnu jma dxiichiʼ ti cadi guiábanu lu guendaquéiquiiñeʼ. Peru cadi galán diʼ chuʼnu triste biaʼ dxi guibáninu purtiʼ rucheʼnu. Pablu bizeeteʼ xcaadxi diidxaʼ riʼ guníʼsibe guiráʼ ni runiná laabe: «Rudiee [xquíxepeʼ] Dios purti Jesucristu zabee naa de laani. Laabe nga Señor stinu» (Romanos 7:25). Dxandíʼ, Pablu biʼniʼ cré zanda guixá donda ni gulenebe pur rini ni bixhii Jesús para guilá binni (Romanos 5:18).

7. Xi zanda gacané ti binni ni raca nagana para laa guni guiráʼ ni na Dios.

⁷ Pa riuuluʼ triste purtiʼ nannuʼ binni ruchee lii la? zanda gacané ca diidxaʼ ni guníʼ apóstol Juan riʼ lii: «Pa chuʼ tu uchee la? napa nu tu caníʼ né Dios pur laanu, Jesucristu ni qué ñuu dxi nuchee. Laabe gudixe be saca bixá stonda nu, ne cadi sti si nu, sínuque ne sti irá xixé binni guidxilayú» (1 Juan 2:1, 2). Ora chuʼluʼ triste purtiʼ raca nagana para lii guʼnuʼ guiráʼ ni na Dios la? bietenalaʼdxiʼ guti Jesús pur cani ruchee, ne cadi pur cani qué ruchee. Cadi guiaandaʼ lii «irá xixé nu [ru]chéʼ nu» ne qué zanda diʼ gusihuínninu guiráʼ ca guenda stiʼ Dios (Romanos 3:23).

8, 9. Xiñee cadi galán diʼ ugáʼninu donda laca laanu.

⁸ Peru guiníʼ íquenu de tuuxa ni biʼniʼ xiixa guizáʼ malu dxiqué. Maʼ guníʼnebe Jiobá de laani, ne zándaca maʼ bíʼnibe ni stale biaje. Laaca maʼ gucané ca binnigola ni zinanda Cristu laabe ne Stiidxaʼ Dios (Santiago 5:14, 15). Cumu guca arrepentirbe la? biaanarube lade ca binni ridagulisaa. O guiníʼ íquenu bixélebe de xquidxi Dios xadxí, de racá guca arrepentirbe ne yanna maʼ nuube galán nezalú Dios sti biaje. Pa bizaacabe tobi de cani guninu ca, zándaca ora guietenaláʼdxibe ni guninani laabe. Yanna, pa zacá nuuluʼ la? riquiiñeʼ guietenaláʼdxiluʼ nabé rutiidilaʼdxiʼ Jiobá donda stiʼ binni ni dxandíʼ raca arrepentir (Isaías 55:7). Ne Jiobá qué riuulaʼdxiʼ diʼ guiníʼ íqueluʼ maʼ qué ziuuruʼ dxi chuʼluʼ galán ne laabe. Binidxabaʼ nga racalaʼdxiʼ guni sentirluʼ zacá (2 Corintios 2:7, 10, 11). Binidxabaʼ zanitilú purtiʼ nga nga caquiiñeʼ gácabe, ne laabe ñuuláʼdxibe niníʼ íqueluʼ laaca zanitiluluʼ casi laabe (Apocalipsis 20:10). Cadi gudiiluʼ lugar gusirá Binidxabaʼ fe stiluʼ (Efesios 6:11). Jma galán gucaaluluʼ laabe ti cadi guiníʼ íqueluʼ zacá, cásica rucaaluluʼ laabe lu xcaadxi cosa (1 Pedro 5:9).

⁹ Lu Apocalipsis 12:10 na Binidxabaʼ nga ni riguu «xqueja ca hermanu stinu», cani bibí pur espíritu santu. Laabe riguube «xqueja ca nezalú [Dios] ridxí ne huaxhinni». Pa guiníʼ íqueluʼ ni na textu riʼ zudiiluʼ cuenta guizáʼ ñecheʼ Binidxabaʼ nugaaniluʼ donda laca lii, ne niníʼ íqueluʼ maʼ qué ziuulaʼdxiʼ Dios ni cayuʼnuʼ, peru Jiobá qué liica riníʼ ique zacá de lii (1 Juan 3:19-22). Xi para guninaluʼ laca lii pur guietenaláʼdxiluʼ ra bicheeluʼ ne dede guiníʼ íqueluʼ maʼ qué zanda guʼnuʼ gastiʼ. Cadi gudiiluʼ lugar guxheleʼ Binidxabaʼ lii de Dios. Qué chuʼ dxi guchebe luluʼ, ne guni nga maʼ cadi gúʼyaluʼ Jiobá casi ti «ti Dios ni rilaselaʼdxiʼ ne nachaʼhuiʼ, rindaa para guidxiichi ne napa stálepeʼ guendarannaxhii ni qué rusaana» (Éxodo 34:6).

Zándaca guireʼnu gana ora qué gúninu biaʼ racaláʼdxinu

10. Xi zándaca cuee gana laanu para cadi gúninu biaʼ racaláʼdxinu.

¹⁰ Nuu caadxi xpinni Cristu rireecaʼ gana ora qué randa rúnicaʼ biaʼ racaláʼdxicaʼ lu xhiiñaʼ Dios pur modo nuucaʼ. Ñee zacá nuuluʼ la? Zándaca pur xiixa guendahuará, o pur maʼ huaniisiluʼ o pur xcaadxi cosa maʼ qué ganda gucheecheluʼ diidxaʼ cásica dxiqué. Dxandíʼ nga cayabi Stiidxaʼ Dios laanu cueenu tiempu ne iquiiñenu ni para gúninu jma lu xhiiñaʼ Dios (Efesios 5:15, 16). Peru xi guʼnuʼ pa pur modo nuuluʼ maʼ qué ganda gucheecheluʼ diidxaʼ biaʼ racaláʼdxiluʼ, ne pur nga nuuluʼ triste yaʼ.

11. Ximodo racané conseju ni cudii Pablu laanu lu Gálatas 6:4.

¹¹ Biblia cayabi laanu cadi gácanu binni nachaabaʼ, sínuque chinándanu ejemplu stiʼ ca binni ni napa fe ne cabézacaʼ gaca ni maʼ guníʼ Dios sin guireecaʼ gana (Hebreos 6:12). Ndiʼ zanda gúninu ni pa guibáninu casi bibánicabe ne gápanu fe biaʼ gúpacabe. Peru, cadi galán diʼ guchaaganu ni rúninu ne ni runi xcaadxi ne guininu qué risaca ni cayúninu purtiʼ para Dios caquiiñeʼ gúninu jma. Jma galán chinándanu conseju ni bidii Pablu: «Cada tobi guʼya chaahui ni cayuni, ne pa nanna jneza ni cayuni la? zieche né ni, ne qué zazaalaʼdxi ni cayuni stobi» (Gálatas 6:4).

12. Xiñee nápanu razón para chuʼnu nayecheʼ pur modo cayúninu xhiiñaʼ Jiobá.

¹² Guiráʼ ca xpinni Cristu nápacaʼ razón para chuʼcaʼ nayecheʼ, dede ne ora maʼ qué randa rúnicaʼ ni na Dios biaʼ racaláʼdxicaʼ pur xiixa guendahuará malu. Biblia cayabi laanu: «Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa. Huayacané tu laaca ne cayacané ru tu laaca dede yanna» (Hebreos 6:10). Pa gueeda guizaacaluʼ xiixa ni cadi cabezuʼ ne pur laani maʼ qué ganda guʼnuʼ xhiiñaʼ Jiobá casi dxiqué la? Jiobá zanda gacané lii para gucheecheluʼ diidxaʼ xcaadxi modo, casi pur teléfono o pur carta. Gunna dxichi zaguu ndaayaʼ Jiobá Dios lii purtiʼ cayuʼnuʼ ni nabe de guidubi xhiálmaluʼ, nadxiiluʼ laabe ne nadxiiluʼ binni (Mateo 22:36-40).

Riuʼnu triste pur ca dxi nagana riʼ

13, 14. 1) Ximodo runiná ca dxi nagana riʼ laanu. 2) Ximodo rihuinni maʼ gastiʼ guendarannaxhii yanna riʼ.

¹³ Dxandipeʼ nga cabézanu guedandá guidxilayú cubi stiʼ Dios ra zaca puru si ni jneza, peru yanna riʼ nabáninu lu ca dxi jma nagana (2 Timoteo 3:1). Ca cosa malu nuu yanna riʼ cusihuinni cani mayaca guilanu, ne nga riguixhedxí ladxidoʼno; neca zacá runinaruʼ cani laanu. Casi yanna riʼ huaxiéʼ dxiiñaʼ nuu. Ñee laaca qué gapuʼ dxiiñaʼ la? Zándaca yanna qué guidxeʼluʼ dxiiñaʼ, ne ra tiidiʼ beeu de nuuluʼ zacá maʼ gucaa ni lii guinabadiidxaluʼ pa cayuuyaʼ Jiobá modo nuuluʼ o pa rucaadiágabe ca oración stiluʼ. O zándaca qué gudiicabe dxiiñaʼ lii purtiʼ si riniʼluʼ sti diidxaʼ o de sti raza lii o gúnicabe lii xiixa ni qué riuulaʼdxuʼ. O pacaa ora gúʼyaluʼ periódicu guni sentirluʼ casi Lot, hombre ni biʼniʼ ni jneza ni bibani dxiqué, laabe guizáʼ guyuube triste pur modo bibani ca xpesínube (2 Pedro 2:7).

¹⁴ Lu ca últimu dxi riʼ laaca nuu sti cosa ni cahuinni guiráʼ ladu, Biblia maca bizeeteʼ de laani ora guníʼ: «Ziuu tu qué zanaxhii binni» (2 Timoteo 3:3). Ndaaniʼ stale familia maʼ gastiʼ guendarannaxhii. Sicaríʼ na ti libru ni láʼ Family Violence (Guendaridinde ndaaniʼ familia), «pur cani huayaca la? rihuinni jma nga nagueenda guuti ti binni tuuxa de ca binnilidxi, guniná laacabe, guni menu laacabe, guilaxoo laacabe que guni sti binni ni qué runibiáʼ laacabe ca cosa malu riʼ. [ . . . ] Para caadxi binni huaniisi ne nahuiiniʼ la? ra naquiiñeʼ ñannaxhiicabe ne ñápacabe laacaʼ, racapeʼ nga jma runinácabe laacaʼ». Ca binni ni bibani zacá ndaaniʼ lidxi zándaca ora maʼ guiniisicaʼ guidxibi stúbicaʼ ne chuʼcaʼ triste. Ñee zacá nuuluʼ la?

15. Ximodo nga jma rannaxhii Jiobá que tutiica binni.

¹⁵ David biindaʼ salmo riʼ sicaríʼ: «Pa bixhozeʼ piaʼ ne jñaa piaʼ gusaana naa la? Jiobá peʼ zacaa naa» (Salmo 27:10). ¡Guizáʼ ratadxí ladxidoʼno ora gánnanu jma nadxii Jiobá laanu que biaʼ nadxii ti binni laanu! Ziuubaʼ ladxidoʼno pa bixhózenu o jñaanu guiladxi, guniná o gusaana laanu, peru Jiobá qué zusaana de gannaxhii laanu (Romanos 8:38, 39). Guietenaláʼdxinu Dios riuulaʼdxiʼ guidxiña ca binni ni nadxiibe ra nuube (Juan 3:16; 6:44). ¡Nabé galán runi sentirnu ora gánnanu nadxii Jiobá laanu neca chuʼ binni runiná laanu!

Xi naquiiñeʼ gúninu para cadi chuʼnu triste

16, 17. Xi naquiiñeʼ guni ti binni ni nuu triste para guzuhuaa dxichi lu Stiidxa Dios.

¹⁶ Nuu chupa chonna cosa ni zanda gúniluʼ para cadi chuʼluʼ triste. Zanda quixhe íqueluʼ modo gúniluʼ xhiiñaʼ Jiobá ne cueeluʼ tiempu para guiníʼ íqueluʼ de ni gúʼndaluʼ lu Stiidxabe, ne jma naquiiñeʼ gúniluʼ cani ora maʼ nuuluʼ triste. Hombre bicaa salmo riʼ biindaʼ: «Ora guniéʼ: “Maʼ qué gapa stipa ñee para guzuhuaa dxiichiʼ”, guendanachaʼhuiʼ stiluʼ, Jiobá, bidiini stipa naa. Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa» (Salmo 94:18, 19). Pa guidúʼndanu Biblia gatigá la? zaníʼ íquenu puru si diidxaʼ galán ni quixhedxí ladxidoʼno ne ni cuʼ gana laanu.

¹⁷ Sti cosa ni zacané laanu nga guni orarnu Dios. Pa qué ganda guiniʼluʼ ni nuu ndaaniʼ ladxidoʼloʼ, Jiobá maʼ nanna xi racaláʼdxiluʼ gábiluʼ laa (Romanos 8:26, 27). Ni bicaa salmo riʼ na zacá ni ora guníʼ: «Bilaa guiráʼ ni nualuʼ luguiáʼ Jiobá, ne laapebe zacanebe lii. Qué ziuu dxi gudiibe lugar guitende ñee cani runi ni jneza» (Salmo 55:22).

18. Xi zanda guni ti binni ni nuu triste.

¹⁸ Nuu tiru maʼ qué ridxela binni xi guni ne riuu triste pur guendahuará ni láʼ depresión clínica.b Pa zacá nuuluʼ la? galán cueeluʼ tiempu para guiníʼ íqueluʼ de guidxilayú cubi stiʼ Dios ne dxi «maʼ guirutiʼ zaníʼ: “Huaraʼyaʼ”» (Isaías 33:24). Pa nuuluʼ triste ne guʼyuʼ qué ganda tiidiʼ ni la? jma galán guyúbiluʼ tuuxa gacané lii, casi ti doctor ni nanna de guendahuará ca (Mateo 9:12). Laaca nabé risaca nga chuʼnu nazaaca. Laaca galán chuʼluʼ cuidadu ni goloʼ ne biʼniʼ ejerciciu. Biziilaʼdxiʼ biaʼ gándatiʼ. Cadi guixhínniluʼ xaʼnaʼ tele, ne ora chichíteluʼ o chizaluʼ la? cadi guidxágaluʼ stale ne gusidxágaluʼ xquendabiaaniluʼ. Ni jma galán nga guʼnuʼ ca cosa ni riuulaʼdxiʼ Dios. Nécapeʼ caʼruʼ guidxiña dxi guchaa Jiobá nisa rieeteʼ lú binni, laabe zacanebe lii guni huantarluʼ (Apocalipsis 21:4; 1 Corintios 10:13).

Nuunu ndaaniʼ naʼ Dios ni nandxóʼ

19. Xi cayabi Jiobá ca binni ni cadiʼdiʼ lu guendanagana.

¹⁹ Nécapeʼ stale guendanagana ridxaagalú binni runi ni jneza la? Biblia cayabi laanu: «Jiobá ribee laabe de laacani» (Salmo 34:19). Ximodo runi Dios ndiʼ yaʼ. Dxi gunabaʼ apóstol Pablu Jiobá cuee ti yuubaʼ ni gúpabe ni beeda gaca para laabe casi ra daabi ti guichi la? Jiobá bicabi laabe: «Jma rihuinni enda nandxóʼ stinne ora cayaadxa stipa lii» (1 Corintios 12:7-9). Xi gudxi Jiobá apóstol Pablu ne xi cayábibe lii yaʼ. Jiobá qué zusianda diʼ lii nagueendaca, sínuque zudiibe stipa lii para guni huantarluʼ.

20. Ximodo racané ca diidxaʼ ni cá lu 1 Pedro 5:6, 7 laanu ora gápanu intiica guendananá.

²⁰ Apóstol Pedru bicaabe sicaríʼ: «Laganna gasti nga laatu nezalú Dios ni nandxóʼ, ti udxiiba be laatu dxi naguixhe be guni be ni» (1 Pedru 5:6, 7). Jiobá rizaalaʼdxiʼ lii. Laabe qué zusaanabe lii, sínuque zacanebe lii guni huantarluʼ intiica guendanagana gápaluʼ. Bietenalaʼdxiʼ, ca xpinni Cristu la? nuucaʼ ndaaniʼ naʼ Dios ni nandxóʼ. Pa gúninu ni nabe, zudiibe stipa laanu para guni huantarnu. Pa guzúʼbanu stiidxabe la? qué ziuu xiixa guxheleʼ laanu de laabe. Nga runi, cadi gucheʼnu nezalú Jiobá; purtiʼ zacá zabáninu ndaaniʼ guidxilayú cubi stiʼ Dios sin qué chuʼ dxi gátinu. Laaca zadúʼyanu dxi maʼ cuee Jiobá guiráʼ yuubaʼ stiʼ binni ne maʼ qué liica zabiguétaruʼ cani.

[Cani cá ñee yaza]

Rietenalaʼdxuʼ la?

• Xiñee dede ne ca xpinni Jiobá cayacaná.

• Xi zándaca cuee gana ca xpinni Dios.

• Ximodo racané Jiobá laanu para ganda guni huantarnu ca guendanagana ni ridxaagalunu.

• Ximodo ndiʼ nuunu ndaaniʼ naʼ Dios ni nandxóʼ.